"എനിക്ക് ലോകത്തിലെ മികച്ച താരമാകേണ്ട, ബ്രസീലിനെ വീണ്ടും ലോകഫുട്ബോളിന്റെ നെറുകയിലെത്തിക്കണം"; വാക്കുപാലിച്ച് വിനീഷ്യസ്!

ലോകകപ്പിന്റെ ആവേശം വാനോളം ഉയരുമ്പോൾ, ബ്രസീൽ ക്യാമ്പിൽ നിന്ന് കേട്ട വാക്കുകൾ വിനയത്തിന്റെതായിരുന്നു. ടൂർണമെന്റിലെ മികച്ച താരത്തിനുള്ള വ്യക്തിഗത നേട്ടങ്ങളല്ല, മറിച്ച് തന്റെ രാജ്യത്തിന് ആറാം കിരീടം നേടിക്കൊടുക്കുക എന്ന ദൗത്യമാണ് വലുതെന്ന് വിനീഷ്യസ് ജൂനിയർ പ്രഖ്യാപിച്ചിരുന്നു.

"ഞാൻ ഇവിടെ വന്നിരിക്കുന്നത് ടൂർണമെന്റിലെ മികച്ച താരമാകാനല്ല, ബ്രസീലിനെ ലോകഫുട്ബോളിന്റെ നെറുകയിൽ വീണ്ടും എത്തിക്കാൻ സഹായിക്കാനാണ്," മത്സരത്തിന് തലേദിവസം വിനീഷ്യസ് മാധ്യമങ്ങളോട് പറഞ്ഞത് ഇങ്ങനെയായിരുന്നു. പറഞ്ഞ വാക്ക് വെറും വാക്കല്ലെന്ന് വിനീഷ്യസ് ന്യൂജേഴ്‌സിയിലെ മെറ്റ്‌ലൈഫ് സ്റ്റേഡിയത്തിൽ തെളിയിക്കുകയും ചെയ്തു.

ഒരു ഗോളിന് പിന്നിൽ, മൊറോക്കൻ പടയുടെ ആധിപത്യത്തിന് മുന്നിൽ അല്പം പതറിയ ബ്രസീൽ. ലോകകപ്പിന്റെ വലിയ വേദിയിൽ കാനറികൾ തളരുന്ന കാഴ്ച. ആ ഘട്ടത്തിലാണ് വിനീഷ്യസ് ജൂനിയർ തന്റെ ക്ലാസ് തെളിയിച്ചത്. മൊറോക്കൻ വലയിലേക്ക് വെടിയുണ്ട കണക്കെ പാഞ്ഞുകയറിയ ആ മിന്നൽ ഗോൾ ബ്രസീലിന് നൽകിയത് കേവലമൊരു സമനിലയല്ല, ജീവവായുവാണ്. ഗാലറിയെ ഒന്നടങ്കം ആവേശത്തിലാഴ്ത്തിയ ഒരു ഒന്നാന്തരം ക്ലാസിക് ഫിനിഷ്.

ലോകകപ്പിന്റെ മാറ്റ് കൂട്ടുന്ന ഒരു ഗോളായിരുന്നു അത്. കടുത്ത സമ്മർദ്ദത്തിലായിരുന്ന തന്റെ ടീമിനെ ആ വലിയ കുഴിയിൽ നിന്നും പുറത്തെടുക്കാൻ വിനീഷ്യസിന് സാധിച്ചു. 1934-ന് ശേഷം ലോകകപ്പിലെ തങ്ങളുടെ ആദ്യ ഉദ്ഘാടന മത്സരം തോൽക്കാതിരിക്കാൻ ബ്രസീലിനെ സഹായിച്ചതും ആ ഒറ്റ നിമിഷത്തെ മികവായിരുന്നു. ഒരു യഥാർത്ഥ സൂപ്പർ താരത്തിന് മാത്രം സാധ്യമാകുന്ന രീതിയിൽ, ഏറ്റവും നിർണ്ണായകമായ വേദിയിൽ വിനീഷ്യസ് തന്നിലെ മാന്ത്രികനെ പുറത്തെടുത്തു. ബ്രസീലിയൻ ഫുട്ബോൾ ഇതിഹാസങ്ങളുടെ നിരയിലേക്ക് വിനീഷ്യസിന് നടന്നുകയറാൻ കഴിയുമോ എന്നത് ഇപ്പോൾ ആരാധകർ ഉറ്റുനോക്കുന്ന പ്രധാന ചോദ്യമാണ്.

