പ്രീമിയം സ്മാർട്ട്‌ഫോൺ വിപണിയിൽ വലിയ മാറ്റത്തിനൊരുങ്ങി വൺപ്ലസ്. പുതിയ ഫ്ലാഗ്ഷിപ്പ് ഫോണുകളായ വൺപ്ലസ് 16, വൺപ്ലസ് 16ആർ എന്നിവ ഇന്ത്യൻ വിപണിയിൽ അവതരിപ്പിക്കാൻ കമ്പനി പദ്ധതിയിടുന്നതായാണ് റിപ്പോർട്ടുകൾ. നേരത്തെ വൺപ്ലസ് 16ആർ മാത്രമേ ഇന്ത്യയിലെത്തൂ എന്നായിരുന്നു സൂചനകൾ. എന്നാൽ ഏറ്റവും പുതിയ റിപ്പോർട്ടുകൾ പ്രകാരം ഫ്ലാഗ്ഷിപ്പ് മോഡലായ വൺപ്ലസ് 16നും ഇന്ത്യയിൽ അരങ്ങേറ്റം കുറിച്ചേക്കും.
എന്നാൽ ഫോണുകളുടെ വിലയാണ് ഇപ്പോൾ ടെക് ലോകത്തെ പ്രധാന ചർച്ച. വൺപ്ലസ് 16ന് 1.3 ലക്ഷം മുതൽ 1.4 ലക്ഷം രൂപ വരെ വിലയുണ്ടാകുമെന്നാണ് പുറത്തുവരുന്ന സൂചനകൾ. ഇത് യാഥാർഥ്യമായാൽ കമ്പനിയുടെ പതിവ് വിലനിലവാരത്തിൽനിന്ന് വലിയ മാറ്റമായിരിക്കും. അതേസമയം, വൺപ്ലസ് 16ആറിന് 70,000 മുതൽ 75,000 രൂപ വരെയാണ് പ്രതീക്ഷിക്കുന്ന വില.
ഇന്ത്യൻ ലോഞ്ചിന് സാധ്യതയെന്ന് ടിപ്‌സ്റ്റർമാർ
വൺപ്ലസ് 16, 16ആർ മോഡലുകളുടെ ഇന്ത്യൻ ലോഞ്ചുമായി ബന്ധപ്പെട്ട വിവരങ്ങൾ പ്രമുഖ ടിപ്‌സ്റ്റർമാരാണ് പുറത്തുവിട്ടിരിക്കുന്നത്. വൺപ്ലസ് 16ആറിന്റെ വികസനം ഉറപ്പാണെന്നും വൺപ്ലസ് 16ന്റെ ഇന്ത്യൻ വിപണിയിലെത്തലിന് സാധ്യതയുണ്ടെന്നും ദേബയൻ റോയ് (ഗാഡ്‌ജറ്റ്‌സ് ഡാറ്റ) സൂചിപ്പിക്കുന്നു.
വൺപ്ലസ് 16ന്റെ ആഗോള സോഫ്റ്റ്‌വെയർ മൂന്ന് വ്യത്യസ്ത മോഡൽ നമ്പറുകളിൽ പരീക്ഷിക്കുന്നതായാണ് മറ്റൊരു ടിപ്‌സ്റ്ററായ അഭിഷേക് യാദവിന്റെ അവകാശവാദം. CPH2901, CPH2903, CPH2905 എന്നിവയാണ് ഈ നമ്പറുകൾ. ഇന്ത്യയുൾപ്പെടെയുള്ള ഏഷ്യൻ വിപണികളിൽ ഫോൺ അവതരിപ്പിക്കാനുള്ള നീക്കത്തിന്റെ ഭാഗമായാണ് ഈ പരീക്ഷണങ്ങളെന്നാണ് വിലയിരുത്തൽ. എന്നാൽ ഇരു മോഡലുകളുടെയും ഇന്ത്യയിലെ ലോഞ്ച് സംബന്ധിച്ച് വൺപ്ലസ് ഔദ്യോഗിക സ്ഥിരീകരണം നൽകിയിട്ടില്ല.
