ലോകത്തെ പട്ടിണി അസമത്വങ്ങള്‍ വ്യക്തമാക്കുന്ന 2026-ലെ ആഗോള പട്ടിണി സൂചിക റിപ്പോര്‍ട്ട് പുറത്ത്. ആറു വര്‍ഷത്തിലൊരിക്കല്‍ പ്രസിദ്ധീകരിക്കുന്ന സൂചികയില്‍, ആകെ സര്‍വേ ചെയ്ത 122 രാജ്യങ്ങളില്‍ ഇന്ത്യ 100-ാം സ്ഥാനത്താണ്. 24.1 സ്‌കോറോടെ 'ഗുരുതരം' എന്ന വിഭാഗത്തിലാണ് ഇന്ത്യ ഇപ്പോഴും ഉള്‍പ്പെട്ടിരിക്കുന്നത്. 2012 മുതല്‍ ഈ അവസ്ഥയില്‍ നിന്ന് മെച്ചപ്പെടാന്‍ രാജ്യത്തിന് സാധിച്ചിട്ടില്ല എന്നത് ആശങ്ക ഉയര്‍ത്തുന്നു. നേപ്പാള്‍ (72), ശ്രീലങ്ക (53), ബംഗ്ലാദേശ് (84) എന്നീ രാജ്യങ്ങള്‍ക്ക് വളരെ പിന്നിലായാണ് ഇന്ത്യയുടെ സ്ഥാനം.
ജര്‍മ്മന്‍ സഹായ ഏജന്‍സിയായ 'വെല്‍റ്റ് ഹംഗര്‍ ഹില്‍ഫെ', അയര്‍ലന്‍ഡിലെ 'കണ്‍സേണ്‍ വേള്‍ഡ് വൈഡ്' എന്നീ സംഘടനകളും ഇന്‍സ്റ്റിറ്റ്യൂട്ട് ഫോര്‍ ഇന്റര്‍നാഷണല്‍ ലോ ഓഫ് പീസ് ആന്‍ഡ് ആംഡ് കോണ്‍ഫ്‌ലിക്റ്റ്, സ്വിസ് സംഘടനയായ ഹെല്‍വെറ്റാസ് എന്നീ പങ്കാളിത്ത സ്ഥാപനങ്ങളും ചേര്‍ന്നാണ് ഈ സൂചിക സംയുക്തമായി പുറത്തിറക്കുന്നത്.
സൂചിക പ്രകാരം, ഇന്ത്യയിലെ ജനസംഖ്യയുടെ 9.8% പേര്‍ പോഷകാഹാരക്കുറവ് അനുഭവിക്കുന്നവരാണ്. കൂടാതെ, അഞ്ച് വയസ്സില്‍ താഴെയുള്ള കുട്ടികളില്‍ 29.3% പേരും വളര്‍ച്ചാമുരടിപ്പ് നേരിടുന്നു. ആദ്യമായാണ് ഇത് ഇത്രയും ഉയര്‍ന്ന നിരക്കിലെത്തുന്നത്. ഉയരത്തിനനുസരിച്ച് ഭാരമില്ലാത്ത കുട്ടികളുടെ നിരക്ക് 19% ആയി ഉയര്‍ന്നു. ദക്ഷിണേഷ്യയിലെ തന്നെ ഏറ്റവും ഉയര്‍ന്ന നിരക്കാണിത്. മുന്‍ കണക്കെടുപ്പ് കാലയളവില്‍ ഈ നിരക്ക് 16.9% ആയിരുന്നു. ദീര്‍ഘകാല പോഷകാഹാരക്കുറവിന്റെ സൂചകമായാണ് വളര്‍ച്ചാമുരടിപ്പിനെ കണക്കാക്കുന്നത്. അതേസമയം, കുട്ടികളുടെ ഉയരത്തിനനുസരിച്ചുള്ള ഭാരക്കുറവ് ഗുരുതരമായ പോഷകാഹാരക്കുറവിനെയാണ് സൂചിപ്പിക്കുന്നത്. മാത്രമല്ല, ഇത് സമീപകാലത്ത് രാജ്യം നേരിടുന്ന പോഷക പ്രതിസന്ധികളെയും പ്രതിഫലിപ്പിക്കുന്നു.
ദക്ഷിണേഷ്യയിലെയും ആഗോളതലത്തിലെയും സാഹചര്യം
ദക്ഷിണേഷ്യയുടെ പട്ടിണി സൂചിക സ്‌കോര്‍ 23.5 ആണ്. ലോകത്തില്‍ കുട്ടികളിലെ ഉയരത്തിനനുസരിച്ചുള്ള ഭാരക്കുറവ് (15.8%) ഏറ്റവും കൂടുതലുള്ള മേഖലയും ദക്ഷിണേഷ്യയാണ്. 'ദക്ഷിണേഷ്യയിലെ സ്ഥിതി ആശങ്കാജനകമായി തുടരുന്നു. സമീപകാലത്ത് പല രാജ്യങ്ങളിലും പുരോഗതി സ്തംഭിച്ച അവസ്ഥയിലാണ്. രണ്ട് രാജ്യങ്ങളിലും പാകിസ്താനിലും 2018-നെ അപേക്ഷിച്ച് സ്ഥിതി കൂടുതല്‍ വഷളായിട്ടുണ്ട്. എന്നാല്‍ നേപ്പാളില്‍ മികച്ച പുരോഗതിയുണ്ടായപ്പോള്‍ ബംഗ്ലാദേശിലും ഇന്ത്യയിലും നേരിയ മെച്ചപ്പെടലുകള്‍ ഉണ്ടായി', റിപ്പോര്‍ട്ടില്‍ പറയുന്നു. 2018-ല്‍ 25.8 ആയിരുന്ന ഇന്ത്യയുടെ സ്‌കോര്‍ 2026-ല്‍ 24.1 ആയി മെച്ചപ്പെട്ടിട്ടുണ്ട്. മറുവശത്ത്, ലോകമെമ്പാടുമുള്ള 31 രാജ്യങ്ങള്‍ 2018-ന് ശേഷം തങ്ങളുടെ പട്ടിണി നിരക്കില്‍ 10 ശതമാനത്തിലധികം കുറവുവരുത്തി. ആഫ്രിക്കയില്‍ ഉഗാണ്ടയും ടോഗോയും നേട്ടമുണ്ടാക്കിയപ്പോള്‍, 2000-ത്തിന് ശേഷം ദക്ഷിണേഷ്യയില്‍ ഏറ്റവും വലിയ പുരോഗതി കൈവരിച്ചത് നേപ്പാളാണ്.
