ആസ്ത്മയെന്ന് തെറ്റിദ്ധരിക്കേണ്ട; ശ്വാസകോശ കാൻസറിന്റെ മറഞ്ഞിരിക്കുന്ന മുന്നറിയിപ്പുകൾ

ശ്വാസകോശ അർബുദം അഥവാ ലങ്സ് ക്യാൻസർ എന്ന് കേൾക്കുമ്പോൾ വിട്ടുമാറാത്ത ചുമ, ചുമക്കുമ്പോൾ രക്തം വരുന്നത്, നെഞ്ചുവേദന അല്ലെങ്കിൽ ശ്വാസംമുട്ടൽ എന്നിവയാണ് മിക്കവരും ആദ്യം ചിന്തിക്കുന്നത്. എന്നാൽ ഇത്തരം സാധാരണ ലക്ഷണങ്ങൾക്ക് അപ്പുറം ശബ്ദത്തിലുണ്ടാകുന്ന മാറ്റം, നടുവേദന, വിരലുകളുടെ ആകൃതിയിലെ മാറ്റം എന്നിങ്ങനെ പല അസാധാരണ ലക്ഷണങ്ങളിലൂടെയും ശ്വാസകോശ അർബുദം പ്രകടമാകാമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഈ ലക്ഷണങ്ങൾ നേരത്തെ തിരിച്ചറിയുന്നത് രോഗനിർണയവും ചികിത്സയും വേഗത്തിലാക്കാൻ സഹായിക്കുമെന്നും വിദഗ്ധർ ചൂണ്ടിക്കാട്ടുന്നു.

ആസ്ത്മയാണെന്ന് കരുതി ആഴ്ചകളോളം ചികിത്സ തേടിയ ഒരു അൻപതുകാരിയുടെ അനുഭവത്തിലൂടെയാണ് വിദഗ്ധർ ഈ വിഷയം വ്യക്തമാക്കുന്നത്. ഇൻഹേലറുകൾ കൃത്യമായി ഉപയോഗിച്ചിട്ടും ഇവരുടെ ശ്വാസംമുട്ടലിനും ചുമയ്ക്കും യാതൊരു ശമനവുമുണ്ടായിരുന്നില്ല. തുടർന്ന് നടത്തിയ വിശദമായ എക്സ്-റേ പരിശോധനയിലാണ് ശ്വാസകോശത്തിന് ചുറ്റും വലിയ തോതിൽ ദ്രാവകം കെട്ടിക്കിടക്കുന്നതായി കണ്ടെത്തിയത്. ഇത് പ്ലീയുറയിലേക്ക് (ശ്വാസകോശത്തെ പൊതിയുന്ന പാട) പടർന്ന ശ്വാസകോശ അർബുദമാണെന്ന് പിന്നീട് സ്ഥിരീകരിച്ചു.

വിട്ടുമാറാത്ത എല്ലാ ചുമയും ശ്വാസംമുട്ടലും ആസ്ത്മയോ സാധാരണ അണുബാധയോ ആകണമെന്നില്ലെന്നും, ചികിത്സിച്ചിട്ടും മാറാത്ത ലക്ഷണങ്ങളെ പുതിയൊരു വീക്ഷണത്തോടെ പരിശോധിക്കേണ്ടത് അത്യാവശ്യമാണെന്നും ഈ സംഭവം ഓർമ്മിപ്പിക്കുന്നു. മുതിർന്ന പുരുഷന്മാരായ പുകവലിക്കാരെ മാത്രം ബാധിക്കുന്ന ഒന്നാണ് ശ്വാസകോശ അർബുദം എന്ന ധാരണയും ഇപ്പോൾ മാറുകയാണ്. പുതിയതായി രോഗം സ്ഥിരീകരിക്കുന്നവരിൽ വലിയൊരു ശതമാനം സ്ത്രീകളും, ജീവിതത്തിൽ ഒരിക്കൽപ്പോലും പുകവലിക്കാത്തവരുമാണെന്നത് ഏറെ ശ്രദ്ധേയമാണ്.

