ബോളിവുഡ് താരം അജയ് ദേവ്ഗണിന്റെ മുംബൈയിലെ ജുഹു ബംഗ്ലാവിൽ അനധികൃത നിർമാണമെന്നാരോപിച്ച് ബിഎംസിയുടെ ഭാഗിക പൊളിക്കൽ നടപടി. കെട്ടിടത്തിലെ മാറ്റങ്ങൾക്ക് ആവശ്യമായ അനുമതി രേഖകൾ ഹാജരാക്കാനായില്ലെന്നും നിർമാണം നിർത്തിവയ്ക്കാനുള്ള നിർദേശം പാലിച്ചില്ലെന്നും അധികൃതർ പറഞ്ഞു.
ജുഹുവിലെ കപോൾ കോ-ഓപ്പറേറ്റീവ് ഹൗസിങ് സൊസൈറ്റിയിലുള്ള 7,802 ചതുരശ്രയടി വിസ്തീർണമുള്ള ബംഗ്ലാവ് അജയ് ദേവ്ഗണിന്റെയും മാതാവ് വീണ ദേവ്ഗണിന്റെയും ഉടമസ്ഥതയിലുള്ളതാണ്. അനുമതിയില്ലാതെ കെട്ടിടത്തിൽ മാറ്റങ്ങൾ നടത്തിയെന്നായിരുന്നു ബിഎംസിയുടെ ആരോപണം. സെപ്റ്റംബർ 10-നാണ് നിർമാണം നിർത്തിവയ്ക്കാൻ കെ വെസ്റ്റ് വാർഡ് ഓഫീസ് നോട്ടീസ് നൽകിയത്. മുനിസിപ്പൽ കോർപ്പറേഷൻ നിയമത്തിലെ 354 എ വകുപ്പ് പ്രകാരം, 24 മണിക്കൂറിനുള്ളിൽ ആവശ്യമായ അനുമതി രേഖകൾ ഹാജരാക്കാനും നിർദേശിച്ചിട്ടുണ്ട്. നിർദേശം പാലിച്ചില്ലെങ്കിൽ അനധികൃതമായി നിർമിച്ച ഭാഗങ്ങൾ നീക്കം ചെയ്യേണ്ടിവരുമെന്നും ബിഎംസി മുന്നറിയിപ്പ് നൽകി.
നോട്ടീസിന് മറുപടിയായി സെപ്റ്റംബർ 15-ന് തന്നെ ഉടമസ്ഥർ വിശദീകരണം നൽകിയെങ്കിലും നിർമാണത്തിന് നിയമപരമായ അനുമതിയുണ്ടെന്ന് തെളിയിക്കുന്ന രേഖകൾ ഹാജരാക്കിയില്ലെന്നാണ് ബിഎംസിയുടെ വാദം. ഒക്ടോബർ ആറിന് ഉടമകളുടെ വിശദീകരണം തള്ളിയ അധികൃതർ, നിർമാണം അനധികൃതമാണെന്ന് വിലയിരുത്തി ബന്ധപ്പെട്ട ഭാഗങ്ങൾ പൊളിച്ചുനീക്കാനുള്ള നടപടികളിലേക്ക് കടക്കുകയായിരുന്നു.
ബംഗ്ലാവ് സലൂണിന്റെയും സ്പായുടെയും പ്രവർത്തനങ്ങൾക്കായി ഉപയോഗിക്കാനുള്ള പദ്ധതിയാണ് വിവാദത്തിന് കൂടുതൽ ശ്രദ്ധ നേടിക്കൊടുത്തത്. വാണിജ്യ ഉപയോഗം, പാർക്കിങ് സൗകര്യം, സുരക്ഷ, താമസമേഖലയിലെ തിരക്ക് എന്നിവയിൽ ഹൗസിങ് സൊസൈറ്റി ആശങ്കകൾ ഉന്നയിച്ചതായും റിപ്പോർട്ടുകളുണ്ട്. എന്നാൽ വസ്തു വാടകയ്ക്ക് നൽകാനുള്ള അനുമതിയും കെട്ടിടത്തിൽ ഘടനാപരമായ മാറ്റങ്ങൾ വരുത്താനുള്ള അനുമതിയും വ്യത്യസ്ത വിഷയങ്ങളാണ്. അനുമതിയില്ലാത്ത നിർമാണം സംബന്ധിച്ച ബിഎംസിയുടെ നടപടിയാണ് ഇപ്പോൾ ബംഗ്ലാവിന്റെ ഭാഗിക പൊളിച്ചുനീക്കലിലേക്ക് നയിച്ചിരിക്കുന്നത്.
ഏതായാലും, ഒക്ടോബർ 12-ന് ബംഗ്ലാവിന്റെ ചില ഭാഗങ്ങൾ ബിഎംസി പൊളിച്ചുനീക്കിയതായാണ് റിപ്പോർട്ടുകൾ. ആവശ്യമായ അനുമതികളില്ലാതെ നടത്തിയ നിർമാണപ്രവർത്തനങ്ങൾക്കെതിരായ നടപടിയുടെ ഭാഗമായിരുന്നു ഇത്. കെട്ടിടത്തിലെ അനധികൃത നിർമാണവുമായി ബന്ധപ്പെട്ടതാണ് നടപടിയെന്നും അജയ് ദേവ്ഗണിന്റെ സിനിമാ പ്രവർത്തനങ്ങളെ ബാധിക്കുന്നതല്ലെന്നുമാണ് നിലവിലെ റിപ്പോർട്ടുകൾ വ്യക്തമാക്കുന്നത്.
The Brihanmumbai Municipal Corporation (BMC) has taken partial demolition action at Bollywood actor Ajay Devgn’s Juhu bungalow over alleged unauthorised construction. Officials cited the failure to produce required approval documents and comply with a stop-work notice. The property’s proposed commercial use as a salon and spa has also drawn attention.