'ആ നോട്ടം അത്ര സുഖകരമല്ല', തെന്നിന്ത്യൻ സിനിമയിലുള്ളത് പുരുഷാധിപത്യം; തമന്ന ഭാട്ടിയ

ഹിന്ദി, തെന്നിന്ത്യൻ സിനിമാ വ്യവസായങ്ങൾ തമ്മിലുള്ള വ്യത്യാസങ്ങളെക്കുറിച്ചും നായികമാരോടുള്ള വ്യത്യസ്തമായ സമീപനങ്ങളെക്കുറിച്ചും തുറന്നുപറഞ്ഞ് നടി തമന്ന ഭാട്ടിയ. തെന്നിന്ത്യൻ സിനിമാ മേഖലയിലെ സ്ത്രീകളെ കാണുന്ന സമീപനത്തിൽ ഇപ്പോഴും പുരുഷാധിപത്യത്തിന്റെ സ്വാധീനം നിലനിൽക്കുന്നുണ്ടെന്ന് നടി. ദക്ഷിണേന്ത്യൻ സിനിമയിൽ സ്ത്രീകളെ നോക്കുന്ന ഒരു പ്രത്യേക പുരുഷാധിപത്യപരമായ "ഗേസ്" (gaze) നിലനിൽക്കുന്നുണ്ടെന്നും അത് സ്ത്രീകൾക്ക് അനുകൂലമോ പ്രശംസനീയമോ ആയ സമീപനമല്ലെന്നും തമന്ന അഭിപ്രായപ്പെട്ടു. വാണിജ്യ സിനിമകളിൽ നായികമാർക്ക് കൂടുതൽ കർശനമായ മാനദണ്ഡങ്ങൾ പാലിക്കേണ്ടി വരുന്നുണ്ടെന്നും താരം പറഞ്ഞു. ഫോർബ്സ് ഇന്ത്യയ്ക്ക് നൽകിയ പുതിയ അഭിമുഖത്തിലാണ് രണ്ട് പതിറ്റാണ്ടിലേറെ നീണ്ട തന്റെ സിനിമാജീവിതത്തിലെ അനുഭവങ്ങൾ അവർ പങ്കുവെച്ചത്.

തെന്നിന്ത്യൻ സിനിമകളിൽ ഗ്ലാമർ വേഷങ്ങളും അഭിനയപ്രാധാന്യമുള്ള വേഷങ്ങളും ഒരുപോലെ കൈകാര്യം ചെയ്യുന്നതിൽ നായികമാർ കൂടുതൽ സമ്മർദ്ദം നേരിടുന്നുണ്ടെന്ന് താരം പറഞ്ഞു. തന്റെ രണ്ട് പതിറ്റാണ്ട് നീണ്ട സിനിമാജീവിതത്തിലെ അനുഭവങ്ങൾ പങ്കുവെച്ച തമന്ന, തെന്നിന്ത്യൻ സിനിമാ മേഖലയുടെ കാഴ്ചപ്പാടിനെ പലരും 'പുരുഷാധിപത്യപരം' (patriarchal) എന്ന് വിശേഷിപ്പിക്കുന്നത് എന്തുകൊണ്ടാണെന്ന് തനിക്ക് ഇപ്പോൾ മനസ്സിലാകുന്നുണ്ടെന്നും വ്യക്തമാക്കി. സ്ത്രീകളെ സംബന്ധിച്ചിടത്തോളം ഈ നോട്ടം പലപ്പോഴും അത്ര സുഖകരമല്ലെന്നും അവർ കൂട്ടിച്ചേർത്തു.

ബോളിവുഡും തെന്നിന്ത്യൻ സിനിമയും തമ്മിലുള്ള പ്രധാന വ്യത്യാസം നായികമാർക്ക് ലഭിക്കുന്ന സ്വാതന്ത്ര്യത്തിലാണെന്ന് തമന്ന ചൂണ്ടിക്കാട്ടുന്നു. വാണിജ്യ സിനിമകളാണോ അതോ അഭിനയത്തിന് പ്രാധാന്യമുള്ള കഥാപാത്രങ്ങളാണോ വേണ്ടതെന്ന് തിരഞ്ഞെടുക്കാനുള്ള അവസരം ഹിന്ദി സിനിമ നായികമാർക്ക് നൽകുന്നുണ്ട്. എന്നാൽ, തെന്നിന്ത്യൻ സിനിമാ വ്യവസായത്തിൽ ഒരു നായികയ്ക്ക് ദീർഘകാലം പിടിച്ചുനിൽക്കണമെങ്കിൽ ഗ്ലാമർ വേഷങ്ങളിലും അഭിനയത്തിലും അവർക്ക് ഒരേപോലെ മികവ് പുലർത്തേണ്ടതുണ്ട്.