ശ്വാസകോശ അർബുദത്തിന്റെ പല ലക്ഷണങ്ങളും ശരീരത്തിന്റെ മറ്റ് ഭാഗങ്ങളിലാണ് ആദ്യം പ്രത്യക്ഷപ്പെടുന്നത്. ഇവ പലപ്പോഴും വാർദ്ധക്യസഹജമായ പ്രശ്നങ്ങളായോ, പോഷകക്കുറവായോ, മറ്റ് അണുബാധകളായോ തെറ്റിദ്ധരിക്കപ്പെടാറുണ്ട്. ശബ്ദത്തിലുണ്ടാകുന്ന മാറ്റം ഇത്തരത്തിലൊന്നാണ്. നെഞ്ചിലെ മുഴകൾ ശബ്ദത്തെ നിയന്ത്രിക്കുന്ന ഞരമ്പുകളെ ബാധിക്കുമ്പോൾ ആഴ്ചകളോളം നീണ്ടുനിൽക്കുന്ന ശബ്ദമാറ്റം ഉണ്ടാകാം. അലർജിയോ അണുബാധയോ ആകാം ഇതിന് പ്രധാന കാരണമെങ്കിലും, ആഴ്ചകൾ നീളുന്ന ശബ്ദമാറ്റങ്ങളെ നിസ്സാരമായി കാണരുത്. അതുപോലെ തന്നെ, ട്യൂമർ അന്നനാളത്തിൽ സമ്മർദ്ദം ചെലുത്തുമ്പോൾ ഭക്ഷണം വിഴുങ്ങാൻ ബുദ്ധിമുട്ട് അനുഭവപ്പെടുന്ന അവസ്ഥയും ഉണ്ടാകാം.

മുഖം, കഴുത്ത്, നെഞ്ചിന്റെ മുകൾഭാഗം എന്നിവിടങ്ങളിൽ വിശദീകരിക്കാനാവാത്ത നീർവീക്കം ഉണ്ടാകുന്നതും ശ്രദ്ധിക്കേണ്ടതാണ്. ട്യൂമർ പ്രധാന രക്തക്കുഴലായ സുപ്പീരിയർ വെന കാവയെ (Superior Vena Cava) അമർത്തുമ്പോഴാണ് ഈ അവസ്ഥ ഉണ്ടാകുന്നത്. കഴുത്തിലോ കോളർബോണിന് മുകളിലോ വേദനയില്ലാത്ത മുഴകൾ പ്രത്യക്ഷപ്പെടുന്നതും ലിംഫ് നോഡുകളിലേക്ക് അർബുദം പടരുന്നതിന്റെ ആദ്യ സൂചനയാകാം.

നടുവേദനയും തോൾ വേദനയും ശ്വാസകോശ അർബുദത്തിന്റെ മറ്റൊരു പ്രധാന ലക്ഷണമാണ്. അർബുദം നട്ടെല്ലിലേക്കും ചുറ്റുമുള്ള ഞരമ്പുകളിലേക്കും പടരുമ്പോഴാണ് ഇത്തരത്തിൽ കഠിനമായ വേദനയും മരവിപ്പും അനുഭവപ്പെടുന്നത്. അസ്ഥികളിലേക്ക് രോഗം പടരുമ്പോൾ രക്തത്തിലെ കാൽസ്യത്തിന്റെ അളവ് വർദ്ധിക്കുകയും, ഇതിന്റെ ഫലമായി അമിതമായ ദാഹം, ഛർദ്ദി, മലബന്ധം, ക്ഷീണം എന്നിവ അനുഭവപ്പെടുകയും ചെയ്യും. ചില സാഹചര്യങ്ങളിൽ തലച്ചോറിലേക്കും അർബുദം പടരാം.

