ഇന്ത്യൻ മിഡ്സൈസ് എസ്യുവി വിപണിയിൽ പുതിയ അധ്യായത്തിന് തുടക്കമിടാൻ ഒരുങ്ങുകയാണ് ഹ്യുണ്ടായി ക്രെറ്റ. നിലവിലെ മോഡലിൽനിന്ന് ഏറെ വ്യത്യസ്തമായ രൂപകൽപ്പനയും കൂടുതൽ സാങ്കേതികവിദ്യകളും പുതിയ പവർട്രെയിൻ ഓപ്ഷനുകളും ഉൾപ്പെടുത്തി അടുത്ത തലമുറ ക്രെറ്റയെ 2027ൽ അവതരിപ്പിക്കാനാണ് ഹ്യുണ്ടായിയുടെ നീക്കം. വാഹനത്തിന്റെ പരീക്ഷണയോട്ടം ഇന്ത്യയിലും യൂറോപ്പിലും പുരോഗമിക്കുന്നതിനിടെ ടെസ്റ്റ് മോഡലുകളിലെ കാമഫ്ലാഷ് കുറഞ്ഞുവരുന്നതോടെ പുതിയ എസ്യുവിയെക്കുറിച്ചുള്ള കൂടുതൽ വിവരങ്ങളും പുറത്തുവരികയാണ്.
വൃത്താകൃതിയിലുള്ള രൂപത്തിന് പകരം ബോക്സി ഡിസൈൻ
നിലവിലെ ക്രെറ്റയുടെ വളവുകളേറിയ രൂപകൽപ്പനയിൽനിന്ന് മാറി കൂടുതൽ പരമ്പരാഗത എസ്യുവി ശൈലിയിലാകും പുതിയ തലമുറ മോഡൽ എത്തുകയെന്നാണ് റിപ്പോർട്ടുകൾ. ചില അന്താരാഷ്ട്ര വിപണികളിൽ ക്രെറ്റയെ കോണ എന്ന പേരിൽ അവതരിപ്പിക്കാനുള്ള സാധ്യതയും ചർച്ചയിലുണ്ട്. കൂടുതൽ ഉയർന്ന ബോഡി, വീതിയേറിയ ട്രാക്ക്, ബോക്സി സില്യൂട്ട് എന്നിവയാണ് പുതിയ മോഡലിന്റെ പ്രധാന ഡിസൈൻ മാറ്റങ്ങൾ. ഷാർപ്പ് നോസും ഇല്യൂമിനേറ്റഡ് ലൈറ്റ് ബാറും ഉൾപ്പെടുന്ന പുതിയ ഫ്രണ്ട് ഡിസൈനായിരിക്കും വാഹനത്തിന് ലഭിക്കുക. പ്രധാന ഹെഡ്ലാമ്പുകൾ ബമ്പറിന്റെ താഴ്ഭാഗത്തേക്ക് മാറ്റിയേക്കും. ഇതോടൊപ്പം ആക്ടീവ് ഷട്ടർ ഗ്രിൽ, വീതിയേറിയ ലോവർ എയർ ഇൻടേക്ക്, കൂടുതൽ മസ്കുലാർ ആയ ബമ്പർ എന്നിവയും മുന്നിൽ പ്രതീക്ഷിക്കാം.
വലുപ്പം കൂടും; പിൻഭാഗത്തും കാര്യമായ മാറ്റം
നിലവിലെ മോഡലിനെ അപേക്ഷിച്ച് പുതിയ ക്രെറ്റയ്ക്ക് കൂടുതൽ നീളം ലഭിച്ചേക്കും. ഷാർപ്പായ എ-പില്ലർ, താരതമ്യേന ഫ്ലാറ്റായ റൂഫ്ലൈൻ, വലുതായ വീൽ ആർച്ചുകൾ എന്നിവ വാഹനത്തിന്റെ എസ്യുവി സ്വഭാവം കൂടുതൽ ശക്തമാക്കും. 19 ഇഞ്ച് വരെ വലുപ്പമുള്ള അലോയ് വീലുകൾ, ഫ്ലഷ് ഡോർ ഹാൻഡിലുകൾ, ഉയർന്ന ബെൽറ്റ്ലൈൻ എന്നിവയും ഡിസൈനിന്റെ ഭാഗമായേക്കും.
പിൻഭാഗത്താണ് കൂടുതൽ ശ്രദ്ധേയമായ മാറ്റങ്ങൾ പ്രതീക്ഷിക്കുന്നത്. ലളിതമായ ടെയിൽഗേറ്റ്, വീതിയേറിയ റിയർ പ്രൊഫൈൽ, ആംഗുലാർ റിയർ വിൻഡോ, വലിയ റൂഫ് സ്പോയിലർ എന്നിവ വാഹനത്തിന് കൂടുതൽ കരുത്തുറ്റ രൂപം നൽകും. എക്സ്ഹോസ്റ്റ് പൈപ്പുകൾ മറച്ചുവയ്ക്കുന്ന തരത്തിലുള്ള റിയർ ബമ്പറും പുതിയ മോഡലിൽ ഉണ്ടായേക്കും.
