Crime

70-കാരിക്കും രക്ഷയില്ല... വയോധികയായ ഹരിതകർമ സേനാംഗത്തിനു നേരെ ലൈംഗികാതിക്രമം; 29കാരൻ പിടിയിൽ

ഫോർട്ട്കൊച്ചി ചുള്ളിക്കൽ സ്വദേശി യാസിർ അഫ്രീദിയെയാണ് കടവന്ത്ര പൊലീസ് പിടികൂടിയത്

Madism Desk

കൊച്ചിയിൽ പുലർച്ചെ മാലിന്യശേഖരണ ജോലിക്കിറങ്ങിയ 70കാരിയായ ഹരിതകർമസേനാംഗത്തിന് നേരെ ലൈംഗികാതിക്രമം നടത്തിയ കേസിൽ 29കാരൻ അറസ്റ്റിൽ. ഫോർട്ട്കൊച്ചി ചുള്ളിക്കൽ സ്വദേശി യാസിർ അഫ്രീദിയെയാണ് കടവന്ത്ര പൊലീസ് പിടികൂടിയത്. എം.ജി റോഡിലെ ഒരു കോഫി ഷോപ്പിൽ ജീവനക്കാരനായി ജോലി ചെയ്യുകയാണ് പ്രതി. വെള്ളിയാഴ്ച പുലർച്ചെ മൂന്ന് മണിയോടെയായിരുന്നു സംഭവം.

നഗരത്തിന്റെ വിവിധ ഭാഗങ്ങളിൽ നിന്ന് മാലിന്യം ശേഖരിച്ച് സംസ്കരണ കേന്ദ്രത്തിലെത്തിച്ച ശേഷം മടങ്ങുകയായിരുന്നു വയോധിക. ഇതിനിടെ സുഹൃത്തിനെ യാത്രയാക്കി ബൈക്കിൽ മടങ്ങുകയായിരുന്ന പ്രതി ഇവരെ വിജനമായ സ്ഥലത്ത് വെച്ച് തടഞ്ഞുനിർത്തുകയായിരുന്നു. പ്രദേശത്ത് മറ്റാരുമില്ലെന്ന് ഉറപ്പാക്കിയ ശേഷമാണ് ഇയാൾ വയോധികയ്ക്ക് നേരെ അതിക്രമം നടത്തിയത്.

വയോധികയെ കടന്നുപിടിച്ച പ്രതി ബലമായി നിലത്തേക്ക് വലിച്ചിടുകയും ലൈംഗികമായി ആക്രമിക്കാൻ ശ്രമിക്കുകയും ചെയ്തു. എന്നാൽ അപ്രതീക്ഷിതമായ ആക്രമണത്തിൽ ഭയന്നുപിന്മാറാതെ വയോധിക ശക്തമായി ചെറുത്തുനിന്നു. ഇതിനിടെ അവർ ഉറക്കെ നിലവിളിക്കുകയും ചെയ്തു. നിലവിളി കേട്ട് സമീപത്തുണ്ടായിരുന്ന തെരുവുനായ്ക്കൾ കുരച്ചുകൊണ്ട് സംഭവസ്ഥലത്തേക്ക് പാഞ്ഞെത്തി. ഇതോടെ പരിഭ്രാന്തനായ പ്രതി ആക്രമണം ഉപേക്ഷിച്ച് ബൈക്കിൽ കയറി സ്ഥലത്തുനിന്ന് രക്ഷപ്പെടുകയായിരുന്നു.

ആക്രമണത്തിനിടെ വയോധികയുടെ കൈക്ക് പരിക്കേറ്റു. മുഖത്തും പ്രതിയുടെ നഖംകൊണ്ട് പോറലേറ്റിരുന്നു. സംഭവത്തിന്റെ ആഘാതമുണ്ടായിരുന്നെങ്കിലും വയോധിക പിറ്റേന്ന് തന്നെ കടവന്ത്ര പൊലീസ് സ്റ്റേഷനിലെത്തി പരാതി നൽകി. ആക്രമണം നടത്തിയ സമയത്ത് പ്രതി മദ്യലഹരിയിലായിരുന്നുവെന്നാണ് വയോധിക പൊലീസിനോട് വ്യക്തമാക്കിയത്.

പരാതിയുടെ അടിസ്ഥാനത്തിൽ പൊലീസ് അന്വേഷണം ആരംഭിച്ചെങ്കിലും പ്രതിയെ കണ്ടെത്തുക എളുപ്പമായിരുന്നില്ല. പ്രദേശത്തെ സി.സി.ടി.വി ക്യാമറകൾ പരിശോധിച്ചപ്പോൾ പ്രതി സഞ്ചരിച്ച ബൈക്കിന്റെ ദൃശ്യങ്ങൾ ലഭിച്ചു. എന്നാൽ ഹെൽമെറ്റ് ധരിച്ചിരുന്നതിനാൽ ഇയാളുടെ മുഖം വ്യക്തമായിരുന്നില്ല. ബൈക്കിന്റെ രജിസ്ട്രേഷൻ നമ്പറും ദൃശ്യങ്ങളിൽ വ്യക്തമായി പതിഞ്ഞിരുന്നില്ല. ഇതോടെ സി.സി.ടി.വി ദൃശ്യങ്ങൾ മാത്രം ഉപയോഗിച്ച് പ്രതിയെ തിരിച്ചറിയാനുള്ള ശ്രമം തടസ്സപ്പെട്ടു.

തുടർന്ന് സംഭവസമയത്ത് പ്രദേശത്ത് സജീവമായിരുന്ന മൊബൈൽ ഫോൺ ടവർ ലൊക്കേഷനുകൾ കേന്ദ്രീകരിച്ച് പൊലീസ് ശാസ്ത്രീയ അന്വേഷണം നടത്തുകയായിരുന്നു. സംഭവസ്ഥലത്തിന് സമീപം ഉണ്ടായിരുന്ന മൊബൈൽ നമ്പറുകളുടെ വിവരങ്ങൾ പരിശോധിച്ചും മറ്റ് തെളിവുകൾ വിലയിരുത്തിയുമാണ് അന്വേഷണസംഘം പ്രതിയിലേക്ക് എത്തിയത്.

ഒടുവിൽ ഫോർട്ട്കൊച്ചി ചുള്ളിക്കൽ സ്വദേശിയായ യാസിർ അഫ്രീദിയെ തിരിച്ചറിഞ്ഞ പൊലീസ് ഇയാളെ അറസ്റ്റ് ചെയ്തു. പുലർച്ചെ ജോലി ചെയ്യാനിറങ്ങിയ വയോധികയ്ക്ക് നേരെയുണ്ടായ അതിക്രമം നഗരത്തിൽ വലിയ ആശങ്കയുണ്ടാക്കിയിട്ടുണ്ട്. മാലിന്യശേഖരണം പോലുള്ള പൊതുജനസേവന ജോലികളിൽ ഏർപ്പെടുന്ന സ്ത്രീകളുടെ സുരക്ഷയെക്കുറിച്ചും സംഭവം വീണ്ടും ചർച്ചയാക്കുകയാണ്