പട്ടിണിയും ഭക്ഷ്യപ്രതിസന്ധിയും കൂട്ടാന്‍ കാരണമാകുന്ന ഘടകങ്ങള്‍
സായുധ സംഘര്‍ഷങ്ങളാണ് പട്ടിണിയുടെ പ്രധാന കാരണങ്ങളിലൊന്ന്. രണ്ടാം ലോകമഹായുദ്ധത്തിന് ശേഷം രാജ്യങ്ങള്‍ തമ്മിലുള്ള സായുധ പോരാട്ടങ്ങള്‍ ഏറ്റവും ഉയര്‍ന്ന നിലയിലെത്തി. റഷ്യ-ഉക്രെയ്ന്‍ യുദ്ധവും ഇറാനെതിരായ പോരാട്ടങ്ങളും ആഗോള വ്യാപാര ശൃംഖല തകര്‍ത്തതോടെ ഭക്ഷ്യവസ്തുക്കളുടെ വില കുതിച്ചുയര്‍ന്നു. ഇതുകാരണം ജനങ്ങള്‍ വിലകുറഞ്ഞതും പോഷകഗുണം കുറഞ്ഞതുമായ ഭക്ഷണത്തിലേക്ക് മാറാനോ അല്ലെങ്കില്‍ ഭക്ഷണം ഒഴിവാക്കാനോ നിര്‍ബന്ധിതരാകുന്നു. ഇത് പോഷകാഹാരക്കുറവിന് കാരണമാകുന്നുവെന്ന് സൂചിക പറയുന്നു.
അതേസമയം, തീവ്രമായ കാലാവസ്ഥാ വ്യതിയാനങ്ങളും വിളനാശവും ഭക്ഷ്യസുരക്ഷയെ കൂടുതല്‍ വഷളാക്കുകയും ഭക്ഷ്യവിതരണ സംവിധാനങ്ങളുടെ പ്രതിരോധശേഷി ദുര്‍ബലപ്പെടുത്തുകയും ചെയ്യുന്നു. കൂടാതെ, അന്താരാഷ്ട്ര ഫണ്ടിംഗിലുണ്ടായ കുറവും ഭക്ഷ്യസുരക്ഷയെ ബാധിച്ചു. അന്താരാഷ്ട്ര തലത്തില്‍ പട്ടിണി നിര്‍മാര്‍ജനത്തിനായി ലഭിക്കുന്ന ധനസഹായം കുറഞ്ഞതോടെ ദുരിതാശ്വാസ പദ്ധതികള്‍ വെട്ടിച്ചുരുക്കാനും റേഷന്‍ അടിയന്തിരമായി വെട്ടിക്കുറയ്ക്കാനും ഏജന്‍സികള്‍ നിര്‍ബന്ധിതരായി.
വരാനിരിക്കുന്ന വെല്ലുവിളി
ദക്ഷിണേഷ്യയെ സംബന്ധിച്ചിടത്തോളം വരാനിരിക്കുന്ന നാളുകള്‍ കൂടുതല്‍ വെല്ലുവിളി നിറഞ്ഞതായിരിക്കുമെന്ന് റിപ്പോര്‍ട്ട് മുന്നറിയിപ്പ് നല്‍കുന്നു. ശക്തമാകുന്ന എല്‍ നിനോ പ്രതിഭാസവും 2026-ലെ മണ്‍സൂണിലെ കുറവും കാര്‍ഷിക മേഖലയെ ബാധിച്ചേക്കാം. ഇന്ത്യയിലെ മഴയെ ആശ്രയിച്ച് കൃഷി ചെയ്യുന്ന പ്രധാന മേഖലകളില്‍ സാധാരണ ലഭിക്കേണ്ടതിനേക്കാള്‍ കുറഞ്ഞ മഴ ലഭിക്കാന്‍ 60% സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പ് പ്രവചിക്കുന്നത്. ഇത് വരും നാളുകളില്‍ ഉല്‍പ്പാദനത്തെയും ഭക്ഷ്യസുരക്ഷയെയും വീണ്ടും പ്രതിസന്ധിയിലാക്കിയേക്കാം.
India ranks 100th among 122 countries in the 2026 Global Hunger Index (GHI), with a score of 24.1, placing it in the “serious” hunger category, according to the report provided. Despite some improvement since 2018, when India's score stood at 25.8, the country continues to face significant challenges related to malnutrition and child nutrition. The report states that 9.8% of India's population is undernourished. Among children under five, 29.3% experience stunting, while the child wasting rate has risen to 19%, reportedly the highest in South Asia. These indicators reflect persistent nutritional challenges, including long-term malnutrition and acute nutritional deficiencies.