

കേരളത്തിൽ നവംബർ മാസം മുതൽ വലിയ രീതിയിലുള്ള വൈദ്യുതി പ്രതിസന്ധിയുണ്ടാകുമെന്ന വാർത്തകളുണ്ടാക്കി ഫയലിൽ ഒപ്പിടീക്കാനുള്ള ശ്രമം നടന്നുവെന്ന് മുഖ്യമന്ത്രി വി ഡി സതീശൻ. എം ജി രാജമാണിക്യം വൈദ്യുതി ബോർഡ് ചെയർമാനായിരുന്ന സമയത്ത് നവംബർ മുതൽ പവർക്കട്ട് ഉണ്ടാകുമെന്ന് പറഞ്ഞ് റിപ്പോർട്ട് ലഭിച്ചിരുന്നെന്നും പിന്നീടുവന്ന ടീം ഇപ്പോൾ പ്രതിസന്ധിയില്ലെന്ന് റിപ്പോർട്ട് നൽകിയതായും മുഖ്യമന്ത്രി പറഞ്ഞു. 'ഇപ്പോൾ തന്നെ ചെയ്യണം എന്ന് പറഞ്ഞ് ഫയൽ അയച്ചാൽ അതിനനുസരിച്ച് ഒപ്പുവെക്കാൻ ഇരിക്കുന്ന ആളല്ല ഞാൻ' എന്നും മുഖ്യമന്ത്രി കൂട്ടിച്ചേർത്തു. വൈദ്യുതി വാങ്ങുന്നതുമായി ബന്ധപ്പെട്ടുയർന്ന വിവാദത്തിലും അദ്ദേഹം പ്രതികരിച്ചു.
'തനിയ്ക്ക് വൈദ്യുതി മന്ത്രി അയച്ച ഒരു ഫയൽ വന്നിരുന്നു. അതിൽ രണ്ട് ഓപ്ഷനുകൾ ഉണ്ടായിരുന്നു. ഒന്ന് ഹിമാചലിന്റെ വൈദ്യുതി, അതിന് 14.50 രൂപ, രണ്ട് ജിഎൻഎയുടെ വൈദ്യുതി 8.90 രൂപയും. വൈദ്യുതി മന്ത്രി അയച്ച ഫയലിൽതന്നെ ഹിമാചലിന്റെ വൈദ്യുതി രാജസ്ഥാന് നൽകിയ കാര്യം പറയുന്നുണ്ട്. ജിഎൻഎ മാത്രമാണ് മുന്നിലുണ്ടായ ഓപ്ഷൻ. രണ്ടുംകൂടെ താരതമ്യപ്പെടുത്തുമ്പോഴും ജിഎൻഎ ആണ് നല്ലതെന്നും തീരുമാനിച്ചു. എന്നാൽ അവരുമായി ഒരു കരാറിലും ഏർപ്പെട്ടിട്ടില്ല. തുടർന്ന് ഇപ്പോ ആവശ്യമുണ്ടോയെന്ന് അന്വേഷിക്കാനാണ് തീരുമാനിച്ചത്. നവംബറിലും ഡിസംബറിലും വേണ്ട എന്നാണ് കണ്ടെത്തിയത്. കൂടാതെ മാർച്ച് ആകുമ്പോൾ എൻടിപിസി നമുക്ക് വൈദ്യുതി നൽകാമെന്ന് അറിയിച്ചിട്ടുണ്ട്. അവരുമായി ചർച്ച ചെയ്തിരുന്നു. 5.18 രൂപയ്ക്കാണ് അവർ വൈദ്യുതി നൽകാമെന്ന് അറിയിച്ചത്. അപ്പോൾ ഏപ്രിൽ മെയ് മാസത്തിൽ ജിഎൻഎയിൽനിന്ന് വാങ്ങിക്കേണ്ടെന്ന് വെച്ചു. ഏറ്റവും കുറവ് എവിടെനിന്നാണോ കിട്ടുന്നത് അവിടെ നിന്നേ വാങ്ങുകയുള്ളൂ. വൻ പ്രതിസന്ധി വരാൻ പോകുന്നുവെന്ന വാർത്തകളുണ്ടാക്കി തന്നെക്കൊണ്ട് ഇതിൽ ഒപ്പിടീക്കാനുള്ള ഒരു സമ്മർദ്ദ ശ്രമമുണ്ടായി. തീരുമാനം എടുത്തില്ലെങ്കിൽ നവംബർ ഒന്ന് മുതൽ പവർക്കട്ട് ഉണ്ടാകുമെന്ന് ആ ഫയലിൽ ഉണ്ടായിരുന്നതായും' മുഖ്യമന്ത്രി ആരോപിച്ചു.
