'കറുപ്പിൽ ഡബ്ബ് ചെയ്‌തത്‌ തുറന്നു പറയാൻ പേടിയായിരുന്നു'; വിവാദത്തിന് തിരികൊളുത്തി വീണ്ടും ചിന്മയി

ആർ.ജെ. ബാലാജി സംവിധാനം ചെയ്ത് സൂര്യ നായകനായ ചിത്രം ‘കറുപ്പ്’ തിയേറ്ററുകളിൽ പ്രദർശനം തുടരുന്നതിനിടെ, ചിത്രവുമായി ബന്ധപ്പെട്ട ഡബ്ബിങ് അനുഭവത്തെക്കുറിച്ച് ഗായികയും ഡബ്ബിങ് ആർട്ടിസ്റ്റുമായ ചിന്മയി ശ്രീപദ നടത്തിയ വെളിപ്പെടുത്തൽ വീണ്ടും സിനിമാ മേഖലയിൽ വലിയ ചർച്ചകൾക്ക് വഴി തുറന്നിരിക്കുകയാണ്. ചിത്രത്തിൽ നായികയായ തൃഷയ്ക്ക് ശബ്ദം നൽകിയിരിക്കുന്നത് താനാണെന്നും, എന്നാൽ അത് തുറന്നു പറയാൻ പോലും തനിക്ക് ഭയം ഉണ്ടായിരുന്നുവെന്നും ചിന്മയി വ്യക്തമാക്കുകയായിരുന്നു.

‘കറുപ്പ്’ സിനിമയിലെ ഡബ്ബിങ് പ്രവർത്തനത്തിൽ പങ്കെടുത്തത് വലിയ മാനസിക സമ്മർദ്ദത്തിനിടയിലായിരുന്നുവെന്നാണ് ചിന്മയിയുടെ കുറിപ്പ് . ആർ.ജെ. ബാലാജിയെയും അദ്ദേഹത്തിന്റെ ഭാര്യയെയും ദീർഘകാലമായി പരിചയമുള്ളതിനാൽ, തന്റെ അനുഭവങ്ങളും മുൻകാല സംഭവങ്ങളും വീണ്ടും സിനിമാ മേഖലയിലേക്കുള്ള പ്രതികൂല പ്രതികരണങ്ങൾക്ക് വഴിവെക്കുമോ എന്ന ആശങ്ക തനിക്കുണ്ടായിരുന്നുവെന്നും ചിന്മയി പറഞ്ഞു. “കറുപ്പിന് ഡബ്ബ് ചെയ്‌തത്‌ ഞാനാണ് എന്ന് പറയാൻ എനിക്ക് ശരിക്കും പേടിയായിരുന്നു” എന്നാണ് ചിന്മയി എക്‌സിൽ കുറിച്ചത്.

അതേസമയം, ഈ വിഷയത്തിന്റെ പശ്ചാത്തലം സിനിമാ മേഖലയിലെ ദീർഘകാല വിവാദങ്ങളിലേക്കാണ് എത്തുന്നത്. 2018-ലെ മീറ്റൂ പ്രസ്ഥാനത്തിന്റെ സമയത്ത്, ചിന്മയി സിനിമാ മേഖലയിലെ ലൈംഗിക ചൂഷണങ്ങളെക്കുറിച്ച് തുറന്നുപറഞ്ഞിരുന്നു. പ്രശസ്ത ഗാനരചയിതാവ് വൈരമുത്തിനെതിരെ ചിന്മയി ഉന്നയിച്ച ആരോപണങ്ങൾ വലിയ ദേശീയ ശ്രദ്ധ നേടിയിരുന്നു. ഈ വെളിപ്പെടുത്തലുകൾക്ക് പിന്നാലെ സിനിമാ മേഖലയിൽ ശക്തമായ പ്രതികരണങ്ങളും വിവാദങ്ങളും ഉണ്ടായി.

ഇതിന് പിന്നാലെയാണ് തമിഴ് ഡബ്ബിങ് യൂണിയനിൽ നിന്ന് ചിന്മയിയെ പുറത്താക്കിയതെന്ന റിപ്പോർട്ടുകൾ പുറത്തുവന്നത്. യൂണിയൻ പ്രസിഡന്റ് രാധാ രവിക്കെതിരെ ഉൾപ്പെടെ ചിന്മയി ആരോപണങ്ങൾ ഉന്നയിച്ചതും, സംഘടനാ നേതൃത്വത്തോട് തുറന്ന നിലപാട് സ്വീകരിച്ചതും ഈ നടപടിക്ക് കാരണമായതെന്നാണ് സിനിമാ വൃത്തങ്ങളിൽ നിന്നുള്ള വിശദീകരണം. ഇതോടെ ഡബ്ബിങ് മേഖലയിൽ ചിന്മയിക്ക് ദീർഘകാലം വിലക്കുകൾ നേരിടേണ്ടി വന്നുവെന്നാണ് റിപ്പോർട്ടുകൾ സൂചിപ്പിക്കുന്നത്.

