ഇലക്ട്രിക് ബൈക്ക് വിപണിയിൽ റേഞ്ചും പ്രകടനവും മെച്ചപ്പെടുത്തുന്നതിൽ ശ്രദ്ധ കേന്ദ്രീകരിച്ച് പുതിയ X-47 വെനം അവതരിപ്പിച്ച് അൾട്രാവയലറ്റ്. ഭാരം കുറച്ചും ബാറ്ററി കാര്യക്ഷമത വർധിപ്പിച്ചും പുതിയ പ്ലാറ്റ്‌ഫോമിൽ ഒരുക്കിയിരിക്കുന്ന ഈ മോഡലിന്റെ ഉയർന്ന വേരിയന്റിന് ഒറ്റ ചാർജിൽ 343 കിലോമീറ്റർ വരെ സഞ്ചരിക്കാനാകുമെന്നാണ് കമ്പനിയുടെ അവകാശവാദം. മികച്ച ആക്സിലറേഷൻ, ആധുനിക റൈഡിങ് സംവിധാനങ്ങൾ, സുരക്ഷാ ഫീച്ചറുകൾ എന്നിവയും പുതിയ ബൈക്കിന്റെ പ്രത്യേകതകളാണ്. അടിസ്ഥാന വേരിയന്റിന് 2.65 ലക്ഷം രൂപയും ഉയർന്ന ബാറ്ററി ശേഷിയുള്ള റീക്കോൺ പതിപ്പിന് 4.12 ലക്ഷം രൂപയുമാണ് വില.
അൾട്രാവയലറ്റിന്റെ പുതിയ VX-100 പ്ലാറ്റ്‌ഫോമിലാണ് X-47 വെനം നിർമിച്ചിരിക്കുന്നത്. മുൻ മോഡലുകളെ അപേക്ഷിച്ച് വാഹനത്തിന്റെ മൊത്തത്തിലുള്ള ഭാരം കുറയ്ക്കുന്നതിനും ബാറ്ററിയുടെ കാര്യക്ഷമത മെച്ചപ്പെടുത്തുന്നതിനും ഈ പ്ലാറ്റ്‌ഫോം സഹായിച്ചെന്നാണ് കമ്പനി പറയുന്നത്. ബാറ്ററി, മോട്ടോർ, മോട്ടോർ കൺട്രോളർ എന്നിവയുടെ ഭാരം കുറച്ചതിനൊപ്പം കൂളിങ് സംവിധാനത്തിലും പരിഷ്കാരങ്ങൾ വരുത്തിയിട്ടുണ്ട്.
7.5kWh ബാറ്ററിയുള്ള അടിസ്ഥാന പതിപ്പിന് 180 കിലോഗ്രാമാണ് ഭാരം. മുൻപ് വിപണിയിലുണ്ടായിരുന്ന 7kWh പതിപ്പിനെക്കാൾ 17 കിലോഗ്രാം കുറവാണിത്. ഒറ്റ ചാർജിൽ 227 കിലോമീറ്റർ വരെ സഞ്ചരിക്കാനാകുമെന്നാണ് കമ്പനി അവകാശപ്പെടുന്നത്.
അതേസമയം, 11kWh ബാറ്ററിയുള്ള റീക്കോൺ വേരിയന്റിന് 195 കിലോഗ്രാമാണ് ഭാരം. മുൻ മോഡലിലെ 10.3kWh പതിപ്പിനെക്കാൾ 13 കിലോഗ്രാം ഭാരം കുറഞ്ഞിട്ടുണ്ട്. ഈ പതിപ്പിലാണ് 343 കിലോമീറ്റർ വരെ റേഞ്ച് ലഭിക്കുമെന്ന് കമ്പനി അവകാശപ്പെടുന്നത്.
പ്രകടനത്തിന്റെ കാര്യത്തിലും X-47 വെനം ശ്രദ്ധേയമാണ്. റീക്കോൺ വേരിയന്റിൽ 40 ബിഎച്ച്പി കരുത്തും 90 എൻഎം ടോർക്കുമാണ് ലഭിക്കുന്നത്. നിശ്ചലാവസ്ഥയിൽനിന്ന് മണിക്കൂറിൽ 60 കിലോമീറ്റർ വേഗത്തിലെത്താൻ 2.7 സെക്കൻഡ് മതിയാകും. മണിക്കൂറിൽ 100 കിലോമീറ്റർ വേഗം കൈവരിക്കാൻ 5.9 സെക്കൻഡ് മതിയെന്നാണ് കമ്പനിയുടെ കണക്ക്.
ബാറ്ററി ചാർജ് 10 ശതമാനമായി കുറഞ്ഞാലും ബാലിസ്റ്റിക് റൈഡ് മോഡ് ഉപയോഗിക്കാൻ സാധിക്കുമെന്നതാണ് മറ്റൊരു പ്രത്യേകത. മുൻ മോഡലിൽ ഈ മോഡ് ഉപയോഗിക്കാൻ കുറഞ്ഞത് 30 ശതമാനം ബാറ്ററി ചാർജ് ആവശ്യമായിരുന്നു. റീജനറേറ്റീവ് ബ്രേക്കിങ് സംവിധാനം ബാറ്ററി ചാർജ് 99 ശതമാനമുള്ളപ്പോഴും പ്രവർത്തിക്കുമെന്നും കമ്പനി വ്യക്തമാക്കുന്നു.
