സിനിമയിലെത്തണമെന്ന ആഗ്രഹവുമായി നടന്നിരുന്ന കാലത്ത്, ഒരു ഫോട്ടോഷൂട്ടിനായി സുഹൃത്തുക്കളെയും വഴിയാത്രക്കാരനെയും വരെ ‘കൺവിൻസ്’ ചെയ്ത കഥ പങ്കുവെച്ച് നടൻ സുരേഷ് കൃഷ്ണ. 38 വർഷം മുമ്പ് എടുത്ത തന്റെ അപൂർവ ഫോട്ടോഷൂട്ടിന്റെ ചിത്രങ്ങളാണ് താരം സോഷ്യൽ മീഡിയയിലൂടെ പങ്കുവെച്ചത്. ചിത്രങ്ങൾക്കൊപ്പം അന്നത്തെ കാലത്തെ ഓർമകളും ഫോട്ടോഷൂട്ടിന് പിന്നിലെ ചെറിയ വലിയ സഹായങ്ങളും സുരേഷ് കൃഷ്ണ കുറിപ്പിലൂടെ വിശദീകരിച്ചു.
ഇന്നത്തെ പോലെ ഡിജിറ്റൽ ക്യാമറകളും എളുപ്പത്തിൽ ചിത്രങ്ങൾ പകർത്താനുള്ള സൗകര്യങ്ങളും ഇല്ലാതിരുന്ന കാലം. അതുകൊണ്ടുതന്നെ ഫോട്ടോഷൂട്ടിന് ആവശ്യമായ ഓരോ കാര്യവും ഒരുക്കിയത് സുഹൃത്തുക്കളുടെ സഹായത്തോടെയായിരുന്നു.
ഫോട്ടോയ്ക്ക് ആവശ്യമായ വസ്ത്രങ്ങൾ പല സുഹൃത്തുക്കളിൽ നിന്നാണ് സംഘടിപ്പിച്ചത്. ചിത്രങ്ങളിൽ ഉപയോഗിച്ചിരിക്കുന്ന ബൈക്കും സുരേഷ് കൃഷ്ണയുടേതായിരുന്നില്ല. വഴിയിലൂടെ പോയ ഒരാളുടെ ബൈക്ക് ഫോട്ടോഷൂട്ടിനായി ഉപയോഗിക്കുകയായിരുന്നു. ഫോട്ടോ എടുക്കാൻ ആവശ്യമായ ഫിലിം റോളിനും ചിത്രങ്ങൾക്കുമായി പണം കടം വാങ്ങിയിരുന്നുവെന്നും താരം ഓർത്തെടുത്തു. മേക്കപ്പിനും സ്റ്റൈലിങ്ങിനുമൊന്നും അന്ന് വലിയ ചെലവ് വഹിക്കാൻ കഴിയാത്ത സാഹചര്യമായിരുന്നുവെന്നും അദ്ദേഹം കുറിപ്പിൽ സൂചിപ്പിക്കുന്നു.
ഫോട്ടോഷൂട്ടിന്റെ ക്രെഡിറ്റുകളിലും ഈ കാലഘട്ടത്തിന്റെ ലാളിത്യം വ്യക്തമാണ്. ഫോട്ടോ എടുത്തത് സുഹൃത്തുക്കൾ. വസ്ത്രങ്ങൾ പല സുഹൃത്തുക്കളുടേത്. ബൈക്ക് ഒരു വഴിപോക്കന്റേത്. ഫിലിം റോളും ഫോട്ടോയും കടം. സിനിമയിലേക്കുള്ള ആദ്യ ചുവടുകൾ എത്ര പരിമിതമായ സാഹചര്യങ്ങളിലൂടെയായിരുന്നു എന്നതിന്റെ ഒരു ഓർമപ്പെടുത്തൽ കൂടിയാണ് ഈ കുറിപ്പ്.
38 വർഷങ്ങൾക്ക് ശേഷം ആ ചിത്രങ്ങളിലേക്ക് തിരിഞ്ഞുനോക്കുമ്പോൾ സന്തോഷവും സങ്കടവും കലർന്ന ഓർമകളാണ് മനസ്സിലൂടെ കടന്നുപോകുന്നതെന്ന് സുരേഷ് കൃഷ്ണ പറയുന്നു. അന്ന് സിനിമയിലേക്ക് എത്തുമോ എന്നത് പോലും ഉറപ്പില്ലാത്ത ഒരു കാലഘട്ടത്തിൽ എടുത്ത ചിത്രങ്ങളാണ് ഇന്ന് അദ്ദേഹത്തിന്റെ അഭിനയജീവിതത്തിന്റെ തുടക്കകാലത്തെ രേഖയായി മാറിയിരിക്കുന്നത്.
സുരേഷ് കൃഷ്ണയുടെ പഴയ ചിത്രങ്ങൾ സോഷ്യൽ മീഡിയയിൽ എത്തിയതോടെ ആരാധകരുടെ ശ്രദ്ധയും നേടി. ചിത്രങ്ങളിലെ സ്റ്റൈലും ബൈക്കിനൊപ്പമുള്ള പോസുകളും ചൂണ്ടിക്കാട്ടി നിരവധി രസകരമായ കമന്റുകളും പോസ്റ്റിന് താഴെ എത്തി. ‘വണ്ടിക്കാരൻ മുതൽ ക്യാമറാമാൻ വരെ കൺവിൻസ് ചെയ്തു’ എന്ന തരത്തിലുള്ള പ്രതികരണങ്ങളും ശ്രദ്ധ നേടി.
വില്ലൻ കഥാപാത്രങ്ങളിലൂടെ ശ്രദ്ധ നേടിയ സുരേഷ് കൃഷ്ണ പിന്നീട് സഹനടനായും ഹാസ്യവേഷങ്ങളിലൂടെയും വ്യത്യസ്തമായ കഥാപാത്രങ്ങളെ അവതരിപ്പിച്ചുവരികയാണ്. നിവിൻ പോളി നായകനായ ‘ബെത്ലഹേം കുടുംബ യൂണിറ്റ്’ ആണ് അദ്ദേഹത്തിന്റെ സമീപകാല ചിത്രങ്ങളിലൊന്ന്. ചിത്രത്തിലെ ബൈജു എന്ന കഥാപാത്രവും ശ്രദ്ധ നേടിയിരുന്നു. വിനീത് ശ്രീനിവാസൻ നായകനാകുന്ന ‘ചടങ്ങ്’ ആണ് സുരേഷ് കൃഷ്ണയുടേതായി വരാനിരിക്കുന്ന ചിത്രങ്ങളിലൊന്ന്.
Actor Suresh Krishna has shared rare photographs from a photoshoot he did 38 years ago, during his early days of pursuing a career in cinema. He recalls borrowing clothes, money for film rolls and photographs, and even using a stranger’s motorcycle. The throwback images have now attracted attention online.