ഇന്ത്യൻ ഇലക്ട്രിക് എസ്‌യുവി വിപണിയിൽ പോരാട്ടം കടുക്കും; 2027ല്‍ പുതിയ മോഡലുകളുമായി ഹ്യുണ്ടായിയും ടാറ്റയും

ഹ്യുണ്ടായി അയോണിക് പി, പുതുതലമുറ ടാറ്റ നെക്സോൺ ഇവി എന്നീ മോഡലുകൾ വിപണിയിലെത്തുന്നതോടെ താങ്ങാനാകുന്ന വിലയിലുള്ള ഇലക്ട്രിക് എസ്‌യുവികളുടെ നിര കൂടുതൽ വിപുലമാകും
ഇന്ത്യൻ ഇലക്ട്രിക് എസ്‌യുവി വിപണിയിൽ പോരാട്ടം കടുക്കും; 2027ല്‍ പുതിയ മോഡലുകളുമായി ഹ്യുണ്ടായിയും ടാറ്റയും
Published on: 

ഇന്ത്യയിലെ കോംപാക്ട് എസ്‌യുവി വിപണിയിൽ മത്സരം പുതിയ തലത്തിലേക്ക്. പെട്രോൾ, ഡീസൽ വാഹനങ്ങൾക്ക് പിന്നാലെ ഇലക്ട്രിക് മോഡലുകൾക്കും ആവശ്യക്കാർ വർധിക്കുന്ന സാഹചര്യത്തിൽ ഈ വിഭാഗത്തിൽ കൂടുതൽ സാന്നിധ്യമുറപ്പിക്കാനൊരുങ്ങുകയാണ് പ്രമുഖ വാഹന നിർമാതാക്കൾ. ഹ്യുണ്ടായിയും ടാറ്റ മോട്ടോഴ്‌സും അവതരിപ്പിക്കാനിരിക്കുന്ന പുതിയ ഇലക്ട്രിക് എസ്‌യുവികൾ ഇതിന് തെളിവാണ്. ഹ്യുണ്ടായി അയോണിക് പി, പുതുതലമുറ ടാറ്റ നെക്സോൺ ഇവി എന്നീ മോഡലുകൾ വിപണിയിലെത്തുന്നതോടെ താങ്ങാനാകുന്ന വിലയിലുള്ള ഇലക്ട്രിക് എസ്‌യുവികളുടെ നിര കൂടുതൽ വിപുലമാകും.

നിലവിൽ ടാറ്റ പഞ്ച്, നെക്സോൺ, മാരുതി ബ്രെസ, ഫ്രോങ്ക്സ്, ഹ്യുണ്ടായി വെന്യു, എക്സ്റ്റർ, കിയ സോണറ്റ് തുടങ്ങിയ മോഡലുകളാണ് നാല് മീറ്ററിൽ താഴെയുള്ള എസ്‌യുവി വിഭാഗത്തിൽ ആധിപത്യം പുലർത്തുന്നത്. ഡിസൈൻ, ഫീച്ചറുകൾ, എൻജിൻ വൈവിധ്യം, വില എന്നിവയ്ക്ക് പ്രാധാന്യം നൽകുന്ന ഈ വിപണിയിലേക്ക് ഇലക്ട്രിക് വാഹനങ്ങളുടെ കടന്നുവരവ് മത്സരത്തിന്റെ സ്വഭാവം തന്നെ മാറ്റുകയാണ്.

ഹ്യുണ്ടായി അയോണിക് പി; വിപണിയിലെത്തുക 2027 മാർച്ചിനകം

ഇന്ത്യൻ ഉപഭോക്താക്കളെ ലക്ഷ്യമിട്ട് ഹ്യുണ്ടായി വികസിപ്പിക്കുന്ന പുതിയ കോംപാക്ട് ഇലക്ട്രിക് എസ്‌യുവിയാണ് അയോണിക് പി. നിലവിൽ എച്ച്‌ഇ1ഐ എന്ന കോഡ് നാമത്തിലാണ് വാഹനത്തിന്റെ വികസനം പുരോഗമിക്കുന്നത്. ഉൽപ്പാദനത്തിന് തയ്യാറാകുന്ന പതിപ്പ് അയോണിക് പി എന്ന പേരിൽ വിപണിയിലെത്തുമെന്നാണ് സൂചന. കമ്പനിയുടെ ഇലക്ട്രിക് വാഹന നിരയിൽ ക്രെറ്റ ഇലക്ട്രിക്കിന് താഴെയായിരിക്കും പുതിയ മോഡലിന്റെ സ്ഥാനം.

