ഐടി പാർക്കുകളിൽ ഒന്നിലധികം മദ്യശാലകൾക്ക് അനുമതി നൽകാനുള്ള മുൻ സർക്കാരിന്റെ ചട്ടഭേദഗതി നിർദേശം നിയമസഭാ സബ്ജക്ട് കമ്മിറ്റി മാറ്റിവെച്ചു. പുതിയ മദ്യനയം പ്രഖ്യാപിച്ചശേഷം ഇക്കാര്യത്തിൽ അന്തിമ തീരുമാനമെടുത്താൽ മതിയെന്ന എക്സൈസ് മന്ത്രിയുടെ നിലപാടിനെ തുടർന്നാണ് നടപടി. മന്ത്രിയുടെ നിർദേശം മുഖ്യമന്ത്രി അംഗീകരിച്ചതോടെ ചട്ടഭേദഗതി സംബന്ധിച്ച തുടർനടപടികൾ താൽക്കാലികമായി മാറ്റിവെക്കുകയായിരുന്നു. കഴിഞ്ഞ സർക്കാർ മുന്നോട്ടുവെച്ച നിർദേശത്തിനെതിരെ പ്രതിപക്ഷ എംഎൽഎമാരും സബ്ജക്ട് കമ്മിറ്റിയിൽ എതിർപ്പ് പ്രകടിപ്പിച്ചു. ഒരു ഐടി ക്യാമ്പസിൽ ഒന്നിലധികം മദ്യശാലകൾ അനുവദിക്കണമെന്ന നിർദേശത്തോടായിരുന്നു ഭരണ-പ്രതിപക്ഷ അംഗങ്ങൾക്ക് ഒരുപോലെ വിയോജിപ്പ്.
ഐടി പാർക്കുകളിൽ മദ്യശാലകൾ ആരംഭിക്കണമെന്ന ആശയം മുന്നോട്ടുവെച്ചത് മുൻ മുഖ്യമന്ത്രി പിണറായി വിജയനായിരുന്നു. ഇതിന്റെ അടിസ്ഥാനത്തിൽ ഐടി പാർക്കുകളുടെ ഡെവലപ്പർമാർക്ക് മാത്രം ബാർ ലൈസൻസ് അനുവദിക്കുന്നതിനുള്ള ചട്ടം കഴിഞ്ഞ സർക്കാർ കൊണ്ടുവന്നു. എന്നാൽ ചട്ടം നിലവിൽ വന്നിട്ടും ഒരു ഐടി പാർക്കിന്റെയും ചീഫ് എക്സിക്യൂട്ടീവ് ഓഫീസർ ബാർ നടത്തുന്നതിനായി ലൈസൻസിന് അപേക്ഷ നൽകിയില്ല. ബാർ നടത്തിപ്പിൽ ആവശ്യമായ പരിചയമില്ലാത്തത് ഉൾപ്പെടെയുള്ള കാരണങ്ങളാണ് ഇതിനുപിന്നിലെന്നാണ് വിലയിരുത്തൽ.
കൂടാതെ, ഒരു ഐടി ക്യാമ്പസിൽ ഒരൊറ്റ മദ്യശാല മാത്രമായി പരിമിതപ്പെടുത്തുന്നത് മറ്റ് നിക്ഷേപകർക്ക് ബുദ്ധിമുട്ടുണ്ടാക്കുമെന്ന ആശങ്കയും ഉയർന്നു. ഇതോടെയാണ് ഡെവലപ്പർമാർക്ക് പുറമെ കോ-ഡെവലപ്പർമാർക്കും ബാർ ലൈസൻസ് അനുവദിക്കണമെന്ന നിർദേശം ഐടി വകുപ്പ് മുന്നോട്ടുവെച്ചത്. കോ-ഡെവലപ്പർമാർക്കും അവർ ശുപാർശ ചെയ്യുന്ന കമ്പനികൾക്കും ലൈസൻസ് നൽകാൻ കഴിയുന്ന തരത്തിൽ നിലവിലെ ചട്ടങ്ങളിൽ ഭേദഗതി വരുത്തണമെന്നായിരുന്നു ശുപാർശ.
