പുതിയ പ്ലാറ്റ്ഫോം, ഫ്യൂച്ചറിസ്റ്റിക് ബോക്സി ഡിസൈൻ; ടാറ്റയോട് മുട്ടാൻ മഹീന്ദ്രയുടെ പുതിയ എസ് യു വി എത്തുന്നു

ഇന്ത്യൻ എസ്‌യുവി വിപണിയിൽ സാന്നിധ്യം ശക്തമാക്കാൻ പുതിയ മോഡലുമായി മഹീന്ദ്ര ആൻഡ് മഹീന്ദ്ര. 2026 ഡിസംബറിൽ വിപണിയിലെത്തുമെന്ന് പ്രതീക്ഷിക്കുന്ന വാഹനം 2025 ഓഗസ്റ്റിൽ അവതരിപ്പിച്ച വിഷൻ എസ് കൺസെപ്റ്റിന്റെ പ്രൊഡക്ഷൻ പതിപ്പായിരിക്കുമെന്നാണ് റിപ്പോർട്ടുകൾ. വാഹനത്തിന്റെ ഔദ്യോഗിക പേര്, എൻജിൻ വിവരങ്ങൾ, മറ്റ് സാങ്കേതിക സവിശേഷതകൾ എന്നിവ കമ്പനി ഇതുവരെ പ്രഖ്യാപിച്ചിട്ടില്ല.

പെട്രോൾ, ഡീസൽ, ഹൈബ്രിഡ്, ഇലക്ട്രിക് പവർട്രെയിനുകൾക്ക് അനുയോജ്യമായ പുതിയ പ്ലാറ്റ്‌ഫോമിനെ അടിസ്ഥാനമാക്കിയായിരിക്കും എസ്‌യുവിയുടെ നിർമാണമെന്നാണ് സൂചന. ഭാവിയിൽ വിവിധ വിഭാഗങ്ങളിലുള്ള വാഹനങ്ങൾ വികസിപ്പിക്കുന്നതിനും ഈ പ്ലാറ്റ്‌ഫോം മഹീന്ദ്രയ്ക്ക് സഹായകരമായേക്കും.

പരുക്കൻ ലുക്കിൽ ബോക്സി ഡിസൈൻ

പുറത്തുവന്ന പരീക്ഷണ ചിത്രങ്ങൾ സൂചിപ്പിക്കുന്നത് കൺസെപ്റ്റ് മോഡലിന്റെ കരുത്തുറ്റ രൂപഭാവം പ്രൊഡക്ഷൻ പതിപ്പിലും നിലനിർത്തുമെന്നാണ്. നേരായ ബോഡി ലൈനുകളും ഉയർന്ന നിലയിലുള്ള രൂപകൽപ്പനയും എസ്‌യുവിക്ക് ഓഫ്-റോഡ് വാഹനങ്ങളുടേതിന് സമാനമായ ഭാവം നൽകും.

മുൻവശത്ത് പുതിയ ആറ് സ്ലോട്ട് ഗ്രിൽ, വൃത്താകൃതിയിലുള്ള പ്രൊജക്ടർ ഹെഡ്‌ലാമ്പുകൾ, സ്പോർട്ടി ബമ്പർ, വീതിയേറിയ എയർ ഡാം എന്നിവ പ്രതീക്ഷിക്കാം. മഹീന്ദ്ര താർ റോക്സിന്റെ ഡിസൈൻ ശൈലിയുമായി സാമ്യമുള്ള ചില ഘടകങ്ങളും വാഹനത്തിലുണ്ടാകുമെന്നാണ് സൂചന.

വശങ്ങളിൽ ഡ്യുവൽ ടോൺ അലോയ് വീലുകൾ, പനോരമിക് സൺറൂഫ്, വീതിയേറിയ വീൽ ആർച്ചുകൾ, ബോഡിയോട് ചേർന്നുനിൽക്കുന്ന ഡോർ ഹാൻഡിലുകൾ എന്നിവ ഇടംപിടിച്ചേക്കും. പിൻഭാഗത്ത് ലംബമായ എൽഇഡി ടെയിൽ ലാമ്പുകൾ, ടെയിൽഗേറ്റിന് കുറുകെയുള്ള എൽഇഡി ലൈറ്റ് സ്ട്രിപ്പ്, ടെയിൽഗേറ്റിൽ ഘടിപ്പിച്ച സ്പെയർ വീൽ എന്നിവയും പ്രതീക്ഷിക്കുന്നുണ്ട്. എന്നാൽ അന്തിമ ഡിസൈനിൽ മാറ്റങ്ങളുണ്ടാകാം.

ഇന്റീരിയറിൽ ഡിജിറ്റൽ സംവിധാനങ്ങൾക്ക് പ്രാധാന്യം

പുതിയ എസ്‌യുവിയുടെ അകത്തളത്തിൽ ആധുനിക സാങ്കേതികവിദ്യയും ദൈനംദിന ഉപയോഗത്തിനുള്ള സൗകര്യങ്ങളും സംയോജിപ്പിക്കാനാണ് മഹീന്ദ്ര ലക്ഷ്യമിടുന്നതെന്നാണ് റിപ്പോർട്ടുകൾ. താർ റോക്സിന് സമാനമായ 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റവും ഡിജിറ്റൽ ഡ്രൈവർ ഡിസ്‌പ്ലേയും ലഭിച്ചേക്കും.