"ഹിന്ദി സിനിമാ വ്യവസായത്തിൽ പ്രധാനമായും രണ്ട് തരം അഭിനേതാക്കളാണുള്ളത്. കലയ്ക്ക് കൂടുതൽ പ്രാധാന്യം നൽകുന്നവർ, അഭിനയസാധ്യതയുള്ള ചില പ്രത്യേകതരം കഥാപാത്രങ്ങൾ ചെയ്യാൻ താല്പര്യപ്പെടുന്നു. അവർ ഒരുപക്ഷേ ഗ്ലാമറസ് ഗാനരംഗങ്ങളിൽ അഭിനയിച്ചെന്നിരിക്കില്ല. ഏതെങ്കിലും ഒരു വഴി തിരഞ്ഞെടുക്കാനുള്ള അവസരം ഹിന്ദി സിനിമ നൽകുന്നുണ്ട്. എന്നാൽ അവിടെ ഈ രണ്ട് കാര്യങ്ങളും ഒരുപോലെ ചെയ്യുന്നവർ സൂപ്പർസ്റ്റാറുകളായി മാറുകയാണ് ചെയ്യുന്നത്."- തമന്ന പറയുന്നു.

അതേസമയം, താൻ അഭിനയിച്ച ഗാനങ്ങളെ "ഐറ്റം സോങ്" എന്ന് വിശേഷിപ്പിക്കാൻ ഇഷ്ടമില്ലെന്നും തമന്ന വ്യക്തമാക്കി. അത്തരം ഗാനങ്ങൾ പലപ്പോഴും സിനിമകളെക്കാൾ കൂടുതൽ കാലം പ്രേക്ഷകരുടെ മനസിൽ നിലനിൽക്കാറുണ്ടെന്നും, അവയെ "പാർട്ടി സോങ്" എന്ന നിലയിലാണ് താൻ കാണുന്നതെന്നും താരം പറഞ്ഞു. സിനിമകൾ പരാജയപ്പെട്ടാൽ പോലും ഇത്തരം പാട്ടുകൾ പ്രേക്ഷകർ എക്കാലവും ഓർമിച്ചിരിക്കാറുണ്ടെന്നും, അത് വലിയ സാംസ്കാരിക സ്വാധീനമായി മാറാറുണ്ടെന്നും അവർ വ്യക്തമാക്കി. കരീന കപൂറിന്റെ 'ചമ്മക് ചല്ലോ', കത്രീന കൈഫിന്റെ 'ഷീല കി ജവാനി' തുടങ്ങിയ ഗാനങ്ങൾ ഉദാഹരണമായി ചൂണ്ടിക്കാട്ടിയാണ് തമന്ന ഇക്കാര്യം വിശദീകരിച്ചത്. ഈ ചിത്രങ്ങൾ വലിയ വിജയം നേടിയില്ലെങ്കിലും അതിലെ ഗാനങ്ങൾ വൻ ഹിറ്റായി മാറിയിരുന്നു.

ഒരു നടിയുടെ ദീർഘകാല കരിയറിന് മികച്ച അഭിനയപ്രകടനങ്ങളും ജനപ്രിയ ഗാനങ്ങളിലെ സാന്നിധ്യവും ഒരുപോലെ പ്രധാനമാണെന്നും തമന്ന അഭിപ്രായപ്പെട്ടു. സ്ത്രീകളെ വസ്തുവത്കരിക്കുന്ന സമീപനങ്ങളെക്കുറിച്ചുള്ള ചർച്ചകൾ ശക്തമാകുന്ന സാഹചര്യത്തിലാണ് താരത്തിന്റെ പ്രതികരണം ശ്രദ്ധ നേടുന്നത്.

'ഒഡേല റെയിൽവേ സ്റ്റേഷന്റെ' രണ്ടാം ഭാഗമായ 'ഒഡേല 2' വിലാണ് തമന്ന ഒടുവിൽ അഭിനയിച്ചത്. സിദ്ധാർത്ഥ് മൽഹോത്രയ്‌ക്കൊപ്പം അഭിനയിക്കുന്ന 'വാൻ' (Vvan) ആണ് താരത്തിന്റെ വരാനിരിക്കുന്ന പുതിയ ചിത്രം. 2026-ലാണ് ഈ ചിത്രം റിലീസിനെത്തുക. ഇതിന് പുറമെ ബാലാജി മോഷൻ പിക്ചേഴ്സ് നിർമ്മിക്കുന്ന 'രാഗിണി 3' യിലും തമന്ന പ്രധാന വേഷത്തിലെത്തുന്നുണ്ട്.