അമേരിക്കന് സ്റ്റേറ്റ് സെക്രട്ടറി മാര്ക്കോ റൂബിയോയുടെ പുതിയ പ്രഖ്യാപനത്തോടെ, അന്താരാഷ്ട്ര ക്രിമിനല് കോടതിയും അമേരിക്കയും തമ്മിലുള്ള പോരാട്ടം പുതിയൊരു തലത്തിലേക്കു കടന്നിരിക്കുകയാണ്. അമേരിക്കന് പരമാധികാരത്തിനു ഭീഷണിയാണെന്ന് ആരോപിച്ച് കോടതിയെ ഇഷ്ടിക തിരിച്ച് പൊളിച്ചടുക്കുമെന്നാണ് അമേരിക്കയുടെ ഭീഷണി.
രണ്ടാം ലോകമഹായുദ്ധത്തിനുശേഷം ലോകം കെട്ടിപ്പടുത്ത നീതിന്യായ വ്യവസ്ഥയുടെ കടയ്ക്കല് കത്തിവെക്കുന്നതാണ് അമേരിക്കയുടെ ഈ നീക്കമെന്ന് മനുഷ്യാവകാശ പ്രവര്ത്തകരും നിയമവിദഗ്ധരും ചൂണ്ടിക്കാട്ടുന്നു. യുദ്ധക്കുറ്റങ്ങള്ക്കും മനുഷ്യത്വവിരുദ്ധമായ കുറ്റകൃത്യങ്ങള്ക്കുമെതിരെ ലോകമെമ്പാടുമുള്ള ഇരകള്ക്കു നീതി ഉറപ്പാക്കാനുള്ള ഒരേയൊരു സ്വതന്ത്ര സംവിധാനത്തെയാണ് സ്വന്തം താല്പര്യങ്ങള് സംരക്ഷിക്കാന് അമേരിക്ക ഇല്ലാതാക്കാന് ശ്രമിക്കുന്നത്.
അമേരിക്കന് സൈനികരെയും നേതാക്കളെയും വിദേശ ജഡ്ജിമാര്ക്കു മുന്നിലേക്കു വലിച്ചിഴക്കാന് ശ്രമിക്കുന്നുവെന്നതാണ് റൂബിയോ ഉന്നയിക്കുന്ന പ്രധാന ആരോപണം. അമേരിക്ക റോം സ്റ്റാച്യൂവില് ഒപ്പുവെച്ചിട്ടില്ലാത്തതിനാല് കോടതിക്കു തങ്ങളുടെ മേല് അധികാരമില്ലെന്ന് അമേരിക്ക വാദിക്കുന്നു. എന്നാല് ഇതേ അമേരിക്കയാണ് യുക്രെയ്നില് റഷ്യ നടത്തിയ യുദ്ധക്കുറ്റങ്ങളില് ഐസിസിയുടെ അന്വേഷണത്തെ സ്വാഗതം ചെയ്തത്.
സ്വന്തം സഖ്യകക്ഷിയായ ഇസ്രായേലിന്റെ നേതാക്കള്ക്കെതിരെയും അഫ്ഗാനിസ്ഥാനിലെ അമേരിക്കന് സൈനികരുടെ ഇടപെടലുകള്ക്കെതിരെയും അന്വേഷണം വരുമ്പോള് മാത്രം കോടതിയെ തള്ളിപ്പറയുന്ന അമേരിക്കന് ഇരട്ടത്താപ്പാണ് ഇവിടെ തുറന്നുകാട്ടപ്പെടുന്നത്. തങ്ങള്ക്കും തങ്ങളുടെ സുഹൃത്തുക്കള്ക്കും എന്ത് യുദ്ധക്കുറ്റങ്ങളും ചെയ്യാമെന്നും അതിനെ ചോദ്യം ചെയ്യാന് ആര്ക്കും അധികാരമില്ലെന്നുമുള്ള സന്ദേശമാണ് അമേരിക്ക ലോകത്തിനു നല്കുന്നത്.
കോടതിയെ തകര്ക്കുകയെന്ന ലക്ഷ്യത്തോടെ വളരെ ആസൂത്രിതമായ നീക്കങ്ങളാണ് ഡോണള്ഡ് ട്രംപിന്റെ നേതൃത്വത്തിലുള്ള ഭരണകൂടം നടത്തുന്നത്. ഐസിസി ചീഫ് പ്രോസിക്യൂട്ടര് കരിം ഖാന് ഉള്പ്പെടെയുള്ളവര്ക്കും ജഡ്ജിമാര്ക്കുമെതിരെ ട്രംപ് ഭരണകൂടം കര്ശനമായ ഉപരോധങ്ങള് ഏര്പ്പെടുത്തിയിരുന്നു. ഇതിന് പുറമെ വിസ റദ്ദാക്കല്, സാമ്പത്തിക ഇടപാടുകള് മരവിപ്പിക്കല് തുടങ്ങിയ നടപടികളിലൂടെ കോടതിയുടെ പ്രവര്ത്തനങ്ങളെ സാമ്പത്തികമായി തകര്ക്കാനാണ് അമേരിക്ക ശ്രമിക്കുന്നത്.
