നിക്കോട്ടിൻ ബുദ്ധിശക്തി കൂട്ടുമോ? സോഷ്യൽ മീഡിയയിലെ പുതിയ ട്രെൻഡിന് പിന്നിലെ ചതിക്കുഴികൾ

പുകവലിയുടെയും കാൻസറിന്റെയും പശ്ചാത്തലത്തിലാണ് നമ്മൾ സാധാരണയായി നിക്കോട്ടിൻ എന്ന പേര് കേൾക്കാറുള്ളത്. എന്നാൽ സമീപകാലത്തായി സോഷ്യൽ മീഡിയയിൽ ഒരു പുതിയ പ്രചാരണം നടക്കുന്നുണ്ട്, "നിക്കോട്ടിൻ നമ്മൾ കരുതും പോലെ ഒരു വില്ലനല്ല, മറിച്ച് തലച്ചോറിന്റെ പ്രവർത്തനം മെച്ചപ്പെടുത്താൻ സഹായിക്കുന്ന ഒന്നാണ്!" ബയോഹാക്കർമാരും വെൽനസ് ഇൻഫ്ലുവൻസർമാരുമാണ് ഈ പുതിയ അവകാശവാദത്തിന് പിന്നിൽ. നിക്കോട്ടിനെ ഒരു വില്ലനായി മുദ്രകുത്തിയത് തെറ്റാണെന്നും സോഷ്യൽ മീഡിയ ഇൻഫ്ലുവൻസർമാർ പറയുന്നു.

സോഷ്യൽ മീഡിയയിലെ പുതിയ ബയോഹാക്കിങ് ട്രെൻഡ്

ഓർമശക്തി, ഏകാഗ്രത, വൈജ്ഞാനിക പ്രവർത്തനങ്ങൾ എന്നിവ മെച്ചപ്പെടുത്താൻ നിക്കോട്ടിന് കഴിയും എന്നാണ് സോഷ്യൽ മീഡിയയിലെ ഒരു വിഭാഗം വെൽനസ് ഇൻഫ്ലുവൻസർമാരുടെ അവകാശവാദം. പ്രശസ്ത അമേരിക്കൻ സംരംഭകനും ബയോഹാക്കറുമായ ഡേവ് ആസ്പ്രേയെപ്പോലുള്ളവർ ഈ വാദത്തിന്റെ മുൻപന്തിയിലുണ്ട്. ചെറിയ അളവിൽ നിക്കോട്ടിൻ മാത്രം വേർതിരിച്ചെടുത്ത് ഉപയോഗിക്കുന്നത് തലച്ചോറിന് വലിയ രീതിയിൽ ഗുണം ചെയ്യുമെന്നാണ് ഇവരുടെ പക്ഷം.

പോഡ്‌കാസ്റ്റുകളിലും റെഡ്ഡിറ്റ് ഫോറങ്ങളിലും മറ്റ് വെൽനസ് പ്ലാറ്റ്‌ഫോമുകളിലുമായി നിക്കോട്ടിനെക്കുറിച്ചുള്ള ചർച്ചകൾ ഇപ്പോൾ വളരെ സജീവമാണ്. സിഗരറ്റ് വലിക്കുന്നതും നിക്കോട്ടിൻ ഉപയോഗിക്കുന്നതും തികച്ചും വ്യത്യസ്തമായ രണ്ട് കാര്യങ്ങളാണെന്നും, നിക്കോട്ടിൻ മാത്രം ഉപയോഗിക്കുന്നത് ദോഷകരമല്ലെന്നുമാണ് ഈ ഇൻഫ്ലുവൻസർമാർ ആവർത്തിക്കുന്നത്.

