'ഹിന്ദു എംഎൽഎ' പരാമർശം; ബിജെപി സ്ഥാനാർത്ഥി ബി ഗോപാലകൃഷ്ണനെതിരെ കേസെടുത്തു

ഗുരുവായൂർ നിയമസഭാ മണ്ഡലത്തിലെ ബിജെപി സ്ഥാനാർത്ഥി ബി. ഗോപാലകൃഷ്ണനെതിരെ പോലീസ് കേസെടുത്തു. സോഷ്യൽ മീഡിയയിൽ നടത്തിയ 'ഹിന്ദു എംഎൽഎ' പരാമർശം വിവാദമായതിന് പിന്നാലെയാണ് ​ഗുരുവായൂർ ടെമ്പിൾ പോലീസ് നിയമനടപടി സ്വീകരിച്ചത്. മുഖ്യ തെരഞ്ഞെടുപ്പ് ഓഫീസറുടെ കർശന നിർദ്ദേശപ്രകാരം തൃശ്ശൂർ ജില്ലാ കളക്ടറാണ് കേസ് രജിസ്റ്റർ ചെയ്യാൻ ഉത്തരവിട്ടത്. വോട്ട് തേടുന്നതിനായി ജാതി-മത വികാരങ്ങൾ ഉപയോഗിക്കുന്നത് ചട്ടവിരുദ്ധമാണെന്ന് കണ്ടെത്തിയതിനെത്തുടർന്നാണ് ഈ നീക്കം.

തിരഞ്ഞെടുപ്പ് ചട്ടങ്ങളിലെ 1951-ലെ സെക്ഷൻ 123(3) പ്രകാരമാണ് ഗോപാലകൃഷ്ണനെതിരെ നടപടിയെടുത്തിരിക്കുന്നത്. വോട്ട് അഭ്യർത്ഥിക്കാൻ ആരാധനാലയങ്ങളോ മതപരമായ ചിഹ്നങ്ങളോ ഉപയോഗിക്കരുത് എന്ന നിർദ്ദേശം സ്ഥാനാർത്ഥി ലംഘിച്ചതായി അധികൃതർ നിരീക്ഷിച്ചു. ഇതിനുപുറമെ, സമൂഹമാധ്യമങ്ങളിൽ പ്രചരിച്ച വിവാദ പ്രസംഗത്തിന്റെ വീഡിയോ ദൃശ്യങ്ങൾ ഉടൻ നീക്കം ചെയ്യാനും കളക്ടർ ഐടി വിഭാഗത്തിന് നിർദ്ദേശം നൽകി. മതപരമായ ചേരിതിരിവ് ഉണ്ടാക്കുന്ന തരത്തിലുള്ള പ്രചരണങ്ങൾ അനുവദിക്കില്ലെന്ന് ഇതോടെ തെരഞ്ഞെടുപ്പ് കമ്മീഷൻ വ്യക്തമാക്കിയിരിക്കുകയാണ്.

ഗുരുവായൂർ മണ്ഡലത്തിൽ പകുതിയോളം ഹിന്ദു ജനസംഖ്യ ഉണ്ടായിട്ടും കഴിഞ്ഞ അൻപത് വർഷമായി ഇരുമുന്നണികളും ഒരു ഹിന്ദു എംഎൽഎയെ പോലും വിജയിപ്പിച്ചില്ലെന്നായിരുന്നു ബി. ഗോപാലകൃഷ്ണന്റെ വിവാദ പ്രസ്താവന. താൻ സ്ഥാനാർത്ഥിയായി എത്തിയത് ഗുരുവായൂരപ്പന്റെ നിയോഗമാണെന്നും മണ്ഡലത്തെ അമ്പലവിരുദ്ധരിൽ നിന്നും വർഗീയവാദികളിൽ നിന്നും മോചിപ്പിക്കാനാണ് തന്റെ പോരാട്ടമെന്നും അദ്ദേഹം പറഞ്ഞിരുന്നു. ഈ വാക്കുകൾ വോട്ടർമാരെ മതപരമായി സ്വാധീനിക്കാനുള്ള ശ്രമമാണെന്ന് വിലയിരുത്തപ്പെട്ടതാണ് കേസിലേക്ക് നയിച്ചത്.

കൊടുങ്ങല്ലൂരമ്മയുടെ നടയിൽ നിന്നാണ് താൻ ഗുരുവായൂരിലേക്ക് എത്തിയതെന്നും ഈ യാത്ര ഒരു വലിയ ദൗത്യത്തിന്റെ ഭാഗമാണെന്നും ഗോപാലകൃഷ്ണൻ അവകാശപ്പെട്ടിരുന്നു. ഗുരുവായൂരിലെ വോട്ടർമാർ രാഷ്ട്രീയത്തിന് അതീതമായി തനിക്കൊപ്പം നിൽക്കണമെന്നും അദ്ദേഹം അഭ്യർത്ഥിച്ചു. എന്നാൽ, പ്രചരണത്തിനായി മതപരമായ വികാരങ്ങൾ ഇളക്കിവിടുന്നത് ജനാധിപത്യ പ്രക്രിയയ്ക്ക് വിരുദ്ധമാണെന്ന നിലപാടിലാണ് അന്വേഷണ സംഘം. സംഭവത്തിൽ കൂടുതൽ വ്യക്തത വരുത്താൻ വരും ദിവസങ്ങളിൽ സ്ഥാനാർത്ഥിയിൽ നിന്ന് വിശദീകരണം തേടിയേക്കും.

English Summery: B. Gopalakrishnan faces a police case over his controversial “Hindu MLA” remark during election campaigning in Guruvayur. Authorities found it violated election rules by invoking religious sentiments to seek votes.