വാഷിങ്ടൺ: റഷ്യയിൽ നിന്ന് ക്രൂഡ് ഓയിൽ വാങ്ങുന്നതിനായി ഇന്ത്യയ്ക്ക് അനുവദിച്ചിരുന്ന താൽക്കാലിക ഇളവ് തുടരില്ലെന്ന് അമേരിക്ക അറിയിച്ചു. യുഎസ് ട്രഷറി സെക്രട്ടറി സ്കോട്ട് ബെസെന്റാണ് ഇന്ത്യൻ റിഫൈനറികൾക്ക് നൽകിയിരുന്ന പ്രത്യേക അനുമതി പുതുക്കില്ലെന്ന നിലപാട് വ്യക്തമാക്കിയിരിക്കുന്നത്.
ഇറാനിൽ നിന്നുള്ള എണ്ണ ഇറക്കുമതിയുമായി ബന്ധപ്പെട്ട ഇളവുകളും അവസാനിപ്പിക്കുന്നതായി യുഎസ് അറിയിച്ചു. ഇറാനിയൻ എണ്ണയ്ക്ക് അനുവദിച്ചിരുന്ന 30 ദിവസത്തെ സമയം ഏപ്രിൽ 19ന് അവസാനിക്കും. റഷ്യൻ എണ്ണയ്ക്കുള്ള ഇളവ് ഇതിനകം അവസാനിച്ചതായും അമേരിക്കൻ വൃത്തങ്ങൾ അറിയിച്ചു.
ഇതിനകം കടലിൽ കയറ്റി അയച്ചിരിക്കുന്ന ചരക്കുകൾക്ക് മാത്രമായിരിക്കും നിലവിലെ ഇളവ് ബാധകമാകുക. പുതിയ ഇടപാടുകൾക്ക് അനുമതി ഉണ്ടാകില്ല. ഇതിലൂടെ റഷ്യയ്ക്ക് കൂടുതൽ സാമ്പത്തിക നേട്ടം ലഭിക്കില്ലെന്ന വിലയിരുത്തലും യുഎസ് മുന്നോട്ട് വെച്ചു.
ഇന്ത്യ ഭാവിയിൽ അമേരിക്കയിൽ നിന്നുള്ള എണ്ണ ഇറക്കുമതി വർധിപ്പിക്കുമെന്ന പ്രതീക്ഷയും യുഎസ് ട്രഷറി വിഭാഗം പ്രകടിപ്പിച്ചു. ഇറാനുമായി ബന്ധപ്പെട്ട സംഘർഷ സാഹചര്യങ്ങൾക്കിടെ ആഗോള ഊർജ്ജ വിപണിയിലെ അനിശ്ചിതത്വം കണക്കിലെടുത്താണ് തീരുമാനം എടുത്തതെന്ന് അധികൃതർ സൂചിപ്പിച്ചു.
English Summary: The U.S. has decided not to renew temporary waivers that allowed India to import crude oil from Russia and Iran. Indian refiners will no longer receive special permissions, and only shipments already in transit will be exempt. The move aims to limit financial gains for Russia and comes amid global energy uncertainties, with the U.S. expecting India to increase oil imports from America