ഓണ്-സ്ക്രീന് മാര്ക്കിംഗ് സിസ്റ്റം
ഇത്തവണ പ്ലസ് ടു പരീക്ഷ എഴുതിയ 18 ലക്ഷത്തിലധികം വിദ്യാര്ത്ഥികളുടെ 98 ലക്ഷത്തോളം ഉത്തരക്കടലാസുകളാണ് സിബിഎസ്ഇ ആദ്യമായി ഡിജിറ്റലായി മൂല്യനിര്ണ്ണയം നടത്തിയത്. പരീക്ഷാ സെന്ററുകളില് നിന്ന് ശേഖരിക്കുന്ന ഉത്തരക്കടലാസുകള് രഹസ്യ കോഡ് നല്കി സ്കാന് ചെയ്ത് പ്രത്യേക പോര്ട്ടലില് അപ്ലോഡ് ചെയ്യും. അധ്യാപകര് ഈ പോര്ട്ടലില് ലോഗിന് ചെയ്താണ് മാര്ക്കിടുന്നത്. ഓരോ ചോദ്യത്തിനും സ്റ്റെപ്പ് മാര്ക്കുകള് രേഖപ്പെടുത്തിയാല് മാത്രമേ സിസ്റ്റം അടുത്ത പേജിലേക്ക് മാറൂ. മാര്ക്കുകള് തനിയെ കൂട്ടുന്നതിനാല് കൂട്ടലില് തെറ്റുകള് വരില്ല എന്നതായിരുന്നു ഇതിന്റെ മെച്ചം. എന്നാല് ഈ പരീക്ഷണം പൂര്ണ്ണ പരാജയമായി എന്നാണ് നിലവിലെ പരാതികള് സൂചിപ്പിക്കുന്നത്.
ഡിജിറ്റല് മൂല്യനിര്ണ്ണയത്തില് സംഭവിച്ച പിഴവുകള്
ഫലം പുറത്തുവന്നതിന് പിന്നാലെ ഉത്തരക്കടലാസുകളുടെ സ്കാന് ചെയ്ത കോപ്പികള്ക്കായി അപേക്ഷിച്ച വിദ്യാര്ത്ഥികള് ഞെട്ടിക്കുന്ന വിവരങ്ങളാണ് പുറത്തുവിട്ടത്. പലര്ക്കും ലഭിച്ച ഉത്തരക്കടലാസുകള് വ്യക്തതയില്ലാത്തതും പേജുകള് നഷ്ടപ്പെട്ടതുമായിരുന്നു. ചിലര്ക്ക് മറ്റ് വിദ്യാര്ത്ഥികളുടെ ഉത്തരക്കടലാസുകള് മാറി ലഭിച്ചതായും പരാതിയുണ്ട്. കൂടാതെ സ്കാന് ചെയ്ത 13,000-ത്തോളം കോപ്പികള് വായിക്കാന് പോലും കഴിയാത്തത്ര മോശമായതിനാല് അവ പിന്നീട് മാനുവലായി മൂല്യനിര്ണ്ണയം നടത്തേണ്ടി വന്നു. കഴിഞ്ഞ വര്ഷം 88.39 ശതമാനമായിരുന്ന വിജയശതമാനം ഇത്തവണ 85.29 ശതമാനമായി കുറയാന് കാരണം ഈ കമ്പ്യൂട്ടര് മൂല്യനിര്ണ്ണയത്തിലെ അപാകതകളാണെന്ന് രക്ഷിതാക്കള് ആരോപിക്കുന്നു. 90 ശതമാനത്തിന് മുകളില് മാര്ക്ക് വാങ്ങിയവരുടെ എണ്ണത്തിലും 16 ശതമാനത്തോളം കുറവുണ്ടായി.
തകര്ന്നുപോയ പേയ്മെന്റ് പോര്ട്ടലും കൂട്ട അപേക്ഷകളും
പരാതികള് വ്യാപകമായതോടെ വലിയ പ്രതിഷേധം ഭയന്ന് സിബിഎസ്ഇ ഉത്തരക്കടലാസ് കോപ്പികള് വാങ്ങാനുള്ള ഫീസ് 700 രൂപയില് നിന്ന് 100 രൂപയായും, പുനര്മൂല്യനിര്ണ്ണയ ഫീസ് ഓരോ ചോദ്യത്തിനും 25 രൂപയായും കുത്തനെ കുറച്ചു. ഇതോടെ വെരിഫിക്കേഷനായുള്ള അപേക്ഷകളുടെ പ്രളയമാണുണ്ടായത്. കഴിഞ്ഞ വര്ഷം 1.31 ലക്ഷം അപേക്ഷകള് മാത്രം ലഭിച്ച സ്ഥാനത്ത് ഇത്തവണ 2.94 ലക്ഷം അപേക്ഷകളിലായി 8.56 ലക്ഷം ഉത്തരക്കടലാസുകളുടെ കോപ്പികളാണ് വിദ്യാര്ത്ഥികള് ആവശ്യപ്പെട്ടത്. എന്നാല് ഈ വന് തിരക്ക് താങ്ങാനാകാതെ സിബിഎസ്ഇയുടെ വെബ്സൈറ്റും പേയ്മെന്റ് പോര്ട്ടലും പൂര്ണ്ണമായി തകര്ന്നു. പലര്ക്കും അക്കൗണ്ടില് നിന്ന് കൂടുതല് പണം നഷ്ടപ്പെടുകയും അപേക്ഷ പൂര്ത്തിയാക്കാന് കഴിയാതെ വരികയും ചെയ്തു. ഇതോടെ അപേക്ഷിക്കാനുള്ള അവസാന തീയതി പലതവണ നീട്ടേണ്ടി വന്നു.