ശാസ്ത്രീയ വശവും ഡോക്ടർമാരുടെ മുന്നറിയിപ്പും

ഈ വാദങ്ങളിലെ യാഥാർത്ഥ്യം മനസ്സിലാക്കാൻ സിഗരറ്റും നിക്കോട്ടിനും തമ്മിലുള്ള വ്യത്യാസം ആദ്യം അറിയേണ്ടതുണ്ട്. സിഗരറ്റ് വലിക്കുമ്പോൾ ക്യാൻസർ ഉണ്ടാക്കുന്നത് പ്രധാനമായും നിക്കോട്ടിൻ അല്ല. മറിച്ച്, പുകയില കത്തുമ്പോൾ പുറത്തുവരുന്ന ആയിരക്കണക്കിന് മറ്റ് രാസവസ്തുക്കളാണ് ക്യാൻസറിന് കാരണമാകുന്നത്. ഇതുകൊണ്ട് തന്നെയാണ് പുകവലി നിർത്താൻ ആളുകളെ സഹായിക്കുന്നതിനായി നിക്കോട്ടിൻ ഗമ്മുകളും പാച്ചുകളും വൈദ്യശാസ്ത്രം ഉപയോഗിക്കുന്നത്. നിക്കോട്ടിൻ ശരീരത്തിൽ എത്തുമ്പോൾ അത് സന്തോഷം, ഏകാഗ്രത, ഉന്മേഷം എന്നിവയുമായി ബന്ധപ്പെട്ട രാസവസ്തുക്കൾ പുറപ്പെടുവിക്കാൻ സഹായിക്കുന്ന ഒരു രാസസന്ദേശവാഹകനായി പ്രവർത്തിക്കുന്നു. ഇതുകൊണ്ടാണ് നിക്കോട്ടിൻ ഉപയോഗിക്കുന്നവർക്ക് പെട്ടെന്ന് കൂടുതൽ ഏകാഗ്രത ലഭിക്കുന്നതായി തോന്നുന്നത്.

എന്നാൽ ഈ താൽക്കാലിക പ്രതിഭാസത്തെ ചൂണ്ടിക്കാണിച്ച് നിക്കോട്ടിൻ 'ആരോഗ്യകരം' ആണെന്ന് വിളിക്കുന്നത് തികച്ചും തെറ്റിദ്ധാരണാജനകമാണെന്ന് ഡോക്ടർമാർ വ്യക്തമാക്കുന്നു. മുംബൈയിലെ പി ഡി ഹിന്ദുജ ഹോസ്പിറ്റലിലെ കൺസൾട്ടന്റ് പൾമണോളജിസ്റ്റായ ഡോ. ലാൻസലോട്ട് പിന്റോ പറയുന്നതനുസരിച്ച്, നിക്കോട്ടിൻ തലച്ചോറിലെ റിസപ്റ്ററുകളെ ഉത്തേജിപ്പിക്കുകയും അതുവഴി താൽക്കാലികമായി ഏകാഗ്രത വർധിപ്പിക്കുകയും ചെയ്യും. എന്നാൽ നിക്കോട്ടിന് നാഡീവ്യവസ്ഥയെ സംരക്ഷിക്കാൻ കഴിഞ്ഞേക്കാം എന്നത് കേവലം ചില പഠനങ്ങളുടെ അടിസ്ഥാനത്തിലുള്ള നിഗമനങ്ങൾ മാത്രമാണ്. ഇതിന് ശാസ്ത്രീയമായി യാതൊരു ഉറപ്പുമില്ല.

കാപ്പിയിലെ കഫീൻ പോലുള്ളവയുമായി താരതമ്യം ചെയ്യുമ്പോൾ, മനുഷ്യനെ വളരെ വേഗത്തിൽ അടിമയാക്കുന്ന ഒന്നാണ് നിക്കോട്ടിൻ. ഇത് ഹൃദയത്തിന്റെ പ്രവർത്തനങ്ങളെ കടുത്ത സമ്മർദ്ദത്തിലാക്കുകയും പ്രത്യേകിച്ച് യുവാക്കളിൽ വലിയ ആരോഗ്യ പ്രശ്നങ്ങൾ സൃഷ്ടിക്കുകയും ചെയ്യും.

