എന്നെ പേടിച്ച് ആരും വരില്ല! ഞാൻ ഓടിച്ചു വിടും

സത്യം പറഞ്ഞാൽ ആ അഭിമുഖം ഞാൻ ധന്യയോട് അങ്ങോട്ട് ആവശ്യപ്പെട്ടതാണ്. എനിക്ക് പറയാൻ ഒരുപാട് വർഷത്തെ കഥകളുണ്ടായിരുന്നു. എല്ലാം തുറന്ന് പറഞ്ഞതിന് ശേഷമാണ് ഞാൻ സ്വതന്ത്രയായത്. കാരണം അതുവരെ ഞാൻ ഒരുപാട് നുണകൾ പറഞ്ഞാണ് മറ്റുള്ളവരുടെ മുന്നിൽ പിടിച്ചു നിന്നത്. എന്റെ കഴുത്തിൽ ഓപ്പറേഷൻ ചെയ്ത പാടുകൾ ഉണ്ടായി. അത് മറച്ചു പിടിച്ചാണ് ഇത്ര കാലം ഞാൻ നടന്നത്. എന്നാൽ ഇപ്പോൾ അതിന്റെ ആവശ്യമില്ല എന്നതിൽ എനിക്ക് അഭിമാനമുണ്ട്. മാത്രമല്ല, എന്റെ അഭിമുഖം കാൻസറിനെ പൊരുതുന്ന പലർക്കും കരുത്ത് നൽകി എന്നറിഞ്ഞതിലും ഒരുപാട് സന്തോഷം.

പലരും എന്റെ ധൈര്യത്തെ പ്രശംസിച്ചിരുന്നു. വിവാഹമോചനത്തിലൂടെ കടന്നു പോകുന്ന ചില സ്ത്രീകൾ എന്നോട് സംസാരിക്കാൻ താൽപര്യം പ്രകടിപ്പിക്കുകയും ചെയ്തു. പക്ഷെ ഞാൻ അവരോട് സംസാരിക്കാൻ തയ്യാറായില്ല. ആളുകൾ അവരുടെ പ്രശ്നങ്ങളെ നേരിടുന്നതിൽ വരുത്തുന്ന എറ്റവും വലിയ വീഴ്ച്ചയാണ് അത് മറ്റുള്ളവരോട് പറഞ്ഞ് ആശ്വാസം കണ്ടെത്തുന്നത്. ഞാൻ വിവാഹമോചനം നേടിയെങ്കിലും, അത് എന്നെ അതിന്റെ 'മാസ്റ്റർ' ആക്കുന്നില്ല. അതുകൊണ്ട് തന്നെ ഞാൻ മറ്റുള്ളവരെ ഈ വിഷയത്തിൽ ഉപദേശിക്കാറുമില്ല. നമ്മുക്ക് തീരുമാനം എടുക്കേണ്ട ഇടങ്ങളിൽ മറ്റുള്ളവരുടെ അഭിപ്രായങ്ങൾ കുത്തിനിറയ്ക്കുന്നത് ആരോഗ്യപരമായ പ്രവണതയല്ല.

എന്റെയടുത്ത് ആരും ഉപദേശവുമായി വരാറില്ല. ഞാൻ തിരിച്ച് എന്തെങ്കിലും പറയും എന്ന് ഒന്ന് രണ്ടു അനുഭവങ്ങളിൽ നിന്നും അവർ തന്നെ പഠിക്കും. കാരണം ഞാൻ നന്നാവണം എന്നതല്ല, മറിച്ച്, എന്നെ തകർക്കുക എന്നത് മാത്രമാണ് ഇത്തരക്കാരുടെ ഉദ്ദേശം. അതുകൊണ്ട് തന്നെ ഞാൻ അത് ശ്രദ്ധിക്കാറില്ല. എന്നെ വേദനിപ്പിക്കാൻ ശ്രമിച്ചാൽ, 'അയ്ന്' എന്ന് തിരിച്ച് ചോദിച്ച് ഞാൻ അവരെ തകർക്കും. മനുഷ്യരെ തകർക്കാൻ വളരെ എളുപ്പമാണ്. അതിന് നൂറ് വഴികളുമുണ്ട്. എന്നെ ദ്രോഹിക്കാനും അപമാനിക്കാനും വരുന്ന മനുഷ്യർക്ക് ഞാൻ എന്റെ നോട്ടം പോലും കൊടുക്കാറില്ല. കാരണം എന്റെ യാഥാർത്ഥ്യത്തിൽ അവരില്ല.