സംസ്ഥാനത്ത് വൈദ്യുതി ആവശ്യകത ഓരോ വർഷവും വർധിക്കുമ്പോഴും അതിനനുസരിച്ച് ആഭ്യന്തര ഉത്പാദനം ഉയരാത്തത് കേരളത്തിന്റെ ഊർജമേഖലയ്ക്ക് വലിയ വെല്ലുവിളിയാകുന്നു. കാലാവസ്ഥയിലെ മാറ്റങ്ങൾ, കടുത്ത ചൂട്, എയർ കണ്ടീഷണറുകളുടെ വർധിച്ച ഉപയോഗം, ഗാർഹിക വൈദ്യുത ഉപകരണങ്ങളുടെ വ്യാപനം എന്നിവയെല്ലാം ഉപഭോഗം റെക്കോർഡ് നിലവാരത്തിലെത്താൻ കാരണമായിട്ടുണ്ട്. മഴക്കാലത്തുപോലും വൈദ്യുതി നിയന്ത്രണം ഏർപ്പെടുത്തേണ്ട സാഹചര്യം ഉണ്ടായത് പ്രതിസന്ധിയുടെ ഗൗരവം വ്യക്തമാക്കുന്നു.
കഴിഞ്ഞ അഞ്ച് വർഷത്തിനിടെ കേരളത്തിലെ വൈദ്യുതി ഉപഭോഗത്തിൽ ഏകദേശം 800 കോടി യൂണിറ്റിന്റെ വർധനയുണ്ടായെന്നാണ് കെ.എസ്.ഇ.ബി കണക്കുകൾ സൂചിപ്പിക്കുന്നത്. 2021-22 സാമ്പത്തിക വർഷത്തിൽ 2,349 കോടി യൂണിറ്റായിരുന്ന വൈദ്യുതി വിൽപ്പന 2025-26ൽ 3,147 കോടി യൂണിറ്റായി ഉയർന്നു. 2026-27 സാമ്പത്തിക വർഷത്തിൽ ഇത് 3,500 കോടി യൂണിറ്റിലെത്തുമെന്നാണ് പ്രതീക്ഷ.
വൈദ്യുതി ആവശ്യകത ഉയരുന്നതിന് പിന്നിൽ ഗാർഹിക മേഖലയിലെ ഉപകരണങ്ങളുടെ ഉപയോഗത്തിലുണ്ടായ മാറ്റവും പ്രധാന ഘടകമാണ്. കഴിഞ്ഞ അഞ്ച് വർഷത്തിനിടെ സംസ്ഥാനത്ത് ഏകദേശം 30 ലക്ഷം എയർ കണ്ടീഷണറുകൾ വിറ്റുപോയതായാണ് കണക്ക്. 2023ൽ 4.8 ലക്ഷം എ.സി യൂണിറ്റുകൾ വിറ്റപ്പോൾ 2024ൽ വിൽപ്പന ഏഴ് ലക്ഷം കടന്നു. 2025ലും അഞ്ച് ലക്ഷം എ.സി യൂണിറ്റുകൾ വിപണിയിലെത്തി.
വിൽക്കുന്ന എ.സി.കളിൽ വലിയൊരു പങ്കും ഒരു ടൺ ശേഷിയുള്ളവയാണ്. 1,200 വാട്ട് ശേഷിയുള്ള ഒരു എ.സി ഒരു മണിക്കൂർ പ്രവർത്തിപ്പിക്കുമ്പോൾ ഏകദേശം 1.2 യൂണിറ്റ് വൈദ്യുതി ചെലവാകും. ഇതിന് പുറമെ വാഷിങ് മെഷീനുകൾ, മൈക്രോവേവ് ഓവനുകൾ, വലിയ ടെലിവിഷനുകൾ തുടങ്ങിയവയുടെ ഉപയോഗവും വൈദ്യുതി ആവശ്യകത വർധിപ്പിക്കുന്നു. പ്രതിവർഷം ശരാശരി നാല് ലക്ഷം പുതിയ വൈദ്യുതി കണക്ഷനുകൾ നൽകുന്നതും ഉപഭോഗം ഉയരാൻ കാരണമാകുന്നു.
സംസ്ഥാനത്തെ വാർഷിക വൈദ്യുതി ഉപഭോഗം ഏകദേശം 27,581 ജിഗാവാട്ട് മണിക്കൂറായി ഉയർന്നിട്ടുണ്ട്. പ്രതിദിന ശരാശരി ഉപഭോഗം 93.6 ദശലക്ഷം യൂണിറ്റിന് മുകളിലാണ്. മുൻവർഷങ്ങളെ അപേക്ഷിച്ച് പ്രതിദിന ഉപഭോഗത്തിൽ ഏകദേശം ഒരു കോടി യൂണിറ്റിന്റെ വർധനയും രേഖപ്പെടുത്തിയിട്ടുണ്ട്.