മുന്നൊരുക്കമില്ലാത്ത പരീക്ഷണം
പൂര്ണ്ണ തോതില് നടപ്പിലാക്കുന്നതിന് മുന്പ് ചില വിഷയങ്ങളില് മാത്രം പൈലറ്റ് പ്രോജക്റ്റായി ഇത് നടത്തി വിജയം ഉറപ്പാക്കണമെന്ന് സിബിഎസ്ഇ ഗവേണിംഗ് ബോഡി നിര്ദ്ദേശിച്ചിരുന്നു. എന്നാല് പ്രാദേശിക ഓഫീസുകളില് കൃത്യമായ പൈലറ്റ് പ്രോജക്റ്റുകള് നടത്താതെ, ജനുവരിയില് വെറും അഞ്ച് സ്കൂളുകളില് മാത്രമാണ് ഒരു ഡ്രൈ റണ് നടത്തിയത്. അധ്യാപകര്ക്ക് കൃത്യമായ പരിശീലനം നല്കാതെ പെട്ടെന്ന് ഈ ഡിജിറ്റല് സംവിധാനം രാജ്യവ്യാപകമായി അടിച്ചേല്പ്പിച്ചതാണ് ഈ വലിയ വീഴ്ചയ്ക്ക് പ്രധാന കാരണം. എന്നാല് റീജിയണല് വ്യത്യാസങ്ങളില്ലാതെ മൂല്യനിര്ണ്ണയം സുതാര്യമാക്കാനാണ് ഇതുകൊണ്ട് ശ്രമിച്ചതെന്നാണ് സിബിഎസ്ഇ ചെയര്മാന് രാഹുല് സിംഗ് ഇപ്പോഴും വാദിക്കുന്നത്.
പരിഹാര നടപടികളുമായി ഐഐടികള്
പ്രതിസന്ധി രൂക്ഷമായതോടെ കേന്ദ്ര വിദ്യാഭ്യാസ മന്ത്രി ധര്മ്മേന്ദ്ര പ്രധാന്റെ നിര്ദ്ദേശപ്രകാരം സാങ്കേതിക പിഴവുകള് പരിഹരിക്കാന് ഐഐടി കാണ്പൂര്, ഐഐടി മദ്രാസ് എന്നിവരുടെ സഹായം തേടിയിരിക്കുകയാണ് ബോര്ഡ്. കൂടാതെ സാമ്പത്തിക ഇടപാടുകള് സുരക്ഷിതമാക്കാനും അധികമായി ഈടാക്കിയ പണം ബാങ്ക് അക്കൗണ്ടുകളിലേക്ക് തിരികെ നല്കാനുമായി ബാങ്ക് ഓഫ് ഇന്ത്യ, ബാങ്ക് ഓഫ് ബറോഡ ഉള്പ്പെടെയുള്ള നാല് പൊതുമേഖലാ ബാങ്കുകളെയും ചുമതലപ്പെടുത്തിയിട്ടുണ്ട്. സ്കാന് ചെയ്ത ഉത്തരക്കടലാസുകള് പൂര്ണ്ണമായി ലഭിച്ച ശേഷം മാത്രമേ പുനര്മൂല്യനിര്ണ്ണയത്തിനുള്ള പോര്ട്ടല് തുറക്കൂ എന്നും വിദ്യാര്ത്ഥികളുടെ എല്ലാ പരാതികളും കൃത്യമായി പരിശോധിക്കുമെന്നും സിബിഎസ്ഇ അറിയിച്ചിട്ടുണ്ട്.
English Summary: CBSE’s new “on-screen marking” system for Class 12 exams has come under criticism after being implemented nationwide for the first time. Under this system, answer sheets of over 18 million students were scanned and evaluated digitally by teachers through an online portal. However, many students reported serious issues such as blurred scans, missing pages, and even mismatched answer scripts. The situation worsened with technical failures in the payment and verification portals, causing delays and financial issues for applicants.