തിരുവനന്തപുരം: ബിനീഷ് കോടിയേരിയുടെ പാർട്ടി അംഗത്വം പുതുക്കി നൽകാത്തതുമായി ബന്ധപ്പെട്ട് സൈബറിടങ്ങളിലെ ചർച്ചകളിൽ കുഴങ്ങി സിപിഐഎം. ഇന്ന് രാവിലെ ബിനീഷ് കോടിയേരിയുടെ അംഗത്വം പ്രാദേശിക വിഷയം മാത്രമാണെന്ന് പാർട്ടി സെക്രട്ടറി എംവി ഗോവിന്ദൻ പ്രസ്താവന നടത്തിയതോടെയാണ് ചർച്ചകൾ ശക്തിയാർജിക്കുന്നത്. വിഷയത്തിൽ കർശന നിലപാട് തുടരുമെന്നാണ് സംസ്ഥാന നേതൃത്വം നൽകുന്ന സൂചനയും.
സിപിഐഎം സൈബറിടത്തിൽ ശക്തമായ സാന്നിധ്യങ്ങളിലൊരാളായ ബിനീഷിന് പാർട്ടി ഔദ്യോഗിക അംഗത്വം നൽകി കൂടുതൽ പരിഗണന നൽകണമെന്നായിരുന്നു നേരത്തെ സൈബറിടത്തിൽ ഉയർന്ന ആവശ്യം. എന്നാൽ ബിനീഷിന്റെ അപേക്ഷ പരിഗണിക്കുന്ന സിപിഐഎം തിരുവനന്തപുരം ജില്ലാ കമ്മിറ്റി നാലുതവണയാണ് അംഗത്വം നിഷേധിച്ചിരിക്കുന്നത്. ജില്ലാ കമ്മറ്റിയിലെ ചിലകോണുകളിൽനിന്ന് ബിനീഷിനെ തിരികെയെടുക്കണമെന്ന ആവശ്യമുയർന്നതോടെ വിഷയം സംസ്ഥാനതലത്തിൽ ശ്രദ്ധനേടുകയായിരുന്നു.
2020ൽ ലഹരിക്കടത്തുമായി ബന്ധപ്പെട്ട കള്ളപ്പണക്കേസിൽ അറസ്റ്റിലായതോടെയാണ് ബിനീഷിനെ പാർട്ടി പ്രാഥമിക അംഗത്വത്തിൽനിന്ന് പുറത്താക്കുന്നത്. പാർട്ടി വിഷയത്തിൽ യാതൊരു ഇടപെടലുകളും നടത്തില്ലെന്ന് അന്ന് പ്രഖ്യാപിച്ചിരുന്നു. പിന്നാലെ കോടിയേരി ബാലകൃഷ്ണന് പാർട്ടി സെക്രട്ടറി സ്ഥാനത്തുനിന്ന് മാറിനിൽക്കേണ്ടിവന്നു. കേസുമായി ബന്ധപ്പെട്ട കാര്യങ്ങളിൽ കുടുംബമാണ് നേരിട്ട് ഇടപെട്ടത്. ദീർഘനാളത്തെ ജയിൽവാസത്തിന് ശേഷം 2023ൽകർണാടക ഹൈക്കോടതി കേസിന്റെ തുടർനടപടികൾ സ്റ്റേ ചെയ്തു.
ഇതോടെയാണ് പാർട്ടിയിലേക്ക് തിരികെ വരാൻ ബിനീഷ് ശ്രമങ്ങൾ ആരംഭിച്ചത്. അന്നത്തെ രാഷ്ട്രീയ കോലാഹലങ്ങൾ പക്ഷേ പാർട്ടി അംഗത്വം എടുക്കുന്നതിന് വിലങ്ങുതടിയായി. കുറ്റവിമുക്തനായാലും പാർട്ടിയിലേക്ക് തിരികെയെടുക്കുന്നതിൽ പ്രായോഗിക ബുദ്ധിമുട്ടുകളുണ്ടെന്ന തരത്തിൽ തിരുവനന്തപുരം ജില്ലാ കമ്മറ്റിയിലെ നേതൃനിര നിലപാട് സ്വീകരിച്ചതായിട്ടാണ് സൂചന. ഇക്കാര്യത്തിൽ സംസ്ഥാന കമ്മിറ്റിയുടെ നേരിട്ടുള്ള ഇടപെടലുണ്ടെന്നും അഭ്യൂഹങ്ങളുണ്ട്.
English Summary: Communist Party of India (Marxist) is facing intense discussion on social media after the party reportedly refused to renew the membership of Bineesh Kodiyeri. The controversy deepened after party secretary M. V. Govindan described the issue as a “local matter,” while reports suggest divisions within the party leadership over Bineesh’s return.