ഫോർട്ട് കൊച്ചിയിലെ മുസ്‌ലിം ജനസംഖ്യ ചൂണ്ടിക്കാട്ടി കേരളം അപകടത്തിലാണെന്നും കേന്ദ്രം ഇടപെടണമെന്നും വാദിച്ച യൂട്യൂബർ അമൃത് സിങ് ഡാരന്റെ സോഷ്യൽ മീഡിയ പോസ്റ്റുകളിലെ ദിയ കൃഷ്ണയുടെ ഇടപെടലുകൾ വീണ്ടും ചർച്ചയാകുന്നു. കൊച്ചിയിലെ കഫേ വിവാദത്തിന് പിന്നാലെ, ഇയാളുടെ മറ്റ് പോസ്റ്റുകൾക്കും ദിയ ലൈക്ക് നൽകിയിട്ടുണ്ടെന്നും ചിലതിൽ കമന്റുകൾ രേഖപ്പെടുത്തിയിട്ടുണ്ടെന്നുമാണ് ഉയരുന്ന വിമർശനം.
ബിഗ് ബോസ് പരിപാടി ‘ലവ് ജിഹാദ്’ പ്രോത്സാഹിപ്പിക്കുന്നുവെന്ന് ആരോപിച്ച് ഷോ നിർത്തണമെന്ന് ആവശ്യപ്പെടുന്ന പോസ്റ്റും അമൃത് സിങ്ങിന്റെ ഇൻസ്റ്റഗ്രാം പേജിലുണ്ട്. നിരവധി മുസ്‌ലിം യുവാക്കൾ പരിപാടിയിൽ പങ്കെടുക്കുന്നതിനെ വിമർശിക്കുന്ന ഈ പോസ്റ്റിനും ദിയ ലൈക്ക് നൽകിയിട്ടുണ്ടെന്നാണ് ചൂണ്ടിക്കാണിക്കപ്പെടുന്നത്. ‘ലവ് ജിഹാദ്’ പരാമർശങ്ങളുള്ള മറ്റ് പോസ്റ്റുകളിലും ദിയയുടെ ലൈക്കുകളുണ്ടെന്നാണ് സോഷ്യൽ മീഡിയയിലെ വിമർശനം.
രാഹുൽ ഗാന്ധിയെ ലക്ഷ്യമിട്ടുള്ള മറ്റൊരു പോസ്റ്റും വിവാദത്തിന് ആക്കം കൂട്ടിയിട്ടുണ്ട്. ‘രാഹുൽ ഗാന്ധിക്ക് ഒരു ഗോഡ്‌സെയെ ആവശ്യമുണ്ട്’ എന്ന പരാമർശവും അദ്ദേഹത്തെ ‘മുഹമ്മദ് രാഹുൽ ഫിറോസ് ഗാന്ധി’ എന്ന് വിശേഷിപ്പിക്കുന്നതും ഉൾപ്പെട്ട പോസ്റ്റിന് ദിയ ലൈക്ക് നൽകിയിട്ടുണ്ടെന്നും വിമർശനമുണ്ട്
ഫോർട്ട് കൊച്ചിയിലെ കാശി ആർട്ട് കഫെയിൽ മഹാത്മാഗാന്ധിയുടെയും മുഹമ്മദ് അലി ജിന്നയുടെയും ചിത്രങ്ങൾ പ്രദർശിപ്പിച്ചതും ബീഫ് വിളമ്പുന്നതും ചോദ്യം ചെയ്തുകൊണ്ടുള്ള അമൃത് സിങ്ങിന്റെ വീഡിയോയ്ക്ക് താഴെ ദിയ ‘Sad reality’ എന്ന് കമന്റിട്ടതോടെയാണ് നേരത്തേ വിവാദം തുടങ്ങിയത്. ഇതിനെതിരെ വിമർശനമുയർന്നതോടെ, വീഡിയോയുടെ ആദ്യഭാഗം മാത്രമാണ് കണ്ടതെന്നും മുഴുവൻ കാര്യങ്ങളും മനസ്സിലാക്കാതെ കമന്റിട്ടത് തെറ്റായിപ്പോയെന്നും ദിയ വിശദീകരിച്ചിരുന്നു.
എന്നാൽ, അമൃത് സിങ്ങിന്റെ മറ്റ് പോസ്റ്റുകളിലെ ലൈക്കുകളുമായി ബന്ധപ്പെട്ട പുതിയ ആരോപണങ്ങളിൽ ദിയ കൃഷ്ണയുടെ പ്രതികരണം ഇതുവരെ ലഭ്യമായിട്ടില്ല. അതേസമയം, ഈ ആരോപണങ്ങൾ സംബന്ധിച്ച വിവരങ്ങൾ സ്വതന്ത്രമായി സ്ഥിരീകരിച്ചിട്ടില്ലെന്നതും ശ്രദ്ധേയമാണ്.
