കത്തോലിക്കാ സഭാ പരമാധ്യക്ഷൻ ലിയോ പതിനാലാമൻ മാർപാപ്പയ്ക്കെതിരെ രൂക്ഷമായ ആക്രമണവുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. മാർപാപ്പയുടെ നയതന്ത്ര നിലപാടുകളെ ചോദ്യം ചെയ്തതിന് പിന്നാലെ, തന്നെത്തന്നെ ഒരു 'മിശിഹ' ആയി ചിത്രീകരിക്കുന്ന കൃത്രിമബുദ്ധി (AI) ഉപയോഗിച്ച് നിർമ്മിച്ച ചിത്രം ട്രംപ് പങ്കുവെച്ചതോടെ വിവാദം ആഗോളതലത്തിൽ പടരുകയാണ്. അമേരിക്കയും വത്തിക്കാനും തമ്മിലുള്ള നയതന്ത്ര ബന്ധം ചരിത്രത്തിലെ ഏറ്റവും മോശമായ ഘട്ടത്തിലാണെന്ന സൂചനയാണിതു നൽകുന്നത്.
വിവാദമായി എഐ ചിത്രം
ക്രിസ്തുവിന്റെ അത്ഭുതപ്രവൃത്തികളെ അനുസ്മരിപ്പിക്കുന്ന തരത്തിൽ, വെളുത്ത വസ്ത്രധാരിയായി ഒരു രോഗിയെ സുഖപ്പെടുത്തുന്ന രൂപത്തിലാണ് ട്രംപ് സ്വന്തം ചിത്രം പങ്കുവെച്ചത്. പശ്ചാത്തലത്തിൽ അമേരിക്കൻ പതാകയും യുദ്ധവിമാനങ്ങളും മാലാഖമാരും ഉൾപ്പെടുന്ന ഈ ചിത്രം വലിയ വിമർശനങ്ങൾക്കാണ് വഴിതുറന്നത്. രാഷ്ട്രീയ ആവശ്യങ്ങൾക്കായി മതചിഹ്നങ്ങളെ ദുരുപയോഗം ചെയ്യുന്നുവെന്ന ആക്ഷേപം ട്രംപിനെതിരെ ഉയർന്നു കഴിഞ്ഞു.
സ്ഥാനാരോഹണത്തിലും സംശയം
മാർപ്പാപ്പയുടെ തിരഞ്ഞെടുപ്പിൽ പോലും രാഷ്ട്രീയമുണ്ടെന്ന ഗൗരവതരമായ ആരോപണവും ട്രംപ് ഉന്നയിച്ചു. "ലിയോ എങ്ങനെ മാർപ്പാപ്പയായി എന്നത് എല്ലാവർക്കും അറിയാവുന്ന അത്ഭുതമാണ്. അദ്ദേഹം ഒരു പട്ടികയിലും ഉണ്ടായിരുന്നില്ല. ഞാൻ വൈറ്റ് ഹൗസിൽ ഇല്ലായിരുന്നെങ്കിൽ ലിയോ വത്തിക്കാനിൽ ഉണ്ടാകുമായിരുന്നില്ല," എന്ന് പറഞ്ഞ ട്രംപ്, മാർപ്പാപ്പ സഭയ്ക്ക് തന്നെ ദോഷമാണെന്നും കൂട്ടിച്ചേർത്തു.
സമാധാനത്തിന്റെ സ്വരം
അമേരിക്കൻ വംശജനായ ആദ്യ മാർപ്പാപ്പയാണ് ലിയോ പതിനാലാമൻ. പശ്ചിമേഷ്യൻ പ്രതിസന്ധിയിലും ഇറാൻ വിഷയത്തിലും സമാധാനപരമായ ചർച്ചകൾ വേണമെന്ന ഉറച്ച നിലപാടാണ് വത്തിക്കാൻ സ്വീകരിച്ചിട്ടുള്ളത്. ഉപരോധങ്ങൾക്കും സൈനിക നീക്കങ്ങൾക്കും എതിരെ മാർപ്പാപ്പ നടത്തിയ പ്രസ്താവനകളാണ് ട്രംപിനെ ചൊടിപ്പിച്ചത്. രാജ്യാന്തര തലത്തിൽ സമാധാനത്തിനായി നിലകൊള്ളുന്ന വത്തിക്കാനും സൈനിക നീക്കങ്ങൾക്ക് മുൻഗണന നൽകുന്ന അമേരിക്കയും തമ്മിലുള്ള ഈ പോര് വരുംദിവസങ്ങളിൽ കൂടുതൽ കടുക്കാനാണ് സാധ്യത.
English Summary: U.S. President Donald Trump launched a scathing attack on Pope Leo, calling him "weak on crime" and "terrible for foreign policy." This came after Pope Leo criticized Trump's foreign and immigration policies, including the U.S.-Israeli war on Iran and the treatment of migrants, which the Pope deemed "unacceptable."