ഗാർഹിക ഉപഭോക്താക്കളാണ് വൈദ്യുതി ആവശ്യകതയിൽ പ്രധാന പങ്കുവഹിക്കുന്നത്. പ്രത്യേകിച്ച് വൈകുന്നേരങ്ങളിൽ വീടുകളിലും സ്ഥാപനങ്ങളിലും ഒരേസമയം വൈദ്യുതി ഉപയോഗം ഉയരുന്നത് വിതരണ സംവിധാനത്തിന് വലിയ സമ്മർദമുണ്ടാക്കുന്നു. ഈ സമയത്തെ അധിക ആവശ്യകതയാണ് കെ.എസ്.ഇ.ബി നേരിടുന്ന പ്രധാന വെല്ലുവിളികളിലൊന്ന്.
കേരളത്തിന്റെ പ്രധാന ആഭ്യന്തര വൈദ്യുതി സ്രോതസ്സ് ജലവൈദ്യുത പദ്ധതികളാണ്. എന്നാൽ മഴയുടെ ലഭ്യതയിലുണ്ടാകുന്ന വ്യതിയാനവും അണക്കെട്ടുകളിലെ ജലനിരപ്പിലെ കുറവും ഉത്പാദനത്തെ ബാധിക്കുന്നു. ആവശ്യമായ അളവിൽ വെള്ളം ലഭിക്കാത്ത സാഹചര്യത്തിൽ ജലവൈദ്യുത നിലയങ്ങൾക്ക് പൂർണശേഷിയിൽ പ്രവർത്തിക്കാനാകില്ല.
ആഭ്യന്തര ഉത്പാദനം വർധിപ്പിക്കാൻ കഴിയാത്തതോടെ പുറത്തുനിന്ന് വൈദ്യുതി വാങ്ങുന്നതിനെ ആശ്രയിക്കേണ്ടിവരുന്നു. സംസ്ഥാനത്തിന്റെ മൊത്തം ആവശ്യകതയുടെ മുക്കാൽ ഭാഗത്തോളം വൈദ്യുതി മറ്റ് സംസ്ഥാനങ്ങളിൽ നിന്നും വിവിധ വിപണികളിൽ നിന്നുമാണ് എത്തിക്കുന്നത്.
വൈദ്യുതി ആവശ്യകതയും ലഭ്യതയും തമ്മിലുള്ള അന്തരം വർധിക്കുമ്പോൾ പവർ എക്സ്ചേഞ്ചുകളെ ആശ്രയിക്കേണ്ട സാഹചര്യമുണ്ടാകുന്നു. പ്രത്യേകിച്ച് വൈകുന്നേരങ്ങളിലെ പീക്ക് സമയങ്ങളിൽ വൈദ്യുതി വാങ്ങുന്നതിന് യൂണിറ്റിന് 10 രൂപയിലധികം നൽകേണ്ടിവരുന്ന സാഹചര്യങ്ങളുണ്ട്. സീസണൽ ആവശ്യകതയും വിപണിയിലെ വിലവ്യതിയാനങ്ങളും ഈ ചെലവ് വർധിപ്പിക്കുന്നു.
ഉയർന്ന വിലയ്ക്ക് വൈദ്യുതി വാങ്ങുന്നത് കെ.എസ്.ഇ.ബിയുടെ സാമ്പത്തിക ബാധ്യത വർധിപ്പിക്കുന്നതിനൊപ്പം ഭാവിയിൽ ഉപഭോക്താക്കൾക്ക് അധിക സാമ്പത്തികഭാരം ഉണ്ടാകാനുള്ള സാധ്യതയും ഉയർത്തുന്നു.
വൈദ്യുതി ബോർഡിന്റെ മുൻകാല സാമ്പത്തിക നഷ്ടമായ 5,000 കോടി രൂപ നാലുവർഷംകൊണ്ട് സർച്ചാർജിലൂടെ തിരിച്ചുപിടിക്കുന്നതിനുള്ള താരിഫ് നയം വൈദ്യുതി റെഗുലേറ്ററി കമ്മിഷൻ വിജ്ഞാപനം ചെയ്തിട്ടുണ്ട്. ഇതിന്റെ ഭാഗമായി 2027 ഏപ്രിൽ ഒന്നുമുതൽ പുതുക്കിയ വൈദ്യുതി നിരക്കും സർച്ചാർജും നിലവിൽ വരും.
2027-28 മുതൽ 2031-32 വരെയുള്ള അഞ്ച് വർഷത്തെ വൈദ്യുതി നിരക്കുകൾ പുതിയ നയത്തിന്റെ അടിസ്ഥാനത്തിലായിരിക്കും നിശ്ചയിക്കുക. ഇതിൽ ആദ്യ നാല് വർഷങ്ങളിലും സർച്ചാർജ് ഈടാക്കാനാണ് വ്യവസ്ഥ. വ്യാവസായിക ഉപഭോക്താക്കൾക്ക് ബില്ലിന്റെ നിശ്ചിത നിരക്കിന്റെ അടിസ്ഥാനത്തിലും മറ്റ് വിഭാഗങ്ങൾക്ക് ഫിക്സഡ് ഡിപ്പോസിറ്റിന്റെയും വൈദ്യുതി നിരക്കിന്റെയും നിശ്ചിത ശതമാനത്തിന്റെ അടിസ്ഥാനത്തിലുമായിരിക്കും സർച്ചാർജ് കണക്കാക്കുക.
