രാജ്യത്തിന്റെ കാര്ഷിക മേഖലയുടെ നട്ടെല്ലായ ഖരിഫ് സീസണ് ഈ വര്ഷം വലിയൊരു പ്രതിസന്ധിയെയാണ് അഭിമുഖീകരിക്കുന്നത്. രാജ്യത്തുടനീളം പ്രതീക്ഷിച്ചതിലും വളരെ കുറഞ്ഞ അളവിലാണ് മണ്സൂണ് മഴ ലഭിച്ചിരിക്കുന്നത്. ഇന്ത്യന് കാലാവസ്ഥാ വകുപ്പിന്റെ കണക്കുകള് പ്രകാരം, രാജ്യത്തെ 741 ജില്ലകളില് 397 എണ്ണത്തിലും സാധാരണയില് താഴെ മാത്രമാണ് മഴ ലഭിച്ചിട്ടുള്ളത്. നെല്കൃഷിക്ക് ഏറ്റവും അനിവാര്യമായ ജൂലൈ മാസത്തില് മഴ ലഭിക്കാത്തതു ഗംഗാ സമതലങ്ങളിലെ കര്ഷകരുടെ പ്രതീക്ഷകളെ തകര്ത്തിരിക്കുകയാണ്. വിത്തിടല് പ്രക്രിയ വൈകുന്നതും മഴക്കുറവും കാരണം കാര്ഷിക ഉല്പ്പാദനം ഗണ്യമായി കുറയുമെന്ന ആശങ്കയാണ് ഉയരുന്നത്.
ഉത്തര്പ്രദേശ്, ബിഹാര്, ജാര്ഖണ്ഡ് സംസ്ഥാനങ്ങളാണ് മഴക്കുറവിന്റെ ഇരകളായി മാറിയിരിക്കുന്നത്. നെല്കൃഷിക്കു വളരെയധികം ജലം ആവശ്യമുള്ള സമയമാണിത്. എന്നാല്, ബിഹാറിലെ ഭൂരിഭാഗം ജില്ലകളിലും ഉത്തര്പ്രദേശിലെ ഗംഗാതീര പ്രദേശങ്ങളിലും പകുതിയിലധികം മഴയുടെ കുറവാണു രേഖപ്പെടുത്തിയിരിക്കുന്നത്. ജാര്ഖണ്ഡിലെ ചില ജില്ലകളില് 99 ശതമാനം വരെ മഴക്കുറവുണ്ടായതോടെ അവിടെ നെല്ക്കൃഷി പാടെ ഉപേക്ഷിക്കേണ്ട അവസ്ഥയിലാണ്. കൃഷി ചെയ്യാന് നിലമൊരുക്കാനും ഞാറു നടാനും വെള്ളം ലഭിക്കാത്തതു കര്ഷകരെ കടക്കെണിയിലേക്കു തള്ളിയിടുമെന്നതില് സംശയമില്ല.
കഴിഞ്ഞ വര്ഷത്തെ അപേക്ഷിച്ച് ഖരിഫ് വിത്തിടലില് 16 ശതമാനത്തോളം ഇടിവാണ് രേഖപ്പെടുത്തിയിരിക്കുന്നത്. നെല്ല്, എണ്ണക്കുരുക്കള്, പയര്വര്ഗങ്ങള്, പരുത്തി, ധാന്യങ്ങള് തുടങ്ങി മിക്ക പ്രധാന വിളകളുടെയും വിത്തിടല് കുറഞ്ഞു. നെൽ കൃഷിയില് മാത്രം 10.8 ലക്ഷം ഹെക്ടറിന്റെ കുറവാണ് ജൂലൈ 10 വരെയുള്ള കണക്കുകളില് വ്യക്തമാകുന്നത്. നിശ്ചിത സമയത്തിനുള്ളില് ഞാറു നടാന് സാധിക്കാത്തത് വിളവെടുപ്പിന്റെ അളവിനെയും ഗുണനിലവാരത്തെയും ദോഷകരമായി ബാധിക്കും. മണ്ണിലെ ഈര്പ്പം കുറയുന്നതും ഭൂഗര്ഭജലനിരപ്പ് താഴുന്നതും കാര്ഷിക ഉല്പ്പാദനത്തെ ദീര്ഘകാലത്തേക്കു ബാധിക്കുന്ന പ്രശ്നമാണ്.
