ഗണേഷ് കുമാർ വിവാദം; രാജി ആവശ്യപ്പെടേണ്ടെന്ന നിലപാടിൽ മുഖ്യമന്ത്രി

തിരുവനന്തപുരം: കെ.ബി. ഗണേഷ് കുമാറിനെതിരായ വിവാദം ഒത്തുതീർപ്പായതോടെ രാജി ആവശ്യപ്പെടേണ്ടെന്ന നിലപാടിൽ മുഖ്യമന്ത്രി പിണറായി വിജയൻ. ഗണേഷ് കുമാറിന്റെ വിഷയം കുടുംബ പ്രശ്നമാണെന്ന വിലയിരുത്തലിലാണ് തീരുമാനം. പരാതി ലഭിച്ചാൽ പരിശോധിക്കാമെന്നാണ് സർക്കാർ നിലപാട്.

ആരോപണങ്ങളെ തുടർന്ന് വിവാദം ശക്തമായതോടെ ഭാര്യ ബിന്ദു മേനോനെ ഫോണിൽ വിളിച്ച് ഗണേഷ് കുമാർ മാപ്പ് പറഞ്ഞിരുന്നു. സംഭവത്തിൽ പ്രതികാര നടപടികൾ സ്വീകരിക്കില്ലെന്നും പൊലീസിൽ പരാതിപ്പെടില്ലെന്നും ബിന്ദു മേനോൻ അറിയിച്ചതോടെയാണ് രാജി ആവശ്യപ്പെടേണ്ടെന്ന നിലപാടിലെത്തിയത്.

അതേസമയം, മന്ത്രിയുടെ രാജി ആവശ്യപ്പെട്ട് സംസ്ഥാനവ്യാപക പ്രതിഷേധത്തിന് പ്രതിപക്ഷം ആഹ്വാനം ചെയ്തു. കെ.ബി. ഗണേഷ് കുമാറിന്റെ പത്തനാപുരത്തെ നിയമസഭാംഗ ഓഫിസിലേക്കടക്കം കോൺഗ്രസ് മാർച്ച് സംഘടിപ്പിച്ചു. മന്ത്രിക്കെതിരെ ഗൗരവമായ ആരോപണങ്ങളാണ് ഉയർന്നതെന്നും ഇത് വ്യക്തിപരമായ വിഷയമായി കാണാനാകില്ലെന്നും രമേശ് ചെന്നിത്തല പറഞ്ഞു.

ഗാർഹിക പീഡനം ഉൾപ്പെടെയുള്ള ആരോപണങ്ങൾ ഉയർന്ന സാഹചര്യത്തിൽ മുഖ്യമന്ത്രി നടപടി സ്വീകരിച്ചില്ലെന്നും അദ്ദേഹം ആരോപിച്ചു. ധാർമികവും നിയമപരവുമായ നടപടി സ്വീകരിക്കാൻ മുഖ്യമന്ത്രിക്ക് ഉത്തരവാദിത്തമുണ്ടെന്നും രമേശ് ചെന്നിത്തല പറഞ്ഞു. മന്ത്രിസ്ഥാനം ഗണേഷ് കുമാർ രാജിവയ്ക്കണമെന്ന ആവശ്യത്തിൽ ഉറച്ച് നിൽക്കുന്നതായും അദ്ദേഹം വ്യക്തമാക്കി.

English Summary: Pinarayi Vijayan said there is no need to seek the resignation of K. B. Ganesh Kumar after the controversy related to his family dispute was reportedly settled.