ഇസ്രായേലുമായി ഒരു സുരക്ഷാ കരാറിലെത്താന് സിറിയ സജീവമായി ശ്രമിക്കുന്നതായി വെളിപ്പെടുത്തി പ്രസിഡന്റ് അഹമ്മദ് അല് ഷറ. പ്രമുഖ രാജ്യങ്ങളുടെ സഹായത്തോടെയാണ് സിറിയ ഈ ശ്രമം നടത്തുന്നതെന്ന് 'അല് ജസീറ'യ്ക്ക് നല്കിയ പ്രത്യേക അഭിമുഖത്തില് അല് ഷറ പറഞ്ഞു. ഇസ്രായേലുമായുള്ള ഈ കരാര് കൂടുതല് സമഗ്രമായ സമാധാനത്തിലേക്കുള്ള വാതിലുകള് തുറക്കുമെന്നാണ് പ്രതീക്ഷിക്കുന്നതെന്ന് അദ്ദേഹം പറഞ്ഞു. 1973 മുതല് ഇസ്രായേല് നിയമവിരുദ്ധമായി കൈയടക്കിവച്ചിരിക്കുന്ന ഗോലന് കുന്നുകള്ക്കുമേലുള്ള സിറിയയുടെ അവകാശത്തില് ഒരു വിട്ടുവീഴ്ചയും വരുത്തില്ലെന്നും അദ്ദേഹം ഉറപ്പുനല്കി.
ഇസ്രായേലുമായി ഏതെങ്കിലും തരത്തിലുള്ള സൈനിക ഏറ്റുമുട്ടലുകള് ഒഴിവാക്കാനാണ് സിറിയ ആഗ്രഹിക്കുന്നത്. ഇപ്പോഴത്തെ പ്രതിസന്ധിക്ക് സമഗ്രമായ പരിഹാരം കാണാന് ഒരു സുരക്ഷാ ക്രമീകരണത്തിന് കഴിയുമെന്ന് അദ്ദേഹം കൂട്ടിച്ചേര്ത്തു. 2024 ഡിസംബറില് ബഷാര് അല് അസദിന്റെ ഭരണം വീണതിനെ തുടര്ന്ന് അഹമ്മദ് അല് ഷറ അധികാരമേറ്റ ശേഷം, തെക്കന് സിറിയയില് ഇസ്രായേല് തുടര്ച്ചയായി വ്യോമാക്രമണങ്ങളും കടന്നുകയറ്റങ്ങളും നടത്തിവരികയായിരുന്നു.
ലെബനനിലെ പ്രതിസന്ധിയും പ്രാദേശിക ആശങ്കകളും
അയല്രാജ്യമായ ലെബനനില് സൈനികമായി ഇടപെടാന് സിറിയയ്ക്ക് യാതൊരു പദ്ധതിയുമില്ലെന്ന് അല് ഷറ വ്യക്തമാക്കി. ഇതുസംബന്ധിച്ച് നിലനില്ക്കുന്ന അഭ്യൂഹങ്ങള് അദ്ദേഹം തള്ളി. പകരം, നിലവിലെ കടുത്ത പ്രതിസന്ധി മറികടക്കാന് ലെബനന് ഭരണകൂടത്തെ സഹായിക്കുന്നതിനുള്ള വഴികളാണ് തങ്ങള് നിലവില് ചര്ച്ച ചെയ്യുന്നതെന്നും അദ്ദേഹം പറഞ്ഞു. നിലവില് തെക്കന് ലെബനന്റെ ചില ഭാഗങ്ങള് ഇസ്രായേലിന്റെ അധിനിവേശത്തിലാണ്. അവിടെ ഹിസ്ബുള്ളയും ഇസ്രായേല് സൈന്യവും തമ്മില് മാസങ്ങളായി കടുത്ത പോരാട്ടം നടക്കുന്നുണ്ട്. ഈ പ്രദേശങ്ങള് തിരിച്ചുപിടിക്കാനും രാജ്യത്തെ ആയുധ ശേഖരത്തിന്മേല് പൂര്ണ്ണമായ അധികാരം സ്ഥാപിക്കാനുമാണ് ലെബനന് സര്ക്കാര് ശ്രമിക്കുന്നത്. ആയുധങ്ങള് ഉപയോഗിക്കുന്നതിനും യുദ്ധവും സമാധാനവും പ്രഖ്യാപിക്കുന്നതിനുമുള്ള അധികാരം ലെബനന് ഭരണകൂടത്തിന് മാത്രമായി പരിമിതപ്പെടുത്തണമെന്ന നിലപാടിനെ സിറിയ ശക്തമായി പിന്തുണയ്ക്കുന്നതായി അദ്ദേഹം പ്രഖ്യാപിച്ചു.