കളിയുടെ തുടക്കം മുതൽ മികച്ച ആസൂത്രണത്തോടെ പന്തുതട്ടിയ മൊറോക്കൻ പടയ്ക്ക് മുന്നിൽ ബ്രസീലിയൻ സംഘം പലപ്പോഴും കാഴ്ചക്കാരായി നിന്നു. ശനിയാഴ്ച നടന്ന ഗ്രൂപ്പ് സിയിലെ ആദ്യ പോരാട്ടത്തിൽ 21-ാം മിനിറ്റിലാണ് മൊറോക്കോ ബ്രസീലിനെ ശരിക്കും ഞെട്ടിച്ചത്. ബ്രസീലിയൻ പ്രതിരോധനിരയെ വെറും കാഴ്ചക്കാരാക്കി കുതിച്ച ഇസ്മായിൽ സെയ്ബാരി, അതിമനോഹരമായൊരു 'സ്കൂപ്പ്' ഷോട്ടിലൂടെ പന്ത് വലയിലെത്തിച്ചു. തന്ത്രശാലിയായ ഇറ്റാലിയൻ പരിശീലകൻ കാർലോ ആൻസലോട്ടിയുടെ മാസ്റ്റർ പ്ലാനുകളുമായി കളത്തിലിറങ്ങിയ ബ്രസീലിയൻ പടയെ അക്ഷരാർത്ഥത്തിൽ സ്തംഭിപ്പിച്ചുകൊണ്ടാണ് മൊറോക്കോയുടെ ആദ്യ ഗോൾ. ബ്രസീൽ ആരാധകരുടെ നെഞ്ചിടിപ്പ് കൂടിയ ആ നിമിഷത്തിലാണ് അവരുടെ സൂപ്പർ ഹീറോ പറന്നിറങ്ങിയത്.

രണ്ടാം പകുതിയിൽ ഇരു ടീമുകളും ചടുലമായ നീക്കങ്ങളുമായി കളം നിറഞ്ഞെങ്കിലും മൂന്നാമതൊരു ഗോൾ നേടാൻ സാധിച്ചില്ല. മത്സരം തുടങ്ങിയപ്പോൾ മുതൽ മികച്ച പന്തടക്കത്തോടെയും ആസൂത്രണത്തോടെയുമാണ് മൊറോക്കോ കളിച്ചത്. ബ്രസീലിയൻ പടയ്ക്ക് തുടക്കത്തിൽ മൊറോക്കൻ മുന്നേറ്റങ്ങളെ തടയാൻ നന്നായി വിയർക്കേണ്ടി വന്നു.

രണ്ടാം പകുതിയിൽ ബ്രസീൽ തങ്ങളുടെ ആക്രമണത്തിന്റെ മൂർച്ച കൂട്ടി. എന്നാൽ ആദ്യ പകുതിയിൽ കണ്ട മൊറോക്കോയെ അല്ല പിന്നീട് മൈതാനത്ത് കണ്ടത്. മൊറോക്കോയെ പ്രതിരോധത്തിൽ തളച്ചിടാനും നിരന്തരം ആക്രമണങ്ങൾ അഴിച്ചുവിടാനും കാനറികൾക്ക് സാധിച്ചു.

എന്നാൽ ഫിനിഷിങ്ങിലെ പോരായ്മകളും മൊറോക്കൻ പ്രതിരോധത്തിന്റെ കരുത്തും അവർക്ക് വിലങ്ങുതടിയായി. മൊറോക്കൻ ഗോൾകീപ്പർ യാസിൻ ബോനുവിന്റെ മികച്ച സേവുകളും എടുത്തു പറയേണ്ടതാണ്. മത്സരത്തിന്റെ അവസാന നിമിഷങ്ങളിൽ പരിക്കേറ്റ ബോനുവിന് ഗ്രൗണ്ടിൽ മെഡിക്കൽ സഹായം തേടേണ്ടി വന്നത് മൊറോക്കോയ്ക്ക് നേരിയ ആശങ്കയുണ്ടാക്കി. പത്ത് മിനിറ്റോളം ഇഞ്ചുറി ടൈം ലഭിച്ചിട്ടും വിജയഗോൾ നേടാൻ ഇരു ടീമുകൾക്കും കഴിഞ്ഞില്ല.

