നീറ്റ് പരീക്ഷാ ക്രമക്കേടുകളിലും ചോദ്യപ്പേപ്പര് ചോര്ച്ചയിലും പ്രതിഷേധിച്ച് കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാനിന്റെ രാജി ആവശ്യപ്പെട്ട് കോക്രോച്ച് ജനതാ പാര്ട്ടി (സിജെപി) പാര്ലമെന്റിലേക്ക് നടത്തിയ 'ചലോ സന്സദ്' മാര്ച്ചിന് നേരെ ഡല്ഹിയില് വ്യാപക പൊലീസ് അതിക്രമം. പൊലീസിന്റെ ക്രൂരമായ ലാത്തിച്ചാര്ജും കണ്ണീര്വാതക പ്രയോഗവും അവഗണിച്ച് പതിനായിരക്കണക്കിന് വിദ്യാര്ഥികളാണ് തലസ്ഥാന നഗരിയിലെ തെരുവുകളില് അണിനിരന്നത്. ജന്തര് മന്തറില് സിജെപി തുടരുന്ന അനിശ്ചിതകാല സമരത്തിന്റെ 23-ാം ദിവസമാണ് പാര്ലമെന്റ് മാര്ച്ച് നടക്കുന്നത്. ഇത്രയും വലിയൊരു ജനക്കൂട്ടത്തെ സുരക്ഷാ സേന ഒട്ടും പ്രതീക്ഷിച്ചിരുന്നില്ലെന്നാണ് ദേശീയ മാധ്യമങ്ങള് റിപ്പോര്ട്ട് ചെയ്യുന്നത്.
ശ്രമശക്തി ഭവന്, പ്രസ് ക്ലബ്, കോണ്സ്റ്റിറ്റിയൂഷന് ക്ലബ് എന്നിവയ്ക്ക് സമീപം പൊലീസ് സമരക്കാര്ക്ക് നേരെ ക്രൂരമായി ലാത്തി വീശുകയും കണ്ണീര്വാതക ഷെല്ലുകള് പ്രയോഗിക്കുകയും ചെയ്തു. നിരവധി വിദ്യാര്ഥികള്ക്ക് പരിക്കേറ്റിട്ടുണ്ട്. പ്രതിഷേധം അടിച്ചമര്ത്തുന്നതിന്റെ ഭാഗമായി വലിയൊരു വിഭാഗം സമരക്കാരെ പൊലീസ് കസ്റ്റഡിയിലെടുത്ത് ബസുകളില് അജ്ഞാത കേന്ദ്രങ്ങളിലേക്ക് മാറ്റി. കൂടാതെ, സമരക്കാര് തമ്മിലുള്ള ആശയവിനിമയം തടസ്സപ്പെടുത്തുന്നതിനായി ജന്തര് മന്തര്, പാര്ലമെന്റ് പരിസരങ്ങളില് മൊബൈല് ഇന്റര്നെറ്റ് സേവനങ്ങളും താല്ക്കാലികമായി റദ്ദാക്കിയിട്ടുണ്ട്.
