ചൂടിൽ 'ഉരുകി' ക്ഷീരമേഖല; പാൽ ഉൽപാദനത്തിൽ വൻ ഇടിവ്! കർഷകർ കടുത്ത പ്രതിസന്ധിയിൽ; വരുന്നത് വലിയ പാൽക്ഷാമമോ?

ഇന്ത്യൻ തീൻമേശകളിൽ ചായ മുതൽ പനീറും നെയ്യും വരെ നീളുന്ന വിഭവങ്ങളുടെ അവിഭാജ്യ ഘടകമായ പാൽ വിപണി ഇന്ന് കടുത്ത വെല്ലുവിളിയിലാണ്. ലോകത്തെ ആകെ പാൽ ഉൽപാദനത്തിന്റെ 25 ശതമാനവും കൈകാര്യം ചെയ്യുന്ന ഇന്ത്യയിൽ, അരിയെയും ഗോതമ്പിനെയുംക്കാൾ വലിയ സാമ്പത്തിക മൂല്യമാണ് ക്ഷീരമേഖലയ്ക്കുള്ളത്. എന്നാൽ, ഉഷ്ണതരംഗവും ആഗോളതാപനവും ഈ മേഖലയുടെ നട്ടെല്ലൊടിക്കുകയാണ്. ഉഷ്ണതരംഗം മൂലം കന്നുകാലികളുടെ ആരോഗ്യത്തിലും പാൽ ഉൽപാദനത്തിലും സംഭവിക്കുന്ന വലിയ ഇടിവ് എൺപത് ദശലക്ഷത്തിലധികം വരുന്ന കർഷക കുടുംബങ്ങളെയാണ് നേരിട്ട് ബാധിക്കുന്നത്. കാലാവസ്ഥാ വ്യതിയാനം സൃഷ്ടിക്കുന്ന ഈ പ്രതിസന്ധി ക്ഷീരമേഖലയുടെ അടിത്തറയിളക്കുക മാത്രമല്ല, വിപണിയിൽ പാലിനും പാൽ ഉൽപ്പന്നങ്ങൾക്കും വില വർധിപ്പിക്കുകയും സാധാരണക്കാരന്റെ കീശയെ കാര്യമായി ബാധിക്കുകയും ചെയ്യും.

അന്തരീക്ഷ ഊഷ്മാവ് ക്രമാതീതമായി ഉയരുന്നത് കന്നുകാലികളുടെ ആരോഗ്യത്തെയും ഉൽപാദനക്ഷമതയെയും ഒരുപോലെ തകർക്കുകയാണ്. കടുത്ത ചൂടിൽ പശുക്കളും എരുമകളും തീറ്റ എടുക്കുന്നത് കുറയുകയും, ശരീരതാപം ക്രമീകരിക്കാനായി ഉള്ളിലെ ഊർജ്ജം അമിതമായി ചെലവാക്കേണ്ടി വരികയും ചെയ്യുന്നു. ഇത് പാൽ ഉൽപാദനത്തിൽ 25.8 ശതമാനം വരെ വലിയ ഇടിവുണ്ടാക്കാനാണ് സാധ്യത. നിലവിലെ സാഹചര്യം തുടർന്നാൽ, ഈ നൂറ്റാണ്ടിന്റെ അവസാനത്തോടെ ഗുജറാത്ത്, രാജസ്ഥാൻ തുടങ്ങിയ ഇന്ത്യയിലെ പ്രമുഖ ക്ഷീര സംസ്ഥാനങ്ങളിൽ ഉൽപാദനം കുത്തനെ കുറയുമെന്ന് കണക്കുകൾ സൂചിപ്പിക്കുന്നു. 2025-ൽ രാജ്യത്തുണ്ടായ അപ്രതീക്ഷിത ഉഷ്ണതരംഗം പാൽ വിപണിയെ എങ്ങനെ ബാധിക്കുമെന്നതിന്റെ സൂചനയായിരുന്നു; അന്ന് പ്രമുഖ ബ്രാൻഡുകൾക്കെല്ലാം പാലിന് വില വർധിപ്പിക്കേണ്ടി വന്നത് സാധാരണക്കാരുടെ കുടുംബ ബജറ്റിന് വലിയ തിരിച്ചടിയായിരുന്നു നൽകിയത്.