സോഷ്യൽ മീഡിയയിലെ ഇൻഫ്ലുവൻസർമാർ പലപ്പോഴും തങ്ങൾക്ക് അനുകൂലമായ കാര്യങ്ങൾ മാത്രം തിരഞ്ഞെടുത്ത് അവതരിപ്പിക്കുകയും അതിലെ അപകടങ്ങളെക്കുറിച്ച് മറച്ചുവെക്കുകയുമാണ് ചെയ്യുന്നതെന്ന് പൾമണോളജിസ്റ്റുകൾ ചൂണ്ടിക്കാണിക്കുന്നു. നിക്കോട്ടിൻ സ്ഥിരമായി ഉപയോഗിക്കുന്നവർ ക്രമേണ അതിന് അടിമപ്പെടുകയും, പിന്നീട് നിക്കോട്ടിൻ ഇല്ലാതെ ഒന്നിനും ശ്രദ്ധ കേന്ദ്രീകരിക്കാൻ കഴിയാത്ത അവസ്ഥയിലേക്ക് എത്തുകയും ചെയ്യും.

പുകവലി നിർത്താൻ സഹായിക്കുക എന്ന സദുദ്ദേശത്തോടെയാണ് വിപണിയിൽ നിക്കോട്ടിൻ ഗമ്മുകൾ യാതൊരു നിയന്ത്രണങ്ങളുമില്ലാതെ ലഭ്യമാക്കിയിരിക്കുന്നത്. എന്നാൽ സോഷ്യൽ മീഡിയയുടെ സ്വാധീനത്തിൽ ആളുകൾ ഇത് മറ്റ് ആവശ്യങ്ങൾക്കായി ദുരുപയോഗം ചെയ്യുന്നത് സമൂഹത്തിൽ വലിയ പ്രത്യാഘാതങ്ങൾ ഉണ്ടാക്കും. ഇത്തരം ഉൽപ്പന്നങ്ങൾ വിൽക്കുന്നവർക്ക് അതിന്റെ പാർശ്വഫലങ്ങളിൽ യാതൊരു ഉത്തരവാദിത്തവുമില്ല എന്നതും ശ്രദ്ധേയമാണ്.

ആരോഗ്യ മേഖലയിലെ എളുപ്പവഴികളോടുള്ള നമ്മുടെ വർധിച്ചുവരുന്ന താല്പര്യമാണ് ഇത്തരം ട്രെൻഡുകൾക്ക് കാരണം. ബുദ്ധിശക്തി കൂട്ടാനും ഊർജസ്വലത വർധിപ്പിക്കാനും പലവിധത്തിലുള്ള സപ്ലിമെന്റുകൾക്ക് പിന്നാലെ പായുന്ന ആധുനിക സമൂഹത്തിന്റെ ഏറ്റവും പുതിയ ഇരയാണ് നിക്കോട്ടിൻ. ഇന്റർനെറ്റിന്റെ ചില കോണുകളിൽ നിക്കോട്ടിൻ ഇന്ന് ആഘോഷിക്കപ്പെടുന്നുണ്ടാകാം, എന്നാൽ അത് ഈ നൂറ്റാണ്ടിലെ വലിയൊരു ആരോഗ്യ കണ്ടെത്തലാണെന്ന് ഇതിനർത്ഥമില്ല.

അതിനാൽ ഇൻഫ്ലുവൻസർമാരുടെ അവകാശവാദങ്ങൾ കേട്ട് നിക്കോട്ടിന് പിന്നാലെ പോകാതെ, തലച്ചോറിന്റെ ആരോഗ്യം മെച്ചപ്പെടുത്താൻ പസിൽ ഗെയിമുകൾ കളിക്കുക, പുതിയ കഴിവുകൾ പഠിക്കുക, കൃത്യമായി വ്യായാമം ചെയ്യുക തുടങ്ങിയ സുരക്ഷിതമായ മാർഗ്ഗങ്ങൾ സ്വീകരിക്കുന്നതാണ് എക്കാലത്തും ഉചിതം. എളുപ്പവഴികൾ എപ്പോഴും സുരക്ഷിതമാകണമെന്നില്ല എന്നാണ് വൈദ്യശാസ്ത്രം നൽകുന്ന മുന്നറിയിപ്പ്.