സ്വകാര്യതയുമായി ബന്ധപ്പെട്ട ആശങ്കകള്‍ വര്‍ധിച്ചതോടെ പ്രമുഖ ഐവെയര്‍ റീട്ടെയില്‍ ശൃംഖലയായ ഹാന്‍സ് ആണ്ടേഴ്‌സ് മെറ്റയുടെ റേ-ബാന്‍ സ്മാര്‍ട്ട് ഗ്ലാസുകളുടെ വില്‍പന നിര്‍ത്തിവെച്ചു. നെതര്‍ലന്‍ഡ്‌സിലും ബെല്‍ജിയത്തിലുമാണ് കമ്പനി വില്‍പന താല്‍ക്കാലികമായി നിര്‍ത്തിവെച്ചത്. സ്വകാര്യതാ ആശങ്കകളെത്തുടര്‍ന്ന് ഒരു മുന്‍നിര റീട്ടെയിലര്‍ ഇത്തരമൊരു നടപടി സ്വീകരിക്കുന്നത് പ്രധാന സംഭവങ്ങളിലൊന്നാണ്. സ്മാര്‍ട്ട് ഗ്ലാസുകളുടെ ഉപയോഗവും അതിന്മേലുള്ള നിയമപരമായ നിയന്ത്രണങ്ങളും സംബന്ധിച്ച് പൊതുസമൂഹത്തിലും രാഷ്ട്രീയ മണ്ഡലങ്ങളിലും ഉയരുന്ന ശക്തമായ സംവാദങ്ങളുടെ പശ്ചാത്തലത്തിലാണ് ഈ തീരുമാനമെന്ന് ഹാന്‍സ് ആണ്ടേഴ്‌സ് വക്താവ് വ്യക്തമാക്കി.
ആഗോളതലത്തില്‍ ഉയരുന്ന പ്രതിഷേധം
ക്യാമറ ഘടിപ്പിച്ച സ്മാര്‍ട്ട് ഗ്ലാസുകള്‍ വ്യക്തികളുടെ സ്വകാര്യതയിലേക്ക് കടന്നുകയറുന്നുവെന്ന ആരോപണം ശക്തമാണ്. രഹസ്യമായി ദൃശ്യങ്ങള്‍ ചിത്രീകരിക്കുന്നത് തടയാന്‍ ബ്രിട്ടനിലെ പ്രമുഖ പബ് ശൃംഖലയായ വെതര്‍സ്പൂണ്‍ തങ്ങളുടെ സ്ഥാപനങ്ങളില്‍ ഈ ഗ്ലാസുകളുടെ ഉപയോഗം നേരത്തെ നിയന്ത്രിച്ചിരുന്നു. കൂടാതെ, വ്യക്തികളുടെ അറിവോ സമ്മതമോ ഇല്ലാതെ പകര്‍ത്തിയ ദൃശ്യങ്ങള്‍ മെറ്റയുടെ പുറംകരാര്‍ ജീവനക്കാര്‍ പരിശോധിച്ചുവെന്ന് ആരോപിച്ച് യുഎസില്‍ മെറ്റയ്ക്കും എസിലര്‍ലക്‌സോട്ടിക്കയ്ക്കുമെതിരെ നിയമനടപടികളും നിലവിലുണ്ട്.
നിയമനടപടിയുമായി ഉപഭോക്തൃ സംഘടനകള്‍
വ്യക്തികളെ തിരിച്ചറിയാന്‍ സാധിക്കുന്ന തരത്തിലുള്ള ദൃശ്യങ്ങള്‍ അവരുടെ അനുമതിയില്ലാതെ പങ്കുവെക്കുന്നതും പ്രസിദ്ധീകരിക്കുന്നതും സ്വകാര്യതാ നിയമങ്ങളുടെ ലംഘനമാണെന്ന് നെതര്‍ലന്‍ഡ്‌സിലെ ഡാറ്റാ പ്രൊട്ടക്ഷന്‍ അതോറിറ്റി മുന്നറിയിപ്പ് നല്‍കിയിരുന്നു. പൊതുസ്ഥലങ്ങളില്‍ ഇത്തരം അനുമതി വാങ്ങുക എന്നത് പ്രായോഗികമല്ല എന്നതും വിഷയം സങ്കീര്‍ണ്ണമാക്കുന്നു.
