കഴിഞ്ഞ മാസം വിദ്യാർഥി പ്രക്ഷോഭം കൊടുമ്പിരി കൊണ്ടിരുന്ന സമയത്ത്, ഫ്രാൻസിൽ നിന്ന് വന്ന കുറച്ച് ചിത്രങ്ങൾ കാര്യമായി ശ്രദ്ധിക്കപ്പെട്ടിരുന്നു. സമരത്തിൽ നിന്ന് കുട്ടികളെ മാതാപിതാക്കൾ വലിച്ചിഴച്ച് കൊണ്ടുപോകുന്ന ചിത്രങ്ങൾ. അതിനൊരു കാരണവുമുണ്ടായിരുന്നു. പ്രതിഷേധങ്ങളിൽ പൊതുമുതൽ നശിപ്പിക്കപ്പെട്ടാൽ അതിന്റെ പൂർണ ഉത്തരവാദിത്തം കുട്ടികളുടെ മാതാപിതാക്കൾക്കായിരിക്കും. അതുകൊണ്ടു തന്നെ മാതാപിതാക്കളെ ന്യായീകരിച്ച് എല്ലാ ഭാഗത്ത് നിന്നും അഭിപ്രായങ്ങളുമെത്തി.
ഈ സംഭവങ്ങൾക്ക് ഏകദേശം ഒരാഴ്ചയ്ക്ക് ശേഷം സമാന രീതിയിൽ ഇറ്റലിയിലും വിദ്യാർഥി പ്രതിഷേധം പൊട്ടിപ്പുറപ്പെട്ടു. അതിലും വിദ്യാർഥികളുടെ രോഷം ഒട്ടും കുറവായിരുന്നില്ല. പിന്നാലെ ഇറ്റലിയും ആ ഉത്തരവിറക്കി. അക്രമമുണ്ടാക്കുന്ന വിദ്യാർഥികളുടെ മാതാപിതാക്കളിൽ നിന്ന് കനത്ത തുക പിഴയായി ഈടാക്കും. കൂടാതെ വിദ്യാർഥികൾക്ക് അഞ്ച് വർഷം വരെ കഠിന തടവുമുണ്ടാകും. ഈ നിയമം കൊണ്ട് വിദ്യാർഥികളെ പിടിച്ചടക്കാൻ കഴിഞ്ഞില്ലെങ്കിലും നിയമം അന്താരാഷ്ട്ര തലത്തിൽ ചർച്ചകൾക്ക് വിധേയമായി.
വർധിച്ചു വരുന്ന ജീവിതച്ചെലവ്, സ്കൂളുകളിലെ അടിസ്ഥാന സൌകര്യമില്ലായ്മ എന്നിവയൊക്കെ ചൂണ്ടിക്കാട്ടിയാണ് രണ്ട് രാജ്യങ്ങളിലും വിദ്യാർഥികൾ പ്രതിഷേധവുമായി രംഗത്തെത്തിയത്. പ്രക്ഷോഭങ്ങളിൽ രണ്ടിടത്തും വ്യാപക നാശനഷ്ടങ്ങളുണ്ടായി. തെരുവുകൾ കത്തി. സേനകളെ അധികമായി വിനിയോഗിക്കേണ്ടി വന്നു. ഇതിന് പിന്നാലെയാണ് ആ കടുത്ത തീരുമാനത്തിലേക്ക് ഇറ്റലി കടക്കുന്നത്.
ഇറ്റലിയിലെ പുതിയ നിയമം പറയുന്നതെന്ത്?
സുരക്ഷ ശക്തമാക്കുന്നതിനായി വർഷാവസാനം വരെ 500 സൈനികരെ വിന്യസിക്കാനാണ് ഇറ്റലിയുടെ തീരുമാനം. പ്രധാന കേന്ദ്രങ്ങളുടെ സുരക്ഷ ഉറപ്പാക്കുക, ലോഹങ്ങൾ, കമ്പികൾ, പടക്കങ്ങൾ തുടങ്ങിയ അപകടകരമായ വസ്തുക്കൾ ഉപയോഗിച്ച് അഞ്ചിലധികം ആളുകൾ ഒത്തുകൂടി അക്രമങ്ങളിൽ പങ്കെടുക്കുന്നത് തടയുക എന്നിവയാണ് പുതിയ നിയമത്തിലൂടെ ലക്ഷ്യമിടുന്നത്. ഇതിനായി 'പൊതുപ്രകടനങ്ങളിലെ അക്രമങ്ങളിൽ ഏർപ്പെടൽ' എന്ന പേരിൽ പുതിയ കുറ്റകൃത്യവും സർക്കാർ ഉൾപ്പെടുത്തിയിട്ടുണ്ട്. ഇതിൽ ഉൾപ്പെടുന്നവർക്ക് അഞ്ച് വർഷം വരെ തടവും 20,000 യൂറോ വരെ പിഴയും ലഭിക്കാം.