സിനിമാ മേഖലയിലെ യൂണിയൻ നിയന്ത്രണങ്ങളും ഇതോടൊപ്പം പ്രധാന വിഷയമായി മാറി. തമിഴ് സിനിമാ മേഖലയിലെ ഡബ്ബിങ് ജോലികൾക്ക് യൂണിയൻ അംഗീകാരം നിർബന്ധമായതിനാൽ, അംഗീകാരം ഇല്ലാതെ പ്രവർത്തിക്കുന്നതിനെതിരെ ശക്തമായ നിയന്ത്രണങ്ങൾ നിലനിന്നിരുന്നു. ഈ സാഹചര്യത്തിൽ ചിന്മയിക്ക് ഔദ്യോഗിക ഡബ്ബിങ് അവസരങ്ങൾ കുറഞ്ഞതായും വിലക്കുകൾ തുടരുകയായിരുന്നുവെന്നും പറയപ്പെടുന്നു.

ഇതിനിടയിലാണ് പിന്നീട് ചില സിനിമകളിൽ ചിന്മയിക്ക് വീണ്ടും അവസരം ലഭിച്ചത് വലിയ വിവാദങ്ങൾക്ക് കാരണമായത്. സംവിധായകൻ ലോകേഷ് കനകരാജ് നിർമാതാവ് ലളിത് കുമാർ എന്നിവരുടെ സഹകരണത്തോടെ വിജയ് നായകനായ ‘ലിയോ’ ചിത്രത്തിൽ തൃഷയ്ക്ക് ശബ്ദം നൽകാൻ ചിന്മയിയെ ഉൾപ്പെടുത്തിയ സംഭവം വലിയ ചർച്ചയായി. യൂണിയൻ വിലക്കുകൾ നിലനിൽക്കുന്നതിനിടയിൽ നടന്ന ഈ സഹകരണത്തിനെതിരെ സൗത്ത് ഇന്ത്യൻ സിനി-ടെലിവിഷൻ ആർട്ടിസ്റ്റ്സ് ആൻഡ് ഡബ്ബിങ് ആർട്ടിസ്റ്റ്സ് യൂണിയൻ (SICTAA) ശക്തമായി പ്രതികരിച്ചിരുന്നു. ലോകേഷ് കനകരാജിനെതിരേ ഉൾപ്പെടെ സംഘടന നിലപാട് എടുത്തതായും, ഈ വിഷയത്തിൽ സാമ്പത്തിക പിഴ അടക്കമുള്ള നടപടികൾ ആവശ്യപ്പെട്ടതായും റിപ്പോർട്ടുകളുണ്ട്.

ഇതോടെ വിഷയം വ്യക്തിപരമായ വിവാദത്തിൽ നിന്ന് സിനിമാ മേഖലയിലെ സംഘടനാ അധികാരവും തൊഴിൽ നിയന്ത്രണവും സംബന്ധിച്ച വലിയ ചർച്ചയായി മാറി. ഒരു ഭാഗത്ത് ചിന്മയിക്ക് പിന്തുണ ലഭിച്ചപ്പോൾ, മറുഭാഗത്ത് യൂണിയൻ നിയമങ്ങൾ പാലിക്കണമെന്ന് ആവശ്യപ്പെടുന്ന നിലപാടുകളും ശക്തമായി നിലനിന്നു.

ഇതിനിടയിൽ ചിന്മയി എക്‌സിൽ പങ്കുവെച്ച പുതിയ പ്രതികരണം വീണ്ടും ശ്രദ്ധ നേടുകയാണ്. “ഭയമില്ലാതെ, നാളെ എന്ത് സംഭവിക്കുമെന്ന് പേടിക്കാതെ സ്വന്തം നാട്ടിൽ ജോലി ചെയ്യാൻ കഴിയണം” എന്നതാണ് അവരുടെ പ്രധാന ആവശ്യം. വർഷങ്ങളായി തുടരുന്ന വിലക്കുകളും വിവാദങ്ങളും അവസാനിക്കണമെന്നും, തൊഴിൽ രംഗത്ത് സ്വാതന്ത്ര്യം ലഭിക്കണമെന്നുമുള്ള പ്രതീക്ഷയും ചിന്മയി പങ്കുവെച്ചു.

English Summary: Singer and dubbing artist Chinmayi Sripada’s comments about dubbing for Karuppu have reignited discussions around the MeToo movement, union restrictions, and freedom to work in the Tamil film industry.