പ്രശസ്ത ബോളിവുഡ് സംവിധായകനും നടനുമായ അനുരാഗ കശ്യപ് നായകനാകുന്ന കന്നഡ ചിത്രം '8' ലോകമെമ്പാടും 16 ഭാഷകളിൽ റിലീസ് ചെയ്യാനൊരുങ്ങുന്നു. എ വിആർ എന്റർടൈൻമെന്റ്സിന്റെ ബാനറിൽ അരവിന്ദ് വെങ്കിടേഷ് റെഡ്ഡി നിർമിക്കുന്ന ഈ ചിത്രം സംവിധാനം ചെയ്യുന്നത് സുജയ് ശാസ്ത്രിയാണ്. അനുരാഗ് കശ്യപ് ആദ്യമായി അഭിനയിക്കുന്ന കന്നഡ ചിത്രം കൂടിയാണിത്. ചിത്രത്തിന്റെ ഷൂട്ടിങ് ഇതിനോടകം പൂർത്തിയാവുകയും നിലവിൽ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയും ചെയ്യുന്നു.
സെപ്റ്റംബറിൽ ചിത്രം തിയറ്ററുകളിൽ എത്തിക്കാനാണ് അണിയറപ്രവർത്തകർ ലക്ഷ്യമിടുന്നത്. യഷിന്റെ പുതിയ ചിത്രമായ 'ടോക്സിക്' തിയറ്ററുകളിൽ എത്തിയതിന് ശേഷമാകും '8' പ്രേക്ഷകർക്ക് മുന്നിലെത്തുക. കന്നഡ, ഹിന്ദി, തമിഴ്, തെലുങ്ക്, മലയാളം, ഇംഗ്ലീഷ് എന്നീ ഭാഷകളിലെ റിലീസ് നിർമ്മാതാക്കൾ ഇതിനോടകം സ്ഥിരീകരിച്ചിട്ടുണ്ട്. ബാക്കിയുള്ള ഭാഷകളുടെ വിവരങ്ങൾ വരും ആഴ്ചകളിൽ ഔദ്യോഗികമായി പ്രഖ്യാപിക്കുമെന്നാണ് പ്രതീക്ഷിക്കുന്നത്.
സിനിമയുടെ ഇതിവൃത്തത്തെക്കുറിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ലെങ്കിലും, രണ്ടാമതൊരു അവസരം എങ്ങനെ ഒരു വ്യക്തിയുടെ ജീവിതത്തിന്റെ ഗതി മാറ്റുന്നു എന്ന ആശയത്തെ മുൻനിർത്തിയാണ് ഈ ചിത്രം ഒരുക്കിയിരിക്കുന്നതെന്ന് സംവിധായകൻ സുജയ് ശാസ്ത്രി സൂചിപ്പിക്കുന്നു. ജീവിതത്തിലെ ഒരു ചെറിയ അവസരം പോലും എങ്ങനെ വലിയ മാറ്റങ്ങൾ കൊണ്ടുവരുമെന്ന് ഈ ചിത്രം ചർച്ച ചെയ്യുന്നു.
നേരത്തെ പുറത്തിറങ്ങിയ ചിത്രത്തിന്റെ ഗ്ലിംപ്സ് വീഡിയോയിൽ വളരെ വ്യത്യസ്തവും ഗൗരവമേറിയതുമായ ഒരു ഗെറ്റപ്പിലാണ് അനുരാഗ് കശ്യപിനെ അവതരിപ്പിച്ചിരിക്കുന്നത്. മികച്ച സാങ്കേതിക പ്രവർത്തകരാണ് ചിത്രത്തിന് പിന്നിൽ അണിനിരക്കുന്നത്.
ഗുരുപ്രസാദ് നാർനാട് ഛായാഗ്രഹണവും പ്രതീക് ഷെട്ടി എഡിറ്റിങും നിർവ്വഹിക്കുന്നു. തെന്നിന്ത്യൻ സിനിമകളിൽ ഇതിനോടകം നിരവധി ശ്രദ്ധേയമായ വേഷങ്ങൾ ചെയ്ത അനുരാഗ് കശ്യപിന്റെ കന്നഡയിലേക്കുള്ള ചുവടുവെപ്പ് പ്രേക്ഷകർ ഏറെ പ്രതീക്ഷയോടെയാണ് കാത്തിരിക്കുന്നത്. എവിആർ എന്റർടൈൻമെന്റ്സിന്റെ ഭാഗത്ത് നിന്നും റിലീസ് തിയതി ഉൾപ്പെടെയുള്ള പുതിയ പ്രഖ്യാപനങ്ങൾക്കായി കാത്തിരിക്കുകയാണ് സിനിമാലോകം.
Bollywood director and actor Anurag Kashyap is set to make his Kannada acting debut in the upcoming film '8'. Produced by Aravind Venkatesh Reddy under the AVR Entertainment banner and directed by Sujay Shastry, the film is gearing up for a massive global release across 16 different languages. The makers have already confirmed the release in Kannada, Hindi, Tamil, Telugu, Malayalam, and English, with the remaining languages to be officially announced in the coming weeks. The shooting for the film is completely wrapped up, and post-production work is currently underway.