വിട്ടുമാറാത്ത തലവേദന, തലകറക്കം, കാഴ്ച മങ്ങൽ, ശരീരത്തിന്റെ ഒരു ഭാഗത്തിന് ബലക്കുറവ് തുടങ്ങിയ ഞരമ്പ് സംബന്ധമായ പ്രശ്നങ്ങളാണ് ഈ ഘട്ടത്തിൽ പ്രകടമാകുക. വിരലുകളുടെ അറ്റത്ത് ഉണ്ടാകുന്ന മാറ്റങ്ങളാണ് അത്ര പരിചിതമല്ലാത്ത മറ്റൊരു ലക്ഷണം. വിരലുകളുടെ അറ്റം വീർക്കുകയും നഖങ്ങൾ കൂടുതൽ വളഞ്ഞതായി കാണപ്പെടുകയും ചെയ്യുന്ന ഫിംഗർ ക്ലബ്ബിംഗ് (Finger clubbing) എന്ന അവസ്ഥയുണ്ടായാൽ ഉടൻ വൈദ്യപരിശോധന അനിവാര്യമാണ്.

ശ്വാസകോശത്തിൽ അടിക്കടിയുണ്ടാകുന്ന അണുബാധകളും എപ്പോഴും ശ്രദ്ധിക്കേണ്ടതുണ്ട്. ട്യൂമർ ശ്വാസനാളത്തിൽ തടസ്സം സൃഷ്ടിക്കുമ്പോൾ കഫം പുറത്തുകളയാൻ ബുദ്ധിമുട്ടുണ്ടാകുകയും ഇത് ഇടയ്ക്കിടെയുള്ള ന്യുമോണിയ അല്ലെങ്കിൽ ബ്രോങ്കൈറ്റിസ് പോലുള്ള അണുബാധകൾക്ക് കാരണമാവുകയും ചെയ്യും. കൂടാതെ, ട്യൂമർ ഉൽപ്പാദിപ്പിക്കുന്ന ചില ഹോർമോണുകൾ കാരണം പേശികളുടെ ബലഹീനത, രക്തത്തിൽ സോഡിയത്തിന്റെ അളവ് കുറയുക തുടങ്ങിയ പ്രശ്നങ്ങളും രോഗികളിൽ കാണാറുണ്ട്.

പുകവലിയാണ് ശ്വാസകോശ അർബുദത്തിന്റെ പ്രധാന കാരണമെങ്കിലും, മറ്റുള്ളവർ വലിക്കുന്ന പുക ശ്വസിക്കുന്നത് (പാസീവ് സ്മോക്കിംഗ്), വിറകടുപ്പിൽ നിന്നുള്ള പുക, വായുമലിനീകരണം, ആസ്ബസ്റ്റോസ് പോലുള്ള രാസവസ്തുക്കളുമായുള്ള സമ്പർക്കം എന്നിവയും വലിയ അപകടസാധ്യത സൃഷ്ടിക്കുന്നുണ്ട്. മൂന്നാഴ്ചയിലധികം നീണ്ടുനിൽക്കുന്ന ചുമ, ശ്വാസംമുട്ടൽ, രക്തം തുപ്പൽ അല്ലെങ്കിൽ മേൽപ്പറഞ്ഞ അസാധാരണ ലക്ഷണങ്ങൾ എന്നിവ ശ്രദ്ധയിൽപ്പെട്ടാൽ ഉടൻ തന്നെ ഒരു വിദഗ്ധനെ സമീപിച്ച് പരിശോധനകൾ നടത്തേണ്ടതാണ്. രോഗം എത്രയും വേഗം കണ്ടെത്തുന്നുവോ, അത്രയും ഫലപ്രദമായി ചികിത്സിക്കാനും ജീവൻ രക്ഷിക്കാനും സാധിക്കുമെന്ന് വിദഗ്ധർ ഓർമ്മിപ്പിക്കുന്നു.