ചൂട് വർധിക്കുന്നത് കന്നുകാലികളെ മാത്രമല്ല, അവയുടെ ആഹാരമായ തീറ്റപ്പുല്ല് ഉൽപാദനത്തെയും സാരമായി ബാധിക്കുന്നു. കൃത്യമല്ലാത്ത മൺസൂൺ കാലം തീറ്റപ്പുല്ലിന്റെ വില പലയിടങ്ങളിലും മൂന്നിരട്ടിയായി വർധിപ്പിച്ചു. പാൽ ഉൽപാദന ചെലവിന്റെ 70 ശതമാനത്തോളം കാലിത്തീറ്റയ്ക്കായി ചെലവാക്കേണ്ടി വരുന്നത് കർഷകരെ വലിയ കടക്കെണിയിലേക്കാണ് എത്തിക്കുന്നത്. ഇത് പലരെയും കന്നുകാലികളെ വിറ്റൊഴിവാക്കാൻ പ്രേരിപ്പിക്കുന്നു. കർഷകർ അനുഭവിക്കുന്ന ഈ പ്രതിസന്ധി പരോക്ഷമായി വിപണിയിൽ പാലിന്റെയും മറ്റ് നിത്യോപയോഗ സാധനങ്ങളുടെയും വിലക്കയറ്റത്തിന് കാരണമാകുന്നുണ്ട്

ഭാരതത്തിന്റെ ഗ്രാമീണ സമ്പദ്‌വ്യവസ്ഥയുടെ നട്ടെല്ലായ ക്ഷീരമേഖല ഇന്ന് അതിജീവനത്തിനായുള്ള പോരാട്ടത്തിലാണ്. രാജ്യത്തെ 90 ദശലക്ഷം ഗ്രാമീണ കുടുംബങ്ങളിലായി ഏകദേശം 450 ദശലക്ഷത്തിലധികം ആളുകൾ ഉപജീവനത്തിനായി ഈ മേഖലയെയാണ് ആശ്രയിക്കുന്നത്. ഇതിൽ ഭൂരിഭാഗവും സ്ത്രീകളും ചെറുകിട കർഷകരുമാണെന്നത് പ്രതിസന്ധിയുടെ ആഴം വർദ്ധിപ്പിക്കുന്നു. പാൽ ഉൽപാദനത്തിലുണ്ടാകുന്ന നേരിയ കുറവ് പോലും ഇവരുടെ കുടുംബ ബജറ്റിനെ നേരിട്ടാണ് ബാധിക്കുന്നത്. ഈ സാഹചര്യത്തിൽ, ഉഷ്ണത്തെ അതിജീവിക്കാൻ ശേഷിയുള്ള നാടൻ പശു വർഗ്ഗങ്ങളെ പ്രോത്സാഹിപ്പിക്കുന്നത് പ്രതിസന്ധിക്ക് വലിയൊരു പരിഹാരമാകും. ശാസ്ത്രീയമായ പ്രജനന രീതികളും മെച്ചപ്പെട്ട തീറ്റപ്പുല്ല് സംഭരണ സംവിധാനങ്ങളും ഉറപ്പാക്കിയാൽ മാത്രമേ, കാലാവസ്ഥാ വ്യതിയാനത്തിന്റെ കനത്ത ആഘാതത്തിൽ നിന്നും ഇന്ത്യയുടെ 'വെളുത്ത വിപ്ലവത്തെ' നമുക്ക് സംരക്ഷിക്കാൻ സാധിക്കൂ.

English Summary: Rising heatwaves and climate change are severely impacting India’s dairy sector, reducing milk production and increasing costs for farmers and consumers alike. With heat stress affecting cattle health and fodder shortages driving expenses higher, India’s dairy economy faces a major long-term challenge