ഐഫൽ ടവർ സന്ദർശനവേളയിൽ സ്ത്രീകൾ കാഴ്ചയിൽപ്പെടരുതെന്ന ഹിന്ദു സംഘടനാ നേതാക്കളുടെ ആവശ്യത്തിൽ പ്രതിഷേധം കനക്കുകയാണ്. സംഘം സന്ദർശനം നടത്തിയ സമയത്ത് ജോലിയിൽ നിന്ന് മാറ്റിനിർത്തിയതിൽ ടവർ താല്ക്കാലികമായി അടച്ചിട്ടാണ് വനിതാ ജീവനക്കാർ പ്രതിഷേധിച്ചത്. സ്ത്രീകളെ അപമാനിക്കുന്നതും ലിംഗസമത്വത്തിന് എതിരായതുമായ നടപടിയാണുണ്ടായതെന്ന് ജീവനക്കാർ ചൂണ്ടിക്കാട്ടുന്നു.
സെപ്റ്റംബർ ആദ്യമാണ് ബിഎപിഎസ് (ബോചാസൻവാസി അക്ഷർ പുരുഷോത്തം സ്വാമിനാരായൺ സംസ്ഥ) എന്ന സംഘടനയിലെ നൂറോളം പേർ ഐഫൽ ടവർ സന്ദർശിച്ചത്. പാരീസിലെ ഹൈന്ദവക്ഷേത്രം തുറക്കുന്നതുമായി ബന്ധപ്പെട്ട വേളയിലായിരുന്നു സന്ദർശനം. എന്നാൽ സന്ദർശനവേളയിൽ സ്ത്രീകളുടെ സാന്നിധ്യം പരിമിതമായ തരത്തിൽ സജ്ജീകരിക്കണമെന്ന് ഇവർ ജീവനക്കാരോട് ആവശ്യപ്പെട്ടു. ഇത് SETE എന്ന, ഐഫൽ ടവർ ഓപ്പറേറ്റിംഗ് കമ്പനി സ്ഥിരീകരിച്ചിട്ടുണ്ട്. തുടർന്ന് സംഘം ടവർ സന്ദർശിച്ച സമയത്ത് പുരുഷ ജീവനക്കാരെ നിയോഗിക്കുകയും വനിതാ ജീവനക്കാരെ മാറ്റിനിർത്തുകയുമായിരുന്നു.
പിന്നാലെയാണ് ജീവനക്കാർ പ്രതിഷേധവുമായി എത്തിയത്. ലിംഗ അസമത്വം അനുവദിക്കാനാവില്ലെന്ന് കാട്ടി ജീവനക്കാർ പണിമുടക്കിയതോടെ തിങ്കളാഴ്ച ടവർ അടച്ചിടേണ്ടി വന്നു. മാനേജ്മെന്റ് ക്ഷമാപണം നടത്തിയതോടെയാണ് ജീവനക്കാർ പ്രതിഷേധം അവസാനിപ്പിച്ചത്. തുടർന്ന് ഫ്രാൻസിലെ ലിംഗസമത്വ തത്വങ്ങൾക്ക് എതിരാണ് നടപടിയെന്ന് ചൂണ്ടിക്കാട്ടി രാഷ്ട്രീയനേതാക്കളും പാരീസ് മേയറും രംഗത്തു വന്നു. സംഭവത്തിൽ ഡെപ്യൂട്ടി മേയർ ഇമ്മാനുവൽ ഗ്രിഗ്വാർ അന്വേഷണത്തിന് ഉത്തരവിട്ടിട്ടുണ്ട്. തൊഴിലാളികളുടെ ആശങ്കകൾ ന്യായമാണെന്നും അടിയന്തര ശ്രദ്ധ അർഹിക്കുന്നുവെന്നും എക്സിലെ കുറിപ്പിൽ അദ്ദേഹം വ്യക്തമാക്കി.
സംഭവം വിവാദമായതോടെ ബിഎപിഎസ് വിശദീകരണവും ഖേദപ്രകടനവുമായി രംഗത്തെത്തിയിട്ടുണ്ട്.
പ്രസ്താവനയുടെ വിവരണം:
മുൻകൂട്ടി ക്രമീകരിച്ച സന്ദർശനം:
ഞങ്ങളുടെ പ്രതിനിധി സംഘത്തിൽ വലിയൊരു വിഭാഗം ആളുകൾ (നൂറോളം പേർ) ഉണ്ടായിരുന്നു. അതിനാൽ മറ്റു സന്ദർശകർക്ക് യാതൊരുവിധ തടസ്സമോ ബുദ്ധിമുട്ടോ ഉണ്ടാകാതിരിക്കാൻ വേണ്ടി ഐഫൽ ടവർ അധികൃതരുമായി (SETE) മുൻകൂട്ടി കൂടിയാലോചിച്ച ശേഷമാണ് ജനറൽ ഓപ്പണിംഗ് സമയത്തിന്റെ തുടക്കത്തിൽ തന്നെ സന്ദർശനം സമയം നിശ്ചയിച്ചത്.
പ്രവേശന വിലക്കിനെക്കുറിച്ച്:
ഞങ്ങളുടെ അറിവിൽ, ഈ സന്ദർശന വേളയിൽ മറ്റേതെങ്കിലും സന്ദർശകർക്കോ പൊതുജനങ്ങൾക്കോ ഐഫൽ ടവറിലേക്ക് പ്രവേശനം നിഷേധിക്കപ്പെടുകയോ തടസ്സപ്പെടുകയോ ചെയ്തിട്ടില്ല.
പരസ്പര ബഹുമാനവും മാപ്പപേക്ഷയും:
സംഭവവുമായി ബന്ധപ്പെട്ട് ഉയർന്നുവന്ന ആശങ്കകളെയും പരാതികളെയും ഞങ്ങൾ വളരെ ഗൗരവത്തോടെ കാണുന്നു. പരസ്പര ബഹുമാനത്തിലും സഹജീവി സേവനത്തിലുമുള്ള സാർവത്രിക മൂല്യങ്ങളിൽ ഞങ്ങൾ ഉറച്ചു വിശ്വസിക്കുന്നു. എന്നാൽ, നിലവിലുണ്ടായ ഈ സംഭവം മൂലം ആർക്കെങ്കിലും എന്തെങ്കിലും തരത്തിലുള്ള വിഷമമോ പ്രയാസമോ ഉണ്ടായിട്ടുണ്ടെങ്കിൽ അതിൽ ഞങ്ങൾ ആത്മാർത്ഥമായി മാപ്പുചോദിക്കുന്നു.
ഐഫൽ ടവർ അധികൃതരോട് വനിതാ ജീവനക്കാരെ മാറ്റാൻ തങ്ങൾ നേരിട്ട് ആവശ്യപ്പെട്ടിട്ടില്ലെന്നും, വിനോദസഞ്ചാരികളുടെ തിരക്ക് ഒഴിവാക്കാൻ സമയം മുൻകൂട്ടി നിശ്ചയിക്കുക മാത്രമാണ് ചെയ്തതെന്നും സംഘടന കൂട്ടിച്ചേർത്തു.
Protests are intensifying over the demand by Hindu organisation leaders that women should not be visible during visits to the Eiffel Tower. Female employees protested by temporarily shutting down the tower after being removed from duty while the group was visiting. The employees said the move was insulting to women and against gender equality.