2027 മാർച്ചിനകം വാഹനം അവതരിപ്പിക്കുമെന്ന് ഹ്യുണ്ടായി നേരത്തെ വ്യക്തമാക്കിയിട്ടുണ്ട്. വിപണിയിലെത്തുന്നതോടെ കിയ സൈറോസ് ഇവി, ടാറ്റ നെക്സോൺ ഇവി, മഹീന്ദ്ര എക്സ്‌യുവി 3എക്സ്ഒ ഇവി തുടങ്ങിയ മോഡലുകൾക്ക് അയോണിക് പി വെല്ലുവിളിയാകും.

രണ്ട് റേഞ്ച് പതിപ്പുകൾ പ്രതീക്ഷിക്കാം

ഹ്യുണ്ടായിയുടെ ഇ-ജിഎംപി (കെ) എന്ന പ്രത്യേക ഇലക്ട്രിക് വാഹന പ്ലാറ്റ്‌ഫോമിലായിരിക്കും അയോണിക് പി നിർമിക്കുക. സ്റ്റാൻഡേർഡ് റേഞ്ച്, ലോംഗ് റേഞ്ച് എന്നിങ്ങനെ രണ്ട് വകഭേദങ്ങളിൽ വാഹനം ലഭ്യമാക്കാനാണ് സാധ്യത. എന്നാൽ ബാറ്ററി ശേഷി, മോട്ടോറിന്റെ പവർ, ഒറ്റ ചാർജിൽ സഞ്ചരിക്കാനാകുന്ന ദൂരം തുടങ്ങിയ സാങ്കേതിക വിവരങ്ങൾ കമ്പനി ഇതുവരെ വെളിപ്പെടുത്തിയിട്ടില്ല. ആദ്യഘട്ടത്തിൽ ചൈനീസ് കമ്പനിയായ സ്വോൾട്ടിൽ നിന്നായിരിക്കും വാഹനത്തിനാവശ്യമായ ബാറ്ററി സെല്ലുകൾ ഹ്യുണ്ടായി എത്തിക്കുക. ആഗോള വിപണിയിലെ കമ്പനിയുടെ ഇലക്ട്രിക് മോഡലുകളിൽനിന്ന് പ്രചോദനം ഉൾക്കൊണ്ട രൂപകൽപ്പനയും പുതിയ എസ്‌യുവിയിൽ പ്രതീക്ഷിക്കുന്നുണ്ട്.

ഫീച്ചറുകളുടെ കാര്യത്തിലും അയോണിക് പി സമ്പന്നമായിരിക്കുമെന്നാണ് സൂചന. വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, ഡിജിറ്റൽ ഇൻസ്ട്രുമെന്റ് ക്ലസ്റ്റർ, കണക്റ്റഡ് കാർ സംവിധാനങ്ങൾ, ഓട്ടോമാറ്റിക് ക്ലൈമറ്റ് കൺട്രോൾ, വയർലെസ് സ്മാർട്ട്ഫോൺ കണക്റ്റിവിറ്റി, ഒന്നിലധികം യുഎസ്ബി ചാർജിങ് പോർട്ടുകൾ എന്നിവ വാഹനത്തിലുണ്ടാകാം. ലെവൽ 2 എഡിഎഎസ് സുരക്ഷാ സംവിധാനവും പ്രതീക്ഷിക്കുന്നുണ്ട്.

പുതുതലമുറ നെക്സോൺ ഇവിയും 2027-ൽ

ടാറ്റ മോട്ടോഴ്‌സിന്റെ ജനപ്രിയ എസ്‌യുവിയായ നെക്സോണിനും അടുത്ത വർഷം തലമുറമാറ്റം ലഭിക്കുമെന്നാണ് റിപ്പോർട്ടുകൾ. പെട്രോൾ, ഡീസൽ പതിപ്പുകൾക്കൊപ്പം ഇലക്ട്രിക് മോഡലിലും സമഗ്രമായ പരിഷ്‌കരണങ്ങൾ ഉണ്ടാകും. പ്രോജക്ട് ഗാർഡ് എന്ന രഹസ്യനാമത്തിലാണ് പുതിയ നെക്സോണിന്റെ വികസനം നടക്കുന്നത്.

നിലവിലെ പ്ലാറ്റ്‌ഫോമിൽ കാര്യമായ മാറ്റങ്ങൾ വരുത്തിയാകും പുതിയ മോഡൽ നിർമിക്കുക. പരീക്ഷണയോട്ടത്തിനിടെ പകർത്തിയ ചിത്രങ്ങൾ പുറത്തുവന്നതോടെ വാഹനത്തിന്റെ രൂപമാറ്റങ്ങളെക്കുറിച്ചുള്ള സൂചനകളും ലഭിച്ചിട്ടുണ്ട്. നിലവിലെ മോഡലിനെ അപേക്ഷിച്ച് കൂടുതൽ ഉയരവും എസ്‌യുവിക്ക് അനുയോജ്യമായ പരുക്കൻ രൂപഭാവവും പുതിയ വാഹനത്തിനുണ്ടാകും. മുൻവശത്തെ ഡിസൈനിൽ സമഗ്രമായ മാറ്റങ്ങൾ വരുത്തുന്നതിനൊപ്പം വശങ്ങളിലും പിൻഭാഗത്തും പരിഷ്‌കരണങ്ങൾ പ്രതീക്ഷിക്കാം.

