ഇതൊരു തുടർച്ച മാത്രം, ഒട്ടും അതിശയമില്ല! രഞ്ജിത്തിന്റെ അറസ്റ്റിൽ ആഞ്ഞടിച്ച് പാർവതി തിരുവോത്ത്

യുവനടിയുടെ ലൈംഗികാതിക്രമ പരാതിയിൽ സംവിധായകൻ രഞ്ജിത് ബാലകൃഷ്ണൻ അറസ്റ്റിലായ സംഭവത്തിൽ പ്രതികരിച്ച് നടി പാർവതി തിരുവോത്ത്. സംഭവം അമ്പരപ്പിക്കുന്നതല്ലെന്നും, ഇത്തരം ആരോപണങ്ങൾ ആവർത്തിക്കപ്പെടുന്ന സാഹചര്യത്തിൽ അത്ഭുതമോ ഞെട്ടലോ ഇല്ലെന്നും പാർവതി വ്യക്തമാക്കി.

മുമ്പ് ഉണ്ടായ സംഭവങ്ങളിൽ യഥാർത്ഥമായ ശിക്ഷ ലഭിക്കാത്തത് ഇത്തരം പ്രവണതകൾ തുടരാൻ ഇടയാക്കുന്നുണ്ട്. അതുകൊണ്ടുതന്നെ ഇത്തരം വാർത്തകൾ ഇപ്പോൾ ആശ്ചര്യപ്പെടുത്തുന്നില്ലെന്നും പാർവതി പറഞ്ഞു. വിവിധ മേഖലകളിൽ ജോലി ചെയ്യുന്നതിനോടൊപ്പം ഇത്തരം വിഷയങ്ങളെക്കുറിച്ച് നിരന്തരം സംസാരിക്കേണ്ടിവരുന്നത് മാനസികമായ തളർച്ച സൃഷ്ടിക്കുന്നുവെന്നും പാർവതി വ്യക്തമാക്കി.

നടപടികൾ പലപ്പോഴും ‘ശിക്ഷ’ എന്ന പേരിൽ ഒരു ഔപചാരികതയായി മാത്രമാണ് മാറുകയാണെന്ന വിമർശനവും പാർവതി ഉന്നയിച്ചു. സ്ത്രീകൾ പരാതി നൽകാൻ വൈകുന്നതിനെ ചോദ്യം ചെയ്യുന്ന സമീപനം യാഥാർത്ഥ്യങ്ങളെ അവഗണിക്കുന്നതാണെന്നും, പരാതി നൽകിയാൽ തന്നെ തൊഴിൽ അവസരങ്ങൾ നഷ്ടപ്പെടുന്ന അവസ്ഥയുണ്ടാകുന്നതും വലിയ പ്രശ്നമാണെന്നും പാർവതി ചൂണ്ടിക്കാട്ടി. സാമ്പത്തിക സുരക്ഷിതത്വം ഇല്ലാത്തവർക്കിത് കൂടുതൽ ബാധകമാണെന്നും പാർവതി കൂട്ടിച്ചേർത്തു.

സിനിമ മേഖലയിൽ പ്രവർത്തിക്കുന്ന സംഘടനകൾക്ക് പരിമിതമായ അധികാരമുണ്ടെങ്കിലും, സുരക്ഷിതമായ തൊഴിൽപരിസ്ഥിതി ഉറപ്പാക്കാനുള്ള ശ്രമങ്ങൾ തുടരുകയാണെന്നും പാർവതി പറഞ്ഞു. സിനിമാ സെറ്റുകളിൽ ഇന്റേണൽ കംപ്ലെയിന്റ് കമ്മിറ്റികളുടെ (ഐ.സി.സി) പ്രവർത്തനം സാധാരണ രീതിയാക്കാൻ ശ്രമങ്ങൾ നടത്തിയിരുന്നു. ബന്ധപ്പെട്ട റിപ്പോർട്ടുകൾ ദീർഘകാലം പുറത്തുവന്നില്ലെന്നത് കുറ്റക്കാർക്ക് ഭയം കുറയാൻ കാരണമായെന്നും പാർവതി അഭിപ്രായപ്പെട്ടു.

ഫോർട്ട് കൊച്ചിയിൽ നടന്ന സിനിമാ ചിത്രീകരണത്തിനിടെ കാരവനിൽ വെച്ച് ലൈംഗികാതിക്രമത്തിന് ശ്രമിച്ചതായുള്ള യുവ നടിയുടെ പരാതിയിലാണ് രഞ്ജിത്തിനെ പൊലീസ് അറസ്റ്റ് ചെയ്തത്. സംഭവത്തെ തുടർന്ന് ഫെഫ്ക നടപടി സ്വീകരിച്ച് അദ്ദേഹത്തെ സസ്പെൻഡ് ചെയ്തിട്ടുണ്ട്.

മുൻകാലങ്ങളിലും സമാന ആരോപണങ്ങൾ ഉയർന്നിരുന്നു. കൊച്ചിയിലെ ഫ്ലാറ്റിൽ വെച്ച് മോശമായി പെരുമാറിയെന്ന പരാതിയുമായി ഒരു ബംഗാളി നടി രംഗത്തെത്തിയിരുന്നു. എന്നാൽ സംഭവവുമായി ബന്ധപ്പെട്ട കേസുകളിൽ നടപടി വൈകിയതിനെ തുടർന്ന് കോടതി പിന്നീട് കേസ് റദ്ദാക്കിയിരുന്നു.

English Summary: Actor Parvathy Thiruvothu says the arrest of director Ranjith Balakrishnan in a sexual assault case is not shocking, citing repeated allegations and lack of strict punishment enabling such behavior.