കുട്ടികൾ വരുത്തുന്ന നാശനഷ്ടങ്ങൾക്ക് മാതാപിതാക്കൾ സാമ്പത്തികമായി ഉത്തരവാദികളായിരിക്കുമെന്ന You break it, you buy it എന്ന തത്വം പുതിയ നിയമത്തിൽ ഉൾപ്പെടുത്തിയിട്ടുണ്ട്. ഇതിനായി മാതാപിതാക്കളുടെ സ്വത്തുക്കളിൽ നിന്നോ കുടുംബത്തിന് ലഭിക്കുന്ന സർക്കാർ ആനുകൂല്യങ്ങളിൽ നിന്നോ തുക ഈടാക്കാൻ സംസ്ഥാനത്തിന് അധികാരമുണ്ട്.
കുറ്റകൃത്യങ്ങൾ ചെയ്തിട്ടില്ലെങ്കിൽ പോലും, അപകടകാരികളാണെന്ന് തെളിവുണ്ടെങ്കിൽ 14 നും 18 നും ഇടയിൽ പ്രായമുള്ള കുട്ടികളെ ഭരണപരമായ തടങ്കലിൽ വെയ്ക്കാം. നേരത്തെ മുതിർന്നവർക്ക് മാത്രമായിരുന്നു ഈ നിയമം ബാധകമായിരുന്നത്.
അക്രമസ്വഭാവമുള്ള പൊതുപ്രകടനങ്ങൾ സംഘടിപ്പിക്കാൻ സമൂഹമാധ്യമങ്ങളോ ഓൺലൈൻ പ്ലാറ്റ്‌ഫോമുകളോ ഉപയോഗിക്കുന്നവർക്ക് 12 വർഷം വരെ തടവുശിക്ഷ ലഭിക്കുന്ന വ്യവസ്ഥയും പുതിയ നിയമത്തിലുണ്ട്.
ഫ്രാൻസ് മുൻകൂട്ടി കണ്ടു...
ഫ്രാൻസിൽ നേരത്തേ തന്നെ നിലവിലുള്ള നിയമമാണിത്. സിവിൽ കോഡിലെ ആർട്ടിക്കിൾ 1242 പ്രകാരം, കുട്ടികളുണ്ടാക്കുന്ന നാശനഷ്ടങ്ങൾക്ക് നഷ്ടപരിഹാരം വഹിക്കേണ്ടത് മാതാപിതാക്കളോ രക്ഷാകർത്താക്കളോ ആയിരിക്കും.
കുട്ടികൾ വരുത്തുന്ന നാശനഷ്ടങ്ങൾക്ക് മാതാപിതാക്കളിൽ നിന്നുള്ള നഷ്ടപരിഹാരം സിവിൽ നടപടികളിലൂടെ ഈടാക്കാം. സിവിൽ ലയബിലിറ്റി ഇൻഷുറൻസ് (ഇത് സാധാരണയായി വീട്ടു ഇൻഷുറൻസുമായി ബന്ധപ്പെട്ടിരിക്കുന്നു) ഇതിൽ ഉൾക്കൊള്ളുന്നില്ലെങ്കിൽ, പോളിസി വ്യവസ്ഥകൾക്ക് വിധേയമായി മാതാപിതാക്കളുടെ സ്വത്തുക്കൾ കണ്ടുകെട്ടുന്നതിലൂടെയും ഈ തുക ഈടാക്കാവുന്നതാണ്.
വെള്ളിയാഴ്ച ഫ്രഞ്ച് റേഡിയോ സ്റ്റേഷനായ RFI റിപ്പോർട്ട് ചെയ്തതനുസരിച്ച്, അക്രമ സമരങ്ങൾക്ക് മറുപടിയായി റയോട്ടേഴ്സ് പേ (Rioters Pay) എന്ന പേരിൽ പുതിയൊരു ബില്ലും സർക്കാർ അവതരിപ്പിക്കുന്നുണ്ട്.
