പതിമൂന്നുകാരിയെ ആൺസുഹൃത്തിന്റെ മുന്നിലിട്ട് ബലാത്സം​ഗം ചെയ്തു; സംഭവം ഡല്‍ഹിയില്‍

13 വയസ്സുകാരിയെ ആൺസുഹൃത്തിന്റെ മുന്നിൽവച്ച് കൂട്ടബലാത്സംഗം ചെയ്തതായി പരാതി. ഡല്‍ഹിക്കടുത്ത് ഹരിയാണിലെ ഗ്രേറ്റർ ഫരീദാബാദ് മേഖലയിലെ ഉപേക്ഷിക്കപ്പെട്ട കെട്ടിടത്തിനുള്ളിൽവച്ചാണ് ഒരു സംഘം യുവാക്കൾ പെൺകുട്ടിയെ പീഡിപ്പിച്ചതെന്നാണ് പരാതി. സംഭവത്തിൽ മൂന്ന് പേരെ പോലീസ് അറസ്റ്റ് ചെയ്തു.

ഓഗസ്റ്റ് 24നാണ് കേസിനാസ്പദമായ സംഭവം നടന്നത്. ട്യൂഷൻ ക്ലാസ് കഴിഞ്ഞ് മടങ്ങുകയായിരുന്ന പെൺകുട്ടി 16 വയസ്സുകാരനായ സുഹൃത്തിനൊപ്പം ഫരീദാബാദിലെ ഒരു കെട്ടിടത്തിനുള്ളിലേക്ക് പോയിരുന്നു. ഇരുവരെയും പിന്തുടർന്നെത്തിയ യുവാക്കളുടെ സംഘം ഭീഷണിപ്പെടുത്തിയശേഷം പെൺകുട്ടിയെ കൂട്ടബലാത്സംഗം ചെയ്യുകയായിരുന്നു.

സംഭവത്തെക്കുറിച്ച് പെൺകുട്ടി ഒരു മാസത്തോളം വീട്ടുകാരോട് വെളിപ്പെടുത്തിയിരുന്നില്ല. എന്നാൽ, പിന്നീട് പെൺകുട്ടിയുടെ പെരുമാറ്റത്തിൽ അസ്വാഭാവികതയും കടുത്ത മാനസിക ബുദ്ധിമുട്ടുകളും പ്രകടമായതോടെ മാതാപിതാക്കൾ വിവരം അന്വേഷിച്ചു. ഇതോടെയാണ് പീഡനവിവരം പുറത്തറിയുന്നത്. തുടർന്ന് മാതാപിതാക്കൾ പോലീസിൽ പരാതി നൽകുകയായിരുന്നു.

പെൺകുട്ടിയുടെ ആൺസുഹൃത്തിനെയും പ്രതികൾ പീഡിപ്പിച്ചതായി ആരോപണമുയർന്നിരുന്നു. എന്നാൽ, ഈ ആരോപണം പോലീസ് നിഷേധിച്ചു. സംഭവത്തിൽ മൂന്ന് പ്രതികളെ അറസ്റ്റ് ചെയ്തിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും പോലീസ് അറിയിച്ചു.

സംഭവത്തെക്കുറിച്ച് പൊലീസ് പറയുന്നത് ഇങ്ങനെ

ഒരു മാസം മുമ്പ് ഓഗസ്റ്റ് 24നാണ് സംഭവമുണ്ടായത്. ട്യൂഷൻ ക്ലാസ് കഴിഞ്ഞ് വീട്ടിലേക്ക് മടങ്ങുകയായിരുന്ന എട്ടാം ക്ലാസ് വിദ്യാർഥിനി 16 വയസ്സുകാരനായ തന്‍റെ സുഹൃത്തിനെ കാണാൻ പോയപ്പോഴാണ് സംഭവം. ഇരുവരും ഒരുമിച്ചിരിക്കെ നാല് യുവാക്കൾ ഇവരെ പിന്തുടർന്ന് ഉപേക്ഷിക്കപ്പെട്ട കെട്ടിടത്തിനുള്ളിൽ തടഞ്ഞുനിർത്തുകയായിരുന്നു. ശാരീരികമായി ഉപദ്രവിക്കുമെന്ന് ഭീഷണിപ്പെടുത്തിയ ശേഷം പെൺകുട്ടികൾക്കെതിരെ ലൈംഗികാതിക്രമം നടത്തിയെന്നാണ് പരാതി.

ഭീഷണിയെ തുടർന്ന് ഇരുവരും ആദ്യം സംഭവത്തെക്കുറിച്ച് വീട്ടുകാരോട് പറഞ്ഞില്ല. എന്നാൽ പെൺകുട്ടി പിന്നീട് മാനസികമായി അസ്വസ്ഥത പ്രകടിപ്പിക്കാൻ തുടങ്ങിയതോടെ അമ്മ കാര്യങ്ങൾ അന്വേഷിച്ചു. ഇതോടെയാണ് പെൺകുട്ടി തനിക്ക് നേരിട്ട ദുരനുഭവം വെളിപ്പെടുത്തിയത്. തുടർന്ന് സെപ്റ്റംബർ 29ന് ബിപിടിപി പോലീസ് സ്റ്റേഷനിൽ പരാതി നൽകി.

പരാതിയുടെയും വ്യാഴാഴ്ച രാത്രിയിൽ നടത്തിയ വൈദ്യപരിശോധനയുടെയും അടിസ്ഥാനത്തിൽ, പ്രസക്തമായ നിയമവകുപ്പുകൾ പ്രകാരം കൂട്ടബലാത്സംഗത്തിനും പ്രകൃതിവിരുദ്ധ ലൈംഗികാതിക്രമത്തിനും പോലീസ് കേസെടുത്തു.കുനാൽ, ദീപക്, യശ് എന്നിവരെയാണ് പോലീസ് പിടികൂടിയത്. വ്യാഴാഴ്ച രാത്രി മജിസ്ട്രേറ്റിന് മുന്നിൽ ഹാജരാക്കിയ ഇവരെ മൂന്ന് ദിവസത്തേക്ക് പോലീസ് കസ്റ്റഡിയിൽ വിട്ടു.കേസിൽ അന്വേഷണം തുടരുകയാണെന്നും ശേഷിക്കുന്ന മൂന്ന് പ്രതികളെ കണ്ടെത്തുന്നതിനായി വിവിധ സംഘങ്ങൾ പ്രവർത്തിച്ചുവരികയാണെന്നും പോലീസ് അറിയിച്ചു.