ഇന്ത്യൻ വാഹന വിപണിയിൽ സബ്-4 മീറ്റർ എസ്യുവികൾക്ക് ആവശ്യക്കാർ വർധിച്ചുവരികയാണ്. നഗരങ്ങളിലെ തിരക്കേറിയ റോഡുകളിലൂടെയുള്ള യാത്രയും പരിമിതമായ പാർക്കിങ് സൗകര്യങ്ങളും കണക്കിലെടുക്കുമ്പോൾ ചെറിയ വലുപ്പവും പ്രായോഗികതയും ഈ വാഹനങ്ങളെ കൂടുതൽ ജനപ്രിയമാക്കുന്നു. താരതമ്യേന കുറഞ്ഞ വിലയും ഉപഭോക്താക്കളെ ഈ വിഭാഗത്തിലേക്ക് ആകർഷിക്കുന്നുണ്ട്. വർധിച്ചുവരുന്ന ആവശ്യകത കണക്കിലെടുത്ത് നിരവധി വാഹന നിർമാതാക്കൾ പുതിയ മോഡലുകളും നിലവിലുള്ള വാഹനങ്ങളുടെ പുതുക്കിയ പതിപ്പുകളും അവതരിപ്പിക്കാനുള്ള ഒരുക്കത്തിലാണ്. ഹ്യുണ്ടായ്, റെനോ, മാരുതി സുസുക്കി, ടാറ്റ മോട്ടോഴ്സ്, ഫോക്സ്വാഗൺ തുടങ്ങിയ കമ്പനികളുടെ പുതിയ എസ്യുവികൾ അടുത്ത ഒരു വർഷത്തിനുള്ളിൽ ഇന്ത്യൻ വിപണിയിലെത്തുമെന്നാണ് റിപ്പോർട്ടുകൾ.
ഇന്ത്യയിൽ ചെറു ഇലക്ട്രിക് എസ്യുവി അവതരിപ്പിക്കാനുള്ള നീക്കത്തിലാണ് ഹ്യുണ്ടായി. HE1i എന്ന കോഡ് നാമത്തിൽ വികസിപ്പിക്കുന്ന വാഹനത്തിന്റെ പരീക്ഷണ ഓട്ടങ്ങൾ ആരംഭിച്ചതായാണ് റിപ്പോർട്ടുകൾ. കമ്പനിയുടെ E-GMP (കെ) ഇലക്ട്രിക് പ്ലാറ്റ്ഫോമിനെ അടിസ്ഥാനമാക്കിയാകും പുതിയ മോഡൽ നിർമിക്കുക.
42kWh, 49kWh എന്നിങ്ങനെ രണ്ട് ബാറ്ററി ഓപ്ഷനുകൾ വാഹനത്തിൽ ലഭിച്ചേക്കും. ഒറ്റത്തവണ ചാർജ് ചെയ്താൽ 500 കിലോമീറ്റർ വരെ സഞ്ചരിക്കാൻ കഴിയുമെന്നാണ് പ്രതീക്ഷ. എന്നാൽ ബാറ്ററി ശേഷി, യഥാർഥ റേഞ്ച്, മറ്റ് സാങ്കേതിക സവിശേഷതകൾ എന്നിവ സംബന്ധിച്ച ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല.
കൈഗറിന്റെ പുതുക്കിയ പതിപ്പിലൂടെ ഇന്ത്യൻ വിപണിയിൽ കൂടുതൽ സാന്നിധ്യമുറപ്പിക്കാനാണ് റെനോയുടെ നീക്കം. നിലവിലെ CMF-A+ പ്ലാറ്റ്ഫോമിന് പകരം പുതിയ RGEP പ്ലാറ്റ്ഫോമിലായിരിക്കും അടുത്ത തലമുറ കൈഗർ ഒരുങ്ങുകയെന്നാണ് സൂചന. ഫാക്ടറിയിൽ തന്നെ ഘടിപ്പിക്കുന്ന സിഎൻജി സംവിധാനമാണ് വാഹനത്തിലെ പ്രധാന ആകർഷണങ്ങളിലൊന്ന്.
വാഹനത്തിന്റെ അടിഭാഗത്ത് സിഎൻജി ടാങ്ക് സ്ഥാപിക്കുന്ന രീതിയിലായിരിക്കും പുതിയ ക്രമീകരണം. ഇതിലൂടെ ബൂട്ട് സ്പേസ് പരമാവധി നിലനിർത്താൻ സാധിക്കുമെന്നാണ് പ്രതീക്ഷ. നിലവിലുള്ള 1.0 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.0 ലിറ്റർ ടർബോ പെട്രോൾ എൻജിനുകൾ പുതിയ പതിപ്പിലും തുടർന്നേക്കും.
മാരുതി സുസുക്കിയുടെ കോംപാക്ട് എസ്യുവിയായ ഫ്രോങ്ക്സിനും പുതുമകളുമായി ഫെയ്സ്ലിഫ്റ്റ് പതിപ്പ് എത്തുമെന്നാണ് സൂചന. വാഹനത്തിന്റെ പുറംഭാഗത്തെ രൂപകൽപ്പനയിൽ മാറ്റങ്ങൾ വരുത്തുന്നതിനൊപ്പം അകത്തളത്തിലും കൂടുതൽ സൗകര്യങ്ങൾ ഉൾപ്പെടുത്താൻ സാധ്യതയുണ്ട്.
