ഇന്ത്യയിൽ അഭിപ്രായ സ്വാതന്ത്ര്യത്തിനും സമാധാനപരമായ പ്രതിഷേധങ്ങൾക്കും ഭരണഘടന ഉറപ്പുനൽകുന്ന നിയമപരമായ സംരക്ഷണം ദുർബലമാകുകയാണോയെന്ന ആശങ്ക പങ്കുവെച്ച് സുപ്രീംകോടതി ജഡ്ജി ജസ്റ്റിസ് ഉജ്ജൽ ഭുയാൻ. പ്രതിഷേധിക്കുന്ന വിദ്യാർഥികളെ അറസ്റ്റ് ചെയ്ത് ആഴ്ചകളോളം ജാമ്യം നിഷേധിച്ച് ജയിലിൽ പാർപ്പിക്കുന്നതും കുറ്റകരമല്ലാത്ത ചില പ്രവൃത്തികളുടെ പേരിൽ ആളുകൾ ദീർഘകാലം തടവിൽ കഴിയേണ്ടിവരുന്നതും അടിസ്ഥാന സ്വാതന്ത്ര്യങ്ങൾക്ക് തിരിച്ചടിയാണെന്ന് അദ്ദേഹം പറഞ്ഞു. ഇത്തരം നടപടികൾ അഭിപ്രായ സ്വാതന്ത്ര്യത്തെയും സമാധാനപരമായ പ്രതിഷേധത്തിനുള്ള ഭരണഘടനാപരമായ അവകാശത്തെയും ദുർബലപ്പെടുത്തുന്നതാണെന്നും ജസ്റ്റിസ് ഉജ്ജൽ ഭുയാൻ ചൂണ്ടിക്കാട്ടി.
'സാധാരണ ജനാധിപത്യ പ്രവർത്തനങ്ങൾ പോലും കുറ്റകൃത്യങ്ങളായി കാണുന്നു'
ഭോപ്പാലിലെ നാഷണൽ ലോ ഇൻസ്റ്റിറ്റ്യൂട്ട് യൂണിവേഴ്സിറ്റിയിൽ നടന്ന അഞ്ചാമത് ജസ്റ്റിസ് ജി.പി. സിംഗ് മെമ്മോറിയൽ ലക്ചറിനിടെയായിരുന്നു ജസ്റ്റിസ് ഉജ്ജൽ ഭുയാന്റെ പരാമർശം. ജനാധിപത്യത്തിന്റെ ആത്മാവ് സംവാദവും വിയോജിപ്പുമാണെന്നും സമാധാനപരമായി പ്രതിഷേധിക്കാനുള്ള അവകാശം ഓരോ പൗരന്റെയും അടിസ്ഥാന അവകാശമാണെന്നും അദ്ദേഹം പറഞ്ഞു. എന്നാൽ ഇന്ന് സാധാരണ ജനാധിപത്യ പ്രവർത്തനങ്ങൾ പോലും പലപ്പോഴും കുറ്റകൃത്യങ്ങളായി കണക്കാക്കപ്പെടുന്ന സാഹചര്യമാണുള്ളതെന്ന് അദ്ദേഹം നിരീക്ഷിച്ചു. അവകാശങ്ങൾക്കായി പ്രതിഷേധിക്കുന്ന വിദ്യാർഥികളെ അറസ്റ്റ് ചെയ്യുകയും 30 മുതൽ 40 ദിവസം വരെ ജാമ്യം പോലും നിഷേധിക്കുകയും ചെയ്യുന്ന സംഭവങ്ങൾ വർധിച്ചുവരുന്നതായും ജസ്റ്റിസ് ഉജ്ജൽ ഭുയാൻ ആശങ്ക പ്രകടിപ്പിച്ചു.