ഇന്റീരിയറിലും സാങ്കേതികവിദ്യയിലും മാറ്റങ്ങൾ

പുതിയ നെക്സോണിന്റെ അകത്തളത്തിലാണ് കൂടുതൽ ശ്രദ്ധേയമായ മാറ്റങ്ങൾ പ്രതീക്ഷിക്കുന്നത്. പുറത്തുവന്ന പരീക്ഷണ ചിത്രങ്ങളിൽനിന്ന് പുതിയ ഡാഷ്‌ബോർഡും രണ്ട് വ്യത്യസ്ത ഡിജിറ്റൽ സ്‌ക്രീനുകളും വാഹനത്തിലുണ്ടാകുമെന്ന സൂചന ലഭിക്കുന്നുണ്ട്. ക്യാബിന്റെ രൂപകൽപ്പന കൂടുതൽ ആധുനികമാക്കുന്നതിനൊപ്പം ഉപയോഗിക്കുന്ന മെറ്റീരിയലുകളുടെ നിലവാരവും ഉയർത്തിയേക്കും.

പവർഡ് ഫ്രണ്ട് സീറ്റുകൾ, ഡ്യുവൽ സോൺ ക്ലൈമറ്റ് കൺട്രോൾ തുടങ്ങിയ പ്രീമിയം സൗകര്യങ്ങളും പുതിയ മോഡലിൽ ഉൾപ്പെടുത്തിയേക്കും. ഇൻഫോടെയ്ൻമെന്റ്, കണക്റ്റിവിറ്റി സംവിധാനങ്ങളിലും കൂടുതൽ സാങ്കേതിക മുന്നേറ്റങ്ങൾ പ്രതീക്ഷിക്കാം.

ബാറ്ററി ശേഷിയിൽ മാറ്റമുണ്ടാകുമോ?

നിലവിൽ 30 കിലോവാട്ട് അവർ, 45 കിലോവാട്ട് അവർ എന്നിങ്ങനെ രണ്ട് ബാറ്ററി ഓപ്ഷനുകളിലാണ് ടാറ്റ നെക്സോൺ ഇവി വിൽപ്പനയ്ക്കുള്ളത്. ഇവയ്ക്ക് യഥാക്രമം 275 കിലോമീറ്റർ, 489 കിലോമീറ്റർ എംഐഡിസി റേഞ്ചാണ് കമ്പനി അവകാശപ്പെടുന്നത്. 2027-ൽ എത്തുന്ന പുതുതലമുറ മോഡലിലും നിലവിലുള്ള ബാറ്ററി, പവർട്രെയിൻ ഓപ്ഷനുകൾ തുടരാനാണ് സാധ്യത. എന്നാൽ പ്രകടനത്തിലും കാര്യക്ഷമതയിലും കൂടുതൽ മികവ് ഉറപ്പാക്കുന്നതിനായി ടാറ്റ ചില പരിഷ്‌കരണങ്ങൾ വരുത്തിയേക്കും.

ബാറ്ററിയുടെ താപനിയന്ത്രണം, മോട്ടോറിന്റെ കാര്യക്ഷമത, ഊർജ ഉപഭോഗം നിയന്ത്രിക്കുന്ന സോഫ്റ്റ്‌വെയർ, റീജനറേറ്റീവ് ബ്രേക്കിങ് സംവിധാനം എന്നിവയിൽ മെച്ചപ്പെടുത്തലുകൾ പ്രതീക്ഷിക്കാം. ഹ്യുണ്ടായി അയോണിക് പി, പുതുതലമുറ ടാറ്റ നെക്സോൺ ഇവി എന്നീ മോഡലുകളുടെ വരവ് ഇന്ത്യയിലെ കോംപാക്ട് ഇലക്ട്രിക് എസ്‌യുവി വിപണിക്ക് കൂടുതൽ കരുത്തുപകരും. പുതിയ മോഡലുകൾക്കിടയിലെ ഫീച്ചർ മത്സരം, റേഞ്ച്, വില, സാങ്കേതികവിദ്യ എന്നിവയിൽ കൂടുതൽ മികച്ച തിരഞ്ഞെടുപ്പുകൾ ഉപഭോക്താക്കൾക്ക് ലഭിക്കാനും വഴിയൊരുക്കും.

Summary

Hyundai Ioniq P and Tata Nexon EV are set to enter India’s compact electric SUV market in 2027. Their arrival is expected to reshape competition in the segment and offer consumers a wider range of better options.