പ്രീമിയം അഡ്വഞ്ചർ മോട്ടോർസൈക്കിൾ വിപണിയില്‍ കൂടുതൽ സാങ്കേതിക മികവോടെ പുതിയ ടൈഗർ 1200 അവതരിപ്പിച്ച് ട്രയംഫ് മോട്ടോർസൈക്കിൾസ്. എൻജിൻ പ്രകടനം മെച്ചപ്പെടുത്തുന്നതിനൊപ്പം സസ്‌പെൻഷൻ, റൈഡിങ് സൗകര്യങ്ങൾ, സുരക്ഷാ സംവിധാനങ്ങൾ എന്നിവയിലും നിർണായക പരിഷ്‌കാരങ്ങളാണ് പുതിയ മോഡലിൽ വരുത്തിയിരിക്കുന്നത്. കുറഞ്ഞ വേഗതയിൽ മികച്ച കണ്‍ട്രോള്‍, ദീർഘദൂര യാത്രകളില്‍ കൂടുതൽ കംഫര്‍ട്ട്, റഡാർ അധിഷ്ഠിത റൈഡർ അസിസ്റ്റൻസ് സംവിധാനങ്ങൾ എന്നിവയാണ് പുതിയ ടൈഗർ 1200നെ ശ്രദ്ധേയമാക്കുന്നത്. എന്നാൽ ഇന്ത്യയിലെ വിപണിയിലെത്തുന്ന തീയതിയും വിലയും കമ്പനി ഇതുവരെ വെളിപ്പെടുത്തിയിട്ടില്ല.
പുതിയ ടൈഗർ 1200ന് കരുത്തേകുന്നത് 1,200 സിസി ടി-പ്ലെയിൻ ട്രിപ്പിൾ എൻജിനാണ്. പരമാവധി 158 പിഎസ് കരുത്ത് നൽകുന്ന ഈ എൻജിൻ മുൻ പതിപ്പിനെക്കാൾ 8 പിഎസ് അധിക പവർ ഉൽപ്പാദിപ്പിക്കും. പുതിയ പിസ്റ്റണുകൾ, പുതുക്കിയ സിലിണ്ടർ ഹെഡ്, ഭാരം കുറഞ്ഞ വാൽവുകൾ, പരിഷ്‌കരിച്ച ഫ്യൂവൽ ഇഞ്ചക്ഷൻ സംവിധാനം എന്നിവയാണ് എൻജിനിലെ പ്രധാന മാറ്റങ്ങൾ.
ഗിയർബോക്‌സിലും ഷാഫ്റ്റ് ഡ്രൈവിലും വരുത്തിയ പരിഷ്‌കാരങ്ങൾക്കൊപ്പം പുതിയ ഗിയർ അനുപാതങ്ങളും എൻജിൻ ട്യൂണിങ്ങും കുറഞ്ഞ വേഗതയിലുള്ള യാത്ര കൂടുതൽ സുഗമമാക്കും. ബൈക്കിന്റെ ക്രാൾ വേഗത മണിക്കൂറിൽ ആറ് കിലോമീറ്റർ വരെ കുറയ്ക്കാൻ കഴിഞ്ഞതായും കമ്പനി വ്യക്തമാക്കുന്നു. നഗരങ്ങളിലെ തിരക്കേറിയ ഗതാഗത സാഹചര്യങ്ങളിലും മന്ദഗതിയിലുള്ള യാത്രകളിലും ഇത് റൈഡർമാർക്ക് കൂടുതൽ നിയന്ത്രണം നൽകും.
റൈഡർമാർക്ക് ബൈക്ക് കൈകാര്യം ചെയ്യുന്നത് എളുപ്പമാക്കുന്നതിനായി ഷോവയുടെ ഈറ ഹൈറ്റ്‌ഫ്ലെക്സ് സെമി ആക്ടീവ് സസ്‌പെൻഷനാണ് പുതിയ ടൈഗർ 1200ൽ ഉൾപ്പെടുത്തിയിരിക്കുന്നത്. ഫേം, മീഡിയം, സോഫ്റ്റ് എന്നീ മൂന്ന് ഡാംപിങ് ക്രമീകരണങ്ങൾ ഇതിലുണ്ട്.