'ചിക്കൻ ബിരിയാണി കഴിക്കുന്നത് കുറ്റകൃത്യമാണെന്ന് ഞാൻ വിശ്വസിക്കുന്നില്ല'
ഗംഗാ നദിയിൽ ബോട്ടുയാത്രയ്ക്കിടെ ചിക്കൻ ബിരിയാണി കഴിച്ചെന്നാരോപിച്ച് അറസ്റ്റ് ചെയ്യപ്പെട്ട യുവാക്കളുടെ കേസും ജസ്റ്റിസ് ഉജ്ജൽ ഭുയാൻ പ്രസംഗത്തിനിടെ ഉദാഹരണമായി പരാമർശിച്ചു. "ചിക്കൻ ബിരിയാണി കഴിക്കുന്നത് കുറ്റകൃത്യമാണെന്ന് ഞാൻ വിശ്വസിക്കുന്നില്ല. ഗംഗാ നദിക്ക് മുകളിൽ ചിക്കൻ കഴിക്കുന്നത് വിലക്കുന്ന നിയമവും നിലവിലില്ല. എന്നിട്ടും അത്തരം കേസിൽ ആളുകളെ അറസ്റ്റ് ചെയ്ത് മൂന്ന് മാസം ജാമ്യം നിഷേധിക്കുന്നത് എങ്ങനെ ന്യായീകരിക്കാനാകും?" എന്ന് അദ്ദേഹം ചോദിച്ചു. ഇത്തരത്തിലുള്ള സംഭവങ്ങൾ ജാമ്യം നൽകുന്നതുമായി ബന്ധപ്പെട്ട കോടതികളുടെ സമീപനത്തെക്കുറിച്ച് സമൂഹത്തിൽ ഗൗരവമായ ചോദ്യങ്ങൾ ഉയർത്തുന്നതായും ജസ്റ്റിസ് ഭുയാൻ അഭിപ്രായപ്പെട്ടു.
'ജാമ്യത്തിന് ശേഷവും കോടതികള് പൗരന്റെ അവകാശങ്ങൾ പരിമിതപ്പെടുത്തുന്നു'
ജാമ്യം അനുവദിച്ച ശേഷവും കോടതികൾ ചുമത്തുന്ന ചില നിബന്ധനകളെയും ജസ്റ്റിസ് ഉജ്ജൽ ഭുയാൻ വിമർശിച്ചു. ചില വിദ്യാർഥി പ്രവർത്തകർക്ക് ജാമ്യം അനുവദിച്ചെങ്കിലും പാസ്പോർട്ട് സമർപ്പിക്കണം, നേരിട്ടോ ഓൺലൈനായോ പൊതുയോഗങ്ങളിൽ പങ്കെടുക്കുകയോ പ്രസംഗിക്കുകയോ ചെയ്യരുത് തുടങ്ങിയ വ്യവസ്ഥകൾ ഏർപ്പെടുത്തിയ സംഭവങ്ങൾ അദ്ദേഹം ഉദാഹരണമായി ചൂണ്ടിക്കാട്ടി. ഇത്തരം നിബന്ധനകൾ വ്യക്തികളുടെ അഭിപ്രായ സ്വാതന്ത്ര്യത്തെയും പൊതുജീവിതത്തിൽ സജീവമായി പങ്കെടുക്കാനുള്ള ഭരണഘടനാപരമായ അവകാശത്തെയും ഗണ്യമായി പരിമിതപ്പെടുത്തുന്നതാണെന്ന് അദ്ദേഹം അഭിപ്രായപ്പെട്ടു. വിരമിച്ച ശേഷം മുൻ ജഡ്ജിമാർ രാഷ്ട്രീയത്തിൽ പ്രവേശിക്കുന്ന പ്രവണതയെയും ജസ്റ്റിസ് ഭുയാൻ വിമർശിച്ചു. ഇത്തരത്തിലുള്ള നീക്കങ്ങൾ ഭരണഘടന ഉറപ്പുനൽകുന്ന അധികാര വിഭജന തത്വത്തിന് വിരുദ്ധമാണെന്നായിരുന്നു അദ്ദേഹത്തിന്റെ നിരീക്ഷണം.