വീഡിയോയുടെ ആദ്യഭാഗത്ത് ജിന്നയുടെ ചിത്രം സംബന്ധിച്ച ചർച്ച മാത്രമാണുള്ളതെന്ന് കരുതിയാണ് താൻ പ്രതികരിച്ചതെന്നും, രണ്ടാം ഭാഗത്തിൽ കേരളത്തിലെ ഒരു സമൂഹത്തെക്കുറിച്ചും ബീഫ് കഴിക്കുന്നതിനെക്കുറിച്ചും നടത്തിയ പരാമർശങ്ങൾ ശ്രദ്ധിച്ചിരുന്നില്ലെന്നും അവയോട് അടിസ്ഥാനപരമായി വിയോജിക്കുന്നുവെന്നും ദിയ വിശദീകരിച്ചിരുന്നു. ജിന്നയുടെ ചിത്രം പ്രദർശിപ്പിക്കുന്നതിനെക്കുറിച്ചുള്ള തന്റെ അഭിപ്രായത്തിൽ മാറ്റമില്ലെന്നും എന്നാൽ അതിന്റെ പേരിൽ മറ്റൊരു സമൂഹത്തെ അധിക്ഷേപിക്കുന്ന ഉള്ളടക്കത്തെ പിന്തുണയ്ക്കുന്നില്ലെന്നും ദിയ കൂട്ടിച്ചേർത്തു.
മതസൗഹാർദത്തിൽ വിശ്വസിക്കുന്ന താൻ മതപരവും സാംസ്കാരികവുമായ വ്യത്യാസങ്ങളെ സമൂഹത്തെ വിഭജിക്കാനുള്ള കാരണമായി കാണുന്നില്ലെന്നും ദിയ പറഞ്ഞു. തന്റെ ഉദ്ദേശ്യം എന്തായിരുന്നാലും പ്രതികരണം മറ്റുള്ളവരെ വേദനിപ്പിച്ചിട്ടുണ്ടെന്ന കാര്യം അംഗീകരിക്കുന്നതായും അതിൽ ക്ഷമാപണം നടത്തിയതായും താരം വ്യക്തമാക്കി. വിമർശനങ്ങൾ ശക്തമായതോടെ ഇൻസ്റ്റഗ്രാമിൽനിന്ന് താത്കാലികമായി വിട്ടുനിൽക്കുകയാണെന്ന് ദിയ നേരത്തേ അറിയിച്ചിരുന്നു. എന്നാൽ, പിന്നീട് നിലപാട് പുനഃപരിശോധിച്ച താരം, സമൂഹമാധ്യമങ്ങളിൽനിന്ന് മാറിനിൽക്കുന്നതിനേക്കാൾ തെറ്റ് അംഗീകരിച്ച് അതിൽനിന്ന് പഠിക്കുകയാണ് വേണ്ടതെന്ന് വ്യക്തമാക്കി. ഇൻഫ്ലുവൻസർ എന്ന നിലയിൽ പൊതുസമൂഹത്തിൽ സ്വാധീനമുള്ള വ്യക്തിയാണ് താനെന്നും അതിനാൽ തന്റെ വാക്കുകൾക്ക് കൂടുതൽ ഉത്തരവാദിത്വമുണ്ടെന്നും ദിയ പറഞ്ഞു. ഭാവിയിൽ ഇത്തരം വിഷയങ്ങളിൽ കൂടുതൽ ശ്രദ്ധ പുലർത്തുമെന്നും താരം കൂട്ടിച്ചേർത്തു.
വിവാദത്തിനിടെ സഹോദരി അഹാന കൃഷ്ണയും പ്രതികരണവുമായി രംഗത്തെത്തി. ഒരാളുടെ അഭിപ്രായത്തിന്റെ പേരിൽ കുടുംബത്തിലെ മറ്റുള്ളവരെ മുഴുവൻ വിമർശിക്കുന്നത് ശരിയല്ലെന്നാണ് അഹാനയുടെ നിലപാട്. ഒരാളുടെ വാക്കുകളോടോ പ്രവൃത്തികളോടോ വിയോജിപ്പുണ്ടെങ്കിൽ അതേ വ്യക്തിയോടാണ് ചോദ്യം ഉന്നയിക്കേണ്ടതെന്നും മാതാപിതാക്കളുടെയോ സഹോദരങ്ങളുടെയോ നിലപാടുകൾക്ക് മറ്റുള്ളവരെ ഉത്തരവാദികളാക്കരുതെന്നും അഹാന പറഞ്ഞു. വിവാദവുമായി ബന്ധമില്ലാത്ത തന്റെ വിവാഹം പോലും ചർച്ചകളിലേക്ക് വലിച്ചിഴയ്ക്കപ്പെടുന്നതിലുള്ള അതൃപ്തിയും താരം പ്രകടിപ്പിച്ചു.
അതേസമയം, ദിയയുടെ പ്രതികരണവുമായി ബന്ധപ്പെട്ട് പൊലീസ് നോട്ടീസ് നൽകുന്ന കാര്യം അന്വേഷണസംഘം പരിഗണിക്കുന്നതായി റിപ്പോർട്ടുകളുണ്ട്. എന്നാൽ, ഇക്കാര്യത്തിൽ ഔദ്യോഗിക നടപടിയുണ്ടായതായി സ്ഥിരീകരിച്ചിട്ടില്ല. കഫേ വിവാദം രാഷ്ട്രീയ-സാമൂഹിക ചർച്ചകൾക്ക് വഴിവച്ചതിനു പിന്നാലെ, ദിയയുടെ വിശദീകരണവും അഹാനയുടെ പ്രതികരണവും സമൂഹമാധ്യമങ്ങളിൽ വീണ്ടും ചർച്ചയാകുകയാണ്.
Diya Krishna is facing renewed social media criticism over alleged likes on posts shared by influencer Amruth Singh Darren, including content referencing “love jihad” and Rahul Gandhi. The controversy follows her “Sad reality” comment on a Fort Kochi café video. Diya apologised, saying she had not watched the full video.