പ്രതിഷേധം കനക്കുന്നതിനിടെ സിജെപി വക്താക്കളായ സൗരവ് ദാസ്, അശുതോഷ് റാങ്ക എന്നിവരടങ്ങുന്ന പ്രതിനിധി സംഘം കേന്ദ്രമന്ത്രി ജെപി നദ്ദയെ അദ്ദേഹത്തിന്റെ വസതിയില് സന്ദര്ശിച്ച് തങ്ങളുടെ ആവശ്യങ്ങള് അടങ്ങിയ കത്ത് കൈമാറി. നീറ്റ് പരീക്ഷാ വിവാദങ്ങളുടെ പശ്ചാത്തലത്തില് കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന് അടിയന്തരമായി രാജിവെക്കുക, ആരോഗ്യപ്രശ്നങ്ങള് ചൂണ്ടിക്കാട്ടി സമരപ്പന്തലില് നിന്ന് പൊലീസ് നിര്ബന്ധപൂര്വ്വം ആശുപത്രിയിലേക്ക് മാറ്റിയ പ്രമുഖ പരിസ്ഥിതി പ്രവര്ത്തകന് സോനം വാങ്ചുകിനെ ഉടന് മോചിപ്പിക്കുക, പരീക്ഷാ ക്രമക്കേടുകളെ തുടര്ന്ന് മാനസിക വിഷമത്താല് ആത്മഹത്യ ചെയ്ത നീറ്റ് ഉദ്യോഗാര്ഥികളുടെ കുടുംബങ്ങള്ക്ക് ഒരു കോടി രൂപ വീതം നഷ്ടപരിഹാരം നല്കുക എന്നിവയാണ് സിജെപി മുന്നോട്ട് വെക്കുന്ന പ്രധാന ആവശ്യങ്ങള്. അതേസമയം, കേന്ദ്ര നേതൃത്വവുമായി ആലോചിച്ച ശേഷം മറുപടി നല്കാമെന്നാണ് നദ്ദ സിജെപി വക്താക്കളോട് പറഞ്ഞത്. ഡല്ഹിയിലെ അടിയന്തര സാഹചര്യം വിലയിരുത്താന് കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തില് കേന്ദ്രമന്ത്രിമാരുടെ അടിയന്തര യോഗവും ചേര്ന്നു.
തെരുവിലെ പ്രതിഷേധങ്ങള്ക്കൊപ്പം തന്നെ വിഷയത്തില് നിയമപോരാട്ടവും ശക്തമായിട്ടുണ്ട്. ജന്തര് മന്തറിലെ പ്രതിഷേധക്കാരെ പൊലീസ് നിയമവിരുദ്ധമായി ആക്രമിച്ചെന്നും ക്യാമറകള് ഉപയോഗിച്ച് നിരീക്ഷിക്കുന്നുവെന്നും ചൂണ്ടിക്കാട്ടി ജെഎന്യുഎസ്യു മുന് പ്രസിഡന്റ് ഐഷ ഘോഷ് സമര്പ്പിച്ച പൊതുതാല്പ്പര്യ ഹര്ജി ഡല്ഹി ഹൈക്കോടതി പരിഗണിച്ചു. രാത്രി സമയങ്ങളില് മഴയത്ത് കിടന്നുറങ്ങുന്ന വനിതാ സമരക്കാരെപ്പോലും തുടര്ച്ചയായി വീഡിയോയില് പകര്ത്തുന്നുവെന്നും ഇത് മാതാപിതാക്കള്ക്കും വിദ്യാഭ്യാസ സ്ഥാപനങ്ങള്ക്കും അയച്ചുകൊടുക്കുമെന്ന് പൊലീസ് ഭീഷണിപ്പെടുത്തുന്നതായും ഹര്ജിയില് ആരോപിക്കുന്നു. ഇത്തരം കൃത്യമായ സുരക്ഷാ മാനദണ്ഡങ്ങളില്ലാത്ത നിരീക്ഷണങ്ങള് രാജ്യത്തെ ഒരു പൊലീസ് സ്റ്റേറ്റാക്കി മാറ്റുമെന്നും ഹര്ജിഭാഗം കോടതിയില് വാദിച്ചു.
