ഇന്ന് ആഗോള ഫാഷൻ രംഗത്ത് ഏറ്റവും കൂടുതൽ ചർച്ച ചെയ്യപ്പെടുന്ന പേരുകളിലൊന്നാണ് അനോക് യയ്. വളരെ ചുരുങ്ങിയ കാലയളവ് കൊണ്ട് ലോകത്തിലെ ഏറ്റവും പ്രശസ്തയും ഉയർന്ന പ്രതിഫലം കൈപ്പറ്റുന്നതുമായ മോഡലുകളുടെ മുൻനിരയിലേക്ക് ഉയരാൻ ഈ സുന്ദരിക്ക് സാധിച്ചു. ഇൻസ്റ്റാഗ്രാമിൽ തരംഗമായ ഒരൊറ്റ ഫോട്ടോയിലൂടെയാണ് അനോക്കിന്റെ ജീവിതം മാറിമറിഞ്ഞത്.
സൗത്ത് സുഡാനീസ് പശ്ചാത്തലമുള്ള അനോക് യയ്, ആദ്യകാലങ്ങളിൽ ഫാഷൻ ലോകവുമായി യാതൊരു ബന്ധവുമുള്ള വ്യക്തിയായിരുന്നില്ല. അമേരിക്കയിലെ ന്യൂ ഹാംഷെയർ സർവകലാശാലയിൽ ബയോമെഡിക്കൽ എഞ്ചിനീയറിംഗ് വിദ്യാർത്ഥിനിയായി പഠനം മുന്നോട്ട് കൊണ്ടുപോകുകയായിരുന്നു. എന്നാൽ 2017-ൽ ഹോവാർഡ് സർവകലാശാലയിൽ നടന്ന ഒരു കോളേജ് ഫെസ്റ്റിനിടയിൽ ഒരു ഫോട്ടോഗ്രാഫർ എടുത്ത അനോകയുടെ ചിത്രം ഇൻസ്റ്റാഗ്രാമിൽ പ്രത്യക്ഷപ്പെട്ടതോടെ കാര്യങ്ങൾ ആകെ മാറിമറിഞ്ഞു. മിനിറ്റുകൾക്കകം ലക്ഷക്കണക്കിന് ആളുകളിലേക്ക് എത്തിയ ആ ചിത്രം കണ്ട് പ്രമുഖ അന്താരാഷ്ട്ര മോഡലിംഗ് ഏജൻസികൾ അനോക്കിനെ തേടിയെത്തുകയായിരുന്നു.
മോഡലിംഗ് രംഗത്തേക്ക് ചുവടുവെച്ച അനോക്, പ്രശസ്ത ലക്ഷ്വറി ബ്രാൻഡായ പ്രാഡയുടെ (Prada) റൺവേയിൽ ചരിത്രപരമായ നേട്ടമാണ് പിന്നീട് സ്വന്തമാക്കിയത്. ഫാഷൻ ലോകത്തെ ഇതിഹാസ താരം നവോമി കാംബെല്ലിന് ശേഷം, പ്രാഡയുടെ ഫാഷൻ ഷോയിൽ ആദ്യമായി റൺവേ ഓപ്പൺ ചെയ്യുന്ന രണ്ടാമത്തെ കറുത്തവർഗ്ഗക്കാരിയായ മോഡൽ എന്ന പ്രശസ്തി അനോക് തന്റെ പേരിൽ കുറിച്ചു. നിലവിൽ ഫാഷൻ വ്യവസായത്തിൽ ഏറ്റവും ഡിമാൻഡുള്ള മോഡലായ ഇവർ, ഒരു മണിക്കൂർ നീളുന്ന റാമ്പ് വാക്കിന് ഏകദേശം 15,000 ഡോളർ (ഏകദേശം 12 ലക്ഷത്തിലധികം ഇന്ത്യൻ രൂപ) വരെയാണ് പ്രതിഫലമായി ഈടാക്കുന്നത്.
പ്രശസ്തമായ വോഗ് (Vogue) മാഗസിന്റെ കവർ ചിത്രങ്ങളിലൂടെയും ഷനൽ (Chanel), എസ്റ്റേ ലാഡർ (Estee Lauder), ഫെൻഡി (Fendi) തുടങ്ങിയ ആഗോള ബ്രാൻഡുകളുടെ പരസ്യങ്ങളിലൂടെയും അനോക് ഇന്ന് ഫാഷൻ ലോകത്ത് ഒഴിച്ചുകൂടാനാകാത്ത സാന്നിധ്യമായി മാറിയിരിക്കുന്നു. അസാധാരണമായ ഭാവങ്ങളും കാന്തികശക്തിയുള്ള റാമ്പ് വാക്കുമാണ് ഇവരെ മറ്റ് മോഡലുകളിൽ നിന്ന് വേറിട്ടു നിർത്തുന്നത്. സോഷ്യൽ മീഡിയയുടെ കൃത്യമായ സ്വാധീനത്തിലൂടെ ഒരു സാധാരണ കോളേജ് വിദ്യാർത്ഥിനിയിൽ നിന്നും ആഗോള ഫാഷൻ ഐക്കണിലേക്കുള്ള അനോക് യയ്യുടെ ഈ അതിവേഗ വളർച്ച പുതിയ തലമുറയ്ക്ക് വലിയൊരു പ്രചോദനം തന്നെയാണ് നൽകുന്നത്.
English Summary: Anok Yai rose to global fame after a viral Instagram photo transformed her life overnight. From being a biomedical engineering student to becoming one of the world’s highest-paid fashion models, Anok’s journey highlights the massive influence of social media in today’s fashion industry.