ട്രംപിന്റെ എച്ച്-1ബി നിയമമാറ്റങ്ങൾ; ഇന്ത്യൻ വംശജർക്കെതിരെ വിദ്വേഷം വർധിക്കുന്നതായി റിപ്പോർ‍ട്ട്

വാഷിങ്ടൺ: ട്രംപ് ഭരണകൂടത്തിന്റെ എച്ച്-1ബി വിസ പരിഷ്കാരങ്ങൾക്ക് ശേഷം യുഎസിൽ ഇന്ത്യൻ തൊഴിലാളികളോടും ഇന്ത്യൻ വംശജരായ സംരംഭകരോടുമുള്ള ശത്രുതാമനോഭാവം വർധിച്ചതായി റിപ്പോർട്ട്. സെപ്തംബറിൽ പ്രഖ്യാപിച്ച നയമാറ്റങ്ങൾക്ക് പിന്നാലെയാണ് ഈ പ്രവണത രൂക്ഷമായത്. പുതിയ നിയമങ്ങൾ പ്രകാരം പുതിയ എച്ച്-1ബി അപേക്ഷകൾക്ക് 1 ലക്ഷം ഡോളർ അധിക ഫീസ് നൽകണം. കൂടാതെ, ലോട്ടറി സംവിധാനത്തിന് പകരം വേതന അടിസ്ഥാനത്തിലുള്ള തിരഞ്ഞെടുപ്പ് (wage-weighted selection) നടപ്പാക്കി, ഉയർന്ന ശമ്പളമുള്ള തസ്തികകൾക്ക് മുൻഗണന നൽകുന്നു.

ഫെബ്രുവരി 27 മുതൽ ഈ മാറ്റങ്ങൾ പൂർണമായി പ്രാബല്യത്തിൽ വരും. ഇത് സാമ്പത്തിക വർഷം 2027-നുള്ള അപേക്ഷകൾക്ക് ബാധകമാകും. യുഎസ് തൊഴിലാളികളുടെ തൊഴിൽ സുരക്ഷ ഉറപ്പാക്കാനാണ് ഈ നടപടികളെന്നാണ് ഭരണകൂടം വാദിക്കുന്നത്. എച്ച്-1ബി വിസയിൽ ഇന്ത്യക്കാർ 71 ശതമാനം വരുമ്പോൾ ഈ മാറ്റങ്ങൾ ഇന്ത്യൻ പ്രൊഫഷണലുകളെ ഏറെ ബാധിക്കുമെന്നാണ് വിലയിരുത്തൽ.

ക്രിസ്മസിന് മുന്നോടിയായി ഒരു ഫെഡെക്സ് ട്രക്കിന്റെ അപകട ദൃശ്യങ്ങൾ സോഷ്യൽ മീഡിയയിൽ വൈറലായതോടെ കമ്പനിയുടെ ഇന്ത്യൻ വംശജനായ സിഇഒ രാജ് സുബ്രഹ്മണ്യത്തിനെതിരെ രൂക്ഷ വിമർശനങ്ങൾ ഉയർന്നിരുന്നു. "ഇന്ത്യക്കാർ നമ്മുടെ മഹത്തായ അമേരിക്കൻ കമ്പനികളെ ഏറ്റെടുക്കുന്നത് നിർത്തണം" തുടങ്ങിയ വിദ്വേഷ പോസ്റ്റുകളാണ് സംഭവത്തിന് ശേഷം പ്രചരിച്ചത്. ഗാബ് സ്ഥാപകൻ ആൻഡ്രൂ ടോർബ ഉൾപ്പെടെയുള്ള വലതുപക്ഷ നിരീക്ഷകർ, അമേരിക്കൻ ജീവനക്കാരെ പിരിച്ചുവിട്ട് ഇന്ത്യൻ തൊഴിലാളികളെ നിയമിക്കുന്നുവെന്നും ആരോപിച്ചിരുന്നു.

ഫെഡെക്സ്, വാൾമാർട്ട്, വെരിസോൺ തുടങ്ങിയ പ്രമുഖ കമ്പനികൾ ഓൺലൈൻ ആക്രമണങ്ങൾക്കും ബഹിഷ്കരണ ആഹ്വാനങ്ങൾക്കും ഇരയായി. ഇന്ത്യൻ തൊഴിലാളികൾക്ക് ജോലികൾ "വിൽക്കുന്നു" എന്ന ആരോപണവുമായി അജ്ഞാത അക്കൗണ്ടുകൾ ജീവനക്കാരുടെ വിവരങ്ങൾ പുറത്തുവിട്ടു. ഈ ആക്രമണങ്ങൾ സംഘടിതമാണെന്ന് സെന്റർ ഫോർ ദ സ്റ്റഡി ഓഫ് ഓർഗനൈസ്ഡ് ഹേറ്റിന്റെ എക്സിക്യൂട്ടിവ് ഡയറക്ടർ റാഖിബ് നായിക് (Raqib Naik) പറഞ്ഞു. ഇന്ത്യക്കാരെ "തൊഴിൽ മോഷ്ടാക്കളും" വിസ തട്ടിപ്പുകാരുമായി ചിത്രീകരിക്കുന്ന വിവേചനം രൂക്ഷമാണ്.

സ്റ്റോപ്പ് എഎപിഐ ഹേറ്റും മൂൺഷോട്ടും ചേർന്ന വിശകലനത്തിൽ, നവംബറിൽ ദക്ഷിണേഷ്യൻ സമൂഹങ്ങൾക്കെതിരായ അക്രമ ഭീഷണികൾ 12 ശതമാനവും ഓൺലൈൻ സൈബർ ആക്രമണങ്ങൾ 69 ശതമാനവും വർധിച്ചതായി കണ്ടെത്തി. യുഎസ് കമ്പനികൾ സോഫ്റ്റ്‌വെയർ ഡെവലപ്പർമാർ, എഞ്ചിനീയർമാർ, ഡോക്ടർമാർ തുടങ്ങിയവരെ ഇന്ത്യയിൽ നിന്ന് നിയമിക്കുന്നത് തൊഴിലവസരങ്ങളുടെ അഭാവം നികത്താനാണെങ്കിലും, ഇത് ശത്രുത വർധിപ്പിക്കുന്നുവെന്നാണ് വിലയിരുത്തൽ. ഇന്ത്യൻ പ്രൊഫഷണലുകളുടെ സംഭാവനകൾ അംഗീകരിക്കപ്പെടുമ്പോഴും, ഈ പരിഷ്കാരങ്ങൾക്ക് പിന്നാലെ ഉയർന്നുവരുന്ന വിവേചനം ഗൗരവമുള്ളതാണെന്ന് വിദഗ്ധർ മുന്നറിയിപ്പ് നൽകുന്നു.

English Summary: Trump administration’s H-1B visa reforms, including higher fees and wage-based selection, have sparked increased hostility against Indian professionals in the U.S., with reports of online attacks and discrimination.