ലെബനനിലെ പ്രതിസന്ധി പരിഹരിക്കാന് സുരക്ഷാപരമായ സമീപനം മാത്രം പോരെന്നും ബഹുമുഖമായ പ്രശ്നങ്ങള് ഉള്ക്കൊള്ളുന്ന സമഗ്രമായ പരിഹാരമാണ് ആവശ്യമെന്നും അല് ഷറ ചൂണ്ടിക്കാട്ടി. ലെബനന് ഏതെങ്കിലും തരത്തില് അരാജകത്വത്തിലേക്ക് കൂപ്പുകുത്തിയാല് അതിന്റെ നേരിട്ടുള്ള പ്രത്യാഘാതം സിറിയയിലുണ്ടാകും. കൂടാതെ, ഇറാനെതിരെയുള്ള യുഎസ്-ഇസ്രായേല് യുദ്ധം മേഖലയിലേക്ക് വ്യാപിച്ചാല് അത് അതിരൂക്ഷമായ പ്രത്യാഘാതങ്ങള്ക്ക് വഴിവെക്കുമെന്നും അദ്ദേഹം മുന്നറിയിപ്പ് നല്കി.
ഉപരോധങ്ങളും എസ്.ഡി.എഫ് കരാറും
അമേരിക്ക ഉള്പ്പെടെയുള്ള രാജ്യങ്ങള് ഏര്പ്പെടുത്തിയ സാമ്പത്തിക ഉപരോധങ്ങള് നീക്കിയതുകൊണ്ടുമാത്രം കാര്യമില്ലെന്നും ഭീകരവാദത്തെ പിന്തുണയ്ക്കുന്ന രാജ്യങ്ങളുടെ പട്ടികയില് നിന്ന് സിറിയയെ ഒഴിവാക്കിയാല് മാത്രമേ വികസനം സാധ്യമാകൂ എന്നും ആഭ്യന്തര-സാമ്പത്തിക രംഗങ്ങളെക്കുറിച്ച് സംസാരിക്കവെ അല് ഷറ പറഞ്ഞു. വടക്കന്, കിഴക്കന് സിറിയന് പ്രദേശങ്ങള് നിയന്ത്രിക്കുന്ന കുര്ദിഷ്-അറബ് സഖ്യമായ 'സിറിയന് ഡെമോക്രാറ്റിക് ഫോഴ്സുമായി' (എസ്.ഡി.എഫ്) ഉണ്ടാക്കിയ ആഭ്യന്തര കരാര് നടപ്പാക്കുന്നതില് കാലതാമസം നേരിട്ടതായി അദ്ദേഹം സമ്മതിച്ചു. എന്നിരുന്നാലും തങ്ങളുടെ സര്ക്കാര് ഈ കരാറിനോട് പൂര്ണ്ണമായും പ്രതിജ്ഞാബദ്ധമാണെന്നും അത് വിജയിക്കുമെന്ന് തന്നെയാണ് പ്രതീക്ഷയെന്നും അദ്ദേഹം പറഞ്ഞു.
2011 മുതല് 2024 വരെയുള്ള സിറിയന് ആഭ്യന്തരയുദ്ധത്തിനിടെ കാണാതായവരെ കണ്ടെത്താനായി ഒരു പ്രത്യേക സമിതിക്ക് രൂപം നല്കിയതായും പ്രസിഡന്റ് അറിയിച്ചു. യുദ്ധകാലത്ത് ഏകദേശം 1,00,000 ആളുകള് നിര്ബന്ധിതമായി അപ്രത്യക്ഷരാക്കപ്പെട്ടു എന്നാണ് ഐക്യരാഷ്ട്രസഭയുടെ കണക്ക്. എന്നാല് 3,00,000 സിറിയക്കാരെ കാണാതായിട്ടുണ്ടാകാമെന്നാണ് കാണാതായവര്ക്കായുള്ള സിറിയന് ദേശീയ കമ്മീഷന് വ്യക്തമാക്കുന്നത്. രാജ്യാന്തര മാനദണ്ഡങ്ങള് പാലിച്ചും ഈ രംഗത്ത് നൈപുണ്യമുള്ള വിദേശ രാജ്യങ്ങളുടെ പൂര്ണ്ണ സഹകരണത്തോടെയുമായിരിക്കും ഈ സമിതി പ്രവര്ത്തിക്കുകയെന്ന് അല് ഷറ കൂട്ടിച്ചേര്ത്തു.
Syrian President Ahmed al-Sharaa has revealed that Syria is actively seeking a security agreement with Israel with the support of several countries, describing it as a possible first step toward broader regional peace. In an interview with Al Jazeera, he stressed that Syria would not compromise on its claim to the Israeli-occupied Golan Heights. Al-Sharaa said Damascus wants to avoid military confrontation with Israel while pursuing a comprehensive security arrangement. He also ruled out military intervention in Lebanon, supported Lebanon's efforts to place all weapons under state control, and warned that a wider U.S.-Israel conflict with Iran could destabilize the region.