ഫയൽ തടഞ്ഞുവെച്ചതല്ലെന്നും വിശദമായി പരിശോധിച്ചുവരികയായിരുന്നുവെന്നും മുഖ്യമന്ത്രി കൂട്ടിച്ചേർത്തു. അതേസമയം, ഇത്തരമൊരു റിപ്പോർട്ട് കെഎസ്ഇബി നൽകിയതിൽ അന്വേഷണം നടത്തുമോയെന്ന ചോദ്യത്തിന് വ്യക്തമായ മറുപടി നൽകാൻ അദ്ദേഹം തയ്യാറായില്ല. വിഷയം പരിശോധിക്കേണ്ടതുണ്ടെന്ന് മാത്രമാണ് മുഖ്യമന്ത്രി പ്രതികരിച്ചത്. ഇക്കാര്യത്തിൽ പ്രതിപക്ഷ നേതാവ് പരസ്പരവിരുദ്ധമായ പ്രസ്താവനകളാണ് നടത്തുന്നതെന്നും മുഖ്യമന്ത്രി വിമർശിച്ചു. എംവി ഗോവിന്ദനും ഈ വിഷയത്തിൽ ഇടപെട്ടിട്ടുണ്ടെന്നും എന്നാൽ വിഷയത്തിന്റെ യഥാർഥ വശങ്ങൾ പോലും അദ്ദേഹത്തിന് മനസ്സിലായിട്ടില്ലെന്നും മുഖ്യമന്ത്രി പരിഹസിച്ചു.
അതേസമയം, സംസ്ഥാനത്ത് വൈദ്യുതി പ്രതിസന്ധിയില്ലെന്ന കെഎസ്ഇബിയുടെ വാദത്തോട് വൈദ്യുതി മന്ത്രി സണ്ണി ജോസഫ് വിയോജിപ്പ് അറിയിച്ചിരുന്നു. പ്രതിസന്ധി ഫലപ്രദമായി നേരിടാൻ ദീർഘകാല വൈദ്യുതി കരാർ അനിവാര്യമാണെന്ന് അദ്ദേഹം പറഞ്ഞു. പ്രതിസന്ധിയില്ലെന്ന വാദം ജിഎൻഎ കരാറിൽനിന്ന് പിന്മാറാനുള്ള ന്യായീകരണം മാത്രമാണെന്നും മന്ത്രി ആരോപിച്ചു.
മറുവശത്ത് ജിഎൻഎ കരാറുമായി ബന്ധപ്പെട്ട് സംസ്ഥാന സർക്കാരിനെതിരെ വിമർശനം ശക്തമാക്കി സിപിഐഎം സംസ്ഥാന സെക്രട്ടേറിയറ്റ് അംഗം പി ജയരാജൻ. സംസ്ഥാനത്ത് ആവശ്യത്തിന് വൈദ്യുതി ഉണ്ടായിട്ടും കൃത്രിമമായി വൈദ്യുതി ക്ഷാമം സൃഷ്ടിച്ചുവെന്നും മുന്നണി ഭരണത്തില് പാലിക്കേണ്ട മര്യാദകൾ മുഖ്യമന്ത്രി പാലിച്ചില്ലെന്നും പി ജയരാജന് ആരോപിച്ചു. അധികാരത്തിലെത്തി ആറുമാസത്തിനുള്ളിൽ തന്നെ കൂട്ടുത്തരവാദിത്തമില്ലാത്ത സർക്കാരാണ് കേരളത്തിലേതെന്ന് തെളിയിച്ചിരിക്കുകയാണെന്നും ജയരാജൻ ആരോപിച്ചു. മുഖ്യമന്ത്രിയും മന്ത്രിമാരും കൂട്ടുത്തരവാദിത്തത്തോടെ പ്രവർത്തിക്കണമെന്നത് ഭരണഘടനാപരമായ രീതിയാണ്. എന്നാൽ വൈദ്യുതി മന്ത്രി തന്നെ മുഖ്യമന്ത്രി ഒറ്റയ്ക്കാണ് തീരുമാനമെടുത്തതെന്നും തനിക്ക് അതിനെക്കുറിച്ച് അറിവില്ലെന്നും വ്യക്തമാക്കിയിരിക്കുകയാണെന്നും പി ജയരാജൻ കൂട്ടിച്ചേർത്തു.
Kerala Chief Minister V.D. Satheesan has alleged that attempts were made to create panic over an impending power crisis in the state to pressure him into approving an electricity purchase deal with GNA. He said a previous KSEB report had warned of power cuts from November, while a subsequent assessment found no immediate crisis. Satheesan clarified that no agreement had been signed with GNA and that the government decided against purchasing power for November and December after reviewing demand. He also cited an offer from NTPC to supply electricity at ₹5.18 per unit. Meanwhile, Electricity Minister Sunny Joseph defended the need for long-term power contracts, while CPI(M) leader P. Jayarajan criticised the government over alleged differences between the Chief Minister and the Electricity Minister.