ഇതനുസരിച്ച് ഐടി പാർക്കുകളുടെ ഡെവലപ്പർമാർ, കോ-ഡെവലപ്പർമാർ, ഇവർ ശുപാർശ ചെയ്യുന്ന കമ്പനികൾ എന്നിവർക്കെല്ലാം ബാർ ലൈസൻസ് അനുവദിക്കാൻ വ്യവസ്ഥ ചെയ്യുന്ന ചട്ടഭേദഗതിയാണ് മുൻ സർക്കാർ തയ്യാറാക്കിയത്. ഒരു ക്യാമ്പസിൽ ഒന്നിലധികം സ്ഥാപനങ്ങൾക്ക് മദ്യശാലകൾ നടത്താൻ അവസരം നൽകുന്നതായിരുന്നു നിർദേശത്തിന്റെ പ്രധാന പ്രത്യേകത. ഈ ഭേദഗതിയാണ് നിയമസഭാ സബ്ജക്ട് കമ്മിറ്റിയുടെ പരിഗണനയ്ക്ക് എത്തിയത്. എന്നാൽ ഒരേ ഐടി ക്യാമ്പസിൽ ഒന്നിലധികം മദ്യശാലകൾ അനുവദിക്കുന്നത് സംബന്ധിച്ച് അംഗങ്ങൾക്കിടയിൽ എതിർപ്പ് ഉയർന്നു. പ്രതിപക്ഷ അംഗങ്ങളും നിർദേശത്തെ എതിർത്തതോടെ വിഷയം കൂടുതൽ ചർച്ച ചെയ്യാതെ മാറ്റിവെക്കാൻ തീരുമാനിക്കുകയായിരുന്നു.
അതേസമയം, സംസ്ഥാനത്തെ പുതിയ മദ്യനയത്തിന്റെ കരട് പരിശോധിക്കുന്നതിനായി യുഡിഎഫ് തീരുമാനിച്ച ഉപസമിതിയുടെ രൂപീകരണവും ഇതുവരെ പൂർത്തിയായിട്ടില്ല. സമിതിയുടെ അധ്യക്ഷനെ നിശ്ചയിക്കേണ്ട ചുമതല കോൺഗ്രസിനാണ്. കരട് മദ്യനയത്തിലെ പ്രധാന നിർദേശങ്ങൾ വിശദമായി പരിശോധിച്ച് ആവശ്യമായ മാറ്റങ്ങൾ നിർദേശിക്കുകയായിരിക്കും ഉപസമിതിയുടെ ചുമതല. ഫോർ സ്റ്റാർ പദവിക്ക് മുകളിലുള്ള ഹോട്ടലുകൾക്ക് മാത്രമേ ബാർ ലൈസൻസ് അനുവദിക്കാവൂ എന്ന നിർദേശമാണ് കരട് മദ്യനയത്തിലുള്ളത്. ഈ വ്യവസ്ഥയുടെ പ്രായോഗികതയും ഉപസമിതി പരിശോധിക്കും. ഇതിനുപുറമെ, മദ്യപിച്ച് വാഹനമോടിച്ച് അപകടമുണ്ടാക്കുന്ന സംഭവങ്ങളിൽ ബാറുടമകൾക്കും ഉത്തരവാദിത്തം ചുമത്തണമെന്ന ശുപാർശയും സമിതിയുടെ പരിഗണനയിലുണ്ട്. ബാറുകളിൽനിന്ന് മദ്യം കഴിച്ചിറങ്ങുന്നവർ വാഹനാപകടങ്ങളിൽപ്പെടുന്ന സാഹചര്യത്തിൽ ബാർ ഉടമകൾക്ക് എന്തുതരത്തിലുള്ള ഉത്തരവാദിത്തം നൽകണമെന്നതടക്കമുള്ള കാര്യങ്ങൾ ചർച്ചയാകുമെന്നാണ് പ്രതീക്ഷിക്കുന്നത്.
The Legislative Assembly Subject Committee has temporarily deferred the previous government's proposal to amend rules allowing multiple liquor outlets in IT parks. The move followed a suggestion from the Excise Minister. With members, including those from the opposition, opposing the proposal, further proceedings on the rule amendment have been put on hold.