ബൈക്ക് നിർത്തുമ്പോൾ സീറ്റ് ഉയരം സ്വയമേവ 30 എംഎം വരെ താഴ്ത്താൻ ഈ സംവിധാനം സഹായിക്കും. കാലുകൾ നിലത്ത് ഉറപ്പിച്ച് നിർത്താൻ കൂടുതൽ സൗകര്യം ലഭിക്കുന്നതിനാൽ വ്യത്യസ്ത ഉയരമുള്ള റൈഡർമാർക്കും ബൈക്ക് കൈകാര്യം ചെയ്യുന്നത് എളുപ്പമാകും. രണ്ട് നിലകളിൽ ക്രമീകരിക്കാവുന്ന സീറ്റിനൊപ്പം താഴ്ന്ന സീറ്റ് ഓപ്ഷനും ലഭ്യമാണ്. സെന്റർ സ്റ്റാൻഡിൽ ബൈക്ക് ഉയർത്തിവയ്ക്കുന്നതിനുള്ള അസിസ്റ്റ് സംവിധാനവും പുതിയ പതിപ്പിൽ ഉൾപ്പെടുത്തിയിട്ടുണ്ട്.
സാങ്കേതിക സൗകര്യങ്ങളുടെ കാര്യത്തിലും പുതിയ ടൈഗർ 1200 മുന്നേറ്റം നടത്തിയിട്ടുണ്ട്. ബോഷ് വികസിപ്പിച്ച ഏഴ് ഇഞ്ച് എച്ച്ഡി ടച്ച്‌സ്‌ക്രീനാണ് പ്രധാന ആകർഷണം. വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ പിന്തുണയുള്ളതിനാൽ നാവിഗേഷൻ, സംഗീതം, സന്ദേശങ്ങൾ തുടങ്ങിയവ യാത്രയ്ക്കിടെ എളുപ്പത്തിൽ ഉപയോഗിക്കാനാകും.
ഫോൺ ചാർജ് ചെയ്യുന്നതിനായി യുഎസ്ബി-സി പോർട്ടും ഉപകരണം സൂക്ഷിക്കാൻ പ്രത്യേക കമ്പാർട്ട്‌മെന്റും നൽകിയിട്ടുണ്ട്. ഫോൺ അമിതമായി ചൂടാകുന്നത് നിയന്ത്രിക്കാൻ സഹായിക്കുന്ന സംവിധാനവും ഇതിന്റെ ഭാഗമാണ്. ദീർഘദൂര യാത്രകളിൽ ഡിജിറ്റൽ ഉപകരണങ്ങൾ കൂടുതൽ സൗകര്യപ്രദമായി ഉപയോഗിക്കുകയാണ് ഈ സംവിധാനങ്ങളുടെ ലക്ഷ്യം.
സുരക്ഷാ സാങ്കേതികവിദ്യകളിൽ ബോഷുമായി സഹകരിച്ച് വികസിപ്പിച്ച മുൻ, പിൻ റഡാർ സംവിധാനങ്ങളാണ് പ്രധാന മാറ്റങ്ങളിലൊന്ന്. അഡാപ്റ്റീവ് ക്രൂയിസ് കൺട്രോൾ, മുന്നിലെ കൂട്ടിയിടി മുന്നറിയിപ്പ്, എമർജൻസി ബ്രേക്കിങ് അസിസ്റ്റ്, ബ്ലൈൻഡ് സ്‌പോട്ട് അസിസ്റ്റ്, പിന്നിൽനിന്നുള്ള വാഹനങ്ങളുടെ ദൂരം അറിയിക്കുന്ന സംവിധാനം, ഗ്രൂപ്പ് റൈഡ് അസിസ്റ്റ് എന്നിവ പുതിയ മോഡലിൽ ഉൾപ്പെടുത്തിയിട്ടുണ്ട്.