മഴക്കുറവ് രൂക്ഷമായതോടെ പല പ്രദേശങ്ങളും 'മെറ്റീരിയോളജിക്കല് വരള്ച്ച' എന്ന അവസ്ഥയിലേക്ക് നീങ്ങുകയാണ്. കാലാവസ്ഥാ വകുപ്പിന്റെ കണക്കുകള് പ്രകാരം 50 ശതമാനത്തിലധികം മഴക്കുറവ് അനുഭവപ്പെടുന്ന മേഖലകളില് അതിരൂക്ഷമായ വരള്ച്ചയാണു പ്രവചിക്കപ്പെടുന്നത്. ഇത് കേവലം കാര്ഷിക നഷ്ടമല്ല, മറിച്ച് രാജ്യത്തിന്റെ ഭക്ഷ്യസുരക്ഷയെത്തന്നെ ബാധിച്ചേക്കാവുന്ന വലിയ പ്രതിസന്ധിയാണ്. സമയബന്ധിതമായി കൃഷി ചെയ്യാന് കഴിയാത്തത് വിപണിയില് ധാന്യങ്ങളുടെ വില വര്ദ്ധനവിനും ഭക്ഷ്യക്ഷാമത്തിനും കാരണമായേക്കാം.
ഉല്പ്പാദനത്തിലെ ഈ കുറവ് വരും മാസങ്ങളില് വിപണിയിലെ അരിയുടെ ലഭ്യതയെയും വിലയെയും സാരമായി ബാധിക്കാന് സാധ്യതയുണ്ട്. ഖരിഫ് സീസണിലെ വിളവെടുപ്പ് കുറയുന്നത് വിപണിയില് അരിയുടെ ക്ഷാമത്തിന് കാരണമാവുകയും ഇത് വില കുത്തനെ ഉയരുന്നതിലേക്ക് നയിക്കുകയും ചെയ്യും. പ്രത്യേകിച്ച് സാധാരണക്കാര് ആശ്രയിക്കുന്ന അരിയിനങ്ങള്ക്കു പോലും വിലക്കയറ്റമുണ്ടാകുന്നതു കുടുംബ ബജറ്റുകളെ വലിയ തോതില് താളം തെറ്റിക്കും.
രാജ്യത്തിന്റെ ഭക്ഷ്യസുരക്ഷ ഉറപ്പാക്കാന് സര്ക്കാര് അടിയന്തരമായി ബഫര് സ്റ്റോക്കുകള് ഉപയോഗിച്ച് വിപണിയില് ഇടപെടേണ്ടി വരും. ലഭ്യത കുറഞ്ഞാല് കയറ്റുമതി നിയന്ത്രണങ്ങള് കര്ശനമാക്കാനും സര്ക്കാര് നിര്ബന്ധിതമായേക്കാം. ചുരുക്കത്തില്, കൃഷിയിലെ ഈ വീഴ്ച വരും മാസങ്ങളില് പൊതുവിപണിയില് വലിയൊരു സാമ്പത്തിക പ്രതിസന്ധിക്ക് തന്നെ വഴിവെച്ചേക്കാം.
ഈ സാഹചര്യത്തില്, മഴയെ മാത്രം ആശ്രയിച്ചുനില്ക്കുന്ന കാര്ഷിക രീതിക്ക് അടിയന്തര മാറ്റം ആവശ്യമാണ്. കര്ഷകര്ക്കായി ജലസേചന സൗകര്യങ്ങള് വര്ദ്ധിപ്പിക്കുക, മഴക്കുറവിനെ അതിജീവിക്കാന് കഴിയുന്ന വിത്തിനങ്ങളെ പ്രോത്സാഹിപ്പിക്കുക, കൃത്യമായ കാലാവസ്ഥാ മുന്നറിയിപ്പുകള് കര്ഷകരിലേക്ക് എത്തിക്കുക എന്നിവയാണ് ഇപ്പോള് അടിയന്തരമായി വേണ്ടത്. ജലലഭ്യത ഉറപ്പാക്കാന് സര്ക്കാര് തലത്തില് ചെറുകിട ജലസേചന പദ്ധതികള് ശക്തിപ്പെടുത്തേണ്ടതുണ്ട്. കാര്ഷിക മേഖലയെ ഈ പ്രതിസന്ധിയില് നിന്ന് കരകയറ്റാന് കേന്ദ്ര-സംസ്ഥാന സര്ക്കാരുകളുടെ ഇടപെടല് അനിവാര്യമാണ്.
India's crucial Kharif cropping season is under severe pressure as the southwest monsoon has delivered significantly below-normal rainfall across much of the country. According to the India Meteorological Department (IMD), 397 of India's 741 districts have recorded deficient rainfall, with Uttar Pradesh, Bihar and Jharkhand among the worst-hit states. The rainfall deficit has delayed paddy transplantation and reduced Kharif sowing by around 16% compared to last year, raising concerns over lower agricultural output. Experts warn that prolonged dry conditions could lead to meteorological drought, threaten food security, and push up rice prices in the coming months. The situation has intensified calls for improved irrigation, drought-resistant crop varieties, and timely government intervention.