പുതിയ താരിഫ് നയത്തിൽ വൈദ്യുതി ഉപഭോഗത്തിന്റെ പീക്ക് സമയത്തിലും മാറ്റം വരുത്തിയിട്ടുണ്ട്. നേരത്തെ വൈകുന്നേരം ആറുമുതൽ രാത്രി 10 വരെയായിരുന്ന പീക്ക് സമയം ഇനി രാത്രി 11.30 വരെ നീളും.
ഈ സമയത്ത് വൈദ്യുതി ഉപയോഗിക്കുന്നവർക്ക് ഉയർന്ന നിരക്ക് ബാധകമാകുന്ന രീതിയിലാണ് ടൈം ഓഫ് ഡേ (TOD) നിരക്കുകൾ ക്രമീകരിക്കുന്നത്. കൂടുതൽ ഉപഭോക്താക്കൾക്ക് ടി.ഒ.ഡി മീറ്ററുകൾ സ്ഥാപിക്കാനും നിർദേശമുണ്ട്. രാവിലെ എട്ടുമുതൽ വൈകുന്നേരം ആറുവരെയും രാത്രി 11.30 മുതൽ രാവിലെ എട്ടുവരെയും കുറഞ്ഞ നിരക്ക് ലഭ്യമാക്കാനാണ് പുതിയ ക്രമീകരണം ലക്ഷ്യമിടുന്നത്.
വൈദ്യുതി ഉത്പാദനശേഷി വർധിപ്പിക്കുന്നതിനൊപ്പം നിലവിലുള്ള ഊർജസ്രോതസ്സുകൾ കാര്യക്ഷമമായി ഉപയോഗിക്കുകയാണ് പ്രതിസന്ധി മറികടക്കാനുള്ള പ്രധാന മാർഗം. പ്രത്യേകിച്ച് പകൽ സമയങ്ങളിൽ ലഭിക്കുന്ന അധിക സൗരോർജം ബാറ്ററികളിൽ സംഭരിച്ച് വൈകുന്നേരങ്ങളിലെ ഉയർന്ന ആവശ്യകതയുള്ള സമയത്ത് ഉപയോഗിക്കാൻ കഴിഞ്ഞാൽ പുറത്തുനിന്ന് ഉയർന്ന വിലയ്ക്ക് വൈദ്യുതി വാങ്ങേണ്ട സാഹചര്യം കുറയ്ക്കാനാകും.
സംസ്ഥാനത്ത് പുരപ്പുറ സൗരോർജ പദ്ധതികൾ വ്യാപകമാകുന്നത് ഊർജമേഖലയ്ക്ക് ആശ്വാസകരമാണ്. കേന്ദ്ര സർക്കാരിന്റെ പി.എം സൂര്യഘർ മുഫ്ത് ബിജിലി യോജന പ്രകാരം മൂന്ന് കിലോവാട്ട് വരെ സൗരോർജ സംവിധാനങ്ങൾ സ്ഥാപിക്കുന്നവർക്ക് പരമാവധി 78,000 രൂപ വരെ സബ്സിഡി ലഭിക്കുന്നതും കൂടുതൽ കുടുംബങ്ങളെ ഈ മേഖലയിലേക്ക് ആകർഷിക്കുന്നുണ്ട്. വൈദ്യുതി ഉപഭോഗം നിയന്ത്രിക്കുക, ആഭ്യന്തര ഉത്പാദനം വർധിപ്പിക്കുക, സൗരോർജ പദ്ധതികൾ പ്രോത്സാഹിപ്പിക്കുക, ബാറ്ററി സംഭരണ സംവിധാനങ്ങൾ വികസിപ്പിക്കുക തുടങ്ങിയ നടപടികൾ ഒരുമിച്ച് നടപ്പാക്കിയാൽ മാത്രമേ കേരളത്തിന് ദീർഘകാലാടിസ്ഥാനത്തിൽ ഊർജസുരക്ഷ ഉറപ്പാക്കാൻ കഴിയൂ. അല്ലാത്തപക്ഷം വർധിച്ചുവരുന്ന ആവശ്യകതയും വൈദ്യുതി വാങ്ങുന്നതിനുള്ള ഉയർന്ന ചെലവും സംസ്ഥാനത്തിന്റെ ഊർജമേഖലയെ കൂടുതൽ സമ്മർദത്തിലാക്കും.
Kerala is facing a severe energy crisis as soaring electricity demand outstrips domestic power generation. The widespread use of air conditioners and household appliances has pushed electricity consumption to record levels. Weather-related setbacks to hydropower generation and the rising cost of purchasing electricity from outside the state have further aggravated the crisis.