മോഹൻലാലിന്റെ ‘അംഗീകാരം’ തേടി അജയ് ദേവ്ഗൺ; ‘ദൃശ്യം 3’യെക്കുറിച്ച് താരം പറഞ്ഞത്

മോഹൻലാൽ നായകനായ മലയാളം ‘ദൃശ്യം’ ഫ്രാഞ്ചൈസും അജയ് ദേവ്ഗണിന്റെ ഹിന്ദി പതിപ്പും ഇനി ഒരേ വഴിയിലൂടെയല്ല സഞ്ചരിക്കുന്നത്. ‘ദൃശ്യം: ദി കൺക്ലൂഷൻ’ മലയാളം ‘ദൃശ്യം 3’യുടെ റീമേക്ക് അല്ലെന്നും, തികച്ചും വ്യത്യസ്തമായ തിരക്കഥയാണ് ചിത്രത്തിന്റേതെന്നും അജയ് ദേവ്ഗൺ വ്യക്തമാക്കി. ചിത്രം റിലീസിന് ഒരുങ്ങുന്നതിനിടെ, മോഹൻലാലിനെ സിനിമ കാണിക്കണമെന്ന തന്റെ ആഗ്രഹവും താരം തുറന്നുപറഞ്ഞു.

ആദ്യ രണ്ട് ചിത്രങ്ങളിലും മലയാളം ഫ്രാഞ്ചൈസിയുടെ കഥയാണ് ഹിന്ദി പതിപ്പിന് പ്രധാനമായും അടിസ്ഥാനമായത്. എന്നാൽ മൂന്നാം ഭാഗത്തേക്ക് എത്തിയപ്പോൾ സമീപനം മാറിയിരിക്കുകയാണ്. മോഹൻലാലിനെ നായകനാക്കി ജീത്തു ജോസഫ് ഒരുക്കിയ മലയാളം ‘ദൃശ്യം 3’യിൽ നിന്ന് വ്യത്യസ്തമായ കഥയാണ് അജയ് ദേവ്ഗണിന്റെ ചിത്രം പറയുന്നതെന്ന് അദ്ദേഹം വ്യക്തമാക്കി. ചെറിയ മാറ്റങ്ങളോടെ ഒരുക്കിയ പതിപ്പല്ല ഇതെന്നും, രണ്ട് സിനിമകളുടെയും തിരക്കഥകൾ തന്നെ വ്യത്യസ്തമാണെന്നും അജയ് പറഞ്ഞു.

ചിത്രം പൂർത്തിയായതിന് പിന്നാലെ മോഹൻലാലിനെ നേരിട്ട് വിളിച്ചതായും അജയ് വെളിപ്പെടുത്തി. തന്റെ പുതിയ ചിത്രം മോഹൻലാൽ കാണണമെന്നായിരുന്നു ആഗ്രഹം. എന്നാൽ അവധിയിലായിരുന്നതിനാൽ താരത്തിന് അപ്പോൾ സിനിമ കാണാൻ കഴിഞ്ഞില്ല. പിന്നീട് ഇരുവരും ആശയവിനിമയം നടത്തിയെന്നും മോഹൻലാൽ ചിത്രം കാണുമെന്നാണ് പ്രതീക്ഷിക്കുന്നതെന്നും അജയ് പറഞ്ഞു.

മലയാളം ‘ദൃശ്യം’ ഫ്രാഞ്ചൈസിയുടെ തുടക്കവുമായി മോഹൻലാലിനും ജീത്തു ജോസഫിനുമുള്ള ബന്ധം കണക്കിലെടുത്താണ് അവരുടെ അഭിപ്രായത്തിന് പ്രാധാന്യം നൽകുന്നതെന്നും അജയ് വ്യക്തമാക്കി. ചിത്രം ഇരുവരും കണ്ട് ഇഷ്ടപ്പെടുകയും അവരുടെ അംഗീകാരം ലഭിക്കുകയും ചെയ്താൽ അത് തനിക്ക് സന്തോഷം നൽകുമെന്നും അദ്ദേഹം പറഞ്ഞു.

‘ദൃശ്യം 2’യ്ക്ക് ശേഷം മൂന്നാം ഭാഗം എങ്ങനെ മുന്നോട്ടുകൊണ്ടുപോകണമെന്നത് എളുപ്പമായിരുന്നില്ലെന്നാണ് അജയ് പറഞ്ഞത്. പഴയ കഥയുടെ തുടർച്ച നിലനിർത്തുന്നതിനൊപ്പം പുതിയ ട്വിസ്റ്റുകളും സസ്പെൻസും ഒരുക്കേണ്ടതുണ്ടായിരുന്നു. സംവിധായകൻ അഭിഷേക് പാഥക് മുന്നോട്ടുവച്ച ആശയത്തിൽ നിന്നാണ് പുതിയ ചിത്രത്തിന്റെ തിരക്കഥ വികസിച്ചത്. ഏകദേശം രണ്ടര വർഷം തിരക്കഥയുടെ ജോലികൾ നടന്നതായും അജയ് പറഞ്ഞു. ഇത്തവണ വിജയ് സൽഗാവ്കറിന്റെ കഥയ്ക്ക് പുതിയൊരു വഴിയാണ് ചിത്രം തുറക്കുന്നത്. അജയ് ദേവ്ഗണിനൊപ്പം തബു, ശ്രിയ ശരൺ, രജത് കപൂർ, മൃണാൾ ജാദവ് തുടങ്ങിയവർ വീണ്ടും എത്തുന്നു. ജയ്‌ദീപ് അഹ്ലാവത്തും പ്രകാശ് രാജും പുതിയ കൂട്ടിച്ചേർക്കലുകളാണ്.

‘ദൃശ്യം: ദി കൺക്ലൂഷൻ’ ഒക്ടോബർ 2ന് തിയറ്ററുകളിൽ എത്തും. മലയാളം മൂന്നാം ഭാഗവുമായി നേരിട്ടുള്ള കഥാസാമ്യം ഒഴിവാക്കി, വിജയ് സൽഗാവ്കറിന്റെ യാത്രയ്ക്ക് സ്വന്തം രീതിയിലുള്ള ഒരു അവസാന അധ്യായമാണ് ഹിന്ദി ചിത്രം ഒരുക്കുന്നതെന്നാണ് അജയ് ദേവ്ഗണിന്റെ വിശദീകരണം.