കോടതിയുമായി സഹകരിക്കുന്ന വിദേശ രാജ്യങ്ങള്ക്കെതിരെയും അമേരിക്ക സാമ്പത്തിക ഉപരോധവും മറ്റ് നിയമനടപടികളും പ്രഖ്യാപിച്ചിട്ടുണ്ട്. ഈ സാമ്പത്തിക വിലക്കുകള് കാരണം ഐസിസി ജഡ്ജിമാര്ക്കു സ്വന്തം ബാങ്ക് അക്കൗണ്ടുകള് പോലും ഉപയോഗിക്കാന് കഴിയാത്ത സാഹചര്യമാണുള്ളത്. ഇതിലൂടെ സാമ്പത്തികമായും നയതന്ത്രപരമായും കോടതിയെ പൂര്ണമായും ഒറ്റപ്പെടുത്തുകയെന്നതാണ് അമേരിക്കയുടെ ലക്ഷ്യം.
അമേരിക്കയുടെ ഈ നീക്കം കേവലം ഒരു കോടതിക്കെതിരായ ഭീഷണിയല്ല, മറിച്ച് ലോകമെമ്പാടുമുള്ള മനുഷ്യാവകാശ പോരാട്ടങ്ങള്ക്കേറ്റ വലിയൊരു തിരിച്ചടിയാണ്. ഗാസ മുതല് സുഡാന് വരെയുള്ള സംഘര്ഷഭരിതമായ പ്രദേശങ്ങളില് നീതിക്കായി കാത്തിരിക്കുന്ന ലക്ഷക്കണക്കിനു ജനങ്ങളുടെ അവസാന പ്രതീക്ഷയാണ് ഐസിസി. സാമ്പത്തിക ഉപരോധങ്ങള് ഭയന്ന് രാജ്യങ്ങളും വ്യക്തികളും കോടതിയുമായി സഹകരിക്കാന് തയ്യാറാകാത്ത സാഹചര്യം ഉണ്ടായാല്, അത് യുദ്ധക്കുറ്റവാളികള്ക്കു സ്വൈര്യ വിഹാരം നടത്താനുള്ള അവസരമൊരുക്കും. എല്ലാ രാജ്യങ്ങള്ക്കും ബാധകമായ അന്താരാഷ്ട്ര ക്രമത്തെ തന്നെ ഇത് തകിടംമറിക്കും.
ലോകത്തിലെ ഏറ്റവും വലിയ സാമ്പത്തിക-സൈനിക ശക്തി തന്നെ നീതിയുടെ കാവല്ക്കാരെ വേട്ടയാടാന് ഇറങ്ങിത്തിരിക്കുമ്പോള്, അതു നല്കുന്ന സന്ദേശം വളരെ അപകടകരമാണ്. അധികാരവും സമ്പത്തുമുണ്ടെങ്കില് ഏത് അന്താരാഷ്ട്ര നിയമങ്ങളെയും കാറ്റില് പറത്താമെന്നത് മനുഷ്യരാശിയുടെ ഭാവിക്കു തന്നെ വലിയ ഭീഷണിയാണു സൃഷ്ടിക്കുന്നത്. കോടതിയെ തകര്ക്കുക വഴി അമേരിക്ക തങ്ങളുടെ പരമാധികാരം സംരക്ഷിക്കുകയല്ല, മറിച്ച് യുദ്ധക്കുറ്റങ്ങള്ക്ക് ഇരകളാക്കപ്പെട്ട, ലോകമെമ്പാടുമുള്ള നിസ്സഹായരായ മനുഷ്യരെ ഇരുട്ടിലേക്കു തള്ളിവിടുകയാണു ചെയ്യുന്നത്.
With US Secretary of State Marco Rubio’s recent declaration, the conflict between the United States and the International Criminal Court (ICC) has escalated to a new level. Labeling the court a threat to American sovereignty, the US has threatened to dismantle it "brick by brick." Human rights activists and legal experts warn that this move undermines the very foundation of the global justice system established after World War II. They argue that in its effort to protect its own interests, the US is attempting to destroy the only independent mechanism dedicated to securing justice for victims of war crimes and crimes against humanity worldwide.