പുതിയ X-47 വെനത്തിൽ 7 ഇഞ്ച് ടിഎഫ്ടി ഡിസ്പ്ലേ, ക്രൂയിസ് കൺട്രോൾ, ക്യാമറ അധിഷ്ഠിത പാർക്കിങ് അസിസ്റ്റ് തുടങ്ങിയ ഫീച്ചറുകളുണ്ട്. എന്നാൽ ഈ സൗകര്യങ്ങൾ ഉയർന്ന മൂന്ന് വേരിയന്റുകളിൽ മാത്രമാണ് ലഭ്യമാകുക.
സുരക്ഷാ സംവിധാനങ്ങളുടെ കാര്യത്തിൽ എല്ലാ വേരിയന്റുകളിലും ഡ്യുവൽ ചാനൽ എബിഎസ്, ട്രാക്ഷൻ കൺട്രോൾ, ഡൈനാമിക് സ്റ്റബിലിറ്റി കൺട്രോൾ എന്നിവ ഉൾപ്പെടുത്തിയിട്ടുണ്ട്. ഉയർന്ന വേരിയന്റുകളിൽ നാല് ലെവലുകളുള്ള ട്രാക്ഷൻ കൺട്രോൾ സംവിധാനവും റഡാർ അധിഷ്ഠിത യുവി ഹൈപ്പർസെൻസ് അസിസ്റ്റൻസ് സിസ്റ്റവും സംയോജിത ഡാഷ്‌ക്യാമും ലഭിക്കും. റൈഡിങ് അനുഭവം മെച്ചപ്പെടുത്തുന്നതിനൊപ്പം സുരക്ഷയ്ക്കും കൂടുതൽ പ്രാധാന്യം നൽകുന്നതാണ് ഈ സംവിധാനങ്ങൾ.
വാഹനത്തിന്റെ അടിസ്ഥാന ഹാർഡ്‌വെയർ സംവിധാനങ്ങളിൽ വലിയ മാറ്റങ്ങളില്ലാതെയാണ് പുതിയ പതിപ്പ് എത്തുന്നത്. 820 എംഎം സീറ്റ് ഉയരം, 200 എംഎം ഗ്രൗണ്ട് ക്ലിയറൻസ്, 1,385 എംഎം വീൽബേസ് എന്നിവയാണ് പ്രധാന അളവുകൾ.
മുൻവശത്ത് 320 എംഎം ഡിസ്ക് ബ്രേക്കും പിൻവശത്ത് 230 എംഎം ഡിസ്ക് ബ്രേക്കുമാണ് നൽകിയിരിക്കുന്നത്. 41 എംഎം പ്രീലോഡ് ക്രമീകരിക്കാവുന്ന യുഎസ്ഡി ഫ്രണ്ട് ഫോർക്കും പിന്നിൽ മോണോഷോക്ക് സസ്പെൻഷനുമാണ് ഉപയോഗിക്കുന്നത്. സ്റ്റീൽ ട്രെല്ലിസ് ഫ്രെയിമും 17 ഇഞ്ച് വലുപ്പമുള്ള മുൻ-പിൻ വീലുകളും പുതിയ മോഡലിലും നിലനിർത്തിയിട്ടുണ്ട്.
പുതിയ മോഡലിലെ ശ്രദ്ധിക്കേണ്ട മാറ്റങ്ങളിലൊന്ന് ചാർജിങ് സമയത്തിലാണ്. കമ്പനിയുടെ 1.3kW പോർട്ടബിൾ ചാർജർ ഉപയോഗിക്കുമ്പോൾ ബാറ്ററി ചാർജ് 20 ശതമാനത്തിൽനിന്ന് 80 ശതമാനത്തിലെത്താൻ അഞ്ച് മണിക്കൂർ 30 മിനിറ്റ് വേണ്ടിവരും. മുൻ മോഡലിൽ ഇതേ ചാർജ് നിലയിലെത്താൻ ഏകദേശം അഞ്ച് മണിക്കൂർ മതിയായിരുന്നു.
റേഞ്ച്, ഭാരം, വേഗത, സുരക്ഷാ സാങ്കേതികവിദ്യകൾ എന്നിവയിൽ മെച്ചപ്പെടുത്തലുകളുമായെത്തുന്ന X-47 വെനം, ഇലക്ട്രിക് ബൈക്ക് വിപണിയിൽ അൾട്രാവയലറ്റിന്റെ സാന്നിധ്യം ശക്തമാക്കാനുള്ള പുതിയ നീക്കമാണ്. എന്നാൽ, കൂടുതൽ ബാറ്ററി ശേഷിയുള്ള വേരിയന്റിന്റെ ഉയർന്ന വിലയും ചാർജിങ്ങിന് വേണ്ടിവരുന്ന സമയവും ഉപഭോക്താക്കളുടെ തിരഞ്ഞെടുപ്പിൽ നിർണായകമാകും.
Ultraviolette has launched the X-47 Venom electric bike, offering a range of up to 343 km on a single charge, impressive acceleration, advanced technology, and safety features. Built on the VX-100 platform, the model is priced between ₹2.65 lakh and ₹4.12 lakh.