സ്വകാര്യതാ നിയമങ്ങള്‍ക്ക് അനുസൃതമായി ഗ്ലാസുകളില്‍ ആവശ്യമായ മാറ്റങ്ങള്‍ വരുത്തിയില്ലെങ്കില്‍ മെറ്റയ്‌ക്കെതിരെ ശക്തമായ നിയമനടപടി സ്വീകരിക്കുമെന്ന് ഡച്ച് ഉപഭോക്തൃ അവകാശ സംഘടനയായ 'കണ്‍സ്യൂമന്റ്റന്‍ ബോണ്ട്' മുന്നറിയിപ്പ് നല്‍കിയിട്ടുണ്ട്. അതിനിടെ, രഹസ്യ ചിത്രീകരണം പൂര്‍ണ്ണമായും തടയാനുള്ള സാങ്കേതികവിദ്യ വികസിപ്പിക്കുന്നതുവരെ ഗ്ലാസുകള്‍ വിപണിയില്‍ നിന്ന് പിന്‍വലിക്കാന്‍ ഓണ്‍ലൈന്‍ അതിക്രമങ്ങള്‍ക്കെതിരെ പ്രവര്‍ത്തിക്കുന്ന 'ഓഫ്ലിമിറ്റ്സ്' എന്ന സംഘടനയും ആവശ്യപ്പെട്ടു.
മെറ്റയുടെ വിശദീകരണം
സ്വകാര്യതാ ലംഘനവുമായി ബന്ധപ്പെട്ട് ഉയര്‍ന്നുവരുന്ന ആരോപണങ്ങള്‍ മെറ്റ തള്ളി. ഉപഭോക്താക്കളുടെ സ്വകാര്യത സംരക്ഷിക്കാന്‍ ആവശ്യമായ മുന്‍കരുതലുകള്‍ ഗ്ലാസില്‍ ഉള്‍പ്പെടുത്തിയിട്ടുണ്ടെന്ന് മെറ്റാ വക്താവ് അവകാശപ്പെട്ടു. 'ഫോട്ടോയോ വീഡിയോയോ ചിത്രീകരിക്കുമ്പോള്‍ ഗ്ലാസിന്റെ മുന്‍വശത്തുള്ള ലൈറ്റ് മിന്നുന്ന രീതിയിലാണ് ഇത് രൂപകല്‍പ്പന ചെയ്തിരിക്കുന്നത്. ഇത് ഓഫ് ചെയ്യാന്‍ സാധിക്കില്ല. കൂടാതെ, ആരെങ്കിലും ഈ ലൈറ്റ് മറയ്ക്കാനോ തകരാറിലാക്കാനോ ശ്രമിച്ചാല്‍ ക്യാമറ പ്രവര്‍ത്തിക്കില്ല', മെറ്റ വ്യക്തമാക്കി.
പ്രൈവറ്റ് ഇക്വിറ്റി സ്ഥാപനമായ കെകെആറിന്റെ ഉടമസ്ഥതയിലുള്ള 'നെക്‌സ്‌ഐ'യുടെ ഉപകമ്പനിയാണ് ഹാന്‍സ് ആണ്ടേഴ്‌സ്. യൂറോപ്പിലുടനീളം 776-ലധികം സ്റ്റോറുകള്‍ പ്രവര്‍ത്തിപ്പിക്കുന്ന ഇവര്‍ ജര്‍മ്മനി, ഓസ്ട്രിയ, സ്വീഡന്‍ എന്നീ രാജ്യങ്ങളില്‍ നിലവില്‍ ഈ സ്മാര്‍ട്ട് ഗ്ലാസുകള്‍ വില്‍ക്കുന്നില്ല.
A major European eyewear retailer, Hans Anders, has temporarily stopped selling Meta’s Ray-Ban smart glasses in the Netherlands and Belgium amid growing privacy concerns. The decision comes as public and political debate intensifies over the use of camera-equipped smart glasses and the legal limits surrounding them. Privacy advocates have raised concerns that the glasses could enable people to be recorded without their knowledge or consent. In the UK, pub chain Wetherspoons has already restricted the use of such glasses at its venues. In the US, Meta and EssilorLuxottica are also facing legal action over allegations that footage recorded without people’s knowledge or consent was reviewed by outsourced workers.