പോക്സോ പ്രതിക്ക് വീണ്ടും പരവതാനി; അനിരുദ്ധ് രവിചന്ദറിനെതിരെ കടുത്ത വിമർശനം

പ്രശസ്ത തെന്നിന്ത്യൻ സംഗീത സംവിധായകൻ അനിരുദ്ധ് രവിചന്ദറിന്റെ പുതിയ മ്യൂസിക് ആൽബം റിലീസിന് പിന്നാലെ വലിയ വിവാദത്തിൽ. പോക്സോ കേസിൽ പ്രതിയായ പ്രമുഖ കൊറിയോഗ്രാഫർ ജാനി മാസ്റ്ററുമായി (ഷെയ്ഖ് ജാനി ബാഷ) പുതിയ പ്രോജക്റ്റിൽ സഹകരിച്ചതാണ് അനിരുദ്ധിനെതിരെ കടുത്ത സാമൂഹ്യമാധ്യമ വിമർശനങ്ങൾക്ക് കാരണമായിരിക്കുന്നത്.

ജൂൺ 14-നാണ് അനിരുദ്ധിന്റെ സ്വന്തം ലേബലായ 'ആൽബം റെക്കോർഡ്സ്' വഴി 'അരവിന്ദ്' (Aravindh) എന്ന സ്വതന്ത്ര ഗാനം തമിഴിലും തെലുങ്കിലുമായി റിലീസ് ചെയ്തത്. പാട്ട് തുടക്കത്തിൽ ആരാധകർ ഏറ്റെടുത്തുവെങ്കിലും, ഇതിന്റെ കൊറിയോഗ്രാഫി നിർവ്വഹിച്ചത് ജാനി മാസ്റ്ററാണെന്ന വിവരം പുറത്തുവന്നതോടെ വലിയ രീതിയിലുള്ള പ്രതിഷേധം ഉയരുകയായിരുന്നു. കോടതിയിൽ കേസ് നിലനിൽക്കെ ഇത്തരം ആളുകൾക്ക് വീണ്ടും പ്രമുഖർ അവസരം നൽകുന്നത് എന്തിനാണെന്നാണ് സോഷ്യൽ മീഡിയയിൽ ഉയരുന്ന ചോദ്യം.

പോക്‌സോ കേസിൽ ഉൾപ്പെട്ട ഒരാൾക്ക് ഇത്രയും വലിയൊരു വേദി നൽകി അയാളെ വീണ്ടും ഇൻഡസ്ട്രിയിൽ സജീവമാക്കാൻ അനിരുദ്ധ് ശ്രമിക്കുന്നത് തികച്ചും തെറ്റായ സന്ദേശമാണ് നൽകുന്നതെന്ന് ആരാധകർ വിമർശിച്ചു. "ഈ പാട്ട് ജാനി മാസ്റ്ററാണ് കൊറിയോഗ്രഫി ചെയ്തത് എന്ന് അറിഞ്ഞ സ്ഥിതിക്ക് ഇനി ഇത് കാണുകയോ കേൾക്കുകയോ ഇല്ല", എന്ന് പലരും എക്‌സിൽ കുറിച്ചു. മറ്റൊരു നിർമ്മാണ കമ്പനിയുടെ സിനിമയിലല്ലാതെ, സ്വന്തം പൂർണ്ണ തീരുമാനത്തിൽ പുറത്തിറക്കിയ മ്യൂസിക് ലേബലിലൂടെ തന്നെയാണ് ജാനി മാസ്റ്റർക്ക് ഈ അവസരം നൽകിയത് എന്നതും വിമർശനത്തിന്റെ ആക്കം കൂട്ടിയിട്ടുണ്ട്.

തന്റെ കീഴിൽ ജോലി ചെയ്തിരുന്ന 21 വയസ്സുള്ള വനിതാ കൊറിയോഗ്രാഫറുടെ പരാതിയിലാണ് 2024 സെപ്റ്റംബറിൽ ഹൈദരാബാദ് പൊലീസ് ജാനി മാസ്റ്റർക്കെതിരെ പോക്സോ നിയമപ്രകാരം കേസ് എടുത്തത്. ഇരയ്ക്ക് 17 വയസ്സുള്ളപ്പോൾ മുംബൈ യാത്രാമധ്യേ ജാനി മാസ്റ്റർ ലൈംഗികമായി പീഡിപ്പിച്ചുവെന്നും, തുടർന്ന് ഭീഷണിപ്പെടുത്തി പീഡനം തുടർന്നുവെന്നുമാണ് കേസ്.

കേസിനെ തുടർന്ന് 2024 സെപ്റ്റംബറിൽ ഇയാൾ അറസ്റ്റിലാവുകയും ജുഡീഷ്യൽ കസ്റ്റഡിയിലാവുകയും ചെയ്തു. തുടർന്ന് ഒക്ടോബറിൽ തെലങ്കാന ഹൈക്കോടതി ഇയാൾക്ക് ഉപാധികളോടെ ജാമ്യം അനുവദിക്കുകയായിരുന്നു. കേസ് നിലവിൽ കോടതിയുടെ പരിഗണനയിലാണ്. വിവാദത്തെ തുടർന്ന് ജാനി മാസ്റ്റർക്ക് പ്രഖ്യാപിച്ചിരുന്ന ദേശീയ ചലച്ചിത്ര പുരസ്കാരം അധികൃതർ റദ്ദാക്കിയിരുന്നു.

ഇൻഡസ്ട്രിയിലെ പ്രമുഖർ ജാനി മാസ്റ്റർക്ക് തുടരെത്തുടരെ അവസരങ്ങൾ നൽകുന്നതിനെതിരെ അതിജീവിത രംഗത്തെത്തിയിരുന്നു. ആഭ്യന്തര പരാതി പരിഹാര സമിതി അന്വേഷണത്തിൽ ഇയാൾ കുറ്റക്കാരനാണെന്ന് കണ്ടെത്തിയിട്ടും, സിനിമയിലെ വലിയ താരങ്ങളും സംവിധായകരും ഇയാൾക്കൊപ്പം പ്രവർത്തിക്കുന്നത് നീതിക്കായി പോരാടുന്ന തനിക്ക് കടുത്ത നിരാശയുണ്ടാക്കുന്നുവെന്നും, ഇത് അതിജീവിച്ചവർക്ക് തെറ്റായ സന്ദേശമാണ് നൽകുന്നതെന്നും അവർ വ്യക്തമാക്കി.

നേരത്തെ, 2025 നവംബറിൽ റാം ചരൺ ചിത്രത്തിലെ ഒരു ഗാനത്തിനായി എ.ആർ. റഹ്മാൻ ജാനി മാസ്റ്ററുമായി സഹകരിച്ചപ്പോഴും സമാനമായ പ്രതിഷേധം ഉയർന്നിരുന്നു. കൂടാതെ, 2025 ജൂലൈയിൽ നയൻതാര നിർമ്മിച്ച് വിഘ്നേഷ് ശിവൻ സംവിധാനം ചെയ്യുന്ന ചിത്രത്തിലേക്കും ജാനി മാസ്റ്ററെ ഉൾപ്പെടുത്തിയത് വലിയ വിവാദങ്ങൾക്ക് വഴിവെച്ചിരുന്നു. അതേസമയം, ഈ വിഷയത്തിൽ അനിരുദ്ധ് ഇതുവരെ ഔദ്യോഗികമായി പ്രതികരണങ്ങളൊന്നും നടത്തിയിട്ടില്ല.