ഈ ബിൽ പാസായാൽ പൊതുമുതൽ നശിപ്പിച്ചതായി തെളിയിക്കപ്പെട്ടാൽ 10,000 യൂറോ നഷ്ടപരിഹാരമായി നൽകേണ്ടി വന്നേക്കാം. സംഘത്തിലുള്ള ഒരാൾ കുറ്റം ചെയ്തില്ലെങ്കിൽ പോലും നഷ്ടപരിഹാരം നൽകേണ്ടി വരും. ഒക്ടോബർ 27-ന് ഈ കരട് ബിൽ ചർച്ച ചെയ്യാൻ സർക്കാർ നിശ്ചയിച്ചിട്ടുണ്ട്.
ഇത്തരം നിയമങ്ങൾ ഫ്രാൻസിലും ഇറ്റലിയിലും മാത്രമല്ല എന്നതാണ് ഏറ്റവും ശ്രദ്ധേയം. സ്വീഡൻ, യുഎസ് എന്നിവിടങ്ങളിലും കുട്ടികളുടെ അക്രമസ്വഭാവങ്ങൾക്ക് മാതാപിതാക്കൾ പിഴയടയ്ക്കണമെന്ന് വ്യവസ്ഥ ചെയ്യുന്ന നിയമമുണ്ട്. പ്രായപൂർത്തിയാകാത്ത കുട്ടികൾ പൊതുമുതൽ നശിപ്പിച്ചാൽ അതിന്റെ പൂർണ ഉത്തരവാദിത്തം മാതാപിതാക്കൾക്കായിരിക്കുമെന്നാണ് ഈ നിയമങ്ങളെല്ലാം ചൂണ്ടിക്കാട്ടുന്നത്.
പ്രശ്നം തന്നെയാണ്!
കുട്ടികൾ പൊതുമുതൽ നശിപ്പിക്കുന്നതോ അവർ നടത്തുന്ന അക്രമങ്ങൾക്കോ മാതാപിതാക്കൾ സാമ്പത്തിക നഷ്ടപരിഹാരം നൽകണമെന്ന നിയമപരമായ വ്യവസ്ഥ ഫ്രാൻസിലും ഇറ്റലിയിലും ശക്തമാക്കുമ്പോൾ, അത് നിയമപരവും സാമൂഹികവുമായ വലിയ തർക്കങ്ങൾക്കും ആശങ്കകൾക്കും വഴിവെക്കുന്നുണ്ട്.
നിയമവ്യവസ്ഥയുടെ അടിസ്ഥാന തത്വം 'കുറ്റം ചെയ്തയാൾ മാത്രമാണ് അതിന് ശിക്ഷിക്കപ്പെടേണ്ടത്' (Individual Responsibility) എന്നതാണ്. കുട്ടികൾ ചെയ്യുന്ന കുറ്റത്തിന് അവരെ നേരിട്ട് ശിക്ഷിക്കുന്നതിന് പകരം, കുറ്റം ചെയ്യാത്ത മാതാപിതാക്കളെ സാമ്പത്തികമായി ബുദ്ധിമുട്ടിക്കുന്നത് സാർവത്രിക നിയമതത്വങ്ങൾക്ക് എതിരാണെന്ന് നിയമവിദഗ്ധർ ചൂണ്ടിക്കാണിക്കുന്നു.
സമരങ്ങളിലോ അക്രമങ്ങളിലോ പങ്കാളികളാകുന്ന കുട്ടികളുടെ മാതാപിതാക്കൾക്ക് വൻതുക സാമ്പത്തിക പിഴയോ നഷ്ടപരിഹാരമോ ചുമത്തുമ്പോൾ, അത് പലപ്പോഴും പാവപ്പെട്ട അല്ലെങ്കിൽ സാധാരണക്കാരായ കുടുംബങ്ങളെയാണ് ബാധിക്കുന്നത്. സ്വത്ത് കണ്ടുകെട്ടൽ, അല്ലെങ്കിൽ സർക്കാർ നൽകുന്ന സാമൂഹിക സുരക്ഷാ ആനുകൂല്യങ്ങളും സബ്‌സിഡികളും വെട്ടിക്കുറയ്ക്കൽ തുടങ്ങിയ നടപടികൾ ആ കുടുംബത്തെ പട്ടിണിയിലേക്കും കടുത്ത കടക്കെണിയിലേക്കും തള്ളിവിടും.
