സാഹസികതയും ധീരതയും സിനിമകളിൽ മാത്രം കാണുന്ന ഒന്നല്ല എന്ന് ലോകത്തിന് കാണിച്ച് കൊടുത്തിരിക്കുകയാണ് ഇന്ത്യക്കാരനായ ഒരു വിമാന പൈലറ്റ്. ദുബൈയിൽ നിന്ന് ഇസ്രായേലിലേക്ക് പോവുകയായിരുന്ന ഫ്ലൈ ദുബൈ വിമാനത്തിലെ യാത്രക്കാരുടെ ജീവനാണ് മുംബൈ ഘാട്കോപ്പർ ഈസ്റ്റ് സ്വദേശിയായ ക്യാപ്റ്റൻ സ്മിത് മച്ചാർ എന്ന ധീരനായ പൈലറ്റ് സ്വന്തം ജീവൻ പണയം വെച്ച് രക്ഷിച്ചത്. 27 കുട്ടികൾ ഉൾപ്പെടെ 174 യാത്രക്കാരും വിമാനത്തിലെ മറ്റ് ജീവനക്കാരും അദ്ദേഹത്തിന്റെ അസാമാന്യ ധൈര്യം കൊണ്ടുമാത്രമാണ് ഇന്ന് ജീവനോടെ ഇരിക്കുന്നത്.
ദുബായിൽ നിന്ന് ഇസ്രായേലിലെ ബെൻ ഗുരിയൻ വിമാനത്താവളത്തിലേക്ക് പുറപ്പെട്ട FZ 1073 വിമാനത്തിലാണ് ഞെട്ടിപ്പിക്കുന്ന സംഭവങ്ങൾ അരങ്ങേറിയത്. വിമാനം ആകാശത്ത് പറക്കുന്നതിനിടെ സഹപൈലറ്റ് അപ്രതീക്ഷിതമായി വിമാനത്തിന്റെ നിയന്ത്രണം തട്ടിയെടുക്കാനും വിമാനം തകർക്കാനും ശ്രമിക്കുകയായിരുന്നു. ഈ നീക്കത്തെ ക്യാപ്റ്റൻ സ്മിത് അതിശക്തമായി നേരിട്ടു. ഇതിനിടയിൽ അക്രമിയായ സഹപൈലറ്റ് അദ്ദേഹത്തെ കുത്തിപ്പരിക്കേൽപ്പിച്ചു. കോക്പിറ്റിലെ ഈ പിടിവലിക്കിടെ വിമാനം വെറും രണ്ട് മിനിറ്റ് കൊണ്ട് 17,400 അടിയോളം താഴേക്ക് പതിച്ചു.
പരിക്കേറ്റ് കിടക്കുമ്പോഴും യാത്രക്കാരുടെ ജീവൻ രക്ഷിക്കാൻ വേണ്ടി വിമാനത്തിന്റെ നിയന്ത്രണം വിട്ടുകൊടുക്കാൻ സ്മിത് തയ്യാറായില്ല. ഗുരുതരമായി പരിക്കേറ്റിട്ടും അതിസാഹസികമായി കോക്പിറ്റിന്റെ വാതിൽ തുറന്ന് അദ്ദേഹം സഹായത്തിനായി ശബ്ദമുണ്ടാക്കി. തുടർന്ന് വിമാനത്തിലെ മറ്റ് ജീവനക്കാരും ഒരു യാത്രികനും കോക്പിറ്റിലേക്ക് ഇരച്ചുകയറി അക്രമിയെ കീഴ്പ്പെടുത്തുകയും വിമാനം വീണ്ടും നിയന്ത്രണത്തിലാക്കുകയുമായിരുന്നു.
തുടർന്ന് സൗദി അറേബ്യയിൽ അടിയന്തര ലാൻഡിങ് നടത്തിയ വിമാനത്തിൽ നിന്ന് അക്രമിയായ സഹപൈലറ്റിനെ സൗദി അധികൃതർ അറസ്റ്റ് ചെയ്തു. ഗുരുതരമായി പരിക്കേറ്റ ക്യാപ്റ്റൻ സ്മിത് മച്ചാറിനെ ശസ്ത്രക്രിയയ്ക്ക് വിധേയനാക്കി. അദ്ദേഹത്തിന്റെ ആരോഗ്യനില ഇപ്പോൾ തൃപ്തികരമാണ്.
