

ന്യൂസീലൻഡിനെതിരായ ആദ്യ ടെസ്റ്റിൽ മുഹമ്മദ് സിറാജിനെ പ്ലെയിങ് ഇലവനിൽ ഉൾപ്പെടുത്താത്തതുമായി ബന്ധപ്പെട്ട വിവാദത്തിൽ പ്രതികരണവുമായി മുൻ ഇന്ത്യൻ ക്യാപ്റ്റൻ കപിൽ ദേവ്. ടീം തിരഞ്ഞെടുപ്പിനെ ചോദ്യം ചെയ്യാൻ തനിക്ക് അധികാരമില്ലെന്നും സെലക്ടർമാർ മികച്ച രീതിയിലാണ് ചുമതല നിർവഹിക്കുന്നതെന്നും അദ്ദേഹം വ്യക്തമാക്കി. എല്ലാവരെയും ഒരേസമയം തൃപ്തിപ്പെടുത്താൻ കഴിയില്ലെന്നും ടീം തിരഞ്ഞെടുക്കാനുള്ള ഉത്തരവാദിത്തം സെലക്ടർമാർക്കും പരിശീലകനും ക്യാപ്റ്റനുമാണെന്നും കപിൽ ദേവ് പറഞ്ഞു.
സിറാജിനെ ടീമിൽ നിന്ന് ഒഴിവാക്കിയതിനെക്കുറിച്ച് അഭിപ്രായം പറയേണ്ടത് സെലക്ടർമാരാണെന്നായിരുന്നു കപിൽ ദേവിന്റെ നിലപാട്. പുറത്തുനിന്നുള്ളവർ അനാവശ്യമായി ഇത്തരം വിഷയങ്ങളിൽ ഇടപെട്ട് അഭിപ്രായം പറയേണ്ടതില്ലെന്നും അദ്ദേഹം കൂട്ടിച്ചേർത്തു. ഒരു സംവിധാനത്തിന്റെ പ്രവർത്തനത്തെ വ്യക്തിപരമായ ഇഷ്ടാനിഷ്ടങ്ങളുടെ അടിസ്ഥാനത്തിൽ വിമർശിക്കാനാകില്ലെന്നും ഇന്ത്യൻ ക്രിക്കറ്റ് മികച്ച രീതിയിൽ മുന്നോട്ടുപോകുന്നതാണ് പ്രധാനമെന്നും കപിൽ ദേവ് ചൂണ്ടിക്കാട്ടി. സിറാജിനോട് വ്യക്തിപരമായി ഇഷ്ടമുണ്ടെങ്കിലും ടീമിനെ തിരഞ്ഞെടുക്കുന്നത് വ്യക്തികളുടെ താൽപര്യങ്ങൾക്കനുസരിച്ചല്ലെന്നും അദ്ദേഹം വ്യക്തമാക്കി.
അതേസമയം, സിറാജിനെ പ്ലെയിങ് ഇലവനിൽ നിന്ന് ഒഴിവാക്കിയതിന് പിന്നിൽ വിവേചനമാണെന്ന ആരോപണവുമായി കോൺഗ്രസ് എംപി ഇമ്രാൻ മസൂദ് നേരത്തെ രംഗത്തെത്തിയിരുന്നു. മികച്ച പ്രകടനം നടത്തിയിട്ടും താരത്തിന് ടീമിൽ അവസരം ലഭിക്കാത്തത് പേരിലെ മതപരമായ സൂചനകൾ കാരണമാണെന്നായിരുന്നു അദ്ദേഹത്തിന്റെ ആരോപണം. 'അദ്ദേഹത്തിന്റെ പേര് സിറാജ് എന്നായതുകൊണ്ടാണ് ടീമിൽ ഉൾപ്പെടുത്താത്തത്. മികച്ച പ്രകടനം നടത്തിയിട്ടും തിരഞ്ഞെടുക്കുന്നില്ലെങ്കിൽ വിവേചനം വ്യക്തമാണ്' എന്നായിരുന്നു ഇമ്രാൻ മസൂദിന്റെ പ്രതികരണം.
എന്നാൽ, കോൺഗ്രസ് എംപിയുടെ ആരോപണം കേന്ദ്രമന്ത്രി കിരൺ റിജിജു തള്ളിയിരുന്നു. രാജ്യത്ത് അവസരങ്ങൾ നൽകുന്നത് മതത്തിന്റെയോ ജാതിയുടെയോ അടിസ്ഥാനത്തിലല്ലെന്നും അർഹതയും യോഗ്യതയുമാണ് പരിഗണിക്കുന്നതെന്നും അദ്ദേഹം വ്യക്തമാക്കി. സിറാജിനെ ടീമിൽ ഉൾപ്പെടുത്താത്തതുമായി ബന്ധപ്പെട്ട വിവാദം ഇതോടെ രാഷ്ട്രീയ തലത്തിലും ചർച്ചയായിരുന്നു.
Kapil Dev reacted to Mohammed Siraj’s exclusion from the playing XI, stating that team selection is the responsibility of the selectors and captain, and that decisions should not be criticised based on personal likes and dislikes.