14 മുതൽ 17 വരെ പ്രായമുള്ള കൗമാരക്കാർ വീടിന് പുറത്തുപോയി ചെയ്യുന്ന കാര്യങ്ങളിൽ 24 മണിക്കൂറും നിരീക്ഷണം നടത്തുക മാതാപിതാക്കൾക്ക് അപ്രായോഗികമാണ്. ജോലി ചെയ്യുന്ന രക്ഷിതാക്കൾക്ക് കുട്ടികളുടെ എല്ലാ നീക്കങ്ങളും നിയന്ത്രിക്കാനാവില്ല. കുട്ടി തെറ്റ് ചെയ്തത് മാതാപിതാക്കളുടെ ശ്രദ്ധക്കുറവ് കൊണ്ടല്ലെങ്കിൽ പോലും അവർ ശിക്ഷിക്കപ്പെടുന്നു.
ഫ്രാൻസ് ചർച്ച ചെയ്യുന്ന 'Rioters Pay' ബില്ലിലെ 'കൂട്ടായ സിവിൽ ഉത്തരവാദിത്തം' (Collective Civil Liability) പോലുള്ള വ്യവസ്ഥകൾ കൂടുതൽ സങ്കീർണ്ണമാണ്. ഒരു ഗ്രൂപ്പിൽ നിൽക്കുന്ന ഒരാൾ നേരിട്ട് നാശനഷ്ടം വരുത്തിയില്ലെങ്കിൽ പോലും, ആ സംഘത്തിലുണ്ടായിരുന്നു എന്ന കാരണത്താൽ മുഴുവൻ നഷ്ടപരിഹാര തുകയും നൽകേണ്ടി വരുന്നു. ഇത് നിരപരാധികളായ കുട്ടികളെയും അവരുടെ കുടുംബങ്ങളെയും പ്രതിസന്ധിയിലാക്കും
ഭരണകൂടത്തിന്റെ പോളിസികൾക്കെതിരെയോ വിലക്കയറ്റത്തിനെതിരെയോ സമാധാനപരമായി പ്രതിഷേധിക്കാൻ ഇറങ്ങുന്ന യുവജനങ്ങളെയും വിദ്യാർത്ഥികളെയും ഭയപ്പെടുത്താൻ ഇത് കാരണമാകുന്നു. മാതാപിതാക്കൾക്ക് പിഴ ലഭിക്കുമെന്ന ഭയം കാരണം നിയമപരമായ സമാധാനപരമായ പ്രക്ഷോഭങ്ങളിൽ നിന്ന് പോലും ആളുകൾ പിൻവാങ്ങേണ്ടി വരുന്നു.
യുവജനങ്ങൾ അക്രമത്തിലേക്ക് തിരിയുന്നതിന് പിന്നിലെ യഥാർത്ഥ കാരണങ്ങളായ തൊഴിലില്ലായ്മ, സാമ്പത്തിക അസമത്വം, വിവേചനം, വിദ്യാഭ്യാസ രംഗത്തെ പ്രശ്നങ്ങൾ എന്നിവ പരിഹരിക്കുന്നതിന് പകരം, മാതാപിതാക്കളെ ശിക്ഷിച്ചുകൊണ്ട് പ്രശ്നം ലഘൂകരിക്കാൻ നോക്കുന്നത് താൽക്കാലിക തന്ത്രം മാത്രമാണെന്നാണ് സാമൂഹിക പ്രവർത്തകർ വാദിക്കുന്നത്.
ചുരുക്കത്തിൽ, ക്രമസമാധാനം പാലിക്കാനും പൊതുമുതൽ സംരക്ഷിക്കാനും ഇത്തരം കർശന നിയമങ്ങൾ അത്യന്താപേക്ഷിതമാണെന്ന് ഭരണകൂടങ്ങൾ വാദിക്കുമ്പോൾ, സാമ്പത്തികമായി പിന്നാക്കം നിൽക്കുന്ന കുടുംബങ്ങളെ തകർക്കാനും വ്യക്തിസ്വാതന്ത്ര്യത്തെയും പ്രതിഷേധങ്ങളെയും അടിച്ചമർത്താനും ഇത്തരം നിയമങ്ങൾ ദുരുപയോഗം ചെയ്യപ്പെടുമെന്നാണ് പ്രധാന വിമർശനം.
Last month, as student protests intensified in France, several images from the country drew widespread attention. They showed parents dragging their children away from protests. There was a reason behind this. If public property was damaged during the protests, the children's parents would be held fully responsible. This led to widespread support for the parents, with people from all sides coming forward to defend them.