ന്യൂജേഴ്‌സിയിൽ മൊറോക്കോയ്‌ക്കെതിരെ ബ്രസീൽ കാഴ്ചവെച്ച പ്രകടനം ആരാധകരെ ഒട്ടും തൃപ്തിപ്പെടുത്തിയിട്ടില്ല. പെലെയും റൊണാൾഡോയും റൊണാൾഡീഞ്ഞോയും സിക്വോയുമൊക്കെ സമ്മാനിച്ച ആ പഴയ 'ബ്രസീലിയൻ ശൈലി'യോ ആത്മവിശ്വാസമോ ഇന്നലെ മൈതാനത്ത് കാണാൻ സാധിച്ചില്ലെന്നാണ് വിമർശനം. കളിയിലുടനീളം മൊറോക്കോയ്ക്ക് മുന്നിൽ ബ്രസീൽ രണ്ടാമതായിരുന്നു എന്നതാണ് സത്യം.

വിങ്ങർമാരുടെ അതിപ്രസരമുണ്ടെങ്കിലും മധ്യനിരയിലെ കരുത്തില്ലായ്മ ബ്രസീലിയൻ നിരയിൽ പ്രകടമായിരുന്നു. ഗ്രൗണ്ടിലെ ചൂടിൽ പതറിയ 34-കാരനായ കാസമിറോയ്ക്ക് ആദ്യ പകുതിക്ക് ശേഷം കളം വിടേണ്ടി വന്നു. പ്രതിരോധ താരം റോജർ ഇബാനേസിനെയും രണ്ടാം പകുതിയുടെ തുടക്കത്തിൽ തന്നെ ആൻസലോട്ടി പിൻവലിച്ചു. ടീമിന്റെ തകരാറുകൾ പരിഹരിക്കാനും മധ്യനിരയിലെയും പ്രതിരോധത്തിലെയും അസന്തുലിതാവസ്ഥ അടിയന്തരമായി മാറ്റാനുമുള്ള പരിശീലകന്റെ അവസാനവട്ട ശ്രമങ്ങളായിരുന്നു ഈ മാറ്റങ്ങൾ.

ആരാധകരോട് ക്ഷമ ചോദിച്ച് ആൻസലോട്ടി

67-ാം വയസ്സിൽ ആദ്യമായി ഒരു ലോകകപ്പ് മത്സരത്തിൽ ഡഗ് ഔട്ടിലെത്തിയ കാർലോ ആൻസലോട്ടിയ്ക്ക്, അരങ്ങേറ്റം അത്ര സുഖകരമായിരുന്നില്ല. "എനിക്കിതൊരു മനോഹരമായ നിമിഷമാണ്" എന്ന് മത്സരത്തിന് തലേദിവസം വലിയ പ്രതീക്ഷയോടെ പ്രതികരിച്ച ഇറ്റാലിയൻ തന്ത്രജ്ഞന്, മത്സരശേഷം ആരാധകരോട് ഖേദം പ്രകടിപ്പിക്കേണ്ടി വന്നത് വലിയൊരു തിരിച്ചടിയായി. ന്യൂജേഴ്‌സിയിലെ കൊടും ചൂടിൽ ടീം കാഴ്ചവെച്ച മങ്ങിയ പ്രകടനത്തിൽ അദ്ദേഹം മാപ്പ് ചോദിച്ചു.

"ഞങ്ങൾ പ്രതീക്ഷിച്ച നിലവാരത്തിൽ കളിക്കാൻ കഴിഞ്ഞില്ല, അതിൽ ഞാൻ ക്ഷമ ചോദിക്കുന്നു," മത്സരശേഷമുള്ള വാർത്താസമ്മേളനത്തിൽ ആൻസലോട്ടി വ്യക്തമാക്കി. ബ്രസീലിനെ ലോകകപ്പിൽ നയിക്കുന്ന ആദ്യ വിദേശ പരിശീലകനാണ് ആൻസലോട്ടി. യോഗ്യതാ റൗണ്ടിൽ ബ്രസീൽ നേരിട്ട വലിയ പ്രതിസന്ധികൾക്ക് പിന്നാലെയാണ് അദ്ദേഹം ടീമിന്റെ ചുമതലയേറ്റെടുത്തത്. 18 യോഗ്യതാ മത്സരങ്ങളിൽ ആറെണ്ണത്തിലും പരാജയപ്പെട്ട് അഞ്ചാം സ്ഥാനത്ത് ഫിനിഷ് ചെയ്ത ബ്രസീലിന്റെ ലോകകപ്പ് പ്രവേശനം പോലും വലിയ ചോദ്യചിഹ്നമായിരുന്നു. ആ ആശങ്കകൾക്ക് വിരാമമിട്ട് ലോകകപ്പിലെത്തിയ ടീമിന്, ഈ സമനില വീണ്ടും വലിയ ചോദ്യങ്ങൾ സമ്മാനിക്കുകയാണ്.