'പലസ്തീനെ അംഗീകരിച്ച രാജ്യമാണ് ഇന്ത്യ'
ഗാസയിലെ മനുഷ്യാവകാശ പ്രശ്നങ്ങളുമായി ബന്ധപ്പെട്ട പ്രതിഷേധത്തിന് അനുമതി നിഷേധിച്ച ബോംബെ ഹൈക്കോടതിയുടെ സമീപനത്തെയും ജസ്റ്റിസ് ഉജ്ജൽ ഭുയാൻ വിമർശിച്ചു. ഇന്ത്യ ഔദ്യോഗികമായി പലസ്തീനെ അംഗീകരിച്ച രാജ്യമാണെന്നും രാജ്യത്ത് പലസ്തീൻ എംബസി പ്രവർത്തിക്കുന്നുണ്ടെന്നും അദ്ദേഹം ഓർമിപ്പിച്ചു. ഗാസയിലെ സംഭവവികാസങ്ങൾ അന്താരാഷ്ട്ര തലത്തിൽ അന്വേഷണം നേരിടുന്ന സാഹചര്യത്തിൽ, അതുമായി ബന്ധപ്പെട്ട വിഷയങ്ങളിൽ സമാധാനപരമായി അഭിപ്രായം പ്രകടിപ്പിക്കാനുള്ള അവസരം പൗരന്മാർക്ക് ലഭിക്കേണ്ടതുണ്ടെന്നും ജസ്റ്റിസ് ഭുയാൻ അഭിപ്രായപ്പെട്ടു.
'ജാമ്യം വ്യവസ്ഥകളില് കോടതികള് കൂടുതല് സൂക്ഷമത പുലര്ത്തണം'
അഭിപ്രായ സ്വാതന്ത്ര്യവും സമാധാനപരമായി പ്രതിഷേധിക്കാനുള്ള അവകാശവും ഭരണഘടന ഉറപ്പുനൽകുന്ന അടിസ്ഥാന മൂല്യങ്ങളാണെന്ന് ജസ്റ്റിസ് ഉജ്ജൽ ഭുയാൻ പറഞ്ഞു. ജാമ്യം അനുവദിക്കുന്നതിലും അതുമായി ബന്ധപ്പെട്ട വ്യവസ്ഥകൾ നിശ്ചയിക്കുന്നതിലും കോടതികൾ കൂടുതൽ സൂക്ഷ്മവും ഭരണഘടനാപരമായ അവകാശങ്ങളെ മാനിക്കുന്നതുമായ സമീപനം സ്വീകരിക്കേണ്ടതുണ്ടെന്നും അദ്ദേഹം അഭിപ്രായപ്പെട്ടു. നീതിന്യായ വ്യവസ്ഥയുടെ ഇത്തരം തീരുമാനങ്ങൾ ജനാധിപത്യാവകാശങ്ങളുടെ സംരക്ഷണവുമായി നേരിട്ട് ബന്ധപ്പെട്ടിരിക്കുന്നതിനാൽ അവയെ കൂടുതൽ ഗൗരവത്തോടെ വിലയിരുത്തണമെന്നും അദ്ദേഹം കൂട്ടിച്ചേർത്തു. 'ബുൾഡോസർ രാജ്' എന്ന പ്രവണതയെയും ജസ്റ്റിസ് ഭുയാൻ വിമർശിച്ചു. വിവിധ സുപ്രീംകോടതി വിധികൾ ഉദ്ധരിച്ചുകൊണ്ടാണ് അദ്ദേഹം തന്റെ നിലപാടുകൾ വിശദീകരിച്ചതെന്നതും ശ്രദ്ധേയമാണ്.
Supreme Court Judge Justice Ujjal Bhuyan has expressed concern that the constitutional protections for freedom of speech and peaceful protest in India may be weakening. He said that arresting protesting students, denying them bail for weeks, and keeping them in jail, as well as forcing people to remain incarcerated for long periods over acts that are not criminal, undermine fundamental freedoms. Justice Bhuyan added that such actions weaken the constitutional rights to free speech and peaceful protest.