വലിയ ടച്ച്സ്ക്രീൻ ഇൻഫോടെയ്ൻമെന്റ് സംവിധാനം, വെന്റിലേറ്റഡ് ഫ്രണ്ട് സീറ്റുകൾ, ലെവൽ 2 ADAS തുടങ്ങിയ ഫീച്ചറുകൾ പുതിയ പതിപ്പിൽ പ്രതീക്ഷിക്കാം. എൻജിൻ നിരയിലും മാറ്റങ്ങളുണ്ടായേക്കും. നിലവിലെ 1.2 ലിറ്റർ നാല് സിലിണ്ടർ പെട്രോൾ എൻജിന് പകരം പുതിയ 1.2 ലിറ്റർ Z-സീരീസ് മൂന്ന് സിലിണ്ടർ എൻജിൻ അവതരിപ്പിച്ചേക്കും. അതേസമയം, 1.0 ലിറ്റർ ടർബോ പെട്രോൾ എൻജിൻ തുടരുമെന്നാണ് സൂചന.
ഇന്ത്യയിലെ ജനപ്രിയ കോംപാക്ട് എസ്യുവികളിലൊന്നായ നെക്സോണിന്റെ അടുത്ത തലമുറ മോഡലിന്റെ വികസനത്തിലാണ് ടാറ്റ മോട്ടോഴ്സ്. ഗരുഡ് എന്ന രഹസ്യനാമത്തിൽ അറിയപ്പെടുന്ന പുതിയ നെക്സോൺ 2027ൽ വിപണിയിലെത്തുമെന്നാണ് റിപ്പോർട്ടുകൾ.
നിലവിലെ മോഡലിൽനിന്ന് വ്യത്യസ്തമായി കൂടുതൽ കരുത്തുറ്റതും പരുക്കൻ ഭാവമുള്ളതുമായ ഡിസൈനായിരിക്കും പുതിയ വാഹനത്തിന് ലഭിക്കുക. പുറംരൂപത്തിലെ മാറ്റങ്ങൾക്കൊപ്പം ക്യാബിനിലും ആധുനിക സാങ്കേതികവിദ്യകളും പുതിയ സൗകര്യങ്ങളും ഉൾപ്പെടുത്താൻ സാധ്യതയുണ്ട്. പെട്രോൾ, സിഎൻജി എൻജിൻ ഓപ്ഷനുകൾ തുടരുമെന്നാണ് പ്രതീക്ഷ. എന്നാൽ ഡീസൽ എൻജിൻ പുതിയ മോഡലിൽ ലഭ്യമാകുമോയെന്ന കാര്യത്തിൽ ഇതുവരെ വ്യക്തതയില്ല.
ഇന്ത്യൻ വിപണിയിലെ സബ്-4 മീറ്റർ എസ്യുവി വിഭാഗത്തിലേക്ക് പുതിയ മോഡലുമായി പ്രവേശിക്കാനുള്ള ഒരുക്കത്തിലാണ് ഫോക്സ്വാഗൺ. 2027ൽ പുതിയ വാഹനത്തെ അവതരിപ്പിക്കാനാണ് കമ്പനി പദ്ധതിയിടുന്നതെന്നാണ് റിപ്പോർട്ടുകൾ. ഇന്ത്യയ്ക്കായി പ്രത്യേകം വികസിപ്പിച്ച MQB-A0-IN പ്ലാറ്റ്ഫോമിലായിരിക്കും വാഹനത്തിന്റെ നിർമാണം. ഉത്പാദനവും രാജ്യത്ത് തന്നെയായിരിക്കും.
സ്കോഡ കൈലാക്കിൽ ഉപയോഗിച്ചിരിക്കുന്ന നിരവധി സവിശേഷതകളും സാങ്കേതികവിദ്യകളും ഫോക്സ്വാഗണിന്റെ പുതിയ എസ്യുവിയിലും ഉൾപ്പെടുത്തിയേക്കും. 1.0 ലിറ്റർ TSI ടർബോ പെട്രോൾ എൻജിനായിരിക്കും വാഹനത്തിന് കരുത്തേകുകയെന്നാണ് സൂചന. മാനുവൽ, ഓട്ടോമാറ്റിക് ഗിയർബോക്സ് ഓപ്ഷനുകളും പ്രതീക്ഷിക്കുന്നുണ്ട്.
പുതിയ മോഡലുകളും ഫെയ്സ്ലിഫ്റ്റുകളും എത്തുന്നതോടെ വരും മാസങ്ങളിൽ ഇന്ത്യൻ സബ്-4 മീറ്റർ എസ്യുവി വിപണിയിൽ കൂടുതൽ മാറ്റങ്ങളുണ്ടാകുമെന്നാണ് പ്രതീക്ഷ. ഇലക്ട്രിക്, പെട്രോൾ, സിഎൻജി വിഭാഗങ്ങളിലായി പുതിയ വാഹനങ്ങൾ എത്തുന്നത് ഉപഭോക്താക്കൾക്ക് കൂടുതൽ ഓപ്ഷനുകൾ ലഭ്യമാക്കും.
As India’s sub-4-metre SUV market continues to grow rapidly, companies such as Hyundai, Renault, Maruti, Tata, and Volkswagen are preparing new models and facelifts. Hyundai’s electric SUV based on the E-GMP platform, the Renault Kiger with an underbody-mounted CNG tank, the feature-rich Fronx, the new Nexon expected in 2027, and Volkswagen’s SUV based on the MQB-A0-IN platform are set to offer consumers a wide range of options.