ഇന്ത്യന് സിനിമാരംഗത്തെ മികച്ച സ്വഭാവനടനാണ് രാജേഷ് ശര്മ. ഖോസ്ല കാ ഖോസ്ല, എം.എസ്. ധോണി, സ്പെഷ്യല് 26 തുടങ്ങിയ ചിത്രങ്ങളിലൂടെ പ്രേക്ഷകരുടെ മനംകവര്ന്ന ഈ കലാകാരന് ഇപ്പോള് ജീവിതത്തിനും മരണത്തിനുമിടയില് ഒരു നൂല്പ്പാലത്തിലാണ്. പ്രഭാസിന്റെ പുതിയ ചിത്രമായ 'ഫൗജി'യുടെ ലൊക്കേഷനില് അപ്രതീക്ഷിതമായി സംഭവിച്ച ഒരു പ്രാണിക്കടി അദ്ദേഹത്തിന്റെ ആരോഗ്യത്തെ വല്ലാതെ തകര്ത്തിരിക്കുന്നു.
രാജേഷ് ശര്മയ്ക്കു സംഭവിച്ചത് സിനിമാ ലൊക്കേഷനുകളുടെ സുരക്ഷയെക്കുറിച്ചുള്ള വലിയ ചോദ്യങ്ങളാണ് ഉയര്ത്തുന്നത്. കാടും പടര്പ്പും നിറഞ്ഞ രാമോജി ഫിലിം സിറ്റിയിലെ ചിത്രീകരണത്തിനിടെ ഒരു ചെറിയ പ്രാണിയുടെയോ ചിലന്തിയുടെയോ കടിയേറ്റ്, അദ്ദേഹം ജീവിതത്തിനും മരണത്തിനുമിടയില് ആശുപത്രി കിടക്കയില് പിടയുമ്പോള്, ചോദ്യം ചെയ്യപ്പെടുന്നതു സിനിമാ വ്യവസായത്തിന്റെ സുരക്ഷാ ബോധം തന്നെയാണ്.
സെറ്റിലെ തിരക്കുകള്ക്കും ലൈറ്റുകള്ക്കുമിടയില് രാജേഷ് ശര്മയ്ക്കു സംഭവിച്ചത് അപ്രതീക്ഷിതമായിരുന്നു. ലൊക്കേഷനില്നിന്ന് തിരിച്ചെത്തിയശേഷമാണ് അദ്ദേഹത്തിന്റെ ശരീരം പനിയിലും വിറയലിലും അമര്ന്നത്. കൊല്ക്കത്തയിലേക്കുള്ള വിമാനയാത്രയ്ക്കിടയില് ശ്വാസംമുട്ടലും അണുബാധയും കലശലായപ്പോഴാണു സംഗതിയുടെ ഗൗരവം അദ്ദേഹത്തിന്റെ കുടുംബം തിരിച്ചറിഞ്ഞത്. കടിയേറ്റ ഭാഗത്തെ അണുബാധ ശരീരത്തിലുടനീളം പടരുകയാണെന്നാണ് ഡോക്ടര്മാരുടെ റിപ്പോര്ട്ട്. ഒരു പ്രാണികടി പോലും ഒരാളുടെ ജീവന് അപഹരിക്കുന്ന അവസ്ഥയിലേക്കു കാര്യങ്ങളെത്തിയെങ്കില്, ആ സെറ്റില് പ്രഥമ ശുശ്രൂഷാ സംവിധാനങ്ങള് എത്രത്തോളം കാര്യക്ഷമമായിരുന്നു?
സിനിമ നിര്മാണത്തില് സുരക്ഷാ മാനദണ്ഡങ്ങള് പലപ്പോഴും ഫയലുകളില് മാത്രം ഒതുങ്ങുന്നുവെന്നതാണു സത്യം. ലൊക്കേഷനുകളില് അത്യാവശ്യമായ ഒരു മെഡിക്കല് ടീമോ ആംബുലന്സോ പാമ്പുകടിയോ വിഷമുള്ള പ്രാണികളുടെ കടിയോ ഏല്ക്കുകയാണെങ്കില് നല്കേണ്ട 'ആന്റി-വെനം' ചികിത്സയോ ലഭ്യമാണോയെന്ന് ഉറപ്പാക്കാന് നിര്മാതാക്കള് പലപ്പോഴും തയ്യാറാകാറില്ല. രാമോജി ഫിലിം സിറ്റി പോലുള്ള വന്കിട ലൊക്കേഷനുകളില് പോലും ഇത്തരമൊരു വീഴ്ച സംഭവിച്ചുവെന്നതു സിനിമാ സംഘടനകളെപ്പോലും ഞെട്ടിച്ചിരിക്കുകയാണ്. ആര്ട്ടിസ്റ്റുകള്ക്കുവേണ്ടി വലിയ പ്രതിഫലം മുടക്കുന്ന നിര്മാണക്കമ്പനികള്, അവരുടെ സുരക്ഷയ്ക്കായി ചെലവാക്കേണ്ട ചെറിയൊരു തുക പോലും പലപ്പോഴും ലാഭിക്കാന് ശ്രമിക്കുന്നു.
ഒരു നടന് സെറ്റില് വരുമ്പോള്, ആ വ്യക്തിയുടെ സുരക്ഷ പൂര്ണമായും നിര്മാതാവിന്റെ കൈകളിലാണ്. രാജേഷ് ശര്മയുടെ കാര്യത്തില്, അദ്ദേഹത്തിന്റെ അവസ്ഥ വഷളായപ്പോള് എന്തുകൊണ്ട് ഉടന് തന്നെ ഹൈദരാബാദിലെ മികച്ച ആശുപത്രിയില് പ്രവേശിപ്പിച്ചില്ലെന്ന് ഓള് ഇന്ത്യന് സിനി വര്ക്കേഴ്സ് അസോസിയേഷന് ആവര്ത്തിച്ചു ചോദിക്കുന്നു. ചികിത്സയ്ക്കായി അദ്ദേഹം സ്വന്തം നിലയ്ക്കു കൊല്ക്കത്തയിലേക്കു യാത്ര ചെയ്യേണ്ടിവന്നത് നിര്മാണക്കമ്പനിയുടെ വലിയൊരു അനാസ്ഥയാണെന്ന വിമർശനം ശക്തമാണ്.
Veteran Indian character actor Rajesh Sharma is reportedly battling a serious health condition after being bitten by an insect on the set of Prabhas' upcoming film Fauji. The actor, known for memorable performances in films such as Khosla Ka Ghosla, M.S. Dhoni: The Untold Story, and Special 26, is said to be in critical condition, raising concerns among fans and the film industry.