'കിളിയേ കിളിയേ'... ജെൻസി റീലുകളിൽ തരം​ഗമായ ജാനകിയമ്മ

ആറ് പതിറ്റാണ്ടിലേറെക്കാലം ഇന്ത്യൻ ചലച്ചിത്ര സംഗീത ലോകത്തെ തന്റെ സ്വരമാധുര്യം കൊണ്ട് വിസ്മയിപ്പിച്ച മഹാ പ്രതിഭ. കഥാപാത്രത്തെ കുറിച്ച് സംവിധായകൻ പറഞ്ഞു കൊടുക്കുന്ന ചുരുങ്ങിയ വിവരണങ്ങൾ കേട്ട്, കഥാസന്ദർഭം മനസ്സിൽ സങ്കല്പിച്ച്, പാട്ടിനെ ​ഗാനശിൽപ്പമാക്കി മാറ്റുന്ന ഭാവ​ഗായിക. മാതൃത്വത്തിന്റെ നനവും, പ്രണയിനിയുടെ മനോനിലയും ഒരുപോലെ ഉൾക്കൊണ്ട് പ്രേക്ഷകനെ കോരിത്തരിപ്പിക്കുന്ന അനുഗ്രഹീത കലാകാരി. തെന്നിന്ത്യയുടെ സ്വകാര്യ അഹങ്കാരമായ ജാനകിയമ്മ.

എല്ലാ തലമുറകൾക്കും ജാനകിയമ്മ വിസ്മയമാണ്. പുതിയ പാട്ടുകാർ ഒരുപാട് പേർ വന്നിട്ടും ഇന്നും നിത്യഹരിത ​ഗായികയായി ജാനകി നിലനിൽക്കുന്നു. ജെൻസിക്കാരുടെ പുതിയകാല റീലുകൾ പോലും ഭരിക്കുന്നത് ജാനകിയുടെ പാട്ടുകളാണ്. ഇതിൽ മിക്ക പാട്ടുകൾക്കും സം​ഗീതം നൽകിയിരിക്കുന്നത് ഇളയരാജയാണ്. അങ്ങനെ സമൂഹ മാധ്യമങ്ങളിൽ വീണ്ടും വീണ്ടും തരം​ഗമായി മാറിയ ജാനകിയുടെ ചില പാട്ടുകൾ നോക്കാം.

1) 'എന്ത പൂവിലും വാസമുണ്ട്'

ചിത്രം: മുരട്ടു കാളൈ

സം​ഗീതം: ഇളയരാജ

പാടിയത്: എസ് ജാനകി

2) 'സംഗത്തിൽ പാടാത്ത കവിതൈ'

ചിത്രം: 'ഓട്ടോ രാജ'

സം​ഗീതം: ഇളയരാജ

പാടിയത്: എസ് ജാനകി

3) 'റോജാ പൂ ആടി വന്തത്'

ചിത്രം: 'അ​ഗ്നി നച്ചത്തിരം'

സം​ഗീതം: ഇളയരാജ

പാടിയത്: എസ് ജാനകി

4) 'കിളിയേ കിളിയേ'

ചിത്രം: 'ആ രാത്രി'

സം​ഗീതം: ഇളയരാജ

പാടിയത്: എസ് ജാനകി

5) 'സാമി കിട്ട സൊല്ലി വച്ച്'

ചിത്രം: 'ആവാരംപൂ'

സം​ഗീതം: ഇളയരാജ

പാടിയത്: എസ് ജാനകി

6) 'കൺമണി അൻപൊട് കാതലൻ'

ചിത്രം: 'ഗുണ'

സം​ഗീതം: ഇളയരാജ

പാടിയത്: എസ് ജാനകി

ഇരുപത് ഭാഷകളിലായി നാല്‍പ്പത്തി എട്ടായിരത്തിലധികം ഗാനങ്ങള്‍ ജാനകിയമ്മ ഈ ആയുസ്സിൽ പാടി തീർത്തിട്ടുണ്ട്. കെ എസ് ചിത്ര ഒരിക്കൽ പറഞ്ഞു, "പാട്ടിന്റെ അര്‍ഥം മാത്രം അറിഞ്ഞാല്‍ അമ്മയ്ക്ക് മതിയാകില്ല. സംവിധായകനരികിൽ ചെന്നിരുന്ന് ഓരോ പദവും എങ്ങനെ ഉച്ചരിക്കണമെന്ന് ചോദിച്ചറിയും". അങ്ങനെ ഭാഷയെ അറിഞ്ഞ് അര്‍ഥവും ഉച്ചാരണവും മനസ്സിലാക്കി പാടിയതുകൊണ്ട് തന്നെ ജാനകിയമ്മ എല്ലാ ഭാഷകൾക്കും സ്വന്തമായി. ജാനകിയമ്മ പാടിവെച്ച പല പാട്ടുകളും മറ്റ് ഭാഷകളിലേക്ക് മൊഴിമാറ്റി പാടേണ്ടി വന്ന ​ഗായകർ, അവർ ഫലിപ്പിച്ചെടുത്ത ഭാവാവിഷ്കാരത്തോട് നീതി പുലർത്താൻ നന്നേ പണിപ്പെട്ടതായി പിന്നീട് പറഞ്ഞിട്ടുണ്ട്.

ജാനകി എന്ന ​ഗായിക മരിക്കുന്നില്ല. 60 വർഷത്തെ സംഗീത യാത്ര അവസാനിപ്പിച്ച് മടങ്ങിയെങ്കിലും, അവർ ഇരുന്നിടത്ത് ശൂന്യതയില്ല. അവിടെ അവശേഷിക്കുന്ന പാട്ട് മാത്രമാണ്. അതുകൊണ്ട് തന്നെ എക്കാലവും നമ്മുടെയെല്ലാം ചുണ്ടുകളിലൂടെ ആ സം​ഗീത ദേവത പാടിക്കൊണ്ടിരിക്കുന്നു.