എക്‌സ്‌യുവി 7എക്‌സ്ഒയിൽനിന്ന് പ്രചോദനം ഉൾക്കൊണ്ട രണ്ട് സ്പോക്ക് സ്റ്റിയറിങ് വീൽ, പുതുക്കിയ ഡാഷ്‌ബോർഡ്, ഡ്യുവൽ സോൺ ഓട്ടോമാറ്റിക് ക്ലൈമറ്റ് കൺട്രോൾ എന്നിവയും പ്രതീക്ഷിക്കാം. വയർലെസ് ആപ്പിൾ കാർപ്ലേ, ആൻഡ്രോയ്ഡ് ഓട്ടോ, ഓട്ടോ ഹോൾഡ് സംവിധാനമുള്ള ഇലക്ട്രോണിക് പാർക്കിങ് ബ്രേക്ക്, ഒന്നിലധികം എയർബാഗുകൾ, എൻജിൻ സ്റ്റാർട്ട്-സ്റ്റോപ്പ് ബട്ടൺ തുടങ്ങിയ ഫീച്ചറുകളും വാഹനത്തിൽ ഉൾപ്പെടുത്തിയേക്കും.

പെട്രോൾ, ഡീസൽ എൻജിനുകൾ പ്രതീക്ഷിക്കാം

പവർട്രെയിൻ സംബന്ധിച്ച ഔദ്യോഗിക വിവരങ്ങൾ പുറത്തുവന്നിട്ടില്ലെങ്കിലും 1.5 ലീറ്റർ ടർബോ പെട്രോൾ, ഡീസൽ എൻജിൻ ഓപ്ഷനുകൾ ലഭിക്കുമെന്നാണ് റിപ്പോർട്ടുകൾ. ഭാവിയിൽ പൂർണമായും ഇലക്ട്രിക് പതിപ്പും അവതരിപ്പിക്കാൻ സാധ്യതയുണ്ടെന്നാണ് സൂചന. ഒന്നിലധികം പവർട്രെയിനുകളെ പിന്തുണയ്ക്കുന്ന പ്ലാറ്റ്‌ഫോം ഉപയോഗിക്കുന്നതിനാൽ വ്യത്യസ്ത ആവശ്യങ്ങളുള്ള ഉപഭോക്താക്കളെ ലക്ഷ്യമിടാൻ കമ്പനിക്ക് സാധിച്ചേക്കും.

പ്രാരംഭ വില 10.50 ലക്ഷം രൂപ?

ഏകദേശം 10.50 ലക്ഷം രൂപയായിരിക്കുമ പുതിയ എസ്‌യുവിയുടെ പ്രാരംഭ എക്സ്-ഷോറൂം വില എന്നാണ് പ്രതീക്ഷിക്കപ്പെടുന്നത്. ഉയർന്ന വകഭേദങ്ങൾക്ക് 15 ലക്ഷം രൂപയോളം വിലയുണ്ടായേക്കും. എന്നാൽ ഇവ പ്രാഥമിക വില അനുമാനങ്ങൾ മാത്രമാണ്. ഔദ്യോഗിക വിലയും വേരിയന്റുകളുടെ വിശദാംശങ്ങളും കമ്പനി ഇതുവരെ പ്രഖ്യാപിച്ചിട്ടില്ല.

ടാറ്റയ്ക്കും റെനോയ്ക്കും വെല്ലുവിളിയാകുമോ?

വിപണിയിലെത്തുമ്പോൾ ടാറ്റ സ്കാർലെറ്റ്, റെനോ ബ്രിഡ്ജർ തുടങ്ങിയ വരാനിരിക്കുന്ന എസ്‌യുവികളുമായിട്ടായിരിക്കും വാഹനം പ്രധാനമായും മത്സരിക്കുക. ബോക്സി ഡിസൈൻ, ആധുനിക ഫീച്ചറുകൾ, വ്യത്യസ്ത എൻജിൻ ഓപ്ഷനുകൾ എന്നിവയായിരിക്കും വാഹനത്തിന്റെ പ്രധാന ആകർഷണങ്ങളാകുക.

ഡിസംബർ 2026-ൽ ലോഞ്ച് നടക്കുമെന്ന സൂചനകൾ യാഥാർഥ്യമാകുകയാണെങ്കിൽ, ഉത്സവകാലത്തിന് ശേഷമുള്ള എസ്‌യുവി വിപണിയിലെ മത്സരവും ശക്തമാകും. വാഹനത്തിന്റെ ഔദ്യോഗിക പേര്, എൻജിൻ സവിശേഷതകൾ, സുരക്ഷാ സംവിധാനങ്ങൾ, വേരിയന്റുകൾ, കൃത്യമായ വില എന്നിവ സംബന്ധിച്ച കൂടുതൽ വിവരങ്ങൾക്കായി മഹീന്ദ്രയുടെ പ്രഖ്യാപനം കാത്തിരിക്കണം.