തന്റെ ആദ്യ ചിത്രമായ 'രാജാ റാണി'ക്ക് ശേഷം മറ്റൊരു പ്രണയചിത്രം സംവിധാനം ചെയ്യാൻ കഴിയാത്തതിൽ വിഷമമുണ്ടെന്ന് തുറന്നുപറഞ്ഞ് ഹിറ്റ് സംവിധായകൻ അറ്റ്ലി. അഥർവ നായകനായെത്തുന്ന പുതിയ ചിത്രം 'ഇദയം മുരളി'യുടെ പ്രീ-റിലീസ് ചടങ്ങിലാണ് അറ്റ്ലി മനസുതുറന്നത്.
വിജയ് നായകനായ തെരി, മെർസൽ, ബിഗിൽ തുടങ്ങിയ ചിത്രങ്ങളിലൂടെയും ഷാരൂഖ് ഖാന്റെ പാൻ ഇന്ത്യൻ മെഗാഹിറ്റായ ജവാനിലൂടെയും ആക്ഷൻ സിനിമകളുടെ സംവിധായകൻ എന്ന നിലയിൽ അറ്റ്ലി രാജ്യത്തുടനീളം വലിയ പ്രശസ്തി നേടിയിരുന്നു. എന്നാൽ, ബോക്സ് ഓഫീസിൽ തുടർച്ചയായ വിജയങ്ങൾ നേടുമ്പോഴും ഒരു റൊമാന്റിക് ചിത്രം വീണ്ടും ചെയ്യാൻ കഴിയാത്തത് തന്റെ ഉള്ളിലെ വലിയൊരു കുറവായാണ് അറ്റ്ലി കാണുന്നത്.
"ഞാൻ എവിടെ പോയാലും ആളുകൾ എന്നെ ആദ്യം തിരിച്ചറിയുന്നത് രാജാ റാണി എന്ന ചിത്രത്തിലൂടെയാണ്. അതിനുശേഷമാണ് ദളപതിക്കൊപ്പമുള്ള തെരി, മെർസൽ, ബിഗിൽ എന്നീ സിനിമകൾ എനിക്ക് ചെയ്യാൻ അവസരം ലഭിച്ചത്. അതിൽ എനിക്ക് നന്ദിയുണ്ട്, എങ്കിലും വീണ്ടുമൊരു പ്രണയചിത്രം ചെയ്യാൻ സാധിക്കാത്തതിൽ എന്റെ ഉള്ളിൽ എപ്പോഴും ഒരു വേദനയുണ്ട്," അറ്റ്ലി വേദിയിൽ പറഞ്ഞു. ഇതുകൊണ്ടുതന്നെയാണ് 'ഇദയം മുരളി' എന്ന ചിത്രത്തിന് പിന്തുണ നൽകാൻ താൻ ആഗ്രഹിച്ചതെന്നും അറ്റ്ലി വ്യക്തമാക്കി.
ആര്യ, നയൻതാര, നസ്രിയ, ജയ് എന്നിവരായിരുന്നു 'രാജാ റാണി'യിലെ പ്രധാന കഥാപാത്രങ്ങളെ അവതരിപ്പിച്ചത്. ഒട്ടും താല്പര്യമില്ലാതെ വിവാഹിതരാകുന്ന ആര്യയുടെയും നയൻതാരയുടെയും കഥാപാത്രങ്ങൾ, പിന്നീട് പരസ്പരം അവരുടെ കഴിഞ്ഞകാലത്തെക്കുറിച്ച് മനസ്സിലാക്കുകയും പതുക്കെ പ്രണയത്തിലാവുകയും ചെയ്യുന്നതാണ് ചിത്രത്തിന്റെ ഇതിവൃത്തം.
വലിയൊരു കൊമേർഷ്യൽ ഹിറ്റായി മാറിയ ഈ ചിത്രം നിരവധി പുരസ്കാരങ്ങളും സ്വന്തമാക്കിയിരുന്നു. പിന്നീട് ബംഗാളി, സിംഹള എന്നീ ഭാഷകളിലേക്കും ഈ ചിത്രം റീമേക്ക് ചെയ്യപ്പെട്ടിട്ടുണ്ട്.
അതേസമയം, ഒരു വൺ-സൈഡ് പ്രണയത്തിന്റെ കഥയാണ് ഇദയം മുരളി പറയുന്നത്. സ്കൂൾ കാലഘട്ടത്തിൽ പ്രണയം നിരസിക്കപ്പെട്ടതിന് ശേഷം, പ്രീതി മുകുന്ദൻ അവതരിപ്പിക്കുന്ന തന്റെ കാമുകിയെ തേടി അഥർവയുടെ കഥാപാത്രമായ 'ഇദയ' വിദേശത്തേക്ക് പോകുന്നതാണ് ചിത്രത്തിന്റെ ഇതിവൃത്തമെന്നാണ് ഏറ്റവും പുതിയ ട്രെയിലർ നൽകുന്ന സൂചന.
ഇദയം മുരളിയുടെ സംവിധായകനായ ആകാശ് ഭാസ്കരനെ സ്വന്തം സഹോദരനെപ്പോലെയാണ് കാണുന്നതെന്നും അറ്റ്ലി പറഞ്ഞു. "ഒരുപാട് കാര്യങ്ങളിൽ അവൻ എന്നെ സഹായിച്ചിട്ടുണ്ട്. ഈ ചിത്രം ഞാൻ നിർമ്മിക്കാമെന്ന് അവനോട് പറഞ്ഞിരുന്നു, എന്നാൽ എന്തുകൊണ്ടോ അത് നടന്നില്ല. എങ്കിലും സിനിമ പൂർത്തിയായപ്പോൾ അവൻ എന്നെ കാണിച്ചു, എനിക്കത് വളരെ ഇഷ്ടപ്പെട്ടു. സത്യത്തിൽ ഇത് ആകാശിന്റെ സ്വന്തം ജീവിതകഥ പോലെയാണ്. അദ്ദേഹത്തെ അറിയാവുന്നവർക്ക് അത് പെട്ടെന്ന് മനസ്സിലാകും. ഇതിലെ ഫഹദ് ഫാസിലിന്റെ കഥാപാത്രം ഞാനാണെന്ന് കൂട്ടിക്കോളൂ," അറ്റ്ലി കൂട്ടിച്ചേർത്തു.
അഥർവയെ കൂടാതെ പ്രീതി മുകുന്ദൻ, കയാദു ലോഹർ, തമൻ എസ്, നട്ടി, ഫഹദ് ഫാസിൽ തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രം ജൂലൈ 10-ന് ലോകമെമ്പാടുമുള്ള തിയറ്ററുകളിൽ പ്രദർശനത്തിനെത്തും.
During the pre-release event of the romantic entertainer Idhayam Murali, blockbuster director Atlee shared a heartfelt personal reflection, stating that his biggest professional regret is not being able to direct another love story after his 2013 debut blockbuster, Raja Rani.
While Atlee expressed deep gratitude to "Thalapathy" Vijay for opportunities that led to massive action hits like Theri, Mersal, and Bigil—and his subsequent pan-Indian success with Shah Rukh Khan's Jawan—he admitted to a lingering yearning to return to the romance genre.