വിലയിൽ വൻ വർധനയ്ക്ക് സാധ്യത
വൺപ്ലസിന്റെ മുൻ ഫ്ലാഗ്ഷിപ്പ് മോഡലുകളുമായി താരതമ്യം ചെയ്യുമ്പോൾ പുതിയ ഫോണുകൾക്ക് ഉയർന്ന വിലയായിരിക്കുമെന്നാണ് റിപ്പോർട്ടുകൾ. വൺപ്ലസ് 15 ഇന്ത്യയിൽ 85,999 രൂപ പ്രാരംഭ വിലയിലാണ് എത്തിയിരുന്നത്. വൺപ്ലസ് 15ആറിന്റെ വില 47,999 രൂപയായിരുന്നു.
എന്നാൽ പുതിയ തലമുറയിൽ വൺപ്ലസ് 16ആറിന് 70,000 മുതൽ 75,000 രൂപ വരെയും വൺപ്ലസ് 16ന് 1.3 ലക്ഷം മുതൽ 1.4 ലക്ഷം രൂപ വരെയും വില പ്രതീക്ഷിക്കുന്നു. ഇതോടെ കൂടുതൽ ചെലവേറിയ പ്രീമിയം സ്മാർട്ട്‌ഫോൺ വിഭാഗത്തിലേക്ക് വൺപ്ലസ് ചുവടുമാറ്റിയേക്കും.
വൺപ്ലസ് 16: പ്രതീക്ഷിക്കുന്ന പ്രധാന ഫീച്ചറുകൾ
ചൈനയിൽ അവതരിപ്പിച്ച വൺപ്ലസ് 16ന്റെ ഹാർഡ്‌വെയർ സവിശേഷതകൾ ഏറെ ശ്രദ്ധേയമാണ്. 5,999 ചൈനീസ് യുവാനാണ് അവിടത്തെ പ്രാരംഭ വില. ഇന്ത്യൻ കറൻസിയിൽ ഏകദേശം 86,000 രൂപയാണിത്. ക്യാമറയിലും വൺപ്ലസ് വലിയ മാറ്റങ്ങൾ കൊണ്ടുവന്നേക്കും. 200 മെഗാപിക്സൽ പ്രൈമറി ക്യാമറയ്ക്കൊപ്പം 3 മടങ്ങ് ഒപ്റ്റിക്കൽ സൂം ലഭിക്കുന്ന 50 മെഗാപിക്സൽ ടെലിഫോട്ടോ സെൻസറും 50 മെഗാപിക്സൽ അൾട്രാ വൈഡ് ക്യാമറയും ഫോണിലുണ്ട്.
വൺപ്ലസ് 16ആറിലും കരുത്തുറ്റ ഹാർഡ്‌വെയർ
വൺപ്ലസ് 16ആറിലും മികച്ച പ്രകടനം ലക്ഷ്യമിട്ടുള്ള സവിശേഷതകൾ ഉൾപ്പെടുത്തിയേക്കും. ചൈനയിൽ അവതരിപ്പിച്ച എയ്സ് 7 സീരീസിലെ ചില സാങ്കേതികവിദ്യകൾ പുതിയ മോഡലിൽ ഉപയോഗിക്കുമെന്നാണ് സൂചന. Snapdragon 8 Elite Gen 5 ചിപ്‌സെറ്റ്, വലിയ ശേഷിയുള്ള ബാറ്ററി, പ്രത്യേക ടെലിഫോട്ടോ ക്യാമറ എന്നിവ ഫോണിൽ പ്രതീക്ഷിക്കുന്നു.
എന്നാൽ ക്യാമറ സംവിധാനവും ഡിസ്പ്ലേ റിഫ്രഷ് റേറ്റും സംബന്ധിച്ച് വ്യത്യസ്ത റിപ്പോർട്ടുകളാണ് പുറത്തുവരുന്നത്. അതിനാൽ അന്തിമ സവിശേഷതകൾ സംബന്ധിച്ച് വ്യക്തത വന്നിട്ടില്ല. ഇന്ത്യയിലെ ലോഞ്ച് തീയതി, ഔദ്യോഗിക വില, ലഭ്യത എന്നിവയെക്കുറിച്ച് വൺപ്ലസ് ഇതുവരെ പ്രഖ്യാപനം നടത്തിയിട്ടില്ല. കമ്പനിയുടെ ഔദ്യോഗിക അറിയിപ്പിന് ശേഷമേ ഇക്കാര്യങ്ങളിൽ സ്ഥിരീകരണമുണ്ടാകൂ.
The OnePlus 16 and 16R are expected to launch in the Indian market. A 200MP camera, a 9,000mAh battery and a premium price tag are among the key features tipped for the smartphones.