ഇതിന് പുറമെ അഡാപ്റ്റീവ് എൽഇഡി കോർണറിങ് ഹെഡ്‌ലൈറ്റുകളും ലഭ്യമാണ്. വളവുകളിലെ കാഴ്ച മെച്ചപ്പെടുത്താനും യാത്ര കൂടുതൽ സുരക്ഷിതമാക്കാനും ഈ സംവിധാനം സഹായിക്കും. റോഡ്, റെയിൻ, ഇക്കോ, സ്‌പോർട്, ഓഫ്-റോഡ് തുടങ്ങിയവ ഉൾപ്പെടെ എട്ട് റൈഡിങ് മോഡുകളാണ് ബൈക്കിലുള്ളത്. കൂടുതൽ ഓഫ്-റോഡ് ശേഷി ലക്ഷ്യമിടുന്ന റാലി എക്സ്പ്ലോറർ പതിപ്പിൽ ഓഫ്-റോഡ് പ്രോ മോഡും ലഭിക്കും.
പുതിയ ടൈഗർ 1200 ശ്രേണിയിലെ ജിടി പ്രോ, റാലി എക്സ്പ്ലോറർ പതിപ്പുകൾക്ക് വ്യത്യസ്ത യാത്രാ സാഹചര്യങ്ങൾ പരിഗണിച്ചുള്ള സവിശേഷതകളാണുള്ളത്. രണ്ട് പതിപ്പുകളിലും 19 ഇഞ്ച് മുൻ വീലും 17 ഇഞ്ച് പിൻ വീലുമാണുള്ളത്. സസ്‌പെൻഷൻ ട്രാവൽ 200 എംഎമ്മാണ്. ബ്രെംബോ സ്റ്റൈൽമ ബ്രേക്കുകളും രണ്ട് പതിപ്പുകളിലും സ്റ്റാൻഡേർഡായി നൽകിയിട്ടുണ്ട്.
ജിടി പ്രോയിൽ റോഡ് യാത്രകൾക്ക് അനുയോജ്യമായ കാസ്റ്റ് അലോയ് വീലുകളാണ് ഉപയോഗിക്കുന്നത്. ഓഫ്-റോഡ് യാത്രകൾക്ക് കൂടുതൽ പ്രായോഗികമായ സ്പോക്ക് വീലുകളാണ് റാലി എക്സ്പ്ലോററിന്റെ പ്രത്യേകത.
ഇന്ധന ടാങ്കിന്റെ ശേഷിയിലും വ്യത്യാസമുണ്ട്. ജിടി പ്രോയിൽ 20 ലിറ്റർ ടാങ്ക് ലഭിക്കുമ്പോൾ റാലി എക്സ്പ്ലോററിൽ 30 ലിറ്റർ ശേഷിയുള്ള ടാങ്കാണുള്ളത്. ദീർഘദൂര യാത്രകളിൽ കൂടുതൽ സുഖം ഉറപ്പാക്കുന്നതിനായി സീറ്റിന്റെ ഫോം കനം 10 എംഎം വർധിപ്പിച്ചിട്ടുണ്ട്. ചൂടാക്കാവുന്ന സീറ്റുകളും മൂന്ന് ഘട്ടങ്ങളിൽ ക്രമീകരിക്കാവുന്ന ഹീറ്റഡ് ഗ്രിപ്പുകളും എല്ലാ പതിപ്പുകളിലും ലഭ്യമാണ്.
കൂടുതൽ കരുത്ത്, മെച്ചപ്പെട്ട ലോ-സ്പീഡ് നിയന്ത്രണം, ഉയർന്ന സാങ്കേതിക നിലവാരം, റഡാർ അധിഷ്ഠിത സുരക്ഷാ സംവിധാനങ്ങൾ എന്നിവയിലൂടെ പ്രീമിയം അഡ്വഞ്ചർ മോട്ടോർസൈക്കിൾ വിഭാഗത്തിൽ തങ്ങളുടെ സ്ഥാനം ശക്തിപ്പെടുത്താനാണ് ട്രയംഫ് ലക്ഷ്യമിടുന്നത്. ഇന്ത്യയിലെ ലോഞ്ച് തീയതിയും വിലയും പ്രഖ്യാപിക്കുന്നതോടെ പുതിയ ടൈഗർ 1200ന്റെ വിപണിയിലെ മത്സരശേഷി സംബന്ധിച്ച കൂടുതൽ വ്യക്തത ലഭിക്കും.
The new Triumph Tiger 1200 stands out in the premium adventure motorcycle segment with its 158 PS engine, radar-based safety systems, advanced technology, improved suspension, and enhanced low-speed control.