മുംബൈയിലെ വെലിങ്കർ ഇൻസ്റ്റിറ്റ്യൂട്ട് ഓഫ് മാനേജ്മെന്റിൽ നിന്ന് ബിസിനസ് അഡ്മിനിസ്ട്രേഷനിൽ ബിരുദം നേടിയ സ്മിത് മച്ചാർ, ന്യൂസിലൻഡിൽ നിന്നാണ് പൈലറ്റ് പരിശീലനം പൂർത്തിയാക്കിയത്. അന്ന് 16 മുതൽ 17 ലക്ഷം രൂപ വരെയാണ് പരിശീലനത്തിനായി ചെലവായതെന്ന് അദ്ദേഹം ഒരു പോഡ്‌കാസ്റ്റിൽ മുൻപ് പറഞ്ഞിരുന്നു. ബോയിങ് 737 വിമാനങ്ങൾ പറത്തി 9,750 മണിക്കൂറിലേറെ പരിചയമുള്ള വ്യക്തിയാണ് അദ്ദേഹം. മുംബൈയിൽ സ്പൈസ് ജെറ്റിൽ പതിനൊന്ന് വർഷത്തോളം അദ്ദേഹം സേവനമനുഷ്ഠിച്ചു. അവിടെ സീനിയർ കമാൻഡറായും മറ്റ് പൈലറ്റുമാർക്ക് പരിശീലനം നൽകുന്ന ലൈൻ ട്രെയിനിങ് ക്യാപ്റ്റനായും അദ്ദേഹം പ്രവർത്തിച്ചിരുന്നു. സ്പൈസ് ജെറ്റിൽ മാത്രം 6,400 മണിക്കൂറിലധികം പറന്ന മികച്ച പരിചയസമ്പത്ത് കാരണമാണ് 2022 ജൂണിൽ ഫ്ലൈ ദുബായ് അദ്ദേഹത്തെ നേരിട്ട് ക്യാപ്റ്റൻ പദവിയിലേക്ക് നിയമിച്ചത്. ജോലിയുടെ ഭാഗമായി ദുബൈയിലായിരുന്നു അദ്ദേഹത്തിന്റെ താമസം. അദ്ദേഹത്തിന്റെ സഹോദരനും ആകാശ എയറിൽ പൈലറ്റായി സേവനമനുഷ്ഠിക്കുന്നുണ്ട്.
സ്മിത്തിന്റെ അസാമാന്യ ധീരതയെ പ്രശംസിച്ചുകൊണ്ട് ലോകനേതാക്കൾ ഇതിനോടകം രംഗത്തെത്തിയിട്ടുണ്ട്. വലിയ അപകടത്തിന് മുന്നിലും സ്വന്തം ജീവൻ പണയം വെച്ച് മറ്റുള്ളവരെ രക്ഷിച്ച സ്മിത് മച്ചാർ ഒരു യഥാർത്ഥ ഹീറോയാണെന്നും, നൂറുകണക്കിന് ആളുകളുടെ ജീവൻ രക്ഷിക്കാൻ അദ്ദേഹത്തിന്റെ ധീരതയ്ക്ക് കഴിഞ്ഞുവെന്നും ഇന്ത്യൻ പ്രധാനമന്ത്രി നരേന്ദ്ര മോദി എക്‌സിൽ കുറിച്ചു.
കുത്തേറ്റിട്ടും പതറാതെ അക്രമിയെ നേരിട്ട സ്മിത് ഒരു വലിയ ദുരന്തമാണ് ഒഴിവാക്കിയതെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു പ്രതികരിച്ചു. ഗുരുതരമായി പരിക്കേറ്റിട്ടും വാതിൽ തുറന്ന് മറ്റുള്ളവരുടെ സഹായം തേടിയ പൈലറ്റിന്റെ മനസാന്നിധ്യം അതിശയകരമാണെന്നും, അദ്ദേഹം തീർച്ചയായും ഒരു ഹീറോയാണെന്നും അമേരിക്കൻ പ്രസിഡന്റ് ഡോണൾഡ് ട്രംപും പറഞ്ഞു.
Captain Smit Machchhar, an Indian pilot from Mumbai, is being hailed as a global hero after thwarting his co-pilot's attempt to crash a flydubai flight en route to Israel. Despite being stabbed and severely injured during a mid-air cockpit struggle that caused the aircraft to plummet 17,400 feet, Machchhar bravely fought back and successfully alerted the crew. His immense courage and quick thinking saved the lives of 174 passengers and crew onboard. World leaders, including PM Narendra Modi, Benjamin Netanyahu, and Donald Trump, have highly praised his heroic actions.