ഇന്റീരിയറിൽ വൻ ടെക്നോളജി അപ്ഗ്രേഡ്
ക്യാബിനിലും നിലവിലെ ക്രെറ്റയിൽനിന്ന് വലിയ മാറ്റങ്ങളാണ് പ്രതീക്ഷിക്കുന്നത്. ഹ്യുണ്ടായിയുടെ പുതിയ Pleos Connect സംവിധാനത്തിനൊപ്പം ഏകദേശം 17 ഇഞ്ച് വലുപ്പമുള്ള ഇൻഫോടെയ്ൻമെന്റ് ഡിസ്പ്ലേയും സ്ലിം ഡിജിറ്റൽ ഇൻസ്ട്രുമെന്റ് ക്ലസ്റ്ററും ലഭിച്ചേക്കും. ഓഗ്മെന്റഡ് റിയാലിറ്റി ഹെഡ്-അപ്പ് ഡിസ്പ്ലേ, കൂടുതൽ വിപുലമായ കണക്റ്റഡ് കാർ സംവിധാനങ്ങൾ, റിയൽ-ടൈം OTA അപ്ഡേറ്റുകൾ തുടങ്ങിയ സാങ്കേതികവിദ്യകളും വാഹനത്തിൽ ഇടംപിടിച്ചേക്കും. പനോരമിക് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ, ഇലക്ട്രിക്കലി അഡ്ജസ്റ്റബിൾ സീറ്റുകൾ, ഡ്യുവൽ സോൺ ക്ലൈമറ്റ് കൺട്രോൾ തുടങ്ങിയ സൗകര്യങ്ങൾക്കൊപ്പം ലെവൽ 2 ADAS സംവിധാനവും പുതിയ ക്രെറ്റയിൽ പ്രതീക്ഷിക്കാം.
സ്ട്രോങ് ഹൈബ്രിഡ് എത്താൻ സാധ്യത
അടുത്ത തലമുറ ക്രെറ്റയിലെ ഏറ്റവും പ്രധാനപ്പെട്ട മാറ്റങ്ങളിലൊന്ന് സ്ട്രോങ് ഹൈബ്രിഡ് പവർട്രെയിൻ ആയിരിക്കുമെന്നാണ് സൂചന. ആഗോള വിപണികളിലെ കോണ/ക്രെറ്റയ്ക്കായി 1.6 ലിറ്റർ ടർബോ പെട്രോൾ എൻജിനുമായി ഹൈബ്രിഡ് സംവിധാനം ഒരുക്കാനുള്ള സാധ്യതയുണ്ട്.
പെട്രോൾ എൻജിനൊപ്പം ബാറ്ററി പാക്കും ഇലക്ട്രിക് മോട്ടോറും സംയോജിപ്പിച്ചായിരിക്കും ഹൈബ്രിഡ് പവർട്രെയിൻ പ്രവർത്തിക്കുക. ആറ് സ്പീഡ് ഡ്യുവൽ ക്ലച്ച് ഓട്ടോമാറ്റിക് ഗിയർബോക്സ് ഇതുമായി ബന്ധിപ്പിച്ചേക്കുമെന്നാണ് റിപ്പോർട്ടുകൾ.
നിലവിലെ എൻജിൻ ഓപ്ഷനുകളും തുടരും
ഇന്ത്യൻ വിപണിയെ ലക്ഷ്യമിട്ടുള്ള മോഡലിൽ നിലവിലെ എൻജിൻ നിര പൂർണമായും ഒഴിവാക്കാൻ സാധ്യതയില്ല. 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.5 ലിറ്റർ ടർബോ പെട്രോൾ, 1.5 ലിറ്റർ ടർബോ ഡീസൽ എൻജിനുകൾ തുടർന്നും ലഭിച്ചേക്കും.
ഇതിനൊപ്പം പുതിയ ഹൈബ്രിഡ് ഓപ്ഷനും ഇന്ത്യൻ പതിപ്പിൽ ഉൾപ്പെടുത്താനുള്ള സാധ്യതയുണ്ട്. 1.5 ലിറ്റർ നാല് സിലിണ്ടർ നാച്ചുറലി ആസ്പിറേറ്റഡ് പെട്രോൾ എൻജിനൊപ്പം മുൻവശത്ത് ഘടിപ്പിച്ച ഇലക്ട്രിക് മോട്ടോർ ഉപയോഗിക്കുന്ന ഹൈബ്രിഡ് സംവിധാനം ഇന്ത്യയ്ക്കായി പരിഗണിക്കുന്നതായാണ് സൂചന.
പുതിയ ഡിസൈൻ, കൂടുതൽ പ്രീമിയം ഇന്റീരിയർ, വിപുലമായ കണക്റ്റഡ് ടെക്നോളജി, ലെവൽ 2 ADAS, ഹൈബ്രിഡ് പവർട്രെയിൻ എന്നിവയോടെ എത്തുന്ന അടുത്ത തലമുറ ക്രെറ്റയ്ക്ക് നിലവിലെ മോഡലിനേക്കാൾ വ്യത്യസ്തമായ സ്ഥാനം ഇന്ത്യൻ വിപണിയിൽ നേടാനാകും. 2027ലെ അരങ്ങേറ്റത്തോടെ മിഡ്സൈസ് എസ്യുവി വിഭാഗത്തിലെ ഹ്യുണ്ടായിയുടെ മത്സരം കൂടുതൽ ശക്തമാകാനും സാധ്യതയുണ്ട്.