വിദ്യാര്ഥികള്ക്ക് നേരെയുള്ള പൊലീസ് അതിക്രമത്തെ പ്രതിപക്ഷ നേതാക്കള് ഒറ്റക്കെട്ടായി ശക്തമായി അപലപിച്ചു. രാജ്യത്ത് വലിയ പ്രശ്നങ്ങളുണ്ടായിട്ടും അതിനെക്കുറിച്ച് ചര്ച്ച ചെയ്യാന് പോലും സര്ക്കാര് തയ്യാറല്ലെന്നും പകരം നമ്മുടെ കുട്ടികള്ക്ക് നേരെ കണ്ണീര്വാതകം പ്രയോഗിക്കുകയാണോയെന്നും കോണ്ഗ്രസ് നേതാവ് പ്രിയങ്ക ഗാന്ധി ചോദിച്ചു. വിദ്യാര്ഥികള്ക്ക് നേരെ പൊലീസ് ഇലക്ട്രിക് ഷോക്കുകളും കല്ലേറും നടത്തിയതായി സമാജ്വാദി പാര്ട്ടി ചീഫ് അഖിലേഷ് യാദവ് ആരോപിച്ചു. സമരത്തില് പങ്കെടുത്ത ലോക്സഭാ എംപി ഡിംപിള് യാദവിനെ പൊലീസ് കസ്റ്റഡിയിലെടുത്തതിനെ സമാജ്വാദി പാര്ട്ടി ശക്തമായി അപലപിച്ചു. ജമ്മു കശ്മീര് മുഖ്യമന്ത്രി ഒമര് അബ്ദുള്ള സിജെപി പ്രവര്ത്തകര്ക്കൊപ്പം യാത്ര ചെയ്ത് സമരത്തിന് പിന്തുണ പ്രഖ്യാപിച്ചു. പ്രധാനമന്ത്രി ആഗോള വേദിയില് യുവാക്കളെക്കുറിച്ച് സംസാരിക്കുമെങ്കിലും സ്വന്തം നാട്ടിലെ യുവാക്കളുടെ പരാതികള് കേള്ക്കാന് തയ്യാറാകുന്നില്ലെന്ന് എഎപി നേതാവ് മനീഷ് സിസോദിയ കുറ്റപ്പെടുത്തി.
സമരത്തെ തുടര്ന്ന് സെന്ട്രല് ഡല്ഹിയിലെ പ്രധാന റോഡുകളില് കനത്ത ഗതാഗതക്കുരുക്കാണ് അനുഭവപ്പെടുന്നത്. റയില് ഭവന്, വിജയ് ചൗക്ക്, കര്ത്തവ്യ പഥ്, ഇന്ത്യാ ഗേറ്റ്, പാര്ലമെന്റ് സ്ട്രീറ്റ് എന്നീ ഭാഗങ്ങളിലൂടെയുള്ള ഗതാഗതം പൂര്ണമായും തടസ്സപ്പെട്ടു. ഈ ഭാഗങ്ങളിലേക്കുള്ള യാത്ര ഒഴിവാക്കാന് ഡല്ഹി ട്രാഫിക് പൊലീസ് പൊതുജനങ്ങള്ക്ക് നിര്ദേശം നല്കിയിട്ടുണ്ട്. പ്രതിഷേധക്കാര് പാര്ലമെന്റിലേക്ക് അതിക്രമിച്ചു കയറുന്നത് തടയാന് പാര്ലമെന്റ് പരിസരത്ത് സുരക്ഷ ശക്തമാക്കുകയും കൂടുതല് സുരക്ഷാ സേനയെ വിന്യസിക്കുകയും ചെയ്തിരിക്കുകയാണ്.
Thousands of students marched towards Parliament in Delhi under the 'Chalo Sansad' campaign organised by the Cockroach Janata Party (CJP), demanding the resignation of Union Education Minister Dharmendra Pradhan over alleged NEET examination irregularities and question paper leaks. Police reportedly used lathi charges, tear gas, and detained several protesters as they attempted to stop the march. CJP leaders later met Union Minister J.P. Nadda to submit a memorandum outlining their demands, including Pradhan's resignation, the release of environmental activist Sonam Wangchuk, and compensation for families of NEET aspirants who died by suicide. Opposition leaders condemned the police action, while a petition challenging police surveillance of protesters came up before the Delhi High Court. The protest also caused major traffic disruptions across central Delhi.