കഴിഞ്ഞ ഏതാനും വര്‍ഷങ്ങളായി യുഎസ് വിദേശനയവും താല്‍പ്പര്യങ്ങളും മുന്‍നിര്‍ത്തി സ്റ്റാര്‍ലിങ്കിന്റെ സേവനങ്ങള്‍ നിയന്ത്രിക്കാന്‍ അമേരിക്കന്‍ ഭരണകൂടങ്ങള്‍ മസ്‌കിനുമേല്‍ വന്‍ സമ്മര്‍ദ്ദം ചെലുത്തിയിരുന്നതായി റിപ്പോര്‍ട്ടുകള്‍. ബൈഡന്‍, ട്രംപ് ഭരണകൂടങ്ങളുടെ കാലത്ത് നടന്ന ഇത്തരം രഹസ്യ നീക്കങ്ങളെക്കുറിച്ച് ആറ് മുന്‍ മുതിര്‍ന്ന യുഎസ് ഉദ്യോഗസ്ഥരാണ് വിവരങ്ങള്‍ പുറത്തുവിട്ടിരിക്കുന്നത്. ഇതാദ്യമായാണ് അമേരിക്കന്‍ സര്‍ക്കാരും മസ്‌കിന്റെ സ്‌പേസ് എക്‌സ് കമ്പനിയും തമ്മിലുള്ള ഇത്തരം കരാറുകളെക്കുറിച്ചും ഇടപെടലുകളെക്കുറിച്ചും വിവരങ്ങള്‍ പുറത്തുവരുന്നത്.
പശ്ചിമേഷ്യയിലെയും ഉക്രെയ്‌നിലെയും ഇടപെടലുകള്‍
ജോ ബൈഡന്‍ ഭരണകൂട കാലത്ത്, ഇറാന്‍ അനുകൂല പ്രസ്ഥാനങ്ങളായ യെമനിലെ ഹൂതികളും ലെബനനിലെ ഹിസ്ബുള്ളയും വാര്‍ത്താവിനിമയത്തിനായി സ്റ്റാര്‍ലിങ്ക് ഉപയോഗിക്കുന്നത് തടയുകയും സേവനം വിച്ഛേദിക്കുകയും ചെയ്തു. സ്‌പേസ് എക്‌സിനെ നേരിട്ട് ബന്ധപ്പെട്ടാണ് യുഎസ് ഭരണകൂടം സേവനം നിര്‍ത്തലാക്കിച്ചത്. അതേസമയം തന്നെ, ഉക്രെയ്‌നില്‍ റഷ്യന്‍ അധിനിവേശം ആരംഭിച്ചതിന് പിന്നാലെ ഉക്രെയ്ന്‍ സൈന്യത്തിന് സ്റ്റാര്‍ലിങ്ക് സൗകര്യം വിപുലീകരിച്ചു നല്‍കാനും ബൈഡന്‍ ഭരണകൂടം നിര്‍ദേശം നല്‍കി.
കൂടാതെ, 2025-ലും 2026-ലും ഇറാനില്‍ സര്‍ക്കാര്‍ വിരുദ്ധ പ്രതിഷേധങ്ങള്‍ ശക്തമായപ്പോള്‍ ജനങ്ങള്‍ക്ക് തടസ്സമില്ലാതെ ഇന്റര്‍നെറ്റും മറ്റു വാര്‍ത്താവിനിമയ സൗകര്യങ്ങളും ലഭ്യമാക്കുന്നതിനായി ട്രംപ് ഭരണകൂടങ്ങള്‍ മുന്‍കൈയെടുത്തിരുന്നു. അതേസമയം, അടുത്തിടെ ഉക്രെയ്ന്‍ സൈന്യം ഉപയോഗിക്കുന്ന സ്റ്റാര്‍ലിങ്കിന്റെയും അതിന്റെ സൈനിക പതിപ്പായ 'സ്റ്റാര്‍ഷീല്‍ഡിന്റെയും' വേഗത മനപ്പൂര്‍വം കുറച്ചതും പരിമിതപ്പെടുത്തിയതും വലിയ വിവാദങ്ങള്‍ക്കാണ് വഴിതെളിച്ചത്. ഉക്രെയ്ന്‍ ഡ്രോണുകളുടെ പ്രവര്‍ത്തനത്തെയും റഷ്യന്‍ മിസൈല്‍ പ്രതിരോധ സംവിധാനങ്ങളെയും ഇത് കാര്യമായി ബാധിച്ചതായി ഉക്രെയ്ന്‍ പ്രസിഡന്റ് വോളോഡിമിര്‍ സെലെന്‍സ്‌കി വ്യക്തമാക്കിയിരുന്നു.
ഈ വേഗത കുറയ്ക്കല്‍ ഉത്തരവ് വൈറ്റ് ഹൗസില്‍ നിന്നാണ് വന്നതെന്ന് റോയിട്ടേഴ്‌സ് പുറത്തുവിട്ട റിപ്പോര്‍ട്ടില്‍ പറയുന്നു. എന്നാല്‍ ഇത് സംബന്ധിച്ച് പ്രതികരിച്ച ഡൊണാള്‍ഡ് ട്രംപ്, താന്‍ മസ്‌കുമായി നിലവില്‍ സംസാരിച്ചിട്ടില്ലെന്നും പ്രശ്‌നങ്ങളുണ്ടെങ്കില്‍ അത് ഉടന്‍ പരിഹരിക്കുമെന്നുമാണ് വ്യക്തമാക്കിയത്. 'സ്റ്റാര്‍ഷീല്‍ഡ് സംവിധാനങ്ങളുടെ സമ്പൂര്‍ണ്ണ നിയന്ത്രണം യുഎസ് സര്‍ക്കാരിനും സൈന്യത്തിനുമാണ്. അതിലെ ഏത് തീരുമാനവും പ്രസിഡന്റാണ് കൈക്കൊള്ളുന്നത്', എന്നായിരുന്നു വിഷയത്തില്‍ ഇലോണ്‍ മസ്‌കിന്റെ പ്രതികരണം.
മുന്‍നിര യുദ്ധമുഖങ്ങളിലെ ആശയവിനിമയത്തിന് ഉക്രെയ്ന്‍ സൈന്യത്തിന് സ്റ്റാര്‍ലിങ്ക് ഇന്റര്‍നെറ്റ് സേവനം ഒഴിച്ചുകൂടാനാവാത്തതായി മാറിയിട്ടുണ്ട്. സ്‌പേസ് എക്‌സിന്റെ ഉല്‍പ്പന്നങ്ങളുടെ ശേഷിയോട് കിടപിടിക്കാന്‍ നിലവില്‍ മറ്റൊന്നുമില്ലെന്ന് സൈനികര്‍ പറയുന്നു. റേഡിയോ ജാമിംഗുകളെ പ്രതിരോധിക്കാന്‍ ശേഷിയുള്ള സ്റ്റാര്‍ഷീല്‍ഡ് റിസീവറുകളാണ് ഉക്രെയ്ന്‍ ഡ്രോണുകളുടെ വഴികാട്ടിയായും ഉക്രെയ്‌നുള്ളിലെ റഷ്യന്‍ അതിര്‍ത്തികള്‍ക്ക് ഉള്ളിലേക്ക് വരെ ഡ്രോണുകളെ നിയന്ത്രിക്കാനുള്ള റിമോട്ട് പൈലറ്റ് ലിങ്കുകളായും ഉപയോഗിക്കുന്നത്.
ശതകോടീശ്വരന്റെ കൈകളിലെ വിദേശനയം
ഒരു സ്വകാര്യ കമ്പനിയെയും അതിന്റെ ഉടമയായ ശതകോടീശ്വരനെയും വിദേശനയങ്ങള്‍ നടപ്പാക്കാന്‍ അമേരിക്കന്‍ ഭരണകൂടങ്ങള്‍ അമിതമായി ആശ്രയിക്കുന്നത് വലിയ സുരക്ഷാ ആശങ്കകളാണ് ഉയര്‍ത്തുന്നത്. 'തെരഞ്ഞെടുക്കപ്പെടാത്ത വ്യക്തികളോ സ്വകാര്യ കമ്പനികളോ രാജ്യത്തിന്റെ ദേശീയ സുരക്ഷയും വിദേശനയവും തീരുമാനിക്കുന്ന അവസ്ഥ ഉണ്ടാകരുത്,' എന്ന് അമേരിക്കന്‍ ഡെമോക്രാറ്റിക് പ്രതിനിധി ജേസണ്‍ ക്രോ മുന്നറിയിപ്പ് നല്‍കി. യുഎസിന്റെ സഖ്യകക്ഷിയായിരുന്നിട്ടും ഉക്രെയ്‌നില്‍ ഏര്‍പ്പെടുത്തിയ സമീപകാല നിയന്ത്രണങ്ങള്‍ യൂറോപ്യന്‍ ഉദ്യോഗസ്ഥരെയും ആശങ്കാകുലരാക്കിയിട്ടുണ്ട്. നിലവില്‍ പെട്ടെന്ന് പകരംവെക്കാന്‍ മറ്റ് സംവിധാനങ്ങളൊന്നുമില്ലാത്തതിനാല്‍, യൂറോപ്പ് സ്വന്തമായി സൈനിക സാറ്റലൈറ്റ് കമ്മ്യൂണിക്കേഷന്‍ ശേഷി വികസിപ്പിക്കണമെന്ന ആവശ്യം ചില രാജ്യങ്ങള്‍ മുന്നോട്ടുവെക്കുന്നുണ്ട്.
Reports have revealed that successive US administrations under Joe Biden and Donald Trump exerted pressure on Elon Musk’s SpaceX to restrict or expand Starlink satellite internet services in line with American foreign policy and national security interests. Six former senior US officials have disclosed details of these previously unreported interventions, highlighting the growing influence of private technology companies on international affairs. During the Biden administration, US officials reportedly asked SpaceX to prevent Yemen’s Houthi movement and Lebanon’s Hezbollah from using Starlink for communications. At the same time, the administration pushed to expand Starlink access for Ukrainian forces following Russia’s invasion of Ukraine. In 2025 and 2026, the Trump administration also reportedly supported efforts to maintain internet access for people in Iran during anti-government protests.