ലോകമെമ്പാടും വിദ്യാഭ്യാസ സ്ഥാപനങ്ങള്ക്കും വിദ്യാര്ഥികള്ക്കും ജീവനക്കാര്ക്കും നേരെയുള്ള ആക്രമണങ്ങളില് 40% വര്ദ്ധനവുണ്ടായതായി പുതിയ പഠന റിപ്പോര്ട്ട്. 2024, 2025 വര്ഷങ്ങളിലായി 8,556-ലധികം ആക്രമണങ്ങള് രേഖപ്പെടുത്തിയിട്ടുണ്ട്. 10,600-ലധികം വിദ്യാര്ഥികളും അധ്യാപകരും ഉള്പ്പെടെയുള്ള ജീവനക്കാരും കൊല്ലപ്പെടുകയോ, പരിക്കേല്ക്കുകയോ, തട്ടിക്കൊണ്ടുപോകപ്പെടുകയോ, അറസ്റ്റ് ചെയ്യപ്പെടുകയോ അല്ലെങ്കില് മറ്റ് തരത്തില് ഉപദ്രവിക്കപ്പെടുകയോ ചെയ്തിട്ടുണ്ടെന്ന് പഠനം വ്യക്തമാക്കുന്നു.
ലോകത്താകമാനം 83 രാജ്യങ്ങളില് ഇത്തരം ആക്രമണങ്ങള് റിപ്പോര്ട്ട് ചെയ്തിട്ടുണ്ട്. കൊളംബിയ, ഡെമോക്രാറ്റിക് റിപ്പബ്ലിക് ഓഫ് കോംഗോ, എത്യോപ്യ, ഹെയ്തി, ഫലസ്തീന്, യുക്രെയ്ന് എന്നീ രാജ്യങ്ങളിലാണ് ഏറ്റവും കൂടുതല് അക്രമങ്ങള് രേഖപ്പെടുത്തിയത്. യുക്രെയ്നില് സ്കൂളുകള്ക്ക് നേരെ തൊള്ളായിരത്തോളം ആക്രമണങ്ങള് ഉണ്ടായപ്പോള്, ഫലസ്തീനില് വിദ്യാര്ഥികള്ക്കും ജീവനക്കാര്ക്കും നേരെ കുറഞ്ഞത് 2,400 ആക്രമണങ്ങളെങ്കിലും ഉണ്ടായതായി 'ഗ്ലോബല് കോയലിഷന് ടു പ്രൊട്ടക്റ്റ് എഡ്യൂക്കേഷന് ഫ്രം അറ്റാക്ക്' (ജിസിപിഇഎ) പുറത്തുവിട്ട റിപ്പോര്ട്ടില് പറയുന്നു.
സ്കൂളുകള്, സര്വ്വകലാശാലകള് അടക്കമുള്ള വിദ്യാഭ്യാസ സ്ഥാപനങ്ങള് സൈനിക വിഭാഗങ്ങളും സായുധ സംഘങ്ങളും കൈയേറുന്ന സംഭവങ്ങള് ഏകദേശം ഇരട്ടിയായി (91% വര്ദ്ധനവ്) വര്ദ്ധിച്ചു. ഇത്തരത്തില് 1,912 കേസുകളാണ് റിപ്പോര്ട്ട് ചെയ്തത്. കുട്ടികളെ ഒരു കാലത്ത് സംരക്ഷിച്ചിരുന്ന ആഗോള മാനദണ്ഡങ്ങള് തകര്ന്നുകൊണ്ടിരിക്കുകയാണെന്നും ഏറ്റവും പ്രായം കുറഞ്ഞവര് പോലും സുരക്ഷിതരല്ലാത്ത ഒരു ലോകത്തിലേക്കാണ് നമ്മള് നീങ്ങുന്നത് എന്നതിന്റെ മുന്നറിയിപ്പാണിതെന്നും ജിസിപിഇഎ ഡയറക്ടര് ലിസ ചുങ് ബെന്ഡര് പറഞ്ഞു.
മ്യാൻമറിലും നൈജീരിയയിലും കടുത്ത അതിക്രമങ്ങൾ
ആക്രമണങ്ങളില് ഏറ്റവും കൂടുതല് ആളുകള് ഇരകളാക്കപ്പെട്ടത് മ്യാന്മര്, നൈജീരിയ, യെമന്, കാമറൂണ് എന്നീ രാജ്യങ്ങളിലാണ്. ഈ രാജ്യങ്ങളിലായി ആകെ 1,700-ലധികം വിദ്യാര്ഥികളും ജീവനക്കാരും കൊല്ലപ്പെടുകയോ പരിക്കേല്ക്കുകയോ ചെയ്തു. നൈജീരിയയില് 700-ലധികം വിദ്യാര്ഥികളെയും ജീവനക്കാരെയും തട്ടിക്കൊണ്ടുപോയതായി റിപ്പോര്ട്ട് ചെയ്യപ്പെട്ടപ്പോള്, മ്യാന്മറില് കുറഞ്ഞത് 80 വിദ്യാര്ത്ഥികളും ജീവനക്കാരും കൊല്ലപ്പെടുകയും 240 പേര്ക്ക് പരിക്കേല്ക്കുകയും ചെയ്തു.
പെൺകുട്ടികളെ ലക്ഷ്യമിടുന്നു
കുറഞ്ഞത് 11 രാജ്യങ്ങളിലെങ്കിലും സ്ത്രീകള്ക്കും പെണ്കുട്ടികള്ക്കും നേരെ അവരുടെ ലിംഗഭേദം കാരണം ആക്രമണങ്ങള് ഉണ്ടായതായി പഠനം കണ്ടെത്തി. 2025 നവംബര് 17-ന് നൈജീരിയയില് തോക്കുധാരികള് ഒരു ഗേള്സ് ബോര്ഡിംഗ് സ്കൂള് ആക്രമിക്കുകയും വൈസ് പ്രിന്സിപ്പലിനെ വധിക്കുകയും 25 വിദ്യാര്ഥിനികളെ തട്ടിക്കൊണ്ടുപോകുകയും ചെയ്തു. വിദ്യാഭ്യാസം നേടുന്നതില് ഇതിനകം തന്നെ വലിയ തടസ്സങ്ങള് നേരിടുന്ന ഭിന്നശേഷിക്കാരായ കുട്ടികളെയും ഇത് ബാധിച്ചു. 2025 സെപ്റ്റംബര് 11-ന് ലെബനനില്, ഭിന്നശേഷിക്കാരായ കുട്ടികള്ക്കായുള്ള ഒരു സ്കൂള് ഇസ്രായേല് സൈന്യം സ്ഫോടനത്തിലൂടെ തകര്ത്തതായി വിവരങ്ങള് വ്യക്തമാക്കുന്നു.
ആധുനിക ആയുധങ്ങളും നിയമലംഘനങ്ങളും
ഡ്രോണുകള് ഉള്പ്പെടെയുള്ള മാരകമായ ആയുധങ്ങളുടെ ഉപയോഗം സ്കൂളുകള്ക്ക് നേരെയുള്ള ആക്രമണങ്ങളില് പതിവായി കാണാമായിരുന്നു. ഇത് വന്തോതിലുള്ള ആളപായത്തിനും അടിസ്ഥാന സൗകര്യങ്ങളുടെ തകര്ച്ചയ്ക്കും കാരണമാവുകയും പല സ്ഥാപനങ്ങളും അടച്ചുപൂട്ടാന് നിര്ബന്ധിതമാക്കുകയും ചെയ്തു. വിദ്യാഭ്യാസ സ്ഥാപനങ്ങള്ക്ക് നേരെയുള്ള ഇത്തരം ആക്രമണങ്ങള് ജനീവ കണ്വെന്ഷന് പോലുള്ള അന്താരാഷ്ട്ര നിയമങ്ങളുടെ കടുത്ത ലംഘനമാണ്.
2010 മുതല് യുദ്ധമേഖലകളില് ജീവിക്കുന്ന കുട്ടികളുടെ എണ്ണത്തില് 60 ശതമാനം വര്ധനവുണ്ടായിട്ടുണ്ട്. വിദ്യാഭ്യാസ സ്ഥാപനങ്ങള്ക്ക് നേരെയുള്ള ആക്രമണങ്ങള് ഉള്പ്പെടെ കുട്ടികള്ക്കെതിരെയുള്ള ഗുരുതരമായ അതിക്രമങ്ങളില് 373 ശതമാനവും വര്ദ്ധനവുണ്ടായി. 2025-ല് ആകെ 65 സംഘര്ഷങ്ങള് രേഖപ്പെടുത്തിയിട്ടുണ്ട്. ഇതില് 13 എണ്ണം യുദ്ധമാണ്. ഒരു കലണ്ടര് വര്ഷത്തില് കുറഞ്ഞത് 1,000 പേരെങ്കിലും യുദ്ധം മൂലം മരണപ്പെട്ടിട്ടുണ്ട്. മൊത്തത്തില് ലോകത്താകമാനമുണ്ടായ ആക്രമങ്ങളുടെയും സംഘര്ഷത്തിന്റെയും കണക്കെടുത്താല് 2025-ല് മാത്രം 244,000-ലധികം ആളുകള് കൊല്ലപ്പെട്ടു.
A new report has revealed a 40% increase in attacks on educational institutions, students, and staff worldwide during 2024 and 2025. More than 8,556 attacks were recorded across 83 countries, affecting over 10,600 students, teachers, and education personnel